ປາກິສະຖານ: ກຳລັງຮັກສາຄວາມປອດພັຍ ຂອງປາກີສຖານອອກຕາມລ່າສັດຕູ ຢູ່ຕາມຖະນົນຫົນທາງ ທຸກໆສາຍ ໃນໃຈກາງເມືອງໃຫຍ່ຂອງເຂດຮ່ອມພູ Swat ໃນອັນທີ່ກອງທັບປາກີສຖານ ກ່າວວ່າເປັນການສູ້ລົບກັນຢ່າງຮຸນແຮງ. ກຳລັງທະຫານໄດ້ບຸກເຂົ້າໄປໃນເມືອງ Mingora ວັນເສົາວານນີ້ ໂດຍແນເປົ້າໃສ່ພວກກະບົດຕາລີບານ ໃນຕົວເມືອງທີ່ມີປະຊາຊົນອາໃສຢູ່ ປະມານ 20 ພັນຄົນ. ພົນຕຣີ Athar Abass ໂຄສົກກອງທັບປາກີສຖານກ່າວວ່າ ການປະ ຕິບັດການທາງທະຫານເພື່ອຍືດເອົາເມືອງດັ່ງກ່າວຄືນມານັ້ນ ຈະເປັນໄປຢ່າງຊັກຊ້າຫລາຍທີ່ສຸດ ແລະທ່ານຢ້ານກົວວ່າ ພວກຕາລີບານຈະພະຍາຍາມ ໃຊ້ພົນລະເຮືອນເປັນເຄື່ອງກຳບັງພວກເຂົາ. ມາຮອດປັດຈຸບັນນີ້ ກອງທັບລາຍງານວ່າ ພວກຫົວຮຸນແຮງຈຳນວນ 17 ຄົນ ພ້ອມກັບຜູ້ບັນຊາການລະດັບສູງຂອງພວກເຂົາຄົນນື່ງ ຖືກຂ້າຕາຍ. ກຳລັງທະຫານປາກີສຖານໄດ້ບຸກຄືບໜ້າເຂົ້າໄປໃນຕົວເມືອງດັ່ງກ່າວນີ້ ຫລາຍມື້ມາແລ້ວ ຍັງຜົນໃຫ້ປະຊາຊົນຫລາຍພັນຄົນເລີ່ມພາກັນຫລົບໜີ ອອກຈາກເມືອງ Mingora ໃນອາທິດຜ່ານມາ ຍ້ອນຢ້ານວ່າຈະມີການສູ້ລົບຢ່າງດຸເດືອດ.
ໂຊມາເລຍ: ຄົນວາງລະເບີດສະລະຊີບຄົນນື່ງ ໄດ້ເຮັດໃຫ້ເຈົ້າໜ້າທີ່ຮັກສາຄວາມປອດໄພ ສາມຄົນ ເສຍຊີວິດ ແລະໄດ້ຮັບບາດເຈັບອີກສີ່ຄົນ ໃນນະຄອນຫລວງ MOGADISHU ບ່ອນທີ່ພວກກະບົດມຸສລິມ ກຳລັງຕໍ່ສູ້ກັນຢ່າງໜັກ ກັບທະຫານຂອງຝ່າຍລັດຖະບານ. ເຈົ້າໜ້າທີ່ກ່າວວ່າ ຄົນຮ້າຍໄດ້ຂັບລົດບຸກເຂົ້າໄປໃນຄ້າຍທະຫານແຫ່ງນື່ງ ແລ້ວລະເບີດລົດຂື້ນ. ການສູ້ລົບກັນຢ່າງໜັກ ລະວ່າງກຳລັງຂອງລັດຖະບານກັບພວກກະບົດໃນໂຊມາເລຍ ໄດ້ບັງຄັບໃຫ້ປະຊາຊົນຫລາຍພັນຄົນ ຕ້ອງອົບພະຍົບຫລົບໜີຈາກບ້ານເຮືອນໄປ. ອົງການສະຫະປະຊາຊາດກ່າວ ໃນວັນອາທິດມື້ນີ້ວ່າ ມີຫລາຍຮອດ 8 ພັນຄົນ ຫລົບໜີຈາກເມືອງຫລວງໄປໃນວັນສຸກຜ່ານມາ ເຮັດໃຫ້ໂຕເລກພວກອົບພະຍົບເພີ່ມຂື້ນເປັນຮອດ 57 ພັນຄົນແລ້ວ. ມີລາຍງານຂ່າວວ່າ ໃນວັນສຸກວານນີ້ ມີຢ່າງນ້ອຍ 45 ຄົນເສຍຊີວິດ ແລະ 180 ກ່ວາຄົນ ໄດ້ຮັບບາດເຈັບ ໃນການບຸກໂຈມຕີຂອງຝ່າຍລັດຖະບານ ທີ່ແນໃສ່ເພື່ອຂັບໄລ່ພວກກະບົດຫົວແຂງກະດ້າງ ອອກໄປ ຈາກທີ່ໝັ້ນຂອງພວກເຂົາ ຢູ່ໃນເມືອງຫລວງນັ້ນ.
