ທີ່ອິຣ່ານ: ພວກຝ່າຍຄ້ານອິຣ່ານໄດ້ກຽມໂຕ ທ່ີຈະທ້າທາຍຕໍ່ທາງການຂອງອິຣ່ານແລະພາກັນອອກເດີນຂະບວນໄປຕາມຖນົນຫົນທາງສາຍຕ່າງໆອີກ ໃນວັນພະຫັດມື້ນີ້ ເພື່ອປະທ້ວງຕໍ່ການເລືອກຕັ້ງປະທານາທິບໍດີມັກມຸດອະມາດີເນຈາດ ເປັນປະທານາທິບໍດີອີກສໄມນຶ່ງ ທ່ີກາຍມາເປັນບັນຫາຂັດແຍ່ງກັນນັ້ນ.
ໃນຄຳແຖລງອອກທາງ Web site ຂອງທ່ານ ທ່ານ Mir Hossein Mousavi ຜູ້ນຳຝ່າຍຄ້ານທີ່ໄດ້ຮັບການປາໄຊນັ້ນ ຮຽກຮ້ອງໃຫ້ພວກທ່ີສນັບສນຸນທ່ານ ພາກັນນຸ່ງເຄື່ອງນຸ່ງສີດຳ ແລະໄປເຕົ້າໂຮມເພື່ອເດີນຂະບວນ ຕາມຖນົນຫົນທາງສາຍຕ່າງໆ ເພື່ອໄວ້ອາໄລນຳພວກທ່ີໄດ້ ເສັຍຊີວິດໄປ ໃນຄວາມຮຸນແຮງທ່ີເກີດຂຶ້ນຫລັງຈາກການເລືອກຕັ້ງນັ້ນ. ອິຣ່ານໄດ້ຢືນຢັນວ່າ ຢ່າງນ້ອຍພວກປະທ້ວງ 7 ຄົນເສັຍຊີວິດໃນການ ປະທະກັນກັບພວກທະຫານບ້ານ ທ່ີນິຍົມຣັຖບານນັບແຕ່ວັນຈັນເປັນ ຕົ້ນມາ.
ທີ່ປາກີສຖານ: ບັນດາເຈົ້າໜ້າທ່ີສືບລັບຂອງປາກີສຖານກ່າວວ່າ ການໂຈມຕີດ້ວຍລູກສອນໄຟ ທ່ີສົງໄສວ່າເປັນຂອງສະຫະຣັດ ໄດ້ສັງຫານປະຊາຊົນຢ່າງນ້ອຍ 9 ຄົນໃນພາກຕາເວັນຕົກສຽງເໜືອຂອງປາກີສຖານ. ເຈົ້າໜ້າທີ່ ກ່າວວ່າ ລູກສອນໄຟຢ່າງນ້ອຍ 4 ລູກ ໄດ້ຕົກໃສ່ເຂດນື່ງ ໃກ້ໆກັບໝູ່ບ້ານສອງແຫ່ງ ທາງທິດຕາເວັນຕົກຂອງເມືອງ Wana ໃນເຂດ Waziristan ໃຕ້ ໃກ້ໆກັບຊາຍແດນອັຟການີສຖານ.
ມີລາຍງານຂ່າວວ່າ ເຮືອບິນບໍ່ມີຄົນຂັບທ່ີສົງໄສວ່າເປັນຂອງສະຫະຣັດຫລາຍລຳ ໄດ້ຍິງລູກສອນໄຟຢ່າງນ້ອຍ 30 ລູກ ໂຈມຕີເປົ້າໝາຍຕ່າງໆໃນປາກີສຖານ ນັບແຕ່ກາງປີແລ້ວນີ້ມາ ເຖິງແມ່ນມີການຄັດຄ້ານຢ່າງເປີດເຜີຍຈາກຣັຖບານປາກີສຖານກໍຕາມ. ເປັນທ່ີເຊື່ອກັນວ່າ ເຂດ Warizistan ໃຕ້ ທີ່ຖືກໂຈມຕີນັ້ນ ເປັນເຂດ ທີ່ໝັ້ນຂອງພວກຜູ້ນຳເຄືອຂ່າຍ al-Qaida ແລະກຸ່ມຕາລີບັນຫລາຍຄົນ.
