ລິ້ງ ສຳຫລັບເຂົ້າຫາ

Electricity Demand in Laos Increasing


ລັດ​ວິ​ສາ​ຫະກິດ​ໄຟຟ້າ​ລາວລາຍງານວ່າຄວາມຕ້ອງການ ຊົມໃຊ້ພະລັງງານໄຟຟ້າ ໃນລາວ ຈະເພີ້ມຂຶ້ນ ສະເລ່ຍ ເຖິງ 18% ຕໍ່ປີ ນັບຈາກປັດຈຸບັນ ໄປເຖິງປີ 2016 ຊຶ່ງກໍມີສາຍ ເຫດມາຈາກ ການຂຸດຄົ້ນບໍ່ແຮ່ ທີ່ເພີ້ມຂຶ້ນລວມໄປເຖິງ ການຂະຫຍາຍ ຕາໜ່າງສາຍສົ່ງກະແສໄຟຟ້າໄປຍັງເຮືອນ ຊານຂອງປະຊາຊົນລາວ ທີ່ມີການຂະ ຫຍາຍກວ້າງຂຶ້ນອີກ ດ້ວຍເຊັ່ນກັນ.

ລັດ​ວິ​ສາ​ຫະກິດ​ໄຟຟ້າ​ລາວ ຫລື EDL ​ໄດ້​ສະ​ເໜີລາຍ​ງານ​ວ່າ ການ​ຊົມ​ໃຊ້​ພະລັງງານ​ໄຟຟ້າຢູ່​ໃນ​ລາວ​ໄດ້​ເພີ້ມສູງ​ຂຶ້ນຢ່າງ​ຕໍ່​ເນື່ອງ ​ແລະ ກໍ​ເພີ້ມສູງ​ຂຶ້ນ​ໃນ​ທຸກໆປີ ​ໂດຍ​ຈາກ​ການ​ສຳ​ຫລວດ​ໃນ​ໄລຍະ​ນັບ​ຈາກ​ປີ 2003 ຈົນ​ເຖິງ​ປີ 2007 ​ທີ່​ຜ່ານມານັ້ນກໍ​ພົບ​ວ່າ ການຊົມ​ໃຊ້ພະລັງງານໄຟຟ້າ​ຢູ່​ໃນ​ທົ່ວ​ປະ​ເທດ​ລາວ ​ໄດ້​ເພີ້ມສູງ​ຂຶ້ນ​ໃນ​ອັດຕາ​ສະ​ເລ່ຍ​ເຖິງ 11% ຕໍ່ປີ ​ໂດຍ​ໃນ​ບາງ​ປີນັ້ນກໍ​ປະກົດ​ວ່າ ການ​ຊົມ​ໃຊ້​ພະລັງງານ​ໄຟຟ້າ ​ໄດ້​ເພີ້ມສູງ​ຂຶ້ນ​ເຖິງ​ລະດັບ 13% ກໍ​ມີ. ຍິ່ງໄປ​ກວ່າ​ນັ້ນ ການ​ສຳ​ຫລວດ​ໃນ​ປີ 2008 ທີ່​ຜ່ານ​ມານີ້ກໍ​ຍັງພົບອີກ​ວ່າ ການຊົມ​ໃຊ້ພະລັງງານໄຟຟ້າ​ໃນ​ທົ່ວ​ປະ​ເທດ​ລາວ ​ໄດ້​ປັບ​ຕົວສູງ​ຂຶ້ນຈາກ​ເດີມ​ເຖິງ 18% ​ເມື່ອ​ທຽບ​ໃສ່​ກັບປີ 2007 ທີ່​ຜ່ານ​ມາ​ດັ່ງກ່າວ ​ແລະ ຈົນ​ເຖິງ​ປະຈຸ​ບັນນີ້ ການ​ຊົມ​ໃຊ້​ພະລັງງານ​ໄຟຟ້າ​ໃນ​ລາວ ກໍ​ຍັງ​ຄົງ​ເພີ້ມຂຶ້ນຢ່າງ​ຕໍ່​ເນື່ອງ ​ໂດຍ​ເຖິງ​ແມ່ນ​ວ່າ​ລາວ ຈະ​ໄດ້​ຮັບ​ຜົນ​ກະທົບ​ຈາກ​ບັນຫາ​ວິ​ກິດ​ການ​ທາງ​ເສດ​ຖະ​ກິດ​ການ​ເງິນ​ໂລກ ຄື​ກັບປະ​ເທດ​ອື່ນໆ​ກໍ​ຕາມ. ຫາກ​ແຕ່​ ຍ້ອນ​ວ່າການ​ລົງທຶນ​ໃນ​ພາກ​ອຸດສາຫະກຳ​ການ​ຂຸດ​ຄົ້ນບໍ່​ແຮ່ທີ່​ເພີ້ມຫລາຍ​ຂຶ້ນ ​ແລະ ​ເມື່ອສົມທົບ​ກັບ​ການ​ປະຕິບັດ​ແຜນການ​ກ່ຽວກັບ​ການ​ຂະ​ຫຍາ​ຍ​ເຄືອຂ່າຍ​ສົ່ງ​ກະແສ​ໄຟຟ້າ​ເຂົ້າ​ໄປໃນ​ເຂດ​ຊົນນະບົດ​ຂອງ​ລາວ​ທີ່​ກ້ວາງຂວາງ​ຫລາຍ​ຂຶ້ນນັບ​ມື້ ດ້ວຍ​ຫວັງ​ວ່າ​ພະລັງງານ​ໄຟຟ້າ ຈະ​ມີ​ສ່ວນ​ຢ່າງ​ສຳຄັນ ​ໃນ​ການ​ຊ່ອຍ​ຫລຸດ​ຜ່ອນ​ບັນຫາ​ຄວາມທຸກ​ຈົນ​ຂອງ​ປະຊາຊົນ​ລາວ​ໃນ​ເຂດ​ຊົນນະບົດ​ດ້ວຍ​ນັ້ນ ກໍ​ຍິ່ງ​ໄດ້​ເຮັດ​ໃຫ້ຄວາ​ມຕ້ອງການຊົມ​ໃຊ້ພະລັງງານໄຟຟ້າ​ຢູ່​ໃນ​ລາວ ​ບໍ່ມີ​ການ​ຫລຸດໜ້ອຍລົງ​ແຕ່​ຢ່າງ​ໃດ. ​

