ໂດຍການກົດດັນດັ່ງກ່າວ ກໍມີທັງການໃສ່ໂຊ້ໃຫ້ກັບຂາທັງສອງຂ້າງ ແລະ ການໃຫ້ຢູ່, ໃຫ້ກິນ, ໃຫ້ນອນ ແລະ ໃຫ້ກັບທ່າຍທັງໜັກ ແລະ ເບົາ ຢູ່ໃນບ່ອນດຽວກັນ, ຍິ່ງໄປກວ່ານັ້ນ ຍັງມີຮອງຮອຍມີການຖືກທຸບຕີຢູ່ຕາມຮ່າງກາຍ ແລະ ຫົວຂອງຜູ້ກ່ຽວອີກດ້ວຍ. ທ້າວ ເຢັຽ ປໍລໍ ຍັງໃຫ້ການຢືນຢັນດ້ວຍອີກວ່າ ຜູ້ເປັນພໍ່ຂອງຕົນ ຊຶ່ງມີອາຍຸເຖິງ 58 ປີ ແລ້ວນັ້ນ ບໍ່ໄດ້ກະທຳຄວາມຜິດຕາມການກ່າວຫາຂອງທາງການລາວກ່ຽວກັບການຄ້າຢາເສບຕິດ ແລະ ຂ້າຄົນຕາຍຢູ່ໃນລາວກ່ອນທີ່ຈະພາຄອບຄົວອົບພະຍົກເຂົ້າໄປພັກອາໃສຢູ່ໃນສູນຮອງຮັບຊົ່ວຄາວບ້ານຫ້ວຍນ້ຳຂາວ ນັບຕັ້ງແຕ່ປີ 2004 ເປັນຕົ້ນມາ ຫາກແຕ່ສາເຫດທີ່ເຮັດໃຫ້ຕ້ອງອົບພະຍົກຈາກລາວ ແລະ ເຂົ້າໄປຢູ່ໃນ ບ້ານຫ້ວຍ ນ້ຳຂ າວນັ້ນ ກໍຍ້ອນວ່າຖືກທາງການລາວທຳການປິດລ້ອມ ແລະ ປາບປາມຢ່າງໜັກ ແລະ ຢ່າງຕໍ່ເນື່ອງນັບຕັ້ງແຕ່ປີ 1975 ເປັນຕົ້ນມາແລ້ວ. ສ່ວນທາງດ້ານ ທ້າວ ລີສື ແກ່ນຳຄົນສຳຄັນຂອງຊາວມົ້ງຢູ່ໃນສູນຮອງຮັບຊົ່ວຄາວບ້ານຫ້ວຍນ້ຳຂາວດັ່ງກ່າວນັ້ນ ກໍໄດ້ໃຫ້ການຢືນຢັນກັບ VOA ວ່າ: ທາງການໄທ ບໍ່ພຽງແຕ່ຈະໃຊ້ມາດຕະການກົດດັນຕໍ່ຊາວມົ້ງຢ່າງໜັກເທົ່ານັ້ນ ຫາກແຕ່ຍັງໄດ້ພະຍາຍາມປະຕິມານປະຕິບັດການດ້ານຈິດຕະວິຍາຕ່າງໆ ນາໆ ຕໍ່ຊາວມົ້ງອີກດ້ວຍ, ຊຶ່ງກໍລະນີຕົວຢ່າງກໍຄື ການນຳເຜີຍແຜ່ຂໍ້ມູນຂ່າວສານ ທີ່ກ່ຽວກັບມາດຕະການເບິ່ງແຍງທີ່ດີ ທີ່ທາງການລາວໄດ້ປະຕິບັດຕໍ່ບັນດາຊາວມົ້ງທີ່ຖືກສົ່ງກັບຄືນໄປລາວໃນໄລຍະກ່ອນໜ້ານີ້ຈຳນວນຫລາຍກວ່າ 2,000 ຄົນ.
