ລິ້ງ ສຳຫລັບເຂົ້າຫາ

ເກົາຫລີເໜືອຕັດສິນໂທດນັກຂ່າວອະເມຣິກັນ2ຄົນຈຳຄຸກ12ປີ


ເກົາຫລີເໜືອຕັດສິນລົງໂທດນັກຂ່າວອະເມຣິກັນ: ອົງການ​ຂ່າວສານ​ຂອງທາງ​ການ​ເກົາຫລີ​ເໜືອ​ກ່າວ​ວ່າ ສານ​ແຫ່ງ​ນຶ່ງ​ໄດ້​ຕັດສິນ​ລົງ​ໂທດ​ນັກ​ຂ່າວ​ແມ່ຍິງ​ອະ​ເມຣິກັນ 2 ຄົນ​ ໃຫ້​ຈຳ​ຄຸກອອກ​ແຮງ​ງານ​ສັບພະ​ທຸກ​ເປັນ​ເວລາ12 ປີ. ສຳນັກງານຂ່າວກາງຂອງເກົາຫລີ​ເໜືອ ລາຍ​ງານ​ຂ່າວໃນ​ວັນ​ຈັນ​ມື້​ນີ້​ວ່າ ສານ​ຕັດສິນ​ວ່າ​ແມ່ຍິງ​ສອງ​ຄົນ​ນີ້​ມີ​ຄວາມ​ຜິດ​ ໃນ​ຂໍ້​ກ່າວ​ຫາ​ຖານ​ກໍ່ອາຊຍາ​ກັມ​ທ່ີ​ຮ້າຍ​ແຮງ​ ແຕ່​ບໍ່​ບອກ​ໃຫ້​ຮູ້​ຢ່າງ​ເຈາະ​ຈົງ ​ແລະ​ຂ້າມ​ຊາຍ​ແດນ​ເຂົ້າ​ໄປ​ໃນ​ເກົາຫລີ​ເໜືອ​ຢ່າງ​ຜິດ ກົດໝາຍ. ​ສື່​ມວນ​ຊົນ​ຂອງ​ທາງ​ການເກົາຫລີ​ເໜືອ ປະກາດ​ໃຫ້​ຮູ້ໃນ​ວັນ​ພະຫັດ​ແລ້ວ​ນີ້ ຂ່າວການ​ເຣີມຕົ້ນ​ດຳ​ເນີນ​ຄະດີ​ນາງ Euna Lee ​ແລະ​ນາງ Laura Ling ນັກ​ຂ່າວ​ຂອງໂທລະພາບ Current TV ​ໃນ​ສະຫະຣັດ. ເຈົ້າ​ໜ້າ​ທ່ີ​ເກົາຫລີ​ເໜືອ ​ໄດ້​ຈັບ​ນາງ Lee ​ແລະ​ນາງ Ling ​ໃນ​ເດືອນ​ມິ​ນາ​ຜ່ານ​ມາ ​ໃນ​ຂະນະ​ທ່ີ​ພວກ​ເຂົາ​ເຈົ້າ​ກຳລັງໄປ​ຄົ້ນຄວ້າ​ເອົາ​ຂ່າວ ເຣື່ອງນຶ່ງ ຢູ່​ໃກ້ໆ​ກັບ​ຊາຍ​ແດນ​ຈີນ​ແລະ​ເກົາຫລີ​ເໜືອ​.
