ອະນຸສາວະລີ ເທພີແຫ່ງອິດສະລະພາບ ແມ່ນເປັນຮູບປັ້ນໜຶ່ງ ທີ່ມີຊື່ສຽງ ແລະເປັນທີ່ຮູ້ຈັກຫລາຍທີ່ສຸດໃນໂລກ -- ເຊິ່ງປຽບສະເໝືອນ ແສງສວ່າງແຫ່ງຄວາມຫວັງສຳລັບ ຄົນເຂົ້າເມືອງຫລາຍລ້ານຄົນ ທີ່ເຂົ້າມາຢູ່ປະເທດນີ້ ຜ່ານທາງລັດນິວຢັອກມາ ເປັນເວລາດົນກ່ວານື່ງສັດຕະວັດ ເພື່ອຊອກຫາຊີວິດໃໝ່ທີ່ ດີກວ່າເກົ່າ. ນອກນັ້ນ ຮູບປັ້ນ ອະນຸສາວະລີເທພີແຫ່ງອິດສະ ລະພາບນີ້ ກໍຍັງເປັນສິ່ງດຶງດູດ ນັກທ່ອງທ່ຽວທີ່ສຳຄັນອັນນຶ່ງ.
ຫາກແຕ່ວ່າ ນັບຕັ້ງແຕ່ມີການກໍ່ການຮ້າຍໂຈມຕີ ສູນກາງການຄ້າໂລກ ຫລື World Trade Center
ຂອງ ນິວຢັອກໃນປີ 2001 ເປັນຕົ້ນມາ, ພາກສ່ວນນ້ອຍໆຂອງອະນຸສາວະລີແຫ່ງນີ້ ກໍຄືຈອມຂອງມັນ ຫລືຊັ້ນມົງກຸດຂອງເທພີອິດສະລະພາບນັ້ນ ໄດ້ ຖືກປິດ ບໍ່ໃຫ້ປະຊາຊົນເຂົ້າຊົມ.
ຍ້ອນຄວາມເປັນຫ່ວງທາງດ້ານຄວາມສະງົບ ແລະຄວາມປອດໄພ ນັກທ່ອງທ່ຽວຈື່ງ ບໍ່ສາມາດຂຶ້ນໄປຊົມວິວ ຢູ່ບໍລິເວນມົງກຸດຂອງເທພີອິດສະລະພາບໄດ້ເປັນເວລາເກືອບ 8 ປີ ມາແລ້ວ. ຫາກແຕ່ວ່າ ໃນວັນທີ 4 ກໍລະກົດ ເດືອນໜ້ານີ້ ຊຶ່ງເປັນທີ່ຮູ້ກັນດີວ່າ ແມ່ນວັນເອກກະລາດຂອງສະຫະລັດອາເມລິການັ້ນ ຊັ້ນມົງກຸດຂອງຮູບປັ້ນນີ້ ຈະເປີດ ຄືນ ໝ່ໃຫ້ປະຊາຊົນ ຂື້ນໄປຊົມວິວໄດ້ອີກ.
ທ່ານ ແດເຣິນ ໂບຈ໌ (Darren Boch) ທີ່ເຮັດວຽກຢູ່ພະແນກບໍລິການ ສວນສາທາລະ ນະແຫ່ງຊາດ ຊຶ່ງຮັບຜິດຊອບແລະກຳກັບເບິ່ງການດຳເນີນງານຢູ່ຮູບປັ້ນເທພີ ແຫ່ງອິດສະລະພາບນັ້ນ ກ່າວວ່າ:
“ໃນວັນເກີດຂອງອາເມຣິກາ ຄືວັນທີ 4 ເດືອນກໍລະກົດ ປີ 2009 ທີ່ຈະມາເຖິງນີ້ ຫລື ເປັນແປດປີຕໍ່ມາ ພວກເຮົາມີຄວາມ ຕື່ນເຕັ້ນທີ່ຈະໃຫ້ໂອກາດແກ່ ຄົນອາເມຣິກັນ ແລະ ພວກຄົນໃນທົ່ວໂລກ ໄດ້ມາທ່ຽວຊົມອານຸສາວະລີແຫ່ງອິດສະລະພາບ”