ຫາກແຕ່ວ່າສຳລັບຊາວມົ້ງສ່ວນໃຫຍ່ທີ່ຍັງຄົງພັກອາໃສຢູ່ໃນສູນຮອງຮັບຊົ່ວຄາວບ້ານຫ້ວຍນ້ຳຂາວ ຈຳນວນຫລາຍກວ່າ 5,000 ຄົນ ໃນປະຈຸບັນນີ້ ກໍຍັງຄົງບໍ່ເຊື່ອຖື ແລະ ບໍ່ເຊື່ອວ່າຂໍ້ມູນ ແລະ ຂ່າວສານດັ່ງກ່າວຈະເປັນຄວາມຈິງ ດັ່ງທີ່ ທ້າວ ລີສື ໄດ້ກ່າວຊີ້ແຈງກັບ VOA ວ່າ:
ຕອນນີ້ ຢົງ ຈັນທະລັງສີ ກັບນາຍພົນ ບົວສ້ຽງນີ້ ເຂົາກ່າວວ່າ ເຂົາຈະຮັບໄປຢູ່ໃຫ້ມີໄຮ່ມີນາໃຫ້ຢູ່ໃຫ້ກິນ. ອັນນີ້ ລີສື ໄມ່ເຊື່ອເລີຍ ກັບໄປກໍກັບໄປຕາຍຢ່າງດຽວ ຢູ່ຫ້ວຍນ້ໍາ ຂາວນີ້ກໍຈະຕາຍ ໄປລາວກໍສິຕາຍ ກໍຍັງແໜງຕາຍຢູ່ປະເທດເສລີນີ້ດີກວ່າ.
ແຕ່ຢ່າງໃດກໍຕາມ ທາງການລາວ ແລະ ໄທ ກໍໄດ້ຕົກລົງຮ່ວມກັນຢ່າງຄັກແນ່ແລ້ວວ່າ ຈະດຳເນີນມາດຕະການໃນທຸກວິທີທາງ ເພື່ອທີ່ວ່າຈະໄດ້ສົ່ງ ແລະ ຮັບເອົາຊາວມົ້ງຈາກບ້ານຫ້ວຍນ້ຳຂາວກັບຄືນໄປລາວໃຫ້ໄດ້ທັງໝົດໄວທີ່ສຸດເທົ່າທີ່ຈະປະຕິບັດໄດ້ ໂດຍຈະບໍ່ຍອມອະນຸຍາດໃຫ້ພາກສ່ວນທີ່ສາມ ເຂົ້າມາຫຍຸ້ງກ່ຽວຢ່າງເດັດຂາດ ເພາະຊາວມົ້ງເຫລົ່ານີ້ ບໍ່ແມ່ນບັນຫາອົບພະຍົບ ຫາກແຕ່ເປັນພຽງຄົນເຂົ້າເມືອງໄທໂດຍຜິດກົດໝາຍເທົ່ານັ້ນ.ຍິ່ງໄປກວ່ານັ້ນ ທາງການລາວ ແລະ ໄທ ຍັງໄດ້ຢືນຢັນຢ່າງໜັກແໜ້ນດ້ວຍວ່າ ບໍ່ມີປະເທດໃດທີ່ຈະຮັບເອົາຊາວມົ້ງເຫລົ່ານີ້ອີກແລ້ວ ຈຶ່ງມີພຽງແຕ່ການເດີນທາງກັບຄືນໄປລາວເທົ່ານັ້ນ ທີ່ເປັນທາງເລືອກດຽວທີ່ເຫລືອຢູ່ສຳລັບຊາວມົ້ງ ແລະ ໃນຊ່ວງທີ່ທ່ານ ພົນພັດຕະວາບົວສ້ຽງ ຈຳປາພັນ ຮອງຫົວໜ໊າກົມໃຫຍ່ເສນາທິການ ກອງ ທັບປະຊາຊົນລາວ ໄດ້ເດີນທາງໄປໃນສູນຮອງຮັບຊົ່ວຄາວບ້ານຫ້ວຍນ້ຳຂາວເມື່ອທ້າຍເດີນກຸມພາທີ່ຜ່ານມານັ້ນ ທ່ານກໍໄດ້ຢືນຢັນວ່າ ບໍ່ມີການປິດລ້ອມ ແລະ ປາບປາມຊາວມົ້ງຢູ່ໃນປະເທດລາວແຕ່ຢ່າງໃດ ຫາກແຕ່ເປັນການໃສ່ຮ້າຍປາຍສີຕໍ່ທາງການລາວໂດຍກຸ່ມຄົນບໍ່ດີຢູ່ໃນຕ່າງປະເທດ.