ກ່ຽວກັບເກົາຫລີເໜືອ:ໃນ​ຂະນະ​ດຽວ​ກັນ ຣັຖບານ​ປະທາ​ນາ​ທິບໍດີ​ໂອ​ບາ​ມາ​ກ່າວ​ໃນ​ວັນ​ອາທິດ ວານ​ນີ້​ວ່າ ​ເກົາຫລີ​ເໜືອ​ສາມາດ​ກັບ​ຄືນ​ໄປ​ຢູ່​ໃນ​ບັນຊີ​ລາຍ​ຊື່​ພວກ​ປະ​ເທດ​ ທ່ີ​ໃຫ້ການ​ອຸບປະ​ຖັມ​ແກ່​ພວກ​ກໍ່​ການ​ຮ້າຍ​ໄດ້ ຫລັງ​ຈາກ​ທີ່ເກົາຫລີ ເໜືອ​ໄດ້​ທຳ​ການ​ທົດ​ລອງ​ອາວຸດ​ນີວ​ເຄລັຍ​ແລະ​ລູກ​ສອນ​ໄຟ​ຫວ່າງໄວໆ​ ຜ່ານ​ມາ​ນີ້.
ທ່ານ​ນາງ​ຮີນ​ລາຣີ ຄລິນ​ຕັນ ຣັຖມຸນຕີ​ການ​ຕ່າງປະ​ເທດ​ສະຫະຣັດກ່າວ​ວ່າ ການ​ທົດ​ລອງ​ອາວຸດທີ່​ວ່ານັ້ນເປັນ​ການ​ເກາະ​ຜິດ​ຢ່າງທ່ີ​ສຸດ ​ແລະ​ບັງຄັບໃຫ້ຣັຖບານ​ກຸງ​ວໍ​ຊິງ​ຕັນ ​ຕ້ອງ​ພິຈາຣະນາການຕັດສິນ​ໃຈຂອງ​ຕົນ​ໃນ​ເດືອນ​ຕຸລາ​ປີ​ແລ້ວ​ນີ້​ຄືນ​ໃໝ່ ​ທ່ີ​ໄດ້​ຖອນ​ຊື່​ເກົາຫລີ​ເໜືອ​ອອກ​ຈາກບັນ​ຊີ​ພວກ​ປະ​ເທດ ​ທ່ີ​ໃຫ້ການ​ສນັບ​ສນຸນ​ແກ່​ການ​ກໍ່​ການ​ຮ້າຍ​ນັ້ນ. ສະຫະຣັດໄດ້​ປົດ​ຊື່​ເກົາຫລີ​ເໜືອ​ອອກ​ຈາກ​ບັນຊີ​ດັ່ງກ່າວ ຫລັງ​ຈາກ​ທາງ​ເກົາຫລີ​ເໜືອ​ໄດ້​ຕົກລົງ ຮັບເອົາ​ມາດ​ຕະການ​ພິສູດ​ການ​ທັບ​ມ້າງ​ໂຄງ ການນິວ​ເຄລັຍ ທ່ີໂຮງງານ​ນີວ​ເຄລັຍ​ແຫ່ງ​ຕ່າງໆຂອງ​ຕົນນັ້ນ. ຣັຖມຸນ ຕີ​ການ​ຕ່າງປະ​ເທດ​ ຮີນ​ລາຣີ ຄລິນ​ຕັນ ກ່າວ​ວ່າ ສະຫະຣັດກຳລັງ​ດຳ​ເນີນ​ການ​ ຢູ່ໃນ​ອົງການສະຫະ​ປະຊາ​ຊາດ​ກ່ຽວ​ກັບ​ຮ່າງ​ຍັດຕິ​ສະບັບ​ນຶ່ງ ທ່ີ​ຈະ​ສ້າງ​ກົນ​ໄກ​ອັນ​ນຶ່ງ​ ເພື່ອ​ສະກັດ​ກັ້ນ​ບໍ່​ໃຫ້​ເກົາຫລີ​ເໜືອ​ສົ່ງ​ພວກ​ອາ ວຸດ​ເຫລົ່າ​ນີ້ ອອກ​ນອກ​ປະ​ເທດ. ຫົວໜ້າ​ນັກການ​ທູດ​ຂອງສະຫະຣັດ ກ່າວ​ວ່າ ການບໍ່ເຮັດ​ຫຍັງ​ເລີຍ​ກ່ຽວ​ກັບ​ເຣື່ອງນີ້ ອາດ​ສາມາດ​ກະ​ຕຸ້ນ​ໃຫ້​ມີ​ການ​ແຂ່ງຂັນ​ອາວຸດ​ກັນ​ຂຶ້ນໃນ​ພາກ​ເອ​ເຊັຍ​ຕາ​ເວັນ​ອອກສຽງ​ເໝືອນັ້ນ ​ແລະ​ທ່ານ​ນາງ​ກ່າວ​ຕື່ມ​ວ່າ ການ​ລົງ​ໂທດ​ເພ່ີມ​ຂຶ້ນ​ຕໍ່ຣັຖບານ​ກຸງ​ພຽງ​ຢ້າງ​ ​ແມ່ນໄດ້​ຮັບ​ການສນັບ​ສນຸນ​ໂດຍເຕັມ​ ຈາກ​ທັງຣັດ​ເຊັຍ​ແລະ​ຈີນ.
