ຜູ້ປະຈຳການຄະນະລັດຖະບານລາວຢືນຢັນວ່າ ທາງການລາວຈະໃຫ້ຄວາມຮ່ວມມືກັບສະຫະລັດອາເມລິກາຢ່າງສຸດກຳລັງ ໃນການຊອກຄົ້ນຫາກະດູກ ແລະ ສິ່ງເສດເຫລືອຂອງບັນດາທະຫານອາເມລິກັນທີ່ຫາຍສາບສູນໄປໃນປາງສົງຄາມອິນດູຈີນຢູ່ໃນລາວ.
ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕຣີ ຜູ້ປະຈຳການຄະນະລັດຖະບານລາວ ໄດ້ຖະແຫລງຢືນຢັນໃນໂອກາດທີ່ໄດ້ໃຫ້ການຕ້ອນຮັບຄະນະຂອງ ທ່ານນາງແອນ ມິລສ໌ ກຣິຟຟິທ ຜູ້ອຳນວຍການບໍລິຫານສັນນິບາດແຫ່ງຊາດຂອງຄວບຄົວນັກໂທດ ແລະ ທະຫານອາເມລິກັນ ທີ່ ຫາຍສາບສູນໄປ ໃນພູມມິພາກເອເຊຍຕາເວັນອອກຊຽງໃຕ້ ຊຶ່ງໄດ້ເດີນທາງໄປຢ້ຽມຢາມລາວຢ່າງ ເປັນທາງການເປັນເວລາ 6 ວັນ ເມື່ອບໍ່ນານມານີ້ ວ່າລັດຖະບານລາວຈະສືບຕໍ່ດຳເນີນນະໂຍບາຍອັນມີມະນຸດສະທຳ ແລະ ສະເໝີຕົ້ນສະເໜີປາຍໃນການຮ່ວມມືກັບລັດຖະບານສະຫະລັດອາເມລິກາ ເຂົ້າໃນວຽກງານຊອກຫາກະດູກ ແລະ ສິ່ງເສດເຫລືອຂອງທະຫານອາເມລິກັນທີ່ຫາຍສາບສູນໄປໃນປາງສົງຄາມອິນດູຈີນຢູ່ໃນເຂດປະເທດລາວຕໍ່ໄປຢ່າງສຸດກຳລັງ. ໃນໂອກາດດຽວກັນນີ້ ທ່ານນາງ ແອນ ມິລສ໌ ກຣິຟຟິທ ກໍໄດ້ຕາງໜ້າໃຫ້ກັບລັດຖະບານ ແລະ ຄອບຄົວຂອງທະຫານ ອາເມລິກັນທີ່ຫາຍສາບສູນໄປ ສະແດງຄວາມຂອບໃຈຢ່າງຍິ່ງ ຕໍ່ການຮ່ວມມືດັ່ງກ່າວຂອງລັດຖະ ບານລາວ ພ້ອມທັງຍັງໄດ້ຕີລາຄາສູງ ຈາກຜົນການປະຕິບັດງານຮ່ວມກັນ ໃນຕະຫລອດໄລຍະທີ່ຜ່ານມາອີກດ້ວຍ ຊຶ່ງມາຮອດປະຈຸບັນ ກໍປາກົດວ່າທາງການລາວ ແລະ ສະຫະລັດໄດ້ຮ່ວມກັນຊອກຫາ ແລະ ກໍພົ້ນຄົບກະດູກ ແລະ ເສດເຫລືອຂອງທະຫານອາເມລິກັນແລ້ວ ຈຳນວນ 229 ກໍລະນີ ຈາກທັງໝົດ 572 ກໍລະນີ ຈຶ່ງເຮັດໃຫ້ຍັງຄົງເຫລືອອີກ 343 ກໍລະນີ ທີ່ຍັງຈະຕ້ອງຮ່ວມມືກັນຊອກຄົ້ນຫາຕໍ່ໄປ.
ພ້ອມກັນນີ້ ທ່ານ ສົມສະຫວາດ ຍັງໄດ້ຖະແຫລງຢືນຢັນດ້ວຍວ່າ ການພົວພັນຮ່ວມມືລະວ່າງລາວກັບສະຫະລັດ ມີການຂະຫຍາຍຕົວດີຂຶ້ນນັບມື້ ແລະ ກໍຄອບຄຸມໄປໃນດ້ານຕ່າງໆຢ່າງຮອບດ້ານອີກດ້ວຍ ໂດຍຫລ້າສຸດ ທາງການສະຫະລັດກໍໄດ້ໃຫ້ຄວາມຊ່ວຍເຫລືອແກ່ລາວ ເຂົ້າໃນການກະກຽມຄວາມພ້ອມໃນດ້ານຕ່າງໆ ເພື່ອທີ່ຈະເຂົ້າໄປເປັນສະມາຊິກຂອງອົງການການຄ້າໂລກ ແລະ ກໍຍັງຄົງສືບຕໍ່ໃຫ້ການຊ່ອຍເຫລືອໃນດ້ານການເກັບກູ້ລະເບີດບໍ່ທັນແຕກ ຫລື UXO ຢູ່ໃນລາວ ໂດຍໃນໄລຍະທີ່ຜ່ານມາ ກໍຄືນັບຈາກປີ 1998 ນັ້ນ ກໍປາກົດວ່າ ສະຫະລັດອາເມລິກາ ໄດ້ໃຫ້ຄວາມຊ່ອຍເຫລືອແກ່ລາວ ໃນດ້ານການເກັບກູ້ລະເບີດແລ້ວ ຄຶດເປັນມູນຄ່າລວມຫລາຍກວ່າ 25 ລ້ານໂດລ້າສະຫະລັດ.
ຊົງຣິດ ລາຍງານຈາກບາງກອກ ເມື່ອວັນທີ 3 ເດືອນເມສາ 2009. ກົດປຸ່ມຂ້າງເທິງເບື້ອງຂວາມື ເພື່ອຟັງສຽງ.
