ລິ້ງ ສຳຫລັບເຂົ້າຫາ

ຜູ້ນຳໃນການປະທ້ວງໄທ 4 ຄົນ ເຂົ້າມອບໂຕ ຕໍ່ເຈົ້າໜ້າທີ່ ຂະນະທີ່ ການໂຮມຊຸມນຸມ ສິ້ນສຸດລົງ


ໄທ - ການເມືອງ: ຜູ້ນຳ 4 ຄົນ ຂອງພວກ ປະທ້ວງ ໃນໄທ ໄດ້ເຂົ້າມອບໂຕ ຕໍ່ເຈົ້າໜ້າທີ່ ຂະນະທີ່ ພວກປະທ້ວງ ຕໍ່ຕ້ານຣັຖບານ ໄດ້ສິ້ນສຸດ ການປິດລ້ອມ ທຳນຽບຣັຖບານ ທີ່ບາງກອກ ເປັນເວລາ ເກືອບ 3 ອາທິດ. ພວກຜູ້ນຳ ໃນການປະທ້ວງ ໄດ້ຮຽກຮ້ອງ ໃຫ້ຍຸຕິ ການເດີນຂະບວນ ປະທ້ວງ ດ້ວຍຄວາມສັນຕິ ໃນວັນອັງຄານມື້ນີ້ ຂະນະທີ່ ກຳລັງທະຫານ ພວມເຄື່ອນເຂົ້າໄປ ໃກ້ໆພວກປະທ້ວງ ຫົວແຂງກະດ້າງ ທີ່ມີຈຳນວນ ຫຼາຍເຖິງ 2 ພັນຄົນ ທີ່ຍັງ ໂຮມຊຸມນຸມກັນ ຢູ່ນອກ ທຳນຽບຣັຖບານ ທີ່ບາງກອກ. ພວກສນັບສນຸນ ອະດີດ ນາຍົກຣັຖມຸນຕຣີ ທັກສິນ ຊິນນະວັດ ໄດ້ພາກັນຈັດຕັ້ງ ຢູ່ນອກ ທຳນຽບ ນາຍົກຣັຖມຸນຕຣີໄທ ມາໄດ້ ຫລາຍອາທິດແລ້ວ ໃນຄວາມພະຍາຍາມ ເພື່ອຈະບີບບັງຄັບ ໃຫ້ທ່ານ ລາອອກ ແລະຮຽກໃຫ້ມີ ການເລືອກຕັ້ງໃໝ່. ແຕ່ ນາຍົກຣັຖມຸນຕຣີ ອະພິຊິດ ເວດຊາຊີວະ ໄດ້ປະຕິເສດ ກ່ຽວກັບ ຄວາມເປັນໄປໄດ້ ໃນທັງສອງເຣື່ອງ. ການປະທ້ວງ ທີ່ເລີ້ມມາ ແຕ່ທ້າຍເດືອນແລ້ວ ບໍ່ສາມາດ ຄວບຄຸມໄດ້ ໃນມື້ວານນີ້ ຂະນະທີ່ ການປະທະກັນ ຢູ່ຕາມ ຖນົນຫົນທາງ ໃນນະຄອນຫລວງ ຂອງໄທ ເຮັດໃຫ້ ມີຜູ້ເສັຽຊີວິດ 2 ຄົນ ແລະບາດເຈັບ ຫລາຍກວ່າ 100 ຄົນ.

