<!-- IMAGE -->
ສະພາຄວາມໝັ້ນຄົງອົງການສະຫະປະຊາຊາດໄດ້ຖະແຫລງວ່າ ຕົນປະນາມແລະຄັດຄ້ານຕໍ່ການທົດລອງນີວເຄລຍຂອງເກົາຫລີເໜືອເມື່ອວັນທີ່ 25 ເດືອນພືດສະພາຜ່ານມາ ຕາມທີ່ເກົາຫລີເໜືອປະກາດໃຫ້ຊາບນັ້ນ.ທ່ານ ພັນ ຄີມູນ ເລຂາທິການອົງການສະຫະປະຊາຊາດ ເອີ້ນການກະທຳຂອງເກົາຫລີເໜືອໃນຄັ້ງນັ້ນວ່າ “ເປັນການຝ່າຝືນຢ່າງແຈ້ງຂາວແລະຢ່າງຮ້າຍແຮງຕໍ່ມະຕິຂອງສະພາຄວາມໝັ້ນຄົງອົງການສະຫະປະຊາຊາດ.” ແຕ່ກໍມີລາຍງານຂ່າວວ່າເກົາຫລີເໜືອໄດ້ທົດລອງຍິງລູກສອນໄຟ ລະຍະໄກ້ອີກລູກນຶ່ງ ຫລັງຈາກການປະນາມຂອງສະພາຄວາມໝັ້ນຄົງນັ້ນ.
ປະທານາທິບໍດີ ບາຣັກ ໂອບາມາ ກໍໄດ້ອອກຖະແຫລງການສະບັບນຶ່ງ ປະນາມການກະທຳແບບເກາະຜິດຂອງ ເກົາຫລີເໜືອ ຊຶ່ງປະທານາທິບໍ ດີໂອບາມາກ່າວວ່າ “ປາກົດວ່າ ເກົາຫລີເໜືອໄດ້ພະຍາຍາມທີ່ຈະຍິງລູກສອນໄຟລະຍະສັ້ນອີກລູກນຶ່ງ ຊຶ່ງການກະທຳເຫລົ່ານີ້ ເຖິງແມ່ນບໍ່ ທີ່ໜ້າແປກໃຈເລີຍ ຖ້າພິຈາລະນາເບິ່ງຄຳຖະແຫລງແລະການກະທຳຕ່າງໆຂອງເກົາຫລີ ມາເຖິງປັດຈຸບັນນີ້ແລ້ວ ແຕ່ມັນກໍເປັນເລື່ອງທີ່ສ້າງ ຄວາມເປັນຫ່ວງຢ່າງໃຫຍ່ຫລວງ ໃຫ້ແກ່ໝົດທຸກປະເທດໃນໂລກ ຊຶ່ງປະທານາທິບໍດີໂອບາມາກ່າວຕໍ່ໄປວ່າ “ຄວາມພະຍາຍາມຂອງເກົາຫລີເໜືອທີ່ຈະພັທະນາອາວຸດຕ່າງໆ ຕະຫລອດທັງໂຄງການສ້າງລູກສອນ ຂີປະນາວຸດຂອງເກົາຫລີເໜືອນັ້ນ ແມ່ນປະກອບເປັນໄພຂົ່ມຂູ່ຕໍ່ສັນຕິພາບແລະຄວາມໝັ້ນຄົງຂອງສາກົນ.ເກົາຫລີເໜືອເຄີຍໄດ້ທຳການທົດລອງນີວເຄລຍມາແລ້ວໃນເດືອນຕຸລາປີ 2006. ຕົກມາໃນເດືອນເມສາຂອງປີນີ້ ເກົາຫລີເໜືອກໍໄດ້ຍິງລູກສອນໄຟຂີປະນາວຸດລູກນຶ່ງ ຊື່ງໄດ້ພາໃຫ້ນານາຊາດປະນາມຢ່າງແຮງ ຕໍ່ການກະທຳດັ່ງກ່າວ. ມັນເປັນເລຶ່ອງຍາກລຳບາກພໍສົມຄວນ ທີ່ຈະປານີປານອມການກະທຳ ຕ່າງໆເຫລົ່ານີ້ຂອງເກົາຫລີເໜືອ ກັບຂໍ້ຕົກລົງທີ່ເກົາຫລີເໜືອໄດ້ເຊັນຮັບເອົາໃນເດືອນກັນຍາປີ 2005ກັບສະຫະຣັດ ຈີນ ເກົາຫລີໄຕ້ ຍີ່ປຸ່ນ ແລະຣັດເຊຍ ທີ່ມີວັດຖຸປະສົງເພື່ອເຮັດໃຫ້ແຫລມເກົາຫລີປອດນີວເຄລຍໃນແບບທີ່ພິສູດໄດ້ນັ້ນ.