ການເລືອກຕັ້ງທີ່ເລບານອນ: ພັກ​ປະສົມ​ນິຍົມ​ຕາ​ເວັນ​ຕົກ​ຂອງ​ເລ​ບາ​ນອນ ​ໄດ້ອ້າງ​ເອົາ​ໄຊຊະນະໃນ​ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ​ຊຸດ​ໃໝ່​ ຂອງ​ເລ​ບາ​ນອນໃນ​ວັນ​ອາທິດ​ວານ​ນີ້. ​ໃນ​ການ​ປາ​ໄສ​ຕໍ່​ບັນດາ​ຜູ້​ສນັບ​ສນຸນ ທ່ານ Saad Al-Hariri ຜູ້ນຳ​ສຽງ​ຂ້າງ​ຫລາຍ​ໃນ​ສະພາ​ແຫ່ງ​ຊາດ​ຂອງ​ເລ​ບາ​ນອນ ປະກາດ​ໄຊຊະນະ​ເໜືອກຸ່ມ​ພັນທະ​ມິດ Hezbollah ທ່ີ​ໄດ້​ຮັບ​ການ​ໜຸນ​ຫລັງ​ຈາກ​ຊີ​ເຣັຍ​ແລະ​ອິຣ່ານນັ້ນ. ທ່ານ Hariri ​ເອີ້ນ​ໄຊຊະນະ​ຂອງ​ພັກ ປະສົມ​ຂອງ​ທ່ານ​ວ່າ ​ເປັນ​ມື້​ທ່ີ​ຍິ່ງ​ໃຫຍ່​ສຳລັບລະບອບ​ປະຊາທິປະ​ໄຕ​ ໃນ​ເລ​ບາ​ນອນ. ພວກ​ຜູ້​ແທນ​ຂອງພັກ​ພັນທະ​ມິດ​ໃຫຍ່​ຄຣີສຕຽນ​ຂອງ​ກຸ່ມ Hezbollah ​ໄດ້​ຍອມຮັບ​ເອົາ​ການ​ປາ​ໄຊ​ຂອງ​ພວກ​ຕົນ. ຍັງ​ບໍ່​ເປັນ​ທ່ີ​ຈະ​ແຈ້ງ​ເທື່ອ​ວ່າ ພັກປະສົມ​ແຕ່ລະ​ຝ່າຍ​ໄດ້​ຮັບ​ບ່ອນ​ນັ່ງ​ຈັກ​ບ່ອນ ​ເພາະ​ຍັງ​ບໍ່​ທັນມີ​ການປະກາດ​ຜົນ​ຂອງ​ການ​ເລືອກ​ຕັ້ງ​ຢ່າງ​ເປັນ​ທາງ​ການ​ໃຫ້​ຮູ້​ເທື່ອ.​