ສຣີລັງກາ: ລັດຖະບານສຣີລັງກາກ່າວວ່າ ຕົນຈະບໍ່ອະນຸຍາດໃຫ້ພວກພະນັກງານຊ່ວຍເຫລືອ ເຂົ້າໄປຍັງສູນອົບພະຍົບໄດ້ຢ່າງເຕັມທີ່ ຈົນກ່ວາວ່າຕົນຈະສາມາດແຍກພວກກະບົດ ທີ່ສົງໃສວ່າກຳລັງລີ້ຊ່ອນໂຕຢູ່ໃນໝູ່ພວກອົບພະຍົບນັ້ນ ອອກມາໄດ້ເສຍກ່ອນ. ປະທານາທິບໍດີ ມາຮິນດາ ຣາຊະພັກ ກ່າວໃນວັນອາທິດມື້ນີ້ວ່າ ເມື່ອໃດທີ່ສະຖານະການດີຂື້ນ ໂດຍສະເພາະໃນດ້ານຄວາມປອດໄພນັ້ນແລ້ວ ຈື່ງຈະບໍ່ມີການຄັດ ຄ້ານ ຕໍ່ການອະນຸຍາດໃຫ້ພວກພະນັກ ງານຊ່ວຍເຫລືອ ເຂົ້າໄປໃນສູນອົບພະຍົບ ຊື່ງຄຳຖະແຫລງຂອງທ່ານ ແມ່ນເປັນການຕອບຕໍ່ຄຳຮຽກຮ້ອງ ຂອງເລຂາທິການໃຫຍ່ອົງການສະຫະປະຊາຊາດ ທ່ານ ພັນກີມູນ ທີ່ຂໍໃຫ້ພວກອົງການຊ່ວຍເຫລືອເຂົ້າໄປໃນສູນອົບພະຍົບໄດ້ ຢ່າງບໍ່ມີຂໍ້ຈຳກັດຮັດແຄບໃດໆ. ທ່ານ ພັນກີມູນໄດ້ຮຽກຮ້ອງ ໃຫ້ມີການສະນອງການຊ່ວຍເຫລືອດ້ານມະນຸດສະທຳຫລາຍຂື້ນ ແກ່ພວກອົບພະຍົບ ຂະນະທີ່ທ່ານທຳການຢ້ຽມຢາມຫລາຍໆຄອບຄົວອົບພະຍົບ ແລະຄລີນິກກາງແຈ້ງແຫ່ງນື່ງ ຢູ່ໃນສູນອົບພະຍົບ MANIK FARM ໃນວັນເສົາວານນີ້. ສະຖານທີ່ດັ່ງກ່າວເປັນສູນອົບພະຍົບແຫ່ງທີ່ໃຫຍ່ທີ່ສຸດ ໃນພາກເໜືອຂອງປະເທດ ໂດຍມີອົບພະຍົບອາໃສຢູ່ປະມານ 2/3 ຂອງຈຳນວນພວກຫລົບໄພທັງໝົດ ເກືອບສາມແສນຄົນ ຈາກການສູ້ລົບກັນລະວ່າງທະຫານຝ່າຍລັດຖະບານ ກັບພວກກະບົດເສືອທະມິນ.
