ອົງການ ແພດບໍ່ມີພົມແດນປະກາດຢຸດເຊົາການ ດຳເນີນງານໃຫ້ຄວາມຊ່ວຍເຫລືອ ດ້ານມະນຸດສະຍາທໍາ ແກ່ບັນດາຊາວມົ້ງ ຢູ່ສູນຮອງຮັບຊົ່ວຄາວບ້ານຫ້ວຍນໍ້າຂາວໂດຍ ໃຫ້ເຫດຜົນວ່າບໍ່ ສາມາດທີ່ຈະປະຕິບັດງານ ພາຍໃຕ້ສະພາບກົດດັນ ຈາກກອງ ທັບພາກ ທີສາມ ຂອງໄທໄດ້ອີກຕໍ່ໄປ ແລະ ກໍບໍ່ ເຫັນດີກັບການທີ່ ທາງການໄທໄດ້ບີບບັງຄັບ ໃຫ້ຊາວມົ້ງເດີນທາງກັບໄປລາວ.
ທ່ານ ກີລວສ ໄອຊາສ (Gilles Isard) ຫົວໜ້າຄະນະປະຕິ ບັດງານປະຈຳປະເທດໄທ ຂອງອົງການ ແພດບໍ່ມີພົມແດນ ຫລື (Medecins Sans Frontieres) ໄດ້ຖະແຫລງການຢືນຢັນວ່າ ອົງການ ແພດບໍ່ມີພົມແດນ ໄດ້ຕັດສິນໃຈຢຸດເຊົາ ແລະຖອນຕົວຈາກການດຳເນີນງານເພື່ອໃຫ້ຄວາມຊ່ວຍເຫລືອ ດ້ານມະນຸດສະທຳແກ່ບັນດາຊາວມົ້ງທີ່ພັກອາໃສຢູ່ສູນຮອງຮັບຊົ່ວຄາວໃນເຂດອຳເພີເຂົາຄໍ້ຈັງຫວັດເພັດສະບູນ ທາງພາກເໜືອຕອນຫລ່າງຂອງປະເທດໄທ ຢ່າງເປັນທາງການແລ້ວ ໃນຂະນະນີ້. ສາເຫດທີ່ເຮັດໃຫ້ອົງການແພດບໍ່ມີພົມແດນ ຕ້ອງຕັດສິນໃຈດັ່ງກ່າວ ກໍຍ້ອນວ່າ ບໍ່ສາມາດທີ່ຈະປະຕິ ບັດງານພາຍໃຕ້ສະພາບການກົດດັນຈາກ ເຈົ້າໜ້າທີ່ທະຫານຈາກກອງທັບພາກທີສາມ ຂອງໄທໄດ້ອີກຕໍ່ໄປລວມ ທັງຍັງບໍ່ເຫັນດ້ວຍ ແລະ ບໍ່ສາມາດທີ່ຈະຍອມຮັບເອົາໄດ້ກັບການດຳເນີນມາດຕະການກົດດັນ ໃຫ້ບັນດາຊາວມົ້ງ ສະໝັກໃຈເດີນທາງກັບຄືນໄປປະເທດລາວ. ຍິ່ງໄປກວ່ານັ້ນກອງທັບພາກທີ່ ສາມຂອງໄທ ຍັງໄດ້ດຳເນີນມາດຕະການ ປິດກັ້ນ ແລະ ປະຕິເສດການເຂົ້າໄປມີສ່ວນຮ່ວມຂອງອົງ ການລະ ຫວ່າງຊາດຕ່າງໆ ທີ່ຕ້ອງການຈະຍື່ນມືເຂົ້າໄປໃຫ້ຄວາມຊ່ວຍເຫລືອແກ່ຊາວມົ້ງຢູ່ບ້ານຫ້ວຍນໍ້າຂາວ ມາໂດຍ ຕະຫລອດທັງໆ ທີ່ວ່າພາຍໃຕ້ຫລັກການສາກົນແລ້ວ ຊາວມົ້ງເຫລົ່ານີ້ມີສິດທີ່ຈະໄດ້ຮັບຄວາມຊ່ວຍເຫລືອດ້ານມະນຸດສະທຳລວມໄປເຖິງການມີສິດທີ່ຈະໄດ້ຮັບການພິຈາລະນາເພື່ອຮັບຮອງໃຫ້ໄປຕັ້ງຖິ່ນຖານໃໝ່ ຢູ່ໃນປະເທດທີ່ສາມອີກດ້ວຍ. ຫາກແຕ່ວ່າ ພວກເຂົາເຈົ້າ ກໍບໍ່ເຄີຍ ໄດ້ຮັບສິດດັ່ງກ່າວເລີຍ ເນື່ອງຈາກທາງການໄທຖືວ່າຊາວມົ້ງເຫລົ່ານີ້ ເປັນພຽງແຕ່ຄົນຕ່າງດ້າວທີ່ເຂົ້າເມືອງໄທໂດຍຜິດກົດໝາຍ ທີ່ຈະຕ້ອງສົ່ງກັບຄືນໄປລາວພຽງແຕ່ສະຖານດຽວ.
ໃນໂອກາດດຽວກັນນີ້ ທ່ານ ກີວແລດສ ໄອຊາສ (Gilles Isard) ຍັງໄດ້ຮຽກຮ້ອງຂໍໃຫ້ທາງການໄທ ແລະ ລາວຢຸດເຊົາການດຳເນີນມາດຕະການກົດດັນໃຫ້ຊາວມົ້ງສະໝັກໃຈເດີນທາງກັບ ຄືນໄປລາວ ແລະ ຍອມອະນຸ ຍາດ ໃຫ້ພາກສ່ວນທີ່ສາມທີ່ເປັນເອກະເທດ ຈາກທາງການລາວ ແລະ ໄທ ເພື່ອໃຫ້ສາມາດເຂົ້າໄປພິຈາລະນາຕັດສິນໃຈກ່ຽວກັບການໃຫ້ສະຖານະຂອງການເປັນຊາວອົບພະຍົບຕໍ່ຊາວມົ້ງໄດ້ອີກດ້ວຍ.
