<!-- IMAGE -->
ຊາວອາເມລິກັນສະເຫລີມສະຫລອງວັນເກີດປະເທດຂອງເຂົາເຈົ້າໃນວັນທີ່ 4 ກໍລະກົດ ຫລື ຈູລາຍ ຟໍທ໌ ດ້ວຍການຈູດບັ້ງໄຟດອກແລະເດີນສວນສະນາມຕ່າງໆເປັນຕົ້ນ ພ້ອມທັງຊຸມເຂົ້າປິກນິກ ແລະປິ້ງບາບີຄິວ ສັງສັນກັນລະວ່າງເພື່ອນມິດແລະຄອບຄົວ. ສຳຫລັບປີນີ້ ສະຖານທູດສະຫະຣັຖໃນທົ່ວໂລກມີໂອກາດທີ່ຈະເຊື້ອເຊີນແຂກໜ້າໃໝ່ມາຮ່ວມງານສະເຫລີມສະຫລອງນຳ ຊື່ງກໍຄື ພວກນັກການທູດອີຣ່ານ.
ໃນການຫັນເຫອອກຈາກນະໂຍບາຍທີ່ໄດ້ດຳເນີນມາກ່ອນນັ້ນ ກະຊວງຕ່າງປະເທດສະຫະຣັຖ ໄດ້ອະນຸຍາດໃຫ້ສະຖານທູດຂອງຕົນໃນທົ່ວໂລກ ເຊື້ອເຊີນບັນດາເຈົ້າໜ້າທີ່ຂອງຣັຖບານອີຣ່ານ ມາຮ່ວມໃນງານ ສະເຫລີມສະຫລອງບຸນວັນເອກກະລາດ ຄືວັນທີ່ສີ່ ກໍລະກົດນັ້ນ. ສະຫະຣັຖໄດ້ຕັດສາຍສຳພັນທາງການທູດຢ່າງເປັນທາງການ ກັບອີຣ່ານ ຫລັງຈາກພວກນັກສຶກສາຊາວອີຣ່ານໄດ້ບຸກເຂົ້າຍຶດສະຖານທູດສະຫະຣັຖ ໃນນະຄອນຫລວງເຕຫະ ຣ່ານໃນປີ 1979 ແລະຈັບພະນັກງານການທູດສະຫະຣັຖໄວ້ເປັນຕົວປະກັນເປັນເວລາດົນນານເຖິງສີ່ຮ້ອຍກວ່າວັນ.
ການຍື່ນມືໄປຫາອີຣ່ານໃນຄັ້ງໃໝ່ນີ້ ມີຂື້ນໃນຂນະທີ່ສະຫະຣັຖກຳລັງພະຍາຍາມທີ່ຈະພົວພັນກັບຣັຖບານອີຣ່ານໂດຍກົງ ກ່ຽວກັບບັນຫາສຳຄັນຫລາຍປະການ ຊຶ່ງໂຮມທັງບັນຫາໂຄງການນີວເຄລຍຂອງອີຣ່ານ. ທ່ານໂຣເບີດ ວູດ ຮອງໂຄສົກກະຊວງຕ່າງປະເທດສະຫະຣັຖ ກ່າວວ່າການເຊື້ອເຊີນພວກນັກການທູດອີຣ່ານມາຮ່ວມໃນງານສະເຫລີມ ສະຫລອງວັນເອກກະລາດຂອງສະຫະຣັຖນັ້ນ ແມ່ນເປັນພາກສ່ວນນື່ງຂອງຄວາມພະຍາຍາມຂອງສະຫະຣັຖ ເພື່ອໃຫ້ມີການຕິດຕໍ່ພົວພັນກັນໂດຍກົງກັບອີຣ່ານ ຊຶ່ງທ່ານວູດກ່າວວ່າ:
“ນະໂຍບາຍຂອງພວກເຮົາ ແມ່ນພະຍາຍາມຍື່ນມືໄປພົວພັນກັບຣັຖ ບານອິຣ່ານ ແລະປະຊາຊົນຂອງອິຣ່ານ. ປະທານາທິບໍດີບາຣັກໂອບາມາ ແລະທ່ານນາງ Hillary Clinton ຣັຖມຸນຕີການຕ່າງປະເທດສະຫະຣັດ ໄດ້ເວົ້າອອກມາຢ່າງຈະແຈ້ງທີ່ສຸດແລ້ວວ່າ ອັນນັ້ນແມ່ນສິ່ງທີ່ພວກເຮົາຕ້ອງການຢາກເຮັດ ແລະແນ່ນອນພວກທ່ານກໍຮູ້ດີວ່າຈະມີໂອກາດອື່ນໆອີກ ສຳລັບຕິດຕໍ່ພົວພັນກັບອິຣ່ານນັ້ນ ແຕ່ເວລານີ້ພວກເຮົາກໍກຳລັງລໍຖ້າການສນອງຕອບກັບຄືນມາຈາກອິຣ່ານຢູ່.”
ທ່ານໂຣເບີດ ວູດ ຮອງໂຄສົກກະຊວງຕ່າງປະເທດສະຫະຣັຖກ່າວວ່າ ໂດຍສະເພາະແລ້ວ ສະຫະຣັຖແມ່ນມີຄວາມສົນໃຈເປັນພິເສດ ທີ່ຈະ ໄດ້ຍິນການຕອບຮັບໃນທາງບວກຂອງອີຣ່ານ ຕໍ່ຄຳສະເນີໃຫ້ສະຫະຣັຖໄດ້ເຂົ້າປະກອບ ສ່ວນໂດຍເຕັມ ໃນການເຈລະຈາຂອງກຸ່ມ P5 Plus One ຫລືກຸ່ມພີຫ້າ ບວກນື່ງ ກັບອີຣ່ານກ່ຽວກັບໂຄງການນີວເຄລຍຂອງອີຣ່ານນັ້ນ. ກຸ່ມພີຫ້າ ບວກນື່ງແມ່ນໝາຍເຖິງສະມາຊິກຖາວອນຫ້າປະເທດຂອງສະພາຄວາມໝັ້ນຄົງອົງການສະຫະປະຊາຊາດ ຄື ອັງກິດ ຈີນ ຝລັ່ງ ຣັສເຊຍ ແລະ ສະຫະຣັຖ ບວກກັບອີກປະເທດນຶ່ງ ຄື ເຢຍລະມັນ.
ທ່ານ ວູດ ກ່າວວ່າ “ການເຊື້ອເຊີນພວກນັກການທູດອີຣ່ານໃຫ້ມາຮ່ວມໃນການສະເຫລີມສະຫລອງວັນເອກກະລາດຂອງສະຫະຣັຖນັ້ນ ແມ່ນເປັນອີກຮ່ອງຮອຍນື່ງທີ່ສະແດງໃຫ້ເຫັນວ່າ ສະຫະຣັຖກຳລັງກ້າວໄປສູ່ທິດທາງໃໝ່ ກ່ຽວກັບອີຣ່ານ ຊຶ່ງທ່ານວູດ ກ່າວຊີ້ແຈງວ່າ ພວກເຮົາຕ້ອງການຢາກພົວພັນກັບຊາວອີຣ່ານ ແລະຣັຖບານຂອງເຂົາເຈົ້າ ຜ່ານພວກເຂົາເຈົ້າ ແລະນັ້ນກໍເປັນພຽງວິທີນຶ່ງໃນຫລາຍໆວິທີທີ່ພວກເຮົາສາມາດກະທຳໄດ້.
