ສະຖານະການໃນອິຣ່ານ: ບັນດາຜູ້ສນັບສນຸນທ່ານ Mir Hossein Mousavi ຜູ້ສມັກເລືອກຕັ້ງ ປະທານາທິບໍດີ ທ່ີຖືກປະກາດວ່າປາໄຊນັ້ນ ວາງແຜນໂຮມຊຸມນຸມກັນອີກໃນວັນພຸດມື້ນີ້ ຫລັງຈາກການເລືອກຕັ້ງປະທານາທິບໍດີ ທ່ີມີບັນຫາຂັດແຍ່ງກັນໃນວັນສຸກແລ້ວນີ້. ຂະບວນການຫົວປະຕິຮູບໄດ້ຂໍອະນຸຍາດຈາກກະຊວງພາຍໃນເພື່ອທຳການໂຮມຊຸມນຸມກັນ ແຕ່ມາຮອດປັດຈຸບັນນີ້ ທາງການອິຣ່ານກໍຍັງຫ້າມການໂຮມ ຊຸມນຸມ ນັ້ນຢູ່. ທ່ານມຸດສາວີ ໄດ້ອອກຖແລງການສະບັບນຶ່ງໃນວັນພຸດມື້ນີ້ ຮຽກຮ້ອງ ໃຫ້ພວກສນັບສນຸນທ່ານ ທຳການເດີນຂະບວນປະທ້ວງຢ່າງສັນຕິ ຫລືບໍ່ກໍ ໃຫ້ພາກັນໄປຊຸມນຸມກັນຢູ່ໃນໂບດແຫ່ງຕ່າງໆໃນວັນພະຫັດມື້ອື່ນ ເພື່ອໃຫ້ກຽດແກ່ພວກທ່ີເສັຍຊີວິດໄປໃນເຫດການຮຸນແຮງທ່ີເກີດຂຶ້ນຫລັງຈາກການເລືອກຕັ້ງນັ້ນ.
ໃນຂ່າວອື່ນໆທ່ີພົວພັນກັນ ໂທຣະພາບຂ່າວອິຣ່ານລາຍງານໃນວັນພຸດມື້ນີ້ວ່າ ກະຊວງສືບຂ່າວລັບຂອງປະເທດໄດ້ແຈ້ງໂດຍສັງເຂບໃຫ້ສະພາຊາບກ່ຽວກັບຄວາມວຸ້ນວາຍທ່ີເກີດຂຶ້ນຫລັງຈາກການເລືອກຕັ້ງ ແລະບອກວ່າ ໄດ້ມີຄົນເສັຍຊີວິດໄປ 8 ຄົນ.
ກ່ຽວກັບນີວເຄລັຍຂອງເກົາຫລີເໜືອ: ລາຍງານຂ່າວຍີ່ປຸ່ນແລະເກົາຫລີໃຕ້ເວົ້າວ່າ ປາກົດວ່າເກົາຫລີເໜືອ ກຳລັງກະກຽມສະຖານທ່ີໄວ້ 2 ບ່ອນ ຊຶ່ງອາດຈະເປັນບ່ອນທ່ີຈະທຳການທົດລອງຍິງລູກສອນໄຟຂີປະນາວຸດ ກໍໄດ້.ໜັງສືພິມ Chosun Ilbo ຂອງເກົາຫລີໃຕ້ອ້າງຄຳເວົ້າຂອງເຈົ້າໜ້າທ່ີ ຣັຖບານທ່ານນຶ່ງທ່ີບໍ່ໄດ້ແຈ້ງຊື່ໃຫ້ຊາບ ທີ່ກ່າວວ່າ ໄດ້ມີການເຫັນລົດໄຟພິເສດຂະບວນນຶ່ງ ທ່ີໃຊ້ບັນທຸກລູກສອນໄຟທ່ີຍິງໄດ້ໃນລະຍະໄກ ກຳລັງແລ່ນໄປ. ລາຍງານເວົ້າວ່າ ມີການເຫັນລົດໄຟຂບວນນີ້ເຄື່ອນຍ້າຍອອກຈາກ ສະຖານທ່ີຍິງລູກສອນໄຟແຫ່ງນຶ່ງໃນຝັ່ງຕາເວັນຕົກສຽງເໜືອ ຂອງເກົາ ຫລີເໜືອໄປຍັງຝັ່ງທະເລຕາເວັນອອກສຽງເໜືອຂອງປະເທດ.
