ນັບຈາກປີ 2003 ເປັນຕົ້ນມາຈົນເຖິງທ້າຍປີ 2008 ລັດຖະບານລາວໄດ້ຮັບຜົນປະໂຫຍດ ຈາກໂຄງການບໍ່ແຮ່ເຊໂປນ ແຂວງສະຫວັນນະເຂດແລ້ວ ເປັນເງິນຫລາຍກວ່າ 250 ລ້ານໂດລ້າສະຫະຣັດ. ແຕ່ປະຊາຊົນໃນທ້ອງຖິ່ນດັ່ງກ່າວ ກໍຍັງຄົງມີຄວາມທຸກຈົນຢູ່ຕາມເດີມ.
ກຸ່ມບໍລິສັດເອກະຊົນຈາກປະເທດອົສຕຣາລີ ຊຶ່ງລົງທຶນຂຸດຄົ້ນແຮ່ຄຳ ແລະ ທອງແດງຢູ່ບໍ່ແຮ່ເຊໂປນໃນເຂດເມືອງວີລະບູລີ ແຂວງສະຫວັນນະເຂດ ຫລື ທີ່ເອີ້ນວ່າ ກຸ່ມບໍລິສັດອົສຊີເອນາ ຣີຊອສ ຊຶ່ງໄດ້ມາປ່ຽນຊື່ເປັນ ອັອດສລ້ານຊ້າງ ມາຍເນີໂຣ້ສ ຈຳກັດໃນປະຈຸບັນນີ້ ໄດ້ສະເໜີລາຍງານວ່າໃນໄລຍະໄຕຣມາດທີ່ສີຂອງປີ 2008 ທີ່ຜ່ານມາໄດ້ທຳການສົ່ງມອບຄ່າສຳປະທານຄ່າຂຸດຄົ້ນແຮ່ທາດໃຫ້ແກ່ລັດຖະບານລາວເພີ້ມຂຶ້ນອີກ 3.100.000 ໂດລ້າສະຫະຣັດ ຊຶ່ງກໍໄດ້ເປັນຜົນເຮັດໃຫ້ກຸ່ມບໍລິສັດດັ່ງກ່າວນີ້ ໄດ້ສົ່ງມອບຄ່າສຳປະທານໃຫ້ກັບລັດຖະບານລາວແລ້ວ ຄຶດເປັນມູນຄ່າລວມເຖິງ 22,100,000 ໂດລ້າສະຫະຣັດ ຕະຫລອດປີ 2008 ທີ່ຜ່ານມາ. ແຕ່ຢ່າງໃດກໍຕາມ ເນື່ອງຈາກວ່າຜົນປະໂຫຍດທີ່ລັດຖະບານລາວໄດ້ຮັບຈາກບໍ່ແຮ່ເຊໂປນດັ່ງກ່າວນີ້ ຍັງໄດ້ລວມໄປເຖິງອາກອນກຳໄລ, ພາສີລາຍໄດ້ ແລະ ຄ່າເຊົ່າທີ່ດິນໃນເຂດສຳປະທານການຂຸດຄົ້ນແຮ່ຄຳ ແລະ ທອງແດງດ້ວຍນັ້ນ ຈຶ່ງເຮັດໃຫ້ລັດຖະບານລາວໄດ້ຮັບຜົນປະໂຫຍດ ຈາກບໍ່ແຮ່ເຊໂປນແລ້ວ ຄຶດເປັນມູນຄ່າສະສົມລວມກັນຫລາຍກວ່າ 250 ລ້ານໂດລ້າສະຫະລັດ ນັບຈາກປີ 2003 ເປັນຕົ້ນມາ ຈົນເຖິງທ້າຍປີ 2008 ດັ່ງກ່າວ.