ສະຫະຣັຖແມ່ນໄດ້ສະນັບສະນຸນການເຈລະຈາຫົກຝ່າຍ ຢ່າງສະມ່ຳສະມີຕະຫລອດມາໃນຖານະເປັນວິທີທາງທີ່ດີທີ່ສຸດ ເພື່ອຈັດການກັບການ ທ້າທາຍຈາກໂຄງການນີວເຄລຍຂອງເກົາຫລີເໜືອ ແລະບັນຫາສຳຄັນອື່ນໆ ທີ່ເປັນພາກສ່ວນຂອງໂຄງການທັງໝົດຂອງເກົາຫລີເໜືອນັ້ນ. ມີແຕ່ການເຈລະຈາແບບເສີມສ້າງເທົ່ານັ້ນ ບໍ່ແມ່ນການກະທຳແບບເກາະຜິດ ທີ່ຈະຮັບໃຊ້ຜົນປະໂຍດອັນດີທີ່ສຸດຂອງເກົາຫລີເໜືອ.
ປະທານາທິບໍດີໂອບາມາກ່າວຕື່ມວ່າ “ໂດຍການກະທຳທີ່ເປັນການຝ່າຝືນຢ່າງເປີດແປນ ຕໍ່ສະພາຄວາມໝັ້ນຄົງອົງການສະຫະປະຊາຊາດ ນັ້ນ ແມ່ນເກົາຫລີເໜືອກຳລັງທ້າທາຍໂດຍກົງແລະຢ່າງຂາດຄວາມຢັ້ງຄິດຕໍ່ປະຊາຄົມໂລກ. ການປະພຶດໃນທຳນອງນີ້ຂອງເກົາຫລີເໜືອແມ່ນເພີ່ມຄວາມເຄັ່ງຕຶງ ແລະບ່ອນທຳລາຍສະຖຽນລະພາບໃນຂົງເຂດເອເຊຍຕາເວັນອອກສຽງເໜືອ.ປະທານາທິບໍດີສະຫະຣັດກ່າວຕໍ່ໄປວ່າ “ເກົາຫລືເໜືອ ແມ່ນຈະບໍ່ໄດ້ຮັບການຮັບຮອງເອົາຈາກນານາຊາດໄດ້ ເວັ້ນໄວ້ແຕ່ວ່າ ເກົາຫລີເໜືອຈະປະຖິ້ມການສະແຫວງຫາອາວຸດແບບທຳລາຍລ້າງຜານຢ່າງຂະໜານໃຫຍ່ນັ້ນ ຕລອດທັງພາຫານະໃນການຍິງອາວຸດດັ່ງກ່າວ.”
ປະທານາທິບໍດີໂອບາມາ ກ່າວໃນທີ່ສຸດວ່າ “ໃນພາກສ່ວນຂອງຕົນນັ້ນ ສະຫະຣັຖແມ່ນໄດ້ທຳງານ ແລະກໍຈະສືບຕໍ່ປະຕິບັດງານກັບພັນທະມິດ ແລະພາຄີຂອງຕົນໃນການ ເຈລະຈາຫົກຝ່າຍນັ້ນ ພ້ອມກັບສະມາຊິກອື່ນໆຂອງສະພາຄວາມໝັ້ນຄົງອົງການ ສະຫະປະຊາຊາດໃນຕໍ່ໜ້າ .