ອົງການແພດບໍ່ມີພົມແດນ ເປັນອົງການລະຫວ່າງຊາດ ພຽງແຕ່ອົງການດຽວເທົ່ານັ້ນ ທີ່ໄດ້ດຳເນີນການໃຫ້ຄວາມຊ່ວຍເຫລືອ ດ້ານມະນຸດສະຍາທຳແກ່ບັນດາຊາວມົ້ງຢູ່ບ້ານຫ້ວຍນ້ຳຂາວ ນັບຕັ້ງແຕ່ປີ 2005 ເປັນຕົ້ນ ມາ. ເພາະສະນັ້ນ ການຕັດສິນໃຈຢຸດເຊົາດຳເນີນມາດຕະການດັ່ງກ່າວໃນຄັ້ງລ້າສຸດນີ້ ຈຶ່ງໄດ້ສົ່ງຜົນກະທົບຕໍ່ ຊາວມົ້ງຢູ່ບ້ານຫ້ວຍນ້ຳຂາວຢ່າງໜັກຫນ່ວງ ກັບທັງຍັງເປັນການກົດດັນໃຫ້ຊາວມົ້ງຕ້ອງພາກັນສະໝັກໃຈ ເດີນທາງກັບຄືນໄປລາວໄວຂຶ້ນຕາມຄວາມຕ້ອງການຂອງທາງການລາວ ແລະ ໄທອີກຕ່າງຫາກເນື່ອງຈາກວ່າ ຊາວມົ້ງບໍ່ເຫລືອຫນ່ວຍງານໃດເລີຍທີ່ຈະໃຫ້ຄວາມຊ່ວຍເຫລືອແກ່ພວກເຂົາເຈົ້າຕໍ່ໄປອີກແລ້ວ ໃນຂະນະທີ່ທາງການໄທກຳລັງກົດດັນພວກເຂົາເຈົ້າຕະຫລອດເວລາເພື່ອໃຫ້ເດີນທາງກັບຄືນໄປລາວ, ດັ່ງທີ່ທ້າວ ຫລີສື ແກນ ນຳຄົນສຳຄັນແກ່ຊາວມົ້ງຢູ່ບ້ານຫ້ວຍນ້ຳຂາວ ໄດ້ໃຫ້ການອະທິບາຍເຖິງສະພາບການທີ່ເປັນຢູ່ຂອງບັນດາຊາວມົ້ງໃນ ເວລານີ້ກັບ VOA ວ່າ:
ເຈົ້າໜ້າທີ່ໄທໄດ້ກົດດັນຊາວມົ້ງປ່າ ແລ້ວກໍ້ມົ້ງລາວໄປລາວໃຫ້ ໝົດ. ຕອນນີ້ ພວກເຈົ້າໜ້າທີ່ໄທເຂົາເຈົ້າກໍໄລ່ ທ່ານໝໍພົມແດນໃຫ້ອອກໃຫ້ຖອນຕົວໃຫ້ໝົດ. ເຈົ້າໜ້າ ທີ່ໄທກໍບໍ່ໃຫ້ ທ່ານໝໍ ພົມແດນ ແຈກຢາ ແລ້ວກໍບໍ່ໃຫ້ ແຈກເຂົ້າໃຫ້ກິນແລ້ວ. ທ່ານ ໝໍພົມແດນ ເຂົາກໍ່ຈະຖອນຕົວອອກໃຫ້ໝົດ, ຕອນນີ້ ຢາກຣ້ອງຂໍວ່າ ຂໍໃຫ້ລັດຖະ ບານໄທ ແລະ ເຈົ້າໜ້າທີ່ໄທ ໃຫ້ມີຄວາມເປັນທຳໃຫ້ພວກມົ້ງປ່ານີ້. ພວກມົ້ງ ປ່ານີ້ ບໍ່ແມ່ນມົ້ງຄອມມີວນິດ ແມ່ນມົ້ງເສລີ ປີ 85 ນີ້ ພວກມົ້ງປ່ານີ້ ກໍໄດ້ຊ່ວຍຮົບຢູ່ທີ່ບ້ານຮ່ວມເກົ້ານີ້ນ໋ະ ມັນບໍ່ເໝາະສົມທີ່ລັດຖະບານໄທ ແລະ ເຈົ້າໜ້າທີ່ໄທ ຈະເຮັດ ຈັ່ງຊີ້ກັບພວກມົ້ງປ່າ.
ໃນປະຈຸບັນ ຍັງຄົງເຫລືອຊາວມົ້ງເກືອບ 5.000 ຄົນ ທີ່ພັກອາໃສຢູ່ສູນຮອງຮັບ ຊົ່ວຄາວບ້ານຫ້ວຍ ນ້ຳຂາວ ຊຶ່ງທາງການລາວ ແລະໄທໄດ້ຕັ້ງເປົ້າໝາຍວ່າຈະສົ່ງພວກເຂົາເຈົ້າກັບຄືນໄປລາວ ແລະ ຮັບເອົາໃຫ້ໄດ້ທັງໝົດ ພາຍໃນທ້າຍປີນີ້ຕໍ່ໄປ.
ຊົງຣິດ ໂພນເງິນ ລາຍງານຈາກບາງກອກ ໃນວັນທີ 21 ພຶດສະພາ 2009