ການແຕກຕື່ນຢຽບກັນຕາຍທີ່ໂມຣອ໊ກໂກ: ທາງການຕຳຫລວດໂມຣອ໊ກໂກກ່າວວ່າ ໄດ້ເກີດເຫດການ ປະຊາຊົນຫລາຍພັນຄົນ ແຕກຕື່ນແລ່ນຢຽບກັນໃນງານສະແດງດົນຕຣີໃນເມືອງຫລວງ Rabat ທີ່ຍັງຜົນໃຫ້ຜູ້ເຂົ້າຊົມ ເສຍຊີວິດຢ່າງໜ້ອຍ 11 ຄົນແລະບາດເຈັບອີກ 30 ຄົນ. ທາງການໂມຣອ໊ກໂກກ່າວວ່າ ໃນຈຳນວນພວກທີ່ເສຍຊີວິດ ຫລັງຈາກງານສະແດງດົນຕຣີໃນແລງວັນເສົາວານນີ້ ມີແມ່ຍິງຫ້າຄົນ ຜູ້ຊາຍສີ່ຄົນ ແລະເດັກນ້ອຍສອງຄົນ. ທາງການກ່າວຕື່ມວ່າ ຜູ້ຄົນພາກັນອັ່ງອໍກັນຢ່າງໜາແໜ້ນ ຈົນເຮັດໃຫ້ຮົ້ວກັ້ນໃນສະຖານທີ່ສະແດງດົນຕຣີພັງລົງມາ ຊຶ່ງປະມານວ່າ ມີຄົນ 70 ພັນຄົນເຂົ້າຊົມງານສະແດງດົນຕຣີ ຂອງນາຍ Abdelaziz Stati ນັກສິລະປິນຊາວໂມຣອ໊ກໂກທີ່ມີຊື່ສຽງ ທີ່ສະນາມກີລາ Hay Nahda. ສາເຫດທີ່ພາໃຫ້ເກີດພວກຄົນແຕກຕື່ນຄັ້ງນີ້ ຍັງບໍ່ເປັນທີ່ແຈ້ງຂາວເທື່ອ.
ມຽນມ້າ: ທະນາຍຄວາມຂອງທ່ານນາງອອງຊານ ຊູຈີ ຜູ້ນຳຝ່າຍຄ້ານໃນມຽນມ້າ ກ່າວວ່າ ພວກເຂົາເຈົ້າ ຈະເລີ່ມສະເນີການແກ້ຄະດີໃຫ້ທ່ານນາງໃນອາທິດນີ້. ທ່ານນາງອອງຊານ ຊູຈີ ຜູ້ໄດ້ຮັບລາງວັນໂນແບລ ຂະແນງສັນຕິພາບ ໄດ້ໃຫ້ການຕໍ່ສານວ່າຕົນບໍ່ໄດ້ກະທຳຜິດໃດໆໃນຂໍ້ຫາທີ່ວ່າ ທ່ານນາງໄດ້ຝ່າຝືນເງື່ອນໄຂຕ່າງໆຂອງການກັກບໍລິເວນນັ້ນ. ຂໍ້ກ່າວຫາຕ່າງໆ ຊື່ງທາງການສານຂອງມຽນມາໄດ້ຮັບເອົາຢ່າງເປັນທາງການໃນມື້ວັນສຸກຜ່ານມານັ້ນ ແມ່ນສືບເນື່ອງມາ ຈາກເຫດການເມື່ອຕົ້ນເດືອນນີ້ ທີ່ມີຊາວອາເມລິກັນຄົນນຶ່ງ ລອຍນ້ຳເຂົ້າໄປຫາ ທີ່ພັກຂອງທ່ານນາງ ຢູ່ແຄມທະເລສາບ ແລະໄດ້ອາໃສຢູ່ທີ່ນັ້ນເປັນເວລາສອງມື້. ທະນາຍຄວາມຂອງທ່ານນາງອອງຊານຊູຈີ ກ່າວວ່າ ທ່ານນາງ ກໍໄດ້ບອກໃຫ້ຊາຍຄົນນັ້ນ ໜີອອກໄປ ແຕ່ ຜູ້ກ່ຽວມີຮ່າງກາຍອ່ອນເພຍຫລາຍ ແລະບໍ່ສາມາດທີ່ຈະລອຍນ້ຳກັບຄືນໄດ້. ການດຳເນີນຄະດີຂອງທ່ານນາງໃນຄັ້ງນີ້ ໄດ້ເຮັດໃຫ້ນາໆຊາດປະນາມວ່າ ເປັນການກະທຳທີ່ຮຸນແຮງເກີນໄປ ແລະຮຽກຮ້ອງໃຫ້ປ່ອຍຕົວທ່ານນາງໃນທັນທີ.
