ກຸ່ມອົງການອານຸລັກຊັບພະຍາກອນທຳມະ ຊາດລະດັບນາໆ ຊາດຮ່ວມກັນຈັດຕັ້ງ ເປັນພັນທະມິດ ເພື່ອປົກປ້ອງແມ່ນ້ຳ ຂອງໂດຍມີເປົ້າໝາຍທີ່ຈະລົນນະ ລົງ ແລະເຜີຍແຜ່ຂໍ້ມູນຂ່າວສານຕ່າງໆ ໃນລະດັບສາກົນເພື່ອ ຄັດຄ້ານຕໍ່ໂຄງການກໍ່ສ້າງເຂື່ອນ ໃນ ຕະຫລອດສາຍແມ່ນ້ຳຂອງ.
ທ່ານນາງ ເປັມຣືດີ ດາວເຣືອງ ຜູ້ປະສານງານຂອງໂຄງການຟື້ນຟູຂອງລະບົບນິເວດໃນພູມມີພາກແມ່ນ້ຳ ຂອງ ໄດ້ຖະແຫລງຢືນຢັນວ່າ ກຸ່ມອົງການອານຸລັກຊັບພະຍາກອນທຳມະຊາດ ທັງທີ່ຢູ່ໃນປະເທດໄທ ແລະ ໃນລະດັບສາກົນ ໄດ້ຮ່ວມກັນຈັດຕັ້ງເປັນພັນທະມິດເພື່ອປົກປ້ອງແມ່ນ້ຳຂອງ ຂຶ້ນມາຢ່າງເປັນທາງການແລ້ວໃນຂະນະນີ້ ພາຍໃຕ້ເປົ້າໝາຍທີ່ຈະຮ່ວມກັນລົນນະລົງ ແລະເຜີຍແຜ່ບັນດາຂໍ້ມູນ ແລະຂ່າວສານຕ່າງໆ ທີ່ກ່ຽວຂ້ອງກັບແມ່ນ້ຳຂອງ ອອກໄປສູ່ການຮັບຮູ້ຂອງປະຊາກອນໂລກ ເພື່ອໃຫ້ຮ່ວມກັນຄັດຄ້ານຕໍ່ບັນດາໂຄງການກໍ່ສ້າງເຄື່ອນໃນຕະຫລອດແນວແມ່ນ້ຳຂອງຕໍ່ໄປ.
ຮູບແບບຂອງການລົນນະລົງໃນຕະຫລອດໄລຍະເດືອນມີນາເປັນຕົ້ນໄປຈົນ ເຖິງເດືອນເມສາປີນີ້ ກໍຈະມີການລ່າລາຍຊື່ຂອງປະຊາຊົນໃນທົ່ວໂລກ ເພື່ອໃຫ້ໄດ້ຫລາຍທີ່ສຸດເທົ່າທີ່ຈະຫລາຍໄດ້ ຊຶ່ງກໍຈະເປັນການເຊັນຊື່ລົງໃນໂພສະຄາດ ເພື່ອສົ່ງເຖິງລັດຖະບານຂອງທັງ 6 ປະເທດ ຢູ່ໃນເຂດລຸ່ມແມ່ນ້ຳຂອງດ້ວຍກັນ ກໍຄື ຈີນ, ພະມ້າ, ລາວ, ໄທ, ກຳປູເຈຍ ແລະ ຫວຽດນາມ ເພື່ອຮຽກຮ້ອງຂໍໃຫ້ຢຸດຕິໂຄງການກໍ່ສ້າງເຂື່ອນຢູ່ເທິງແນວແມ່ນ້ຳຂອງ ແລະ ປ່ອຍໃຫ້ກະແສນ້ຳໃນແມ່ນໍ້າ ສາມາດທີ່ຈະໄຫລໄດ້ຕາມທຳມະຊາດໂດຍອິດສະລະ ລວມໄປເຖິງການ ສະແຫວງ ຫາທາງເລືອກໃໝ່ຮ່ວມກັນ ໃນການພັດທະນາທາງດ້ານພະລັງງານ ທີ່ບໍ່ແມ່ນການ ກໍ່ສ້າງເຂື່ອນອີກດ້ວຍ.