ເກົາຫລີເໜືອ - ນິວເຄລັຽ: ເກົາຫຼີເໜືອ ກ່າວວ່າ ຕົນ ຈະຖອນໂຕ ອອກຈາກ ການເຈຣະຈາ ປົດອາວຸດ ນິວເຄລັຽ 6 ຝ່າຍ ແລະເສີມຂຍາຍ ຄວາມສາມາດ ໃນການຕ້ານຢັນ ທາງດ້ານນິວເຄຼັຽ ຂອງຕົນ ເພື່ອເປັນການ ປະທ້ວງ ຕໍ່ຖແລງການ ຂອງອົງການ ສະຫະປະຊາຊາດ ທີ່ໄດ້ປະນາມ ການຍິງຈະຣວດ ຂອງຕົນ ໃນຕົ້ນເດືອນນີ້. ຖແລງຂ່າວ ຂອງກະຊວງ ການຕ່າງປະເທດ ທີ່ພິມເຜີຍແຜ່ ໂດຍອົງການຂ່າວ ສູນກາງ ຂອງເກົາຫຼີເໜືອ ເວົ້າວ່າ ພຽງຢາງ ຈະລິເລີ້ມ ໂຄງການສ້າງ ອາວຸດນິວເຄຼັຽ ຂອງຕົນ ຄືນໃໝ່. ຖແລງຂ່າວ ສະບັບດັ່ງກ່າວນີ້ ແມ່ນໄດ້ສະແດງ ປະຕິກິຣິຍາ ຕອບໂຕ້ ຕໍ່ການປະນາມ ຂອງສະພາ ຄວາມໝັ້ນຄົງ ອົງການ ສະຫະປະຊາຊາດ ຕໍ່ການຍິງຈະຣວດ ໄລຍະໄກ ຂອງເກົາຫລີເໜືອ ຂ້າມປະເທດຍີ່ປຸ່ນ ໃນຕົ້ນເດືອນນີ້. ຣັດເຊັຽ ກ່າວໃນມື້ວານນີ້ວ່າ ຕົນມີຄວາມຮູ້ສຶກ ເສັຽໃຈ ຕໍ່ການຕັດສິນໃຈ ຂອງເກົາຫລີເໜືອ ຂະນະທີ່ຈີນ ຮ້ອງຂໍ ໃຫ້ທຸກພັກຝ່າຍ ຕັ້ງຢູ່ໃນຄວາມສະງົບ ແລະຄວາມຢັບຢັ້ງ.

ຈີນ - ປະທ້ວງ: ພວກຄົນງານ ຈາກໂຮງງານແຜ່ນແພ ຢ່າງນ້ອຍ 300 ຄົນ ໃນພາກໃຕ້ ຂອງຈີນ ໄດ້ພາກັນ ລົງຖນົນ ປະທ້ວງ ກ່ຽວກັບ ເຣື່ອງເງິນເດືອນ ທີ່ເຂົາເຈົ້າ ບໍ່ໄດ້ຮັບ. ອົງການຂ່າວ ຊິນຫວາ ຂອງທາງການຈີນ ລາຍງານວ່າ ພວກຄົນງານ ຈາກໂຮງງານ ກຸ່ມອຸສາຫະກັມ JINDI ໄດ້ພາກັນ ອັດຫົນທາງ ທີ່ສຳຄັນ ສາຍນຶ່ງ ທີ່ເມືອງ CHONGQING ໃນວັນອັງຄານ ມື້ນີ້ ເພື່ອປະທ້ວງ ຕໍ່ການທີ່ ພວກເຂົາເຈົ້າ ບໍ່ໄດ້ຮັບ ເງິນເດືອນ ມາໄດ້ 3 ເດືອນແລ້ວ. ອົງການຂ່າວ ຊິນຫວາ ເວົ້າວ່າ ພວກປະທ້ວງ ໄດ້ອັດຫົນທາງ ສາຍສຳຄັນ ແລະຣົບກວນ ການສັນຈອນ ໄປມາ ຢູ່ຕໍ່ໜ້າບໍຣິສັດ ໃນຄວາມຫວັງ ເພື່ອຈະດຶງດູດ ເອົາຄວາມສົນ ໃຈຂອງຣັຖບານ. ອົງການຂ່າວ ຊິນຫວາ ທີ່ອ້າງຄຳເວົ້າ ຂອງເຈົ້າໜ້າທີ່ ຣັຖບານຄົນນຶ່ງ ທີີ່ກ່າວວ່າ ທາງໂຮງງານ ບໍ່ສາມາດ ຈ່າຍເງິນເດືອນ ໃຫ້ແກ່ພວກຄົນງານໄດ້ ກໍຍ້ອນວ່າ ຄວາມຕ້ອງການ ເສື້ອຜ້າແຜ່ນແພ ຂອງຈີນ ໄດ້ຫລຸດລົງ ຢ່າງຫລວງຫລາຍ. ວິກິຕການ ທາງດ້ານການເງິນ ຂອງໂລກ ໄດ້ສ້າງຜົນກະທົບ ຕໍ່ຕລາດ ການສົ່ງອອກ ຂອງຈີນ ຢ່າງໜັກ ແລະຣັຖບານ ກຳລັງ ທຳການຕໍ່ສູ້ ເພື່ອຮັກສາ ຣະດັບ ການເຕີບໂຕ ໃຫ້ສູງພໍ ໃນການສ້າງ ວຽກເຮັດ ງານທຳໃໝ່ ແລະຈຳກັດ ການເພີ້ມຂຶ້ນ ຂອງພວກ ຄົນຫວ່າງງານ.