ຫາກແຕ່ວ່າ ສຳລັບໃນປີ 2009 ນີ້ ກໍຄາດໝາຍວ່າ ຜົນປະໂຫຍດທີ່ລັດຖະບານລາວຈະໄດ້ຮັບຈາກບໍ່ແຮ່ເຊໂປນດັ່ງກ່າວນີ້ ຈະຫລຸດໜ້ອຍຖອຍລົງຈາກປີກາຍຢ່າງແນ່ນອນ. ທັງນີ້ກໍເນື່ອງຈາກວ່າ ໄດ້ຮັບຜົນກະທົບຈາກບັນຫາວິກິດການທາງເສດຖະກິດການເງິນໂລກຊຶ່ງເປັນຢູ່ໃນເວລານີ້ ແລະ ກໍບໍ່ພຽງແຕ່ຈະເຮັດໃຫ້ກຸ່ມລົງທຶນຕ້ອງມີການຫລຸດປະລິມານການສົ່ງອອກແຮ່ຄຳ ແລະ ແຮ່ທອງແດງລົງຈາກປີກາຍເທົ່ານັ້ນ ຫາກແຕ່ວ່າ ດ້ວຍສະພາວະການໃນດ້ານລາຄາຂອງແຮ່ທອງແດງໃນຕະຫລາດໂລກ ທີ່ໄດ້ຫລຸດລົງຢ່າງຕໍ່ເນື່ອງ ຊຶ່ງກໍຄື ຫລຸດລົງຈາກໂຕນລະ 8.000 ກວ່າໂດລ້າສະຫະຣັດ ມາເຫລືອພຽງແຕ່ຢູ່ຕັນ 3.200 ໂດລ້າສະຫະຣັດ ໃນປະຈຸບັນນີ້ ກໍໄດ້ເປັນຜົນເຮັດໃຫ້ກຸ່ມລົງທຶນຢູ່ບໍ່ແຮ່ເຊໂປນດັ່ງກ່າວ ຕ້ອງຫລຸດຜົນປະລິມານການຜະຫລິດ ແລະ ສົ່ງອອກແຮ່ທອງແດງລົງຈາກເປົ້າໝາຍເດີມທີ່ວາງເອົາໄວ້ຫລາຍກວ່າ 35%. ຍິ່ງໄປກວ່ານັ້ນ ກໍຍັງມີຄວາມຈຳເປັນທີ່ຈະຕ້ອງເຊົາວ່າຈ້າງຄົນງານລາວໃນລະດັບທ້ອງຖິ່ນໄປແລ້ວ ຈຳນວນຫລາຍຮ້ອຍຄົນອີກດ້ວຍ.
ໂດຍພາຍໃຕ້ສະພາບການດັ່ງກ່າວນີ້
ກໍຍັງໄດ້ສົ່ງຜົນກະທົບຕໍ່ເນື່ອງໄປເຖິງມູນຄ່າການຊ່ອຍເຫລືອ ທີ່ກຸ່ມລົງທຶນໃນໂຄງການຈະປະກອບສ່ວນໃຫ້ກັບໂຄງການພັດທະນາຕ່າງໆ
ທີ່ຢູ່ໃນລະດັບທ້ອງຖິ່ນ ຫລືວ່າ ເຂດທີ່ບໍ່ແຮ່ເຊໂປນຕັ້ງຢູ່ອີກດ້ວຍເຊັ່ນດຽວກັນ
ໂດຍສະເພາະແມ່ນເມືອງວີລະບູລີ ທີ່ໄດ້ຖືກຈັດຕັ້ງຂຶ້ນມາເພື່ອຮອງຮັບການລົງທຶນ
ໃນການຂຸດຄົ້ນແຮ່ທາດຢູ່ໃນເຂດບໍ່ແຮ່ເຊໂປນເປັນການສະເພາະນັ້ນ ກໍຍ່ອມຈະໄດ້ຮັບຜົນກະທົບໂດຍກົງຢ່າງຫລີກລ້ຽງບໍ່ໄດ້ເຊັ່ນດຽວກັນ ທັງນີ້ກໍເນື່ອງຈາກວ່າເມືອງວີລະບູລີຖືເປັນໜຶ່ງໃນ 4 ເມືອງ ທີ່ຍາກຈົນຢ່າງຍິ່ງໃນແຂວງສະຫວັນນະເຂດ
ແລະກໍຍັງຖືເປັນໜຶ່ງໃນ 47 ເມືອງທີ່ມີປະຊາກອນຍາກຈົນຫລາຍທີ່ສຸດຂອງປະເທດລາວ
ທີ່ຍັງຄົງມີການຂາດເຂີນໃນທຸກໆ ດ້ານ ໂດຍສະເພາະແມ່ນການຂາດເຂີນຖະໜົນຫົນທາງ,
ໄຟຟ້າ ແລະແຫລ່ງນ້ຳດື່ມນ້ຳໃຊ້ທີ່ສະອາດ.
ໃນປະຈຸບັນ ເມືອງວີລະບູລີ ມີປະຊາກອນທັງໝົດຫລາຍກວ່າ 32,000 ຄົນ ໃນເຂດ 79 ໝູ່ບ້ານ ຊຶ່ງໃນຈຳນວນດັ່ງກ່າວ ກໍມີຢູ່ເຖິງ 34 ໝູ່ບ້ານທີ່ຈັດຢູ່ໃນໝູ່ບ້ານທີ່ມີຄວາມທຸກຈົນຢ່າງຍິ່ງ ຊຶ່ງກໍຄື ມີປະຊາກອນສ່ວນໃຫຍ່ ມີລາຍໄດ້ບໍ່ເຖິງ ໜຶ່ງໂດລ້າສະຫະລັດ ຕໍ່ຄົນຕໍ່ມື້ນັ້ນເອງ.
ຊົງຣິດ
ໂພນເງິນ ລາຍງານມາຈາກບາງກອກ ເມື່ອວັນທີ 2 ພຶດສະພາ 2009
