<!-- IMAGE -->
ປະທານາທິບໍດີ ບາຣັກ ໂອບາມາ ເຄີຍຖະແລງໄວ້ຄັ້ງນຶ່ງວ່າ ເວລາຕິດຕໍ່ພົວພັນກັບຂົງເຂດຕາເວັນອອກກາງນັ້ນ ພວກເຮົາຕ້ອງຮັບຮູ້ໄວ້ສະເມີວ່າ ພວກເຮົາແມ່ນຕ້ອງມີຍຸທະ ວິທີໃນລັກສະນະທີ່ກວມເອົາທັງໝົດ ທີ່ຮັບຮູ້ວ່າບັນຫາທັງໝົດເຫລົ່ານີ້ແມ່ນເຊຶ່ອມໂຍງພົວພັນກັນ. ເວົ້າໃນອີກແງ່ນື່ງນັ້ນກໍຄືວ່າຄວາມກ້າວໝ້າທີ່ມີຂື້ນຢູ່ໃນພາກສ່ວນໃດສ່ວນນຶ່ງຂອງຂົງເຂດນັ້ນ ແມ່ນຈະເປັນຕົວຊຸກຍູ້ຫລືເອື້ອອຳນວຍໃຫ້ຂົງເຂດອື່ນໆມີຄວາມ ກ້າວໜ້າຕໍ່ໆກັນໄປ ແລະຄວາມກ້າວໜ້າທີ່ວ່ານີ້ກໍແມ່ນເລີ່ມຈາກການສົນທະນາປາໃສ ຊຶ່ງກັນແລະກັນ.
ເມື່ອເດືອນມິຖຸນາປີ 2008 ຜ່ານມານີ້ ທັງອີສຣາແອລ ແລະຊີເຣຍຕ່າງກໍໄດ້ປະກາດໃຫ້ຮູ້ເຖິງການປະກອບສ່ວນໃນການເຈລະຈາສັນຕິພາບກັນໂດຍທາງອ້ອມ ທີ່ປະເທດເທີກີເປັນຜູ້ໄກ່ເກັ່ຍຂື້ນ ຊື່ງສອງປະເທດເພື່ອນບ້ານດັ່ງກ່າວທີ່ບາງເທື່ອກໍເປັນຄູ່ປໍລະປັກກັນນັ້ນ ໄດ້ອອກຖະແລງການສະບັບນື່ງ ປະກາດໃຫ້ຮູ້ເຖິງເຈດຕະນາຂອງພວກຕົນ ທີ່ຈະທຳການເຈລະຈາກັນດ້ວຍຄວາມຊື່ຕົງ ແລະຢ່າງເປີດເຜີຍຕໍ່ກັນ ພ້ອມກັບທຳການສົນທະນາຫາລືກັນຢ່າງຈິງຈັງແລະຕໍ່ເນຶ່ອງ ເພື່ອທີ່ຈະໃຫ້ບັນລຸຂໍ້ຕົກລົງສັນຕິພາບອັນຄົບຖ້ວນສົມບູນ ທີ່ສອດຄ່ອງກັບໂຄງຮ່າງທ່ີໄດ້ຕັ້ງຂື້ນເມື່ອປີ 1991ໃນກອງປະຊຸມ ທີ່ກຸງ Madrid ປະເທດສະເປນນັ້ນ. ເວົ້າລວມແລ້ວການເຈລະຈາກັນໂດຍທາງອ້ອມລະວ່າງຊີເຣຍກັບອີສຣາແອລ ແມ່ນໄດ້ມີຂື້ນທັງໝົດ 4ຮອບດ້ວຍກັນໃນໄລຍະນື່ງປີຜ່ານມາ.