ມຽນມາ - ເພັດນິນ: ສະມາຄົມ ການຄ້າແຫ່ງຊາດຂ ອງສະຫະຣັດ ສະມາຄົມນຶ່ງ ໄດ້ສົ່ງ ຣະບຽບການໃໝ່ ທີ່ໄດ້ມີ ການປັບປຸງ ແກ້ໄຂ ກ່ຽວກັບມາຕການ ທີ່ແນໃສ່ ເພື່ອຕັດຂາດ ການມີລາຍໄດ້ ຂອງຣັຖບານທະຫານ ໃນມຽນມານັ້ນ ໄປໃຫ້ ສະມາຊິກຂອງຕົນ. ຣະບຽບການໃໝ່ ຂອງສະມາຄົມ ຂາຍເພັດພອຍ ແຫ່ງອະເມຣິກາ ໄດ້ອ້າງເຖິງ ຮ່າງກົດໝາຍ ທີ່ມີຜົນ ບັງຄັບໃຊ້ ໃນເດືອນກັນຍາ ປີກາຍນີ້ ທີ່ໄດ້ຫ້າມ ບໍ່ໃຫ້ສະຫະຣັດ ນຳເຂົ້າ ຫີນແກ້ວພິລາ ແລະຢົກ ຊະນິດພິເສດ ທີ່ໄດ້ພົບເຫັນ ຢູ່ໃນປະເທດ ມຽນມາ. ຣະບຽບການໃໝ່ ທີ່ນຳອອກເຜີຍແຜ່ ໃນທ້າຍເດືອນມີນາ ຜ່ານມານີ້ ໄດ້ແນະນຳ ໃຫ້ຮ້ານຂາຍຍ່ອຍ ທີ່ບໍ່ໄດ້ ນຳເຂົ້າໂດຍກົງ ຮັບການ ຄ້ຳປະກັນ ຈາກຮ້ານ ຂາຍຍົກວ່າ ຫີນແກ້ວພິລາ ແລະຢົກ ທີ່ຕົນຮັບຊື້ນັ້ນ ບໍ່ແມ່ນມາຈາກ ມຽນມາ. ນອກນັ້ນ ຣະບຽບການ ດັ່ງກ່າວ ຍັງບັນຈຸ ຂໍ້ມູນ ເພື່ອຊ່ອຍ ພວກຂາຍເພັດນິນ ຕອບຄຳຖາມ ຜຸ້ໃຊ້ ທີ່ອາດສົນໃຈ ກ່ຽວກັບການຫ້າມ ຊື້ເພັດນິນ ຂອງມຽນມາ.