ກ່ຽວກັບເສດຖະກິດຈີນ: ທະນາຄານໂລກໄດ້ເພີ່ມການທຳນາຍ ກ່ຽວກັບການເຕີບໂຕຂອງເສດຖະ ກິດຈີນ ໃນປີນີ້ ຂຶ້ນ ເປັນ7.2 ເປີເຊັນ ແລະກ່າວວ່າ ການເພີ່ມຂຶ້ນນີ້ສ່ວນໃຫຍ່ແມ່ນສືບເນື່ອງມາຈາກ ການຂະຫຍາຍໂຕໃນດ້ານການລົງ ທຶນ ທີ່ໄດ້ຮັບການຊຸກຍູ້ຂັບດັນ ໂດຍໂຄງການກະຕຸ້ນເສດຖະກິດຂອງ ຣັຖບານຈີນ. ແຕ່ທະນາຄານໂລກກ່າວເຕືອນໃນມື້ນີວ່າ ຍັງໄວເກີນໄປ ທ່ີຈະເວົ້າໄດ້ວ່າ ການຟື້ນໂຕຄືນແບບຍືນຍົງ ກຳລັງຈະມີຂື້ນ. ການເສດຖະກິດຂອງຈີນເຣີ່ມຮູ້ສຶກໄດ້ຮັບຜົນກະທົບ ຈາກວິກິດການດ້ານການເງິນຂອງໂລກ ໃນຕອນທ້າຍໆປີແລ້ວນີ້ ແລະໃນການເອົາມາດຕະການໂຕ້ຕອບຕໍ່ວິກິດການດັ່ງກ່າວ ທາງຣັຖບານກຸງປັກກິງໄດ້ ລົງມືດຳເນີນແຜນການຊຸກຍູ້ເສດຖະກິດ ໃນວົງເງິນ 586 ພັນລ້ານດອນລ້າ ເພື່ອປ້ອນເງິນເຂົ້າໃສ່ເສດຖະກິດໂດຍຜ່ານໂຄງການໂຍທາຕ່າງໆ. ທະນາຄານໂລກກ່າວວ່າ ການເຕີບໂຕຂຶ້ນຢ່າງຫລວງຫລາຍຂອງເສດຖະກິດຈີນໃນປີນີ້ ແມ່ນມາຈາກແຜນກະຕຸ້ນເສດຖະກິດຂອງກຸງປັກກິງເປັນສ່ວນໃຫຍ່. ກ່ອນໜ້ານີ້ ທະນາຄານໂລກທຳນາຍວ່າເສດຖະກິດຂອງຈີນຈະເຕີບໂຕຂຶ້ນ 6.5 ເປີເຊັນ ໃນປີນີ້.
ກ່ຽວກັບນີວເຄລັຍເກົາຫລີເໜືອ: ໜັງສືພິມຍີ່ປຸ່ນສະບັບນຶ່ງລາຍງານວ່າ ເກົາຫລີເໜືອກຳລັງກະກຽມຍິງ ລູກສອນໄຟຂີປະນາວຸດລູກນຶ່ງ ໄປຍັງທິດທາງຂອງເກາະຮາວາຍຂອງສະຫະຣັດ ໃນມະຫາສມຸດປາຊີຟິກໃນຕົ້ນເດືອນກໍລະກົດໜ້ານີ້. ໜັງສືພິມ Yomiuri ກ່າວວ່າ ກະຊວງປ້ອງກັນປະເທດຍີ່ປຸ່ນເຊື່ອວ່າ ເກົາຫລີເໜືອໄດ້ຈັດສົ່ງລູກສອນໄຟເຕໂປດົງ 2 ລູກນື່ງ ຫລືບໍ່ກໍລູກສອນໄຟລຸ່ນດຽວກັນທ່ີຖືກປັບປຸງໃຫ້ດີຂຶ້ນ ໄປຍັງສະຖານທີຍິງລູກສອນໄຟ Tongchang-ri ໃນພາກຕາເວັນຕົກສຽງເໜືອຂອງປະເທດ ຈາກໂຮງງານແຫ່ງນຶ່ງໃກ້ໆກັບນະຄອນຫລວງພຽງຢ້າງ ໃນວັນທີ 30 ພຶດ ສະພາຜ່ານມານີ້. ແຕ່ທາງກະຊວງປ້ອງກັນປະເທດຍີ່ປຸ່ນບໍ່ເຊື່ອວ່າ ລູກສອນໄຟລູກນີ້ ຈະຍິງໄປເຖິງ ໝູ່ເກາະຮາວາຍ.