ມີລາຍງານຂ່າວໃນທຳນອງດຽວກັນນີ້ ຈາກໜັງສືພິມ Sankei ຂອງ ຍີ່ປຸ່ນ. ແຕ່ບັນດາເຈົ້າໜ້າທ່ີຝ່າຍສືບລັບແລະປ້ອງກັນປະເທດຂອງເກົາ ຫລີໃຕ້ກ່າວວ່າ ພວກເຂົາເຈົ້າບໍ່ສາມາດຢືນຢັນລາຍງານຂ່າວເຫລົ່ານີ້ໄດ້.
ທີ່ມຽນມ້າ: ພວກທະນາຍຄວາມຂອງທ່ານນາງອອງຊານຊູຈີ ຜູ້ນຳຝ່າຍຄ້ານໃນມຽນມ້າ ທ່ີຖືກຂັງຄຸກຢູ່ນັ້ນ ໄດ້ຮຽກຮ້ອງຕໍ່ສານເປັນຄັ້ງສຸດທ້າຍໃນວັນ ພຸດມື້ນີ້ ເພື່ອນຳເອົາພະຍານມາໃຫ້ການຕື່ມອີກ 2 ຄົນໃນການດຳເນີນຄະດີທ່ານນາງ ທ່ີມີການຊັກຊ້າມານັ້ນ. ທ່ານ Kyi Win ຫົວໜ້າກຸ່ມທະນາຍຄວາມ ສຳລັບທ່ານນາງອອງຊານຊູຈີ ທ່ີໄດ້ຮັບລາງວັນໂນແບນ ຂະແໜງສັນຕິພາບ ກ່າວຕໍ່ບັນດານັກຂ່າວວ່າ ບໍ່ຄາດວ່າມີການຕັດສິນໃຈຂອງສານກ່ຽວກັບເຣື່ອງນີ້ ຈົນກວ່າຈະຮອດແລງວັນພຸດ ມື້ນີ້ ຕາມເວລາໃນທ້ອງຖິ່ນ.
ທ່ານ Kyi win ກ່າວວ່າ ທ່ານມີຄວາມຮູ້ສຶກໃນແງ່ດີ ວ່າສານຈະຮັບ ເອົາຄຳຂໍຮ້ອງກ່ຽວກັບພວກພະຍານສອງຄົນນີ້.
ທີ່ອິນໂດເນເຊັຍ: ສານແຫ່ງນຶ່ງໃນອິນໂດເນເຊັຍໄດ້ຕັດສິນໂທດຍາດພີ່ນ້ອງຄົນນຶ່ງຂອງ ປະທານາທິບໍດີ ໂຊຊິໂລບັມບັງຢຸດໂທໂຢໂນະ ແຫ່ງອິນໂດເນເຊັຍໃຫ້ ຈຳຄຸກເປັນເວລາ 4 ປີເຄິ່ງ ໃນຂໍ້ຫາສໍ້ໂກງເງິນຈຳນວນຫລາຍລ້ານ ດອນລ້າຈາກທະນາຄານກາງຂອງປະເທດ. ສານປາບການສໍ້ຣາດບັງ ຫລວງອິນໂດເນເຊັຍ ໄດ້ຕັດສິນລົງໂທດດັ່ງກ່າວໃນວັນພຸດມື້ນີ້ຕໍ່ທ່ານ Aulia Pohan ຮອງຜູ້ວ່າການທະນາຄານແຫ່ງອິນໂດເນເຊັຍ ແລະ ອະດີດເຈົ້າໜ້າທ່ີທະນາຄານອື່ນໆອີກ 3 ຄົນ. ທ່ານ Pohan ເປັນພໍ່ເຖົ້າຂອງລູກຊາຍກົກ ຂອງປະທານາທິບໍດີຢຸດໂທໂຢໂນະ. ສານກ່າວວ່າ ທ່ານ Pohanແລະພວກອະດີດເຈົ້າໜ້າທ່ີທະນາຄານ 3 ຄົນນີ້ ໃຊ້ເງິນໄປໃນທາງບໍ່ຖືກຕ້ອງຊອບທັມ ຈຳນວນເກືອບ 10ລ້ານ ດອນລາເພື່ອໃຫ້ສິນບົນແກ່ພວກສະມາຊິກສະພານິຕິບັນຍັດ ແລະຈ່າຍເງິນໃຫ້ທະນາຍຄວາມ ເປັນຄ່າວ່າຄວາມແກ້ຄະດີໃຫ້ພວກເຈົ້າໜ້າທ່ີທະນາຄານຄົນອື່ນໆອີກ ຖືກກ່າວຫາວ່າ ຍັກຍອກເອົາເງິນຣັຖບານໄປໃນລະຫວ່າງເກີດວິກິດການການເງິນໃນເອເຊັຍ ລະຫວ່າງປີ 1997-98 ນັ້ນ.
