<!-- IMAGE -->
ຜູ້ນຳພັກຝ່າຍຄ້ານຂອງມຽນມາ ທ່ານນາງອອງຊານຊູຈີ ທີ່ໄດ້ເປັນສັນລະລັກແຫ່ງຄວາມໃຝ່ຝັນຂອງປະຊາຊົນ ມຽນມາ ມາເປັນເວລາດົນນານໃນການຢາກມີປະເທດທີ່ປົກຄອງດ້ວຍລະບອບປະຊາທິປໄຕນັ້ນ ໄດ້ຖືກກັກບໍລິເວນໃຫ້ຢູ່ໃນແຕ່ບ້ານເຮືອນຕລອດເວລາສ່ວນໃຫຍ່ຂອງລະຍະ 19 ປີຜ່ານມາ ແລະກໍປາກົດວ່າ ເຈົ້າໜ້າທີ່ຣັຖບານ ທະຫານມຽນມາອາດກຳລັງກຽມຈະສືບຕໍ່ກັກບໍລິເວນທ່ານນາງຕໍ່ໄປອີກລະຍະນຶ່ງກໍເປັນໄດ້. ຂໍ້ຫາໃໝ່ທີ່ມີຕໍ່ທ່ານນາງນັ້ນແມ່ນບໍ່ຍຸຕິທຳດັ່ງດຽວກັບຂໍ້ຫາຕ່າງໆໃນເມື່ອກ່ອນ ທີ່ໄດ້ເປັນເຫດໃຫ້ທ່ານນາງຖືກຈັບເທື່ອທຳອິດໃນປີ 1990 ນັ້ນ ແລະສະຫະຣັຖກໍຮຽກຮ້ອງຮ່ວມກັບປະຊາຄົມໂລກໃຫ້ຣັຖບານມຽນມາປ່ອຍຕົວທ່ານນາງຢ່າງຮີບດ່ວນ.
ທ່ານນາງອອງຊານຊູຈີ ທີ່ໄດ້ຮັບລາງວັນໂນແບລຂະແນງສັນຕິພາບ ໄດ້ຖືກນຳຕົວໄປຈາກບ້ານພັກເມື່ອວັນທີ່ 14 ພືດສະພາຜ່ານມານີ້ ໂດຍພວກເຈົ້າໜ້າທີ່ຣັຖບານທະຫານມຽນມາ ທີ່ບອກທ່ານນາງວ່າ ທ່ານນາງຈະຖືກດຳເນີນຄະດີໃນຂໍ້ຫາຝ່າຝືນ ເງຶ່ອນໄຂຂອງການກັກບໍລິເວນ ຊື່ງມີສາເຫດມາຈາກເຫດການທີ່ຊາຍຄົນນື່ງທີ່ເປັນແຂກຢ້ຽມຢາມ ທີ່ບໍ່ໄດ້ຖືກເຊີນ ໄດ້ລັກລອບເຂົ້າໄປໃນບ້ານຂອງທ່ານນາງທີ່ມີຄົນຍາມເຝົ້າ ຢູ່ນັ້ນເມື່ອອາທິດຜ່ານມານີ້ ຊຶ່ງຖືວ່າເປັນ ການຝ່າຝືນກົດທີ່ຫ້າມບໍ່ໃຫ້ທ່ານນາງພົບປະກັບບຸກຄົນໃດ ນອກຈາກຈະໄດ້ຮັບອະນຸຍາດຈາກຣັຖບານເສຍກ່ອນ. ຊາຍຜູ້ກ່ຽວໄດ້ຖືກຈັບຕອນທີ່ໜີອອກຈາກບໍລິເວນບ້ານຂອງທ່ານນາງໄປ ແລະເວລານີ້ຍັງຖືກເຈົ້າໜ້າທີ່ກັກຂັງໄວ້ຢູ່.
ສ່ວນສະຫະຣັຖ ກໍກຳລັງຄົ້ນຫາຂໍ້ມູນເພີ່ມຕື່ມກ່ຽວກັບເຫດການລັກລອບເຂົ້າບ້ານພັກຂອງທ່ານນາງອອງຊານຊູຈີນີ້ ແລະກຳລັງຕິດຕາມເລຶ່ອງນີ້ຢ່າງໄກ້ຊິດຢູ່. ຜູ້ຢ້ຽມຢາມທີ່ບໍ່ໄດ້ຖືກເຊື້ອເຊີນທີ່ວ່ານີ້ ຄືນາຍ John Yettaw ຊາວອາເມຣິກັນ. ສະຫະຣັຖໄດ້ກົດດັນມາເປັນເວລາດົນນານແລ້ວເພື່ອໃຫ້ປ່ອຍຕົວທ່ານນາງ ແລະພວກນັກໂທດການເມືອງອີກປະມານສອງພັນນຶ່ງຮ້ອຍຄົນທີ່ຖືກຣັຖບານທະຫານມຽນມາກັກຂັງໄວ້ຢູ່ນັ້ນ.
ພັກສັນນິບາດແຫ່ງຊາດເພື່ອປະຊາທິປໄຕຂອງທ່ານນາງອອງຊານຊູຈີ ໄດ້ຮັບໃຊຊະນະໃນການເລືອກຄັ້ງລ່າສຸດເມື່ອປີ 1990 ແຕ່ຣັຖບານທະຫານມຽນມາບໍ່ຍອມຮັບຮູ້ຜົນການເລືອກຕັ້ງຄັ້ງນັ້ນ. ການເລືອກຕັ້ງທົ່ວປະເທດຄັ້ງໃໝ່ຈະຈັດໃຫ້ມີຂື້ນໃນປີໜ້ານີ້ ຊຶ່ງກໍມີທ່າທາງວ່າທ່ານນາງອອງຊານຊູຈີ ຄົງບໍ່ສາມາດທີ່ຈະໄປອອກສຽງໄດ້ ຖ້າຫາກທ່ານນາງຍັງຄົງຖືກຣັຖບານຄວບຄຸມຕົວໄວ້ຢູ່. ຣັຖະທຳມະນູນທີ່ໄດ້ເປັນຫົວຂໍ້ໂຕ້ແຍງຖົກຖຽງກັນ ແລະຮັບຮອງເອົາໃນການລົງປະຊາມະຕິແບບຈອມປອມເພື່ອປີກາຍນີ້ ກໍອາດຈະຫ້າມບໍ່ໃຫ້ທ່ານນາງມີສິດເຂົ້າສະມັກເລືອກຕັ້ງໄດ້.
ທ່ານນາງອອງຊານຊູຈີ ຄວນຖືກປ່ອຍໂຕໂດຍທັນທີ. ການກັກໂຕທ່ານນາງຊື່ງບໍ່ຍຸດຕິທຳຢູ່ແລ້ວນັ້ນ ໄດ້ມີມາເປັນເວລາດົນນານເກີນໄປແລ້ວ