ໂຊມາເລັຽ - ໂຈນທະເລ: ເຈົ້າໜ້າທີ່ ການເດີນເຮືອ ທາງທະເລ ໃນເຂດ ອາຟຣິກາ ຕາເວັນອອກ ກ່າວວ່າ ມີກຳປັ່ນຂົນສົ່ງ ອີກລຳນຶ່ງ ໄດ້ຖືກ ພວກໂຈນທະເລ ຈີ້ເອົາໄປ ຢູ່ນອກ ແຄມຝັ່ງ ຂອງໂຊມາເລັຽ. ທ່ານ ANDREW MWANGURA ຈາກ ໂຄງການ ໃຫ້ຄວາມຊ່ອຍເຫຼືອ ໃນການເດີນເຮືອ ທາງທະເລ ທີ່ມີສຳນັກງານ ຢູ່ເຄນຢາ ກ່າວຕໍ່ ພວກນັກຂ່າວວ່າ ກຳປັ່ນຂົນສົ່ງ ຂອງກຣີກ ທີ່ມີຊື່ວ່າ MV IRENE EM ໄດ້ຖືກຈີ້ ໃນຕອນເຊົ້າ ມື້ນີ້ ໃນບໍຣິເວນ ອ່າວເອເດັນ. ທ່ານກ່າວວ່າ ພວກລູກເຮືອ ຂອງກຳປັ່ນ ທີ່ເປັນຊາວ ຟີລິບປິນ 22 ຄົນ ມີລາຍງານວ່າ ຍັງມີ ຄວາມປອດພັຍຢູ່. ເຈົ້າໜ້າທີ່ ກອງທັບເຮືອ ນາໆຊາດ ທີ່ກຳລັງ ປະຕິບັດງານ ຢູ່ໃນຂົງເຂດ ກ່າວວ່າ ກຳປັ່ນຂົນສົ່ງ ຂອງກຣີກ ໄດ້ສົ່ງສັນຍານ ຂໍຄວາມຊ່ອຍເຫລືອ ເວລາຖືກໂຈມຕີ. ການຈີ້ ກຳປັ່ນຂົນສົ່ງ ຂອງກຣີກ ໄດ້ມີຂຶ້ນ ທ່າມກາງ ຄວາມມືດ ຊຶ່ງເປັນກົລຍຸດ ທີ່ພວກໂຈນທະເລ ບໍ່ມັກໃຊ້ປານໃດ. ເຫດຮ້າຍ ລ່າສຸດ ເກີດຂຶ້ນ ພຽງສອງມື້ ຫລັງຈາກ ໄດ້ມີການຊ່ອຍ ກັບຕັນ ຄົນອະເມຣິກັນ ທີ່ຖືກ ພວກໂຈນທະເລ ຈັບເປັນ ໂຕປະກັນ ອອກມາໄດ້.

ອີຣ່ານ - ນັກຂ່າວ: ເຈົ້າໜ້າທີ່ ຜແນກຍຸຕິທັມ ຄົນນຶ່ງ ຂອງອີຣ່ານ ກ່າວວ່າ ນັກຂ່າວອະເມຣິກັນ-ອີຣ່ານ ນາງ ROXANA SABERI ໄດ້ຖືກນຳໂຕ ຂຶ້ນສານ ທີ່ປະເທດອີຣ່ານ ໃນສັບປະດານີ້ ໃນຂໍ້ຫາ ສອດແນມ ໃຫ້ສະຫະຣັດ. ໂຄສົກ ຜແນກຍຸຕິທັມ ຂອງອີຣ່ານ ທ່ານ ALI REZA JAMSHIDI ກ່າວ ໃນມື້ນີ້ວ່າ ການດຳເນີນ ຄະດີ ນາງ SABERI ເລີ້ມຂຶ້ນ ໃນມື້ວານນີ້ ແລະຄາດວ່າ ຈະມີການອອກ ຄຳພິພາກສາ ໃນອີກປະມານ 2 ອາທິດ. ສະຫະຣັດ ໄດ້ປະຕິເສດວ່າ “ບໍ່ມີມູນຄວາມຈິງ” ໃນການກ່າວຫາ ຂອງອີຣ່ານ ຕໍ່ນາງ SABERI. ໂຄສົກ ຂອງກະຊວງ ການຕ່າງປະເທດ ສະຫະຣັດ ໄດ້ປະຕິເສດ ຢ່າງຈະແຈ້ງ ຕໍ່ການກ່າວຫາ ທີ່ວ່ານີ້ ແລະຮຽກຮ້ອງ ໃຫ້ມີປ່ອຍ ນັກຂ່າວຄົນນີ້ ໂດຍໄວ. ນັກຂ່າວ ອາຍຸ 31 ປີ ທີ່ຖື ສອງສັນຊາດ ທັງອະເມຣິກັນ ແລະອີຣ່ານ ທີ່ໄດ້ເຮັດວຽກ ໃຫ້ແກ່ ອົງການຂ່າວ ຕ່າງປະເທດ ຫລາຍໆອົງການ ຢູ່ໃນອີຣ່ານນັ້ນ ໄດ້ຖືກຈັບ ໃນທ້າຍເດືອນ ມັງກອນ ຜ່ານມາ ຍ້ອນເຮັດວຽກ ຢູ່ໃນ ປະເທດດັ່ງກ່າວ ໂດຍບໍ່ມີບັດ ນັກຂ່າວ ທີ່ຖືກຕ້ອງ.

ເຮົາຍັງມີຂ່າວອື່ນໆ ເຊີນຟັງລາຍລະອຽດໄດ້ ໂດຍຄລິກບ່ອນສຽງ.

XS
SM
MD
LG