ປາຂ່າຢູ່ແມ່ນ້ຳຂອງທີ່ລາວແລະກຳປູເຈັຍໃກ້ຈະສູນພັນ: ກຸ່ມສງວນສັດປ່າລະຫວ່າງຊາດກ່າວກຸ່ມນື່ງວ່າ ຄວາມເປິະເປື້ອນໃນລຳແມ່ນ້ຳຂອງໃນຂົງເຂດເອເຊັຍຕາເວັນອອກສຽງໃຕ້ ໄດ້ເຮັດໃຫ້ພວກປ່າຂ່ານ້ຳຈືດ ໃນກຳປູເຈັຍແລະລາວ ໃກ້ຈະສູນພັນໄປ. ໃນລາຍງານສະບັບນຶ່ງທີ່ຫາກໍເປີດເຜີຍອອກມາໃໝ່ໆ ກອງທືນສງວນ ສັດປ່າຂອງໂລກ ຫລື WWF ກ່າວວ່າ ຍັງເຫລືອປາຂ່າພຽງແຕ່ 64 ຫາ 76 ໂຕໃນລຳແມ່ນ້ຳຂອງນັ້ນ. ລາຍງານເວົ້າວ່າ ລະດັບຢາຂ້າແມງໄມ້ ທາດ mercury ແລະສິ່ງເປິະເປື້ອນເປັນພິດອື່ນໆໄດ້ຖືກພົບເຫັນໃນປ່າຂ່ານ້ອຍ ຈຳນວນຫລາຍກວ່າ 50ໂຕ ທ່ີໄດ້ເສັຍຊີວິດໄປຕັ້ງແຕ່ປີ 2003 ເປັນຕົ້ນມາ. ທ່ານ Verne Dove ໝໍຜ່າຕັດສັດປະຈຳກອງທຶນສງວນສັດປ່າຂອງໂລກ ກ່າວວ່າ ໄດ້ມີການພົບເຫັນສິ່ງເປິະເປື້ອນເປັນພິດຢ່າງແຜ່ຫລາຍໃນສິ່ງແວດລ້ອມ ເລາະຕາມແຄມແມ່ນ້ຳຂອງ ແລະຫລາຍປະເທດທ່ີແມ່ນ້ຳຂອງໄຫລຜ່ານນັ້ນ ອາດໄດ້ມີສ່ວນເຮັດໃຫ້ເກີດບັນຫານີ້. ກອງທຶນສງວນສັດປ່າຂອງໂລກ ກ່າວຕ່ືມວ່າ ເວລານີ້ແມ່ນມີຄວາມຕ້ອງການໂຄງການພິເສດຢ່າງຮີບດ່ວນ ເພື່ອຊ່ອຍຕ້ານຢັນຜົນກະທົບຂອງສິ່ງເປິເປື້ອນເປັນພິດຕໍ່ລະບົບຕ້ານທານຂອງພວກປາຂ່າເຫລົ່ານີ້ ທີ່ອາໄສຢູ່ໃນລຳແມ່ນ້ຳຂອງ ໃນຊ່ວງຍາວ 190 ຫລັກກິໂລແມັດ ທີ່ໄຫລຜ່ານພາກ ໃຕ້ຂອງລາວໃນເຂດສີ່ພັນດອນ ແລະພາກເໜືອຂອງ ກຳປູເຈັຍນັ້ນ. ກຸ່ມປກປ້ອງສັດປ່າດັ່ງກ່າວເວົ້າຕື່ມວ່າ ພວກປ່າຂ່າທ່ີຫາຍາກນີ້ ໄດ້ຖືກຈັດເຂົ້າໃນບັນຊີພວກສັດທ່ີຈະສູນພັນໄປຢ່າງຮ້າຍແຮງ ຕັ້ງແຕ່ປີ 2004 ເປັນຕົ້ນມາ.