ມົງໂກເລຍ: ປະຊາຊົນໃນປະເທດມົງໂກເລຍ ພາກັນໄປປ່ອນບັດໃນວັນອາທິດມື້ນີ້ ເພື່ອເລືອກເອົາປະທາ ນາທິບໍດີຄົນໃໝ່ ຊື່ງເປັນການແຂ່ງຂັນກັນໃນລະວ່າງປະທານາທິບໍດີທີ່ກຳລັງຈະພົ້ນຈາກຕຳແໜ່ງ ທ່ານ Nambaryn Enkhbayar ຈາກພັກປະຕິວັດປະຊາຊົນມົງໂກເລຍຂອງລັດຖະບານຊຸດປັດຈຸບັນ ກັບຜູ້ນຳຝ່າຍຄ້ານ ທ່ານ Tsakhia Elbegdorj ຈາກພັກປະຊາທິປັດ. ທ່ານ Elbegdorj ໄດ້ໃຫ້ຄຳໝັ້ນສັນຍາ ໃນການໂຄສະນາຫາສຽງຂອງທ່ານວ່າ ຈະປັບປຸງເສດຖະກິດຂອງຊາດໃຫ້ດີຂື້ນ ໂດຍການພັດທະນາພາກສ່ວນບໍ່ແຮ່ ແລະເຂດຊົນນະບົດ ພ້ອມທັງຈະຫລຸດຜ່ອນ ຄວາມທຸກຈົນຂອງປະ ຊາຊົນ ແລະປາບປາມການສໍ້ລາດບັງຫລວງ. ທ່ານໃຫ້ຄຳໝັ້ນສັນຍາອີກວ່າ ຈະຮັປປະກັນໃຫ້ຊາວມົງໂກເລຍທຸກຖ້ວນໜ້າ ໄດ້ຊົມໃຊ້ຜົນປະໂຫຍດຈາກຊັບພະກອນທຳມະຊາດ ອັນມະຫາສານຂອງປະເທດ. ມົງໂກເລຍເປັນປະເທດ ທີ່ອຸດົມສົມບູນໄປດ້ວຍບໍ່ແຮ່ ອັນມີໂຮມທັງ ທອງແດງ ຄຳ ທາດຢູເຣນຽມ ກົ່ວ ແລະ ສັງກະສີ. ຢ່າງໃດກໍຕາມ ຜົນການສຳຫລວດຫາງສຽງປະຊາຊົນກ່ອນການເລືອກຕັ້ງ ສະແດງໃຫ້ເຫັນວ່າ ປະທານາທິບໍດີ ENKHBAYAR ມີຄະແນນ ນຳໜ້າໜ້ອຍນື່ງ. ປະຊາຊົນມົງໂກເລຍ ເລືອກເອົາປະທານາທິບໍດີ ທຸກໆ 4 ປີ.
ເນປາລ: ສະພາແຫ່ງຊາດຂອງເນປາລ ໄດ້ເລືອກເອົາຜູ້ນຳຄອມມິວນິສຕ໌ຫົວປານກາງ ໃຫ້ເປັນນາຍົກລັດ ຖະມຸນຕີຂອງປະເທດ ໃນຄວາມພະຍາຍາມເພື່ອຍຸຕິຄວາມປັ່ນປ່ວນ ທາງການເມືອງ ທີ່ດຳເນີນມາເປັນເວລາຫລາຍອາທິດແລ້ວນັ້ນ. ທ່ານ Madhav Kumar Nepal ໄດ້ຖືກເລືອກເອົາຢ່າງບໍ່ມີຄູ່ແຂ່ງ ໃນການລົງຄະແນນສຽງໃນວັນເສົາວານນີ້ ທີ່ນະຄອນຫລວງກັດມັນດູ ບໍ່ເທົ່າໃດຊົ່ວໂມງ ຫລັງຈາກເກີດເຫດການວາງລະເບີດຢູ່ໂບດແຫ່ງນື່ງ ທາງທິດໃຕ້ຂອງເມືອງຫລວງ ເຮັດໃຫ້ສອງຄົນເສຍຊີວິດ. ທ່ານເນປາລ ເປັນຫົວໜ້າພັກຄອມມິວນິສຕ໌/ສາມັກຄີ Marx-Lenin ຂອງເນປາລ. ທ່ານຈະຂື້ນດຳລົງຕຳແໜ່ງນາຍົກລັດຖະມຸນຕີແທນທ່ານ Pushpa Kamal Dahal ຫລືທີ່ເອີ້ນກັນສັ້ນໆວ່າ ທ່ານ Prachanda ຫົວໜ້າພັກທີ່ນິຍົມລັດທິເໝົາເຈີຕຸງທີ່ໄດ້ລາອອກໃນເດືອນນີ້ ໃນການຜິດຖຽງກັນກັບປະທານາທິບໍດີຂອງເນປາລ.
ຟັງສຽງພາສາລາວໄດ້ ໂດຍຄລິກ ຢູ່ປຸ່ມທາງເທິງຂວາມື
