ການເມືອງອິຣ່ານ: ສື່ມວນຊົນທາງການຂອງອິຣ່ານລາຍງານວ່າ ສະພາພິທັກອິຣ່ານຕຽມ ພ້ອມທ່ີຈະທຳການນັບບັດຄະແນນສຽງຄືນໃໝ່ໃນຫີບບັດ ທ່ີເປັນບັນຫາ ຂັດແຍ້ງກັນ ຈາກການເລືອກຕັ້ງປະທານາທິບໍດີໃນວັນສຸກຜ່ານມານີ້. ຂ່າວທີ່ວ່າຈະມີການນັບບັດຄະແນນສຽງຄືນໃໝ່ເປັນບາງສ່ວນໃນວັນອັງຄານມື້ນີ້ ມີຂຶ້ນຫລັງຈາກມີການເດີນຂະທ້ວງ ຊຶ່ງບາງຄັ້ງດຳເນີນໄປຢ່າງຮຸນແຮງມາເປັນເວລາ 3 ມື້ ທ່ີກຸງເຕ່ຣ່ານ ໂດຍພວກປະທ້ວງທີ່ ພາກັນປະນາມອັນທ່ີເຂົາເຈົ້າກ່າວວ່າ ໄຊຊະນະໃນການເລືອກຕັ້ງທ່ີສໍ້ໂກງຂອງປະທານາທິບໍດີ ມັກມຸດ ອະມາດີເນຈາດນັ້ນ. ທ່ານ ອາຢາໂຕລາ ອາລີ ຄາເມນີ ຜູ່ນຳສູງສຸດຂອງອິຣ່ານ ໄດ້ຮ້ອງຂໍໃຫ້ສະພາພິທັກຂອງອິຣ່ານ ທີ່ປະກອບນັກບວດອີສລາມທ່ີມີອຳນາດ ໃຫ້ທຳການສືບສວນການກ່າວຫາຕ່າງໆທ່ີວ່າມີການສໍ້ໂກງບັດເລືອກຕັ້ງນັ້ນ. ແຕ່ທ່ານ Mir Hossein Mousavi ຜູ້ສມັກແຂ່ງຂັນປະທານາທິບໍດີທ່ີໄດ້ຮັບການປາໄຊໄປນັ້ນ ໄດ້ກ່າວຄຳຮຽກຮ້ອງທີ່ໜັກໄປກວ່ານັ້ນອີກ ຄືຮຽກຮ້ອງໃຫ້ສະພາດັ່ງກ່າວລົບລ້າງການເລືອກຕັ້ງຄັ້ງນີ້ ແຕ່ປະທານາທິບໍດີອະມາດີເນຈາດ ທີ່ທາງການອິຣ່ານປະກາດໃຫ້ເປັນຜູ້ຊນະນັ້ນ ກ່າວວ່າ ການເລືອກຕັ້ງໄດ້ດຳເນີນໄປຢ່າງເສຣີແລະຍຸຕິທັມ.
ປະຕິກິລິຍາຂອງໂລກ ກ່ຽວກັບການເລືອກຕັ້ງທີ່ອິຣ່ານ:
ປະທານາທິບໍດີບາຣັກໂອບາມາແຫ່ງສະຫະຣັດກ່າວວ່າ ທ່ານມີຄວາມເປັນຫ່ວງກ່ຽວກັບສະຖານະການໃນອິຣ່ານ ໂດຍສະເພາະຫລັງຈາກພວກມືປືນຈຸນຶ່ງ ໄດ້ສັງຫານຜູ້ປະທ້ວງຄົນນຶ່ງໃນການໂຮມຊຸມນຸມຕໍ່ຕ້ານ ຣັຖບານໃນກຸງເຕ່ຣ່ານໃນວັນຈັນວານນີ້. ໃນການປາໄສຕໍ່ບັນດານັກຂ່າວທ່ີທຳນຽບຂາວໃນວັນຈັນວານນີ້ ທ່ານ ໂອບາມາກ່າວວ່າ ມັນຈະເປັນຄວາມຜິດພາດ ຖ້າພວກເຮົາຫາກມິດງຽບຢູ່ ກ່ຽວກັບຄວາມຮຸນແຮງທ່ີເກີດຂຶ້ນລຸນຫລັງການເລືອກຕັ້ງ ແລະການກ່າວຫາຕ່າງໆ ກ່ຽວກັບຄວາມບໍ່ເປັນລະບຽບແລະການກະທຳທີ່ບໍ່ຖືກຕ້ອງ ໃນການເລືອກຕັ້ງປະທານາທິບໍດີຂອງອິຣ່ານໃນວັນສຸກຜ່ານມານັ້ນ. ທ່ານໂອບາມາຍັງໄດ້ກ່າວເຊັ່ນກັນວ່າ ມັນຂຶ້ນຢູ່ກັບອິຣ່ານເອງທ່ີຈະເລືອກເອົາພວກຜູ້ນຳຂອງຕົນ ແລະວ່າການດຳເນີນການສືບສວນ ໃດໆກໍຕາມ ກ່ຽວກັບຜົນຂອງການເລືອກຕັ້ງ ຈະຕ້ອງບໍ່ເສັດສິ້ນລົງດ້ວຍການນອງເລືອດ.