<!-- IMAGE -->
ຢ່າງໃດກໍຕາມ ເມື່ອວັນທີ່ 28 ເດືອນທັນວາ ປີ2008 ຜ່ານມາ ຊີເຣຍໄດ້ໂຈະການເຈລະຈາດັ່ງກ່າວໄວ້ໃນການເຄື່ອນໄຫວ ຕອບຕໍ່ການປະຕິບັດງານທາງທະຫານຂອງອີສຣາແອລຕໍ່ທີ່ໝັ້ນຂອງກຸ່ມຫົວຮຸນແຮງຮາມາສໃນເຂດກາຊາ ຊື່ງອີສຣາແອລ ໄດ້ເປີດສາກທຳການໂຈມຕີໃນທ້າຍເດືອນທັນວາ ປີ 2008 ເພື່ອຕອບໂຕ້ຕໍ່ການທີ່ກຸ່ມຮາມາສຍິງຈລວດໃສ່ເຂດທີ່ມີພົນລະເຮືອນອາໃສຢູ່ຂອງອີສຣາແອລກ່ອນ ແຕ່ຢ່າງໃດກໍ ຕາມມັນເຖິງເວລາແລ້ວທີ່ຊີເຣຍແລະອີສຣາແອລຈະຫັນໜ້າກັບມາເຈລະຈາກັນຄືນໃໝ່
ສະຫະຣັຖແມ່ນສະນັບສະນຸນຢ່າງແຂງແຮງ ຕໍ່ການເຈລະຈາສັນຕິພາບລະວ່າງ ອີສຣາແອລແລະຊີເຣຍນັ້ນ. ທ່ານນາງ Hillary Clinton ຣັຖມຸນຕຣີຕ່າງປະເທດສະຫະຣັຖ ກ່າວວ່າ ຄວາມສຳຄັນແຫ່ງເສັ້ນທາງຂອງການດຳເນີນຄວາມພະຍາ ຍາມເພື່ອສັນຕິພາບຄັ້ງນີ້ ແມ່ນບໍ່ສາມາດທີ່ຈະກ່າວອອກມາໄດ້ຢ່າງພຽງພໍ. ສັນຕິພາບລະວ່າງຊີເຣຍ ກັບ ອີສຣາແອລ ການມີຄວາມສຳພັນກັນຢ່າງເປັນປົກກະຕິນັ້ນ ຄືສິ່ງນື່ງທີ່ຈະເປັນພາກສ່ວນນື່ງຂອງແຜນການສຳລັບດຳເນີນຄວາມພະຍາຍາມສ້າງສັນຕິພາບທີ່ກວມລວມແລະຄົບຖ້ວນສົມບູນ.
ດັ່ງທີ່ທ່ານ Robert Woods ວ່າໜ້າທີ່ຕາງໜ້າໂຄສົກກະຊວງຕ່າງປະເທດສະຫະຣັຖໄດ້ກ່າວສະລູບ ຕໍ່ສື່ມວນຊົນໃນກອງປະຊຸມແຖລງຂ່າວບັ້ນນື່ງເມື່ອໝໍ່ໆມານີ້ກໍແມ່ນວ່າ “ມັນມີຄວາມຈຳເປັນທີ່ຕ້ອງໃຫ້ມີສັນຕິພາບລະວ່າງ ອີສຣາແອລ ແລະຊີເຣຍ.ພວກເຮົາທັງໝົດມີຜົນປະໂຫຍດນຳການເຫັນສັນຕິພາບຢູ່ໃນຂົງເຂດນັ້ນ ແລະພວກເຮົາຄິດວ່າມັນສຳຄັນທີ່ສຸດທີ່ໝົດທຸກຝ່າຍຈະຕ້ອງປະຕິບັດງານໃຫ້ໄປເຖິງເປົ້າໝາຍອັນນັ້ນ. ທັງອີສຣາແອລ ແລະຊີເຣຍ ຈະຕ້ອງຫັນໜ້າເຂົ້າຫາກັນ ແລະຫາທາງແກ້ໄຂຄວາມຄັດແຍ້ງແຕກຕ່າງກັນໃຫ້ໄດ້ ເພາະວ່າການກະທຳເຊ່ນນັ້ນແມ່ນນອນຢູ່ໃນຜົນປະໂຍດຂອງປະຊາຄົມນານາຊາດ.
