ທາງການລາວຍອມຮັບວ່າ ແມ່ຍິງຊາວອັງກິດທີ່ຕົກເປັນຈຳເລີຍໃນຄະດີລັກລອບຂົນຢາເສບຕິດຈາກລາວ ໄປຕ່າງປະເທດທີ່ຕັ້ງ ຄັນນັ້ນ ເປັນການຕັ້ງຄັນຫລັງຈາກທີ່ຖືກທາງການລາວຈັບກຸມຕົວໄດ້ແລ້ວ ຊຶ່ງກໍຄື ເປັນການຕັ້ງຄັນໃນລະຫວ່າງທີ່ຖືກຄຸມຂັງ ຈຶ່ງເຮັດໃຫ້ທາງການລາວຈໍາເປັນທີ່ຈະຕ້ອງສືບຫາຄວາມຈິງໃຫ້ໄດ້ວ່າ ແມ່ຊາວອັງກິດຄົນນີ້ຕັ້ງຄັນ ຫລື ຖືພາໄດ້ແນວໃດ.
ທ່ານ ພັນໂທຄຳພອນ ສີຫາປັນຈະ ຫົວໜ້າ ກົມຄວບຄຸມຢາເສບຕິດ ກະຊວງປ້ອງກັນຄວາມສະງົບພາຍໃນລາວ ໄດ້ຖະແຫລງ ຍອມຮັບວ່າ ການຟ້ອງຮ້ອງຕໍ່ສານປະຊາຊົນເພື່ອດຳເນີນຄະດີກັບ ນາງ ສາມານທ້າ ໂອໂຣບາເທີ້ ຊາວອັງກິດໄວ 20 ປີ ໃນຄວາມຜິດກ່ຽວກັບຢາເສບຕິດນັ້ນ ຈະຕ້ອງຊັກຊ້າອອກໄປອີກ ຍ້ອນວ່າ ຜົນຈາກການຕົວຄັນຂອງນາງພົບວ່າ ນາງ ສາມານທ້າ ໄດ້ຕັ້ງຄັນ ແລະ ຖືພາ ຫລັງຈາກທີ່ນາງໄດ້ຖືກຈັບກຸມຕົວໄດ້ແລ້ວ ກໍຄື ໃນຂະນະທີ່ນາງໄດ້ຖືກຄຸມຂັງ ຢູ່ພາຍໃນຄຸກໂພນຕ້ອງໃນເຂດນະຄອນຫລວງວຽງຈັນ ແລ້ວ ນັ້ນເອງ. ທັງນີ້ ໂດຍຈາກການກວດຄັນຂອງ ນາງ ສາມານທ້າ ເມື່ອ ວັນທີ 4 ເມສາ ທີ່ຜ່ານມາກໍພົບວ່າ ນາງ ສາມານທ້າ ໄດ້ຕັ້ງຄັນ ແລະ ຖືພາແລ້ວເປັນເວລາທີ່ 17 ສັບປະດາ ຫລືວ່າ ກືນກວ່າ 24 ສັບປະດາ ຫລືວ່າ ປະມານ 7 ເດືອນແລ້ວຈົນເຖິງປະຈຸບັນນີ້ ໃນຂະນະທີ່ທາງການລາວໄດ້ທຳການຈັບກຸມ ນາງ ສາມານທ້າ ນັບຕັ້ງແຕ່ເດືອນສິງຫາ ປີກາຍ ຫລື ກວ່າ 40 ສັບປະດາທີ່ຜ່ານມາ ເພາະສະນັ້ນ ຈຶ່ງເຮັດໃຫ້ທາງການລາວຕ້ອງທຳການສືບຫາຄວາມຈິງໃຫ້ໄດ້ ວ່າ ນາງ ສາມານທ້າ ສາມາດຕັ້ງຄັນ ໄດ້ແນວໃດ ໃນເມື່ອວ່າຖືກຄຸມຂັງຢູ່ໃນຄຸກຕະຫລອດເວລາ ກັບທັງຍັງເປັນການຄວບຄຸມຕົວ ໂດຍແຍກອອກຈາກນັກໂທດເພດຊາຍຢ່າງເດັດຂາດ ແລະ ທີ່ຄອຍຄວບຄຸມຕົວ ນາງ ສາມານທ້າ ນັ້ນ ກໍເປັນພະນັກງານເພດຍິງຂອງລາວອີກດ້ວຍ. ສ່ວນທາງດ້ານ ນາງ ສາມານທ້າ ເອງກໍບໍ່ເຄີຍຟ້ອງຮ້ອງ ຫລື ກ່າວໂທດ ແລະ ກ່າວຫາວ່ານາງຖືກຂົ່ມຂືນຢູ່ໃນລະຫວ່າງການຖືກຄຸມຂັງຢູ່ໃນຄຸກອີກດ້ວຍ.
ແຕ່ຢ່າງໃດກໍຕາມ ກ່ອນໜ້ານີ້ ກໍຄືຫລັງຈາກຖືກຈັບກຸມຕົວໄດ້ໃໝ່ໆ ທາງຝ່າຍຂອງນາງ ສາມານທ້າ ກໍເຄີຍໄດ້ຢືນຢັນກັບທາງການລາວວ່າ ນາງໄດ້ຕັ້ງຄັນກັບຄົນຮັກຢູ່ປະເທດອັງກິດ ຫາກແຕ່ທາງການລາວກໍໄດ້ນຳຕົວໄປກວດສຸຂະພາບຮ່າງກາຍ ກໍພົບວ່າບໍ່ມີການຕັ້ງຄັນແຕ່ຢ່າງໃດ.