ກອງປະຊຸມສຸດຍອດກຸ່ມຮ່ວມມືຊຽງໄຮ້ທີ່ມອສກູ:ທ່ານອະມາດີເນຈາດເດີນທາງໄປຮອດເມືອງ Yekaterinburg ໃນ ເຂດພູເຂົາ Ural ໃນວັນອັງຄານມື້ນີ້ ອັນເປັນມື້ສຸດທ້າຍຂອງກອງປະຊຸມສຸດຍອດຂອງອົງການຮ່ວມມືຊຽງໄຮ້ ຫລື SCO ຊຶ່ງເປັນກຸ່ມ ຈັດຕັ້ງທີ່ປະກອບດ້ວຍຣັດເຊັຍ ຈີນແລະ 4 ປະເທດໃນເຂດເອເຊັຍ ກາງ ທີ່ເຄີຍເປັນແຄ້ວນເກົ່າຂອງອະດີດສະຫະພາບໂຊວຽດ. ຄາດວ່າ ທ່ານອາມາດີເນຈາດ ຈະທຳການພົບປະກັບປະທານາທິບໍດີ Dmitri Medvedev ແຫ່ງຣັດເຊັຍ ນອກກອງປະຊຸມສຸດຄັ້ງນີ້.
ອິຣ່ານ ອິນເດັຍ ປາກິສຖານ ແລະມົງໂກເລັຍ ໄປຮ່ວມກອງປະຊຸມ ສຸດຍອດ SCO ຄັ້ງນີ້ ໃນຖານະຜູ້ສັງເກດການເທົ່ານັ້ນ. ປະທານາທິ ບໍດີອັຟການິສະຖານ ທ່ານ Hamid Karzai ກໍໄດ້ຖືກເຊີນໃຫ້ໄປຮ່ວມ ກອງປະຊຸມຄັ້ງນີ້ນຳ.
ກ່ຽວກັບເຣື່ອງນີວເຄລັຍຂອງເກົາຫລີເໜືອ:ທ່ານຫລີມິອອງພັກ ປະທານາທິບໍດີເກົາຫລີໃຕ້ ຈະທຳການພົບປະຫາລືກັບປະທານາທິບໍດີບາຣັກໂອບາມາ ແຫ່ງສະຫະຣັດ ທ່ີກຸງວໍຊິງຕັນໃນວັນອັງຄານມື້ນີ້ ຊື່ງຄາດກັນວ່າ ການຂົ່ມຂູ່ດ້ານນີວເຄລັຍຂອງເກົາຫລີເໜືອ ຈະຄອບງຳການໂອ້ລົມສົນທະນາຂອງພວກທ່ານທັງສອງ. ທ່ານຫລີມິອອງພັກ ໄດ້ພົບປະກັບທ່ານນາງຮີລລາຣີ ຄລິນຕັນ ຣັຖມຸນ ຕີການຕ່າງປະເທດສະຫະຣັດໃນແລງວັນຈັນວານນີ້ ແລະໄດ້ສົນທະນາກັນ ກ່ຽວກັບສະຖານະການຂອງເກົາຫລີເໜືອ. ໂຄສົກປະຈຳປະທານາ ທິບໍດີເກົາຫລີໃຕ້ ບອກກັບອົງການຂ່າວ Yonhap ວ່າ ທ່ານນາງຄລິນ ຕັນໄດ້ກ່າວວ່າ ເກົາຫລີເໜືອຈະຕ້ອງເຂົ້າໃຈວ່າ ພຶດຕິກຳທ່ີບໍ່ດີ ມັກຈະສົ່ງຜົນສະທ້ອນທ່ີບໍ່ດີ ຕິດຕາມພາຍຫລັງເລື້ອຍໆ.
ຍີ່ປຸ່ນແລະເກົາຫລີເໜືອ: ຍີ່ປຸ່ນຫ້າມສົ່ງອອກສິນຄ້າທຸກຢ່າງໄປໃຫ້ເກົາຫລີເໜືອ ເພື່ອເປັນການຕອບໂຕ້ຕໍ່ການທົດລອງຍິງອາວຸດນີວເຄລັຍແລະລູກສອນໄຟເທື່ອຫລ້າສຸດຂອງກຸງພຽງຢ້າງ. ຄນະຣັຖບານຂອງນາ ຍົກຣັຖມຸນຕີຕາໂຣອາໂຊະ ໄດ້ອະນຸມັດໃຫ້ເອົາມາດຕະການໂຕ້ຕອບດັ່ງກ່າວໃນວັນອັງຄານມື້ນີ້ ຫລັງຈາກສະພາຄວາມໝັ້ນຄົງອົງການສະຫະປະຊາຊາດ ປະກາດ ການລົງໂທດຄັ້ງໃໝ່ຕໍ່ຣັຖບານກຸງພຽງຢ້າງ ໃນສັບປະດາຜ່ານມາ. ກ່ອນໜ້ານີ້ ຍີ່ປຸ່ນກໍໄດ້ຫ້າມສົ່ງສິນຄ້າບາງຢ່າງແກ່ເກົາຫລີເໜືອມາແລ້ວ ຊື່ງສ່ວນໃຫຍ່ແມ່ນພວກສິນຄ້າຣາຄາແພງ ເຊັ່ນພວກໄຂ່ປາ caviar ເປັນຕົ້ນ. ການຕັດສິນໃຈຂອງຍີ່ປຸ່ນໃນວັນອັງຄານມື້ນີ້ ໄດ້ຂຍາຍການຫ້າມສົ່ງ ອອກສິນຄ້າປະເພດອື່ນໆອີກ ເຊັ່ນ ສິນຄ້າປະເພດເຄື່ອງຈັກ ເຄ່ືອງ ອຸດສາຫະກັມ ແລະອຸປະກອນຂົ່ນສົ່ງ. ການສົ່ງອອກຂອງຍີ່ປຸ່ນໄປຍັງເກົາຫລີເໜືອ ຕົກເປັນມູນຄ່າ 8 ລ້ານດອນລ້າປາຍເລັກນ້ອຍ ໃນປີແລ້ວນີ້.