ທີ່ຣັດເຊັຍ: ທ່ານຫູຈິນເຖົາ ປະທານປະເທດຈີນກ່າວວ່າ ຄວາມສັມພັນກັບຣັດເຊັຍ ເປັນບູຣິມະສິດດ້ານນະໂຍບາຍຕ່າງປະເທດອັນນຶ່ງສຳລັບປະເທດຂອງທ່ານ. ທ່ານຫູຈິນເຖົາໄດ້ກ່າວຕໍ່ທ່ານ Vladimir Putin ນາຍົກຣັຖ ມຸນຕີຣັດເຊັຍ ໃນວັນພຸດມື້ນີ້ວ່າ ການຍົກສູງການຮ່ວມມືລະວຫ່າງຣັດເຊັຍແລະຈີນ ແມ່ນມີຄວາມສຳຄັນເປັນພິເສດໃນລະຫວ່າງທີ່ເກີດວິກິດ ການດ້ານເສດຖະກິດຂອງໂລກຢູ່ນີ້. ຜູ້ນຳຈີນໄດ້ທຳການໂອ້ລົມສົນທະນາກັນທ່ານພູຕິນ ຢູ່ທ່ີກຸງມອສກູ ຫລັງຈາກເຂົ້າຮ່ວມໃນສອງກອງປະຊຸມສຸດຍອດລະຫວ່າງຊາດທີ່ເມືອງ Yekaterinburg ໃນເຂດພູເຂົາ Ural ຂອງຣັດເຊັຍໃນວັນອັງຄານ ວານນີ້. ໃນລະຫວ່າງກອງປະຊຸມສຸດຍອດຂອງກຸ່ມ BRIC ນັ້ນ ພວກຜູ້ນຳຈາກປະເທດເບຣຊີນ ຣັດເຊັຍ ອິນເດັຍແລະຈີນໄດ້ຮຽກຮ້ອງ ໃຫ້ພວກຕົນມີບົດບາດຫລາຍຂຶ້ນໃນລະບົບການເງິນຂອງໂລກ ແລະໃຫ້ມີລະບົບການເງິນລະຫວ່າງຊາດ ທ່ີທຸ່ນທ່ຽງແລະມີຄວາມຫລາກຫລາຍ ຫລາຍຂຶ້ນ.
ກອງປະຊຸມດ່ັງກ່າວນີ້ ມີຂຶ້ນຫລັງຈາກກອງປະຊຸມວ່າດ້ວຍຄວາມຮ່ວມມືຊຽງໄຮ້ ຊຶ່ງເປັນກຸ່ມທ່ີປະກອບດ້ວຍຣັດເຊັຍ ຈີນ ແລະ4 ປະເທດໃນເອເຊັຍກາງ ທ່ີເຄີຍເປັນແຄວ້ນເກົ່າ ໃນອະດີດສະຫະພາບໂຊວຽດນັ້ນ.
ວັນເສົາ, ໒໑ ກັນຍາ ໒໐໒໔