ທີ່ປາກີສຖານ: ບັນດາ​ເຈົ້າ​ໜ້າ​ທ່ີ​ໃນ​ພາກ​ຕາ​ເວັນ​ຕົກ​ສຽງ​ເໜືອ​ຂອງ​ປາ​ກີ​ສຖານ​ກ່າວ​ວ່າ ພວກ​ຊາວບ້ານ​ຈຳນວນ​ຫລາຍ​ກວ່າ 1000 ຄົນ​ໄດ້ພາກັນ​ທຳ​ການໂຈມ ​ຕີພວກ​ນັກ​ຕໍ່ສູ້​ກຸ່ມ​ຕາ​ລີ​ບັນ​ຫົວ​ຮຸນ​ແຮງ​ໃນ​ເຂດ Upper Dir ​ໃນ​ມື້ທີ​ສາມ​ຂອງ​ການ​ກໍ່​ຄວາມ​ຮຸນ​ແຮງທ່ີ​ມີ​ວັດຖຸ​ປະສົງ​ເພື່ອ​ທຳ​ການ​ແກ້​ແຄ້ນ​ການວາງ​ລະ​ເບີດ​ສະລະ​ຊີບ​ໂຈມ​ຕີໃນ​ໂບດ​ອີສລາມ​ແຫ່ງ​ນຶ່ງ​ໃນ​ທ້ອງຖ່ິນ ໃນ​ວັນ​ສຸກ​ຜ່ານ​ມາ ​ທ່ີ​ພາ​ໃຫ້​ມີ​ຄົນເສັຍ​ຊີວິດ​ໄປຫລາຍ​ສິບ​ຄົນ​. ບັນດາ​ເຈົ້າ​ໜ້າ​ທ່ີ​ປະຈຳ​ທ້ອງ​ຖ່ິນກ່າວ​ໃນ​ວັນ​ຈັນ​ມື້​ນີ້​ວ່າ ​ມີ​ພວກຊາວບ້ານ ຢ່າງ​ນ້ອຍ 1200 ຄົນ​ຈາກ​ເຂດນັ້ນ ​ໄດ້​ຮ່ວມ​ກັບກຸ່ມ​ທະຫານ​ບ້ານ ທຳການໂຈມ​ຕີ​ພວກ​ຫົວ​ຮຸນ​ແຮງ​ ໂດຍ​ໄດ້​ສັງຫານຢ່າງ​ນ້ອຍ 9 ຄົນ​ ແລະ​ໄດ້​ຈູດ​ໄຟ​ເຜົາບ້ານເຮືອນຂອງ​ພວກ​ນັກ​ຕໍ່​ສູ້ຫົວ​ຮຸນ​ແຮງ​ກຸ່ມຕາ​ລີ​ບັນ 20 ຫລັງ​. ນອກ​ນັ້ນ ພວກ​ທະຫານ​ບ້ານ​ຍັງໄດ້ຂັບ​ໄລ່ກຸ່ມ​ຕາ​ລີ​ບັນ​ອອກໄປຈາກ​ຢ່າງ​ນ້ອຍ 3 ໝູ່​ບ້ານ ​ແລະ​ທຳ​ການ​ປິດ​ລ້ອມອີກ 2 ໝູ່​ບ້ານ​ທ່ີ​ຮູ້ຈັກ​ກັນ​ວ່າ ​ເປັນ​ທ່ີ​ໝັ້ນ​ຂອງ​ກຸ່ມ​ຕາ​ລີ​ບັນ​. ຂົງ​ເຂດ​ດັ່ງກ່າວ​ແມ່ນ​ຕັ້ງ​ຢູ່​ໃກ້ໆ​ກັບ​ເຂດ​ຮ່ອມ​ພູ Swat ບ່ອນ​ທ່ີ​ທະຫານ​ຂອງ​ປາ​ກີ​ສຖານ​ ທຳ​ການ​ສູ້ຣົບກັບ​ພວກ​ນັກ​ຕໍ່ສູ້​ຫົວ​ຮຸນ​ແຮງ​ກຸ່ມ​ຕາ​ລີ​ບັນ​ມາ​ໄດ້​ດົນ​ກວ່າ 1 ​ເດືອນແລ້ວ.