ທັງນີ້ ຖ້າຫາກຈະນັບຈາກມົນທົນຢູ່ຕາມທາງພາກໃຕ້ຂອງຈີນ ລົງມາຈົນເຖິງເຂດສາມຫລ່ຽມປາກແມ່ນ້ຳ ຂອງ ຢູ່ໃນເຂດພາກໃຕ້ຂອງຫວຽດນາມນັ້ນ ກໍປະກົດວ່າ ຈະມີແຜນການກໍ່ສ້າງເຄື່ອນເທິງແນວແມ່ນ້ຳຂອງ ຈຳນວນທັງໝົດ 19 ໂຄງການ ໂດຍມີຢູ່ໃນຈີນ 8 ໂຄງ ການ ຊຶ່ງໃນປະຈຸບັນ ໄດ້ກໍ່ສ້າງສຳເລັດແລ້ວ ແລະກໍນຳໃຊ້ປະໂຫຍດໃນການຜະຫລິດກະແສໄຟຟ້າແລ້ວຈຳນວນ 3 ໂຄງການ, ສ່ວນ 5 ໂຄງ ການທີ່ເຫລືອນັ້ນ ກໍມີແຜນການທີ່ຈະກໍ່ສ້າງໃຫ້ແລ້ວພາຍໃນ 10 ປີ ຂ້າງໜ້າ. ສ່ວນສຳລັບອີກ 11 ໂຄງການທີ່ເຫລືອນັ້ນ ກໍຢູ່ໃນເຂດລາວ 7 ໂຄງການ ແລະ ໃນເຂດຕິດຕໍ່ ຊາຍແດນລະຫວ່າງລາວກັບໄທອີກ 2 ໂຄງ ການ ແລະອີກ 2 ໂຄງການທີ່ເຫລືອ ຢູ່ໃນປະເທດກຳປູເຈຍ ຊຶ່ງໃນປະຈຸບັນກຳລັງຢູ່ໃນຂັ້ນຕອນໂຄງການ ສຶກສາສຳຫລວດຄວາມເປັນໄປໄດ້ຂອງແຕ່ລະໂຄງການ ໂດຍສະເພາະແມ່ນ 9 ໂຄງການຢູ່ໃນລາວແລະ ໄທນັ້ນ ຕ່າງກໍມີເປົ້າໝາຍທີ່ຈະຂາຍກະແສໄຟຟ້າໃຫ້ໄທເປັນດ້ານຫລັກ ຈຶ່ງເຮັດໃຫ້ກຸ່ມພັນທະມິດເພື່ອປົກປ້ອງແມ່ນ້ຳຂອງ ໄດ້ວາງເປົ້າ ໝາຍທີ່ຈະຮ່ວມກັນລົນນະລົງ ໃຫ້ຄົນໄທຮ່ວມກັນຄັດຄ້ານແຜນການຮັບຊື້ ກະແສໄຟຟ້າຈາກລາວອີກດ້ວຍ.
ສ່ວນທາງດ້ານ ທ່ານ ສຸເທບ ກິດສະໜາວາຣິນ ນັກຖ່າຍພາບລະດັບແນວໜ້າຂອງໄທ ຊຶ່ງໄດ້ໃຊ້ເວລາເຖິງ 3 ປີ ຕິດຕໍ່ກັນ ໃນການທ່ຽວໄປບັນທຶກພາບກ່ຽວກັບວີຖີຊີວິດຂອງຊາວປະໂມງລາວຢູ່ໃນ ເຂດສີ່ພັນດອນ ໃນແຂວງຈຳປະສັກ ທາງພາກໃຕ້ຂອງລາວນັ້ນ ກໍໄດ້ສະແດງຄວາມກັງວົນໃຈວ່າ ທຳມະຊາດທີ່ສວຍງາມ ແລະຄວາມອຸດົມສົມບູນຂອງສັດນ້ຳນາໆພັນ ອັນລວມໄປເຖິງປາຂ່າ ຫລື ປາໂຣມານ້ຳຈືດ ຢູ່ໃນເຂດສີ່ພັນດອນນັ້ນ ຈະຕ້ອງຖືກທຳລາຍໄປຢ່າງແນ່ນອນ ຖ້າຫາກວ່າທາງການລາວອານຸມັດໃຫ້ກຸ່ມລົງທຶນຂ້າມຊາດດຳເນີນ ໂຄງການກໍ່ສ້າງເຄື່ອນຢູ່ເທິງແມ່ນນ້ຳ ຂອງຢູ່ໃນເຂດປະເທດລາວ ດັ່ງທີ່ທ່ານສຸເທບ ໄດ້ໃຫ້ຄວາມເຫັນໃນຕອນໜຶ່ງ ວ່າ:
ເຂື່ອນໃນແມ່ນ້ຳໂຂງນີ້ ຜົມຄິດວ່າ ມັນຄວນຈະຢຸດໄດ້ແລ້ວເພາະວ່າ ມັນ ໄມ່ໄດ້ກະທົບແຄ່ໄຟຟ້າ ວ່າເຣົາຈຳເປັນຕ້ອງໃຊ້ແຄ່ໄໜ, ແຕ່ຈຸດສຳຄັນກໍຄືປາທີ່ຄົນເຖິງ 6 ລ້ານຄົນທີ່ຕ້ອງອາໃສນີ້ ຊຶ່ງເຂົາໄມ່ມີທາງເລືອກໂດຍສະເພາະລາວນີ້ ເປັນປະເທດທີ່ປິດ ແລະ ຖ້າປາໝົດປະເທດທີ່ເດືອດຣ້ອນທີ່ສຸດ ກໍຄືປະເທດລາວ.
ສຳລັບ 9 ໂຄງການເຄື່ອນຢູ່ເທິງແນວແມ່ນ້ຳຂອງທີ່ລັດຖະບານລາວ ຊຶ່ງລວມເຖິງ 2 ໂຄງການ ທີ່ໄດ້ຮ່ວມກັນກັບລັດຖະບານໄທ ໃຫ້ການອະນຸຍາດຕໍ່ກຸ່ມບໍລິສັດເອກະຊົນຈາກໄທ ແລະຈາກຕ່າງປະເທດ ດຳເນີນການສຶກສາສຳຫລວດຄວາມເປັນໄປໄດ້ຂອງໂຄງການຢູ່ໃນເວລານີ້ກໍປະກອບດ້ວຍ ໂຄງການເຄື່ອນຢູ່ຫລວງພະບາງ, ປາກແບງ, ປາກລາຍ, ໄຊຍະບູລີ, ສານະຄາມ, ປາກຊົມ, ບ້ານກຸ່ມ, ລາດຊັບ ແລະ ດອນສະໂຫງ.
ຊົງຣິດລາຍງານຈາກບາງກອກ ເມື່ອວັນທີ 21 ມີນາ 2007.