ໃນ​ຂະນະ​ດຽວກັນ ລັດ​ວິ​ສາ​ຫະກິດ​ໄຟຟ້າ​ລາວ ກໍ​ຍັງ​ໄດ້​ຄາດ​ການ​ອີກດ້ວຍ​ວ່າ ​ໃນ​ປີ 2008 ໄປ​ຈົນເຖິງປີ 2016 ຄວາມ​ຕ້ອງການ​ຊົມ​ໃຊ້​ພະລັງງານ​ໄຟຟ້າ​ໃນ​ລາວ ຍັງ​ຈະ​ເພີ້ມຂຶ້ນ​ເຖິງ​ອັດຕາ​ສະ​ເລ່ຍ 18% ຕໍ່ປີ ຢ່າງ​ຕໍ່​ເນື່ອງ​ອີກ​ດ້ວຍ. ຊຶ່ງ​ຖ້າ​ຫາກ​ວ່າ​ເປັນ​ຈິງ​ຕາມ​ການ​ຄາດໝາຍດັ່ງກ່າວ​ຂອງ​ລັດ​ວິ​ສາ​ຫະກິດ​ໄຟຟ້າ​ລາວ​ນັ້ນ ກໍ​ຈະ​ເປັນ​ຜົນ​ເຮັດ​ໃຫ້ການ​ຊົມ​ໃຊ້​ພະລັງງານ​ໄຟຟ້າ​ໃນ​ລາວ​ເພີ້ມຂຶ້ນຈາກ​ລະດັບ 1.642 ລ້ານກິ​ໂລ​ວັດ​ໂມງ​ ໃນ​ປະຈຸ​ບັນ ຂຶ້ນ​ໄປ​ເປັນ​ບໍ່ໜ້ອຍກວ່າ 7.257 ລ້ານ​ກິ​ໂລ​ວັດ​ໂມງ ​ໃນ​ປີ 2016 ​ແລະ ກໍ​ຈະ​ເປັນຜົນ​ກະ​ທົບ​ຕໍ່​ເນື່ອງ​ໄປ​ເຖິງ​ການທີ່ຈະ​ເຮັດ​ໃຫ້​ລັດ​ວິ​ສາ​ຫະກິດ​ໄຟຟ້າ​ລາວ​ນັ້ນ ຈະ​ຕ້ອງ​ມີ​ການ​ລົງທຶນໃນ​ມູນ​ຄ່າ​ຫລາຍ​ກວ່າ 1.500 ລ້ານ​ໂດ​ລ້າ​ສະຫະຣັດ ​ເພື່ອ​ການ​ພັດທະນາ​ພະລັງງານ​ໄຟຟ້າ​ໃຫ້​ໄດ້​ຢ່າງ​ພຽງພໍ​ກັບ​ຄວາມ​ຕ້ອງການ​ພາຍ​ໃນ​ປະ​ເທດ ທີ່​ເພີ້ມຂຶ້ນຈາກ 416 ​ເມກາວັດ ​ໃນ​ປະຈຸ​ບັນ​ໄປເປັນ​ບໍ່ໜ້ອຍກວ່າ 1.260 ເມກາ​ວັດ ພາຍ​ໃນ​ປີ 2016 ດັ່ງກ່າວ​ອີກ​ດ້ວຍ. ​ແຕ່​ຢ່າງ​ໃດ​ກໍ​ຕາມ​ໃນ​ໄລຍະ ຫົ​ກ​ເດືອນຕົ້ນປີຂອງແຜນການ​ປະຈຳ​ປີ 2008 ຫາ 2009 ນີ້ ກັບ​ປາກົດ​ວ່າ ການ​ຜະຫລິດ​ກະ​ແສ​ໄຟຟ້າ​ຂອງລັດ​ວິ​ສາ​ຫະກິດ​ໄຟຟ້າ​ລາວ ​ໄດ້​ຫລົດ​ລົງ​ຈາກ​ໃນ​ໄລຍະ​ດຽວກັນ​ຂອງ​ປີ​ກາຍ ຄຶດ​ເປັນ​ສັດສ່ວນ​ເກືອບ​ເຖິງ 9% ຊຶ່ງ​ກໍ​ເປັນ​ຜົນ​ເຮັດ​ໃຫ້​ຜົນ​ຜະຫລິດ​ພະລັງງານ​ໄຟຟ້າ​ຫລົດ​ລົງ​ຈາກ 1.636 ລ້ານ​ກິ​ໂລ​ວັດ​ໂມງ ລົງ​ມາ​ເປັນ 1.497 ລ້ານ​ກິ​ໂລ​ວັດ​ໂມງ ຈຶ່ງ​ບໍ່ພຽງພໍ​ກັບ​ຄວາມ​ຕ້ອງການ​ຊົມ​ໃຊ້​ພະລັງງານ​ໄຟຟ້າ​ທີ່​ເປັນ​ຈິງ​ໃນ​ລາວ ​ໂດຍ​ມີ​ສາ​ເຫດ​ມາ​ຈາກ​ປະລິມານ​ນ້ຳທີ່​ບົກ​ແຫ້ງ​ລົງ​ຢ່າງ​ໄວວາ ຈຶ່ງ​ເຮັດ​ໃຫ້​ມີ​ປະລິມານ​ນ້ຳບໍ່​ພຽງພໍ ກັບ​ຄວາມ​ອາດ​ສາມາດ​ໃນ​ການຜະຫລິດ​ກະ​ແສ​ໄຟຟ້າ​ຂອງ​ໂຄງ​ການ​ເຄື່ອນ​ຕ່າງໆ​ໃນ​ລາວ​ນັ້ນ​ເອງ. ​ເພາະສະນັ້ນ ຈຶ່ງ​ເຮັດ​ໃຫ້​ທາງ​ການ​ລາວ​ມີ​ຄວາມ​ຈຳ​ເປັນ​ທີ່​ຈະ​ຕ້ອງ​ດຳ​ເນີນໂຄງການລົນ​ນະ​ລົງ​ເພື່ອ​ໃຫ້​ປະຊາຊົນ​ລາວ​ຊ່ອຍ​ກັນ​ຊົມ​ໃຊ້​ພະລັງງານ​ໄຟຟ້າ​ຢ່າງ​ປະຢັດ ​ໂດຍ​ກໍ​ເປັນ​ການ​ຮ່ວມ​ມື​ກັບ​ບັນດາ​ປະ​ເທດ​ເພື່ອນ​ບ້ານ​ໃນ​ເຂດ​ລຸ່ມ​ແມ່ນ້ຳຂອງ​ດ້ວຍ​ກັນ ດັ່ງ​ທີ່​ເຈົ້າໜ້າທີ່​ຂັ້ນສູງ​ໃນ EDL ​ໄດ້​ໃຫ້ການຊີ້ແຈງວ່າ:

ໃນກອບ​ການ​ຮ່ວມ​ມື ​ແລະ ການພັດທະນາ​ເສດ​ທະ​ກິດ​ຕາມ​ລາມ​ແມ່ນ້ຳຂອງ​ ວຽກງານ​ການ​ສົ່ງ​ເສີມ​ພະລັງງານ​ຕົວ​ແທນ ​ແລະ ອະນຸລັກ​ພະລັງ​ງານ​ແມ່ນໜຶ່ງ​ໃນ​ວຽກດັ່ງ​ກ່າວ. ສະ​ເພາະ​ສົກ​ປີ 2008-2009​ ນີ້ ໃນ​ກອບ​ການ​ຮ່ວມ​ມື​ລະຫວ່າງ​ກະຊວງ​ພະລັງງານ​ແຫ່ງ​ປະ​ເທດ​ໄທ ​ແລະ ກະຊວງ​ພະລັງງານ ​ແລະ ບໍ່​ແຮ່ ຂອງ ສ.ປ.ປ. ລາວ ກໍ​ໄດ້​ມີ​ການ​ຮ່ວມ​ມື​ກັນ​ຢູ່ ສາມ-ສີ່ໂຄ​ງ ການ ​ແລະ ວຽກງານ​ການ​ສົ່ງ​ເສີມ​ການ​ປະຢັດ​ພະລັງງານ​ ​ແລະ ອານຸລັກ​ພະລັງງານນີ້ ຖື​ວ່າແມ່ນ ໜຶ່ງ​ໃນ​ບັນດາ​ວຽກງານ​ດັ່ງກ່າວ.

ຊົງຣິດ ​ໂພນ​ເງິນ ລາຍ​ງານ​ຈາກ​ບາງກອກ​ໃນ​ວັນ​ທີ 27 ພຶດສະພາ 2009

XS
SM
MD
LG