ທີ່ຈີນ: ເຈົ້າໜ້າ​ທີ່​ຈີນ​ໄດ້ເກັບໂຕເຈົ້າ​ຄອງກຳ​ແພງ​ນະຄອນ News Orleans ​ ຣັດ Louisiana ທາງພາກ​ໃຕ້​ຂອງ​ສະຫະຣັດ​ ໄວ້ໃນ​ຫ້ອງ​ກວດ​ພະ ຍາດ​ ຫລັງ​ຈາກຜູ້ໂດຍສານ​ຄົນ​ນຶ່ງ​ໃນ​ຖ້ຽວ​ບິນ​ດຽວ​ກັນກັບ​ທ່ານ ​ມີ​ອາ ການ​ຕິດ​ເຊື້ອໄຂ້ຫວັດ​ໃຫຍ່ ສາຍ​ພັນ A-H1N1. ທ່ານ Ray Nagin ​ເຈົ້າ​ຄອນ​ກຳ​ແພງ News Orleans ພ້ອມ​ດ້ວຍ​ພັນ​ລະ​ຍາ​ຂອງ​ທ່ານ​ແລະ​ພນັກ​ງານ​ຄົນ​ນຶ່ງ​ໃນ​ຫ້ອງການ​ຂອງ​ທ່ານ ​ກຳລັງ​ຖືກ​ກັກ​ໂຕ​ໄວ້​ໃນ ນະຄອນ​ຊຽງ​ໄຮ້​ໃນ​ເວລານີ້. ທາງ​ຫ້ອງການ​ຂອງ​ທ່ານ Nagin ປະກາດໃຫ້​ຮູ້​ໃນ​ວັນ​ອາທິດ​ວານ​ນີ້​ວ່າ ພວກ​ທ່ານ​ທັງ​ສາມ​ຄົນ​ຖືກ​ກັກ​ໃຫ້​ຢູ່​ໃນ​ຫ້ອງ​ກວດກາ​ພະຍາດ​ ເພື່ອ​ເປັນ​ການ​ປ້ອງ​ກັນ​ຫລັງ​ຈາກ​ຄົນ​ໂດຍ ສານ​ຄົນ​ນຶ່ງ​ໃນ​ຖ້ຽວບິນ​ດຽວ​ກັນ ​ລົ້ມ​ປ່ວຍ​ລົງ​ດ້ວຍ​ອາການທ່ີ​ສົງ​ໄສ​ວ່າເປັນ​ອາການຕິດ​ເຊື້ອ​ໄຂ້ຫວັດ​ໃຫຍ່​ ສາຍພັນ A-H1N1 ນັ້ນ. ​ໂຄສົກ​ປະຈຳ​ຫ້ອງການ​ທ່ານ Nagin ກ່າວ​ວ່າ ບໍ່​ຜູ້​ໃດ​ໃນ​ຄນະ​ຂອງ​ທ່ານ Nagin ສະ​ແດງ​ອາການຕິດ​ເຊື້​ອ​ໄຂ້ ຫວັດ​ໃຫຍ່​ດັ່ງກ່າວ. ທ່ານ Nagin ​ເດີນທາງ​ໄປ​ຈີນ​ເພື່ອ​ທຳ​ການ​ໂອ້​ລົມ​ສົນທະນາ​ເຣື່ອງ​ໂອກາດໃນການ​ພັດທະນາ​ເສດຖະກິດ​ ​ແລະ​ທ່ານ​ມີ​ໝາຍ​ກຳນົດ​ທ່ີ​ຈະ​ໄປ​ຢ້ຽມຢາມ Australia ​ເຊັ່ນ​ກັນ.





XS
SM
MD
LG