ການຂຶ້ນອະນຸສາວະລີ ໄປເທິງຈອມຮູບປັ້ນນັ້ນ ບໍ່ແມ່ນວ່າໃຜໆກໍຈະສາມາດເຮັດໄດ້. ກ່ອນອື່ນ ນັກທ່ອງທ່ຽວຕ້ອງຍ່າງຂຶ້ນຂັ້ນໄດ ທີ່ສູງຊັນຢູ່ທາງໃນຫລືທາງກາງຂອງ ຮູບປັ້ນນັ້ນເປັນຈຳນວນ ຫລາຍກວ່າ 200 ຂັ້ນ ຈື່ງຈະໄປຮອດຈອມ ຫລືຊັ້ນມົງກຸດ ທີ່ມີ ປ່ອງໃຫ້ຄົນຊົມວິວ ແລະ ເມື່ອຂຶ້ນໄປ ຮອດເທິງຈອມແລ້ວ ບໍລິເວນຊົມວິວນັ້ນ ກໍຄັບແຄບ ແລະແນມບໍ່ເຫັນອ້ອມຂ້າງເພາະບ່ອນຢືນເບິ່ງ ມີໜ້ອຍດຽວ ແຕ່ວ່າສິ່ງຫຍຸ້ງຍາກເຫລົ່ານີ້ ກໍບໍ່ໄດ້ເຮັດໃຫ້ຄົນລົ້ມເລີກຄວາມພະຍາຍາມ ທີ່ຈະຈົດຊື່ຈອງປີ້ໄວ້ລ່ວງໜ້າ.
ເຈົ້າໜ້າທີ່ເວົ້າວ່າ ຄວາມຕ້ອງການໄປຊົມອະນຸສາວະລີທີ່ວ່ານີ້ ມີສູງຫລາຍ ຈົນວ່າ ເວັບໄຊ້ທ໌ຂອງເຂົາເຈົ້າລົ້ມແຫລວແລະຢຸດສະງັກລົງ ໃນມື້ທີ່ເຂົາເຈົ້າປະກາດວ່າຈະເປີດ ຊັ້ນມົງກຸດໃຫ້ປະຊາຊົນຂື້ນໄປຊົມ ວິວໄດ້ອີກນັ້ນ ເນື່ອງຈາກມີຫລາຍຄົນເກີນໄປທີ່ເຂົ້າ ໄປເວັບໄຊ້ທ໌ ເພື່ອຈົດຊື່ຈ່ອງປີ້ໄວ້ລ່ວງໜ້າ.
ຈະມີການຈຳກັດຈຳນວນຜູ້ຄົນ ທີ່ສາມາດຂຶ້ນໄປຮອດຊັ້ນມົງກຸດຂອງອະນຸສາວະລີໄດ້. ທາງການຍັງບໍ່ທັນໄດ້ເຮັດລາຍລະອຽດເທື່ອ, ແຕ່ກໍຄາດວ່າ ຈຳນວນນັກທ່ອງທ່ຽວ ທີ່ອະນຸຍາດໃຫ້ຂຶ້ນໄປໄດ້ນັ້ນ ຈະຈຳກັດຢູ່ ປະມານ 150 ຄົນຕໍ່ມື້.
ໃນປະຈຸບັນນີ້ ເກາະອິດສະລະພາບ ຫລື Libety Island ບ່ອນຕັ້ງຂອງອະນຸສາວະລີເທພີແຫ່ງອິດສະລະພາບ ຫລື the Statue of Liberty ທີ່ສະຫະຣັດໄດ້ຮັບເປັນຂອງຂວັນຈາກປະເທດຝຣັ່ງນັ້ນຮັບຕ້ອນ ນັກທ່ອງທ່ຽວ 3 ລ້ານ 6 ແສນຄົນ ຕໍ່ປີ, ເພາະສະນັ້ນ ເຖິງແມ່ນວ່າ ຈະຕ້ອງໄດ້ປີນຂັ້ນໄດຂື້ນໄປກໍຕາມ ກໍເບິ່ງຊົງວ່າ ປີ້ສຳລັບຂຶ້ນໄປຊົມວິວຢູ່ຊັ້ນມົງກຸດຂອງເທພີແຫ່ງອິດສະລະພາບນັ້ນ ຈະເປັນປີ້ທີ່ມີຜູ້ຄົນ ຊອກສະແຫວງຫາຫລາຍທີ່ສຸດທີ່ນະຄອນນິວຢອກ ໃນວັນທີ 4 ກໍລະກົດ ເດືອນໜ້ານີ້.