ໂດຍທາງການລາວໄດ້ມາກວດພົບວ່າ ນາງ ສາມານທ້າ ໄດ້ຕັ້ງຄັນແລ້ວໃນເມື່ອ ເດືອນມີນາ ປີນີ້ ແລະ ທີ່ໜ້າສັງເກດກໍຄື ໃນຊ່ວງເດືອນພຶດສະຈິກາປີກາຍນາຍແເພດຊາວອັອສເຕຣເລຍ ໄດ້ເຂົ້າໄປທຳການກວດສຸຂະພາບຂອງນາງ ສາມານທ້າ ເຖິງເຈັດຄັ້ງໃນເດືອນດັ່ງກ່າວ ຫາກແຕ່ໃນການຕວດສຸຂະພາບທຸກຄັ້ງກໍຍັງຈະຕ້ອງຜ່ານການກວດຄົ້ນຈາກເຈົ້າໜ້າທີ່ຂອງຄຸກໂພນຕ້ອງໃນທຸກໆ ຄັ້ງ. ສ່ວນທາງດ້ານ ດັອກເຕີ້ ບົວວັນ ແສນສະຖິດ ຜູ້ອຳນວຍການໂຮງໝໍເພື່ອສຸຂະພາບແມ່ ແລະ ເດັກ ແຫ່ງປະເທດລາວ ກໍໄດ້ໃຫ້ການຊີ້ແຈງວ່າມີຄວາມເປັນໄປໄດ້ ທີ່ນາງ ສາມານທ້າ ເຮັດໃຫ້ຕົວເອງຕັ້ງຄັນໄດ້ດ້ວຍຕົນເອງ ດ້ວຍການສີດເອົານໍ້າອະສຸຈິິຂອງເພດຊາຍເຂົ້າໄປໃນຊ້ອງຄອດໃນຂະນະ ທີ່ມີການຕົກໄຂ່ເກີດຂຶ້ນ ຫາກແຕ່ບັນຫາກໍຄືວ່າ ນາງໄດ້ຮັບນ້ຳເຊື້ອອະສຸຈິ ຂອງເພດຊາຍມາໄດ້ແນວໃດ ຊຶ່ງທາງການລາວຈະຕ້ອງສືບຫາຄວາມຈິງໃຫ້ໄດ້ ກ່ອນທີ່ຈະມີການຟ້ອງຮ້ອງຄະດີຕໍ່ສານປະຊາຊົນຕໍ່ໄປ. ແຕ່ຢ່າງໃດກໍຕາມ ກ່ອນໜ້ານີ້ ທາງການລາວກໍໄດ້ ຢືນຢັນແລ້ວວ່າ ນາງ ສາມານທ້າ ຈະບໍ່ຖືກສານຕັດສິນໂທດເຖິງຂັ້ນປະຫານຊີວິຢ່າງແນ່ນອນ ຍ້ອນວ່ານາງຕັ້ງຄັນນັ້ນໄດ້ເຮັດໃຫ້ນາງໄດ້ຮັບການຍົກເວັ້ນໂທດປະຫານຊີວິດ, ຍິ່ງໄປກວ່ານັ້ນ ການທີ່ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ແລະ ລັດຖະມົນຕີວ່າການຕ່າງປະເທດຂອງລາວໄດ້ໄປລົງນາມໃນຂໍ້ຕົກລົງວ່າດ້ວຍການໂອນຕົວນັກໂທດຮ່ວມກັນກັບລັດຖະມົນຕີ ວ່າການຕ່າງປະເທດຂອງອັງກິດດ້ວຍແລ້ວ ກໍຍັງເຮັດໃຫ້ທາງການອັງກິດສາມາດທີ່ຈະຂໍເອົາຕົວນາງ ສາມານທ້າ ໄປລົງໂທດຢູ່ປະເທດອັງກິດໄດ້ຕໍ່ໄປອີກດ້ວຍ ຫລັງຈາກທີ່ໄດ້ມີການຕັດສິນຄະດີໃນປະເທດລາວສິ້ນສຸດແລ້ວ ດັ່ງທີ່ ທ່ານ ທອງລຸນ ໄດ້ກ່າວຊີ້ແຈງໃນຕອນໜຶ່ງວ່າ:
ຂ້າພະເຈົ້າໄດ້ລົງນາມໃນສັນຕິສັນຍາສົ່ງນັກໂທດຊຶ່ງກັນ ແລະ ກັນ ຢູ່ລອນດອນ ກັບທ່ານ ລັດຖະມົນຕີຕ່າງປະເທດຂອງອັງກິດແລ້ວ ພວກເຮົາຈະປະຕິບັດຕາມສັນຕິສັນຍານັ້ນ. ລັດຖະບານລາວກໍມີນາຍໂຍບາຍມະນຸດສະທຳກ່ຽວກັບເລື້ອງນີ້ ກໍມີບົ່ງໄວ້ຢູ່ໃນມາດຕາທີ່ວ່າ ຫ້າມບໍ່ໃຫ້ລົງໂທດປະຫານຊີວິດຜູ້ທີ່ຖືພາຢູ່.
ຊົງຣິດ ໂພນເງິນ ລາຍງານຈາກບາງກອກ ໃນວັນທີ 26 ພຶດສະພາ 2009
