ລິ້ງ ສຳຫລັບເຂົ້າຫາ

Bureaucratic Red Tape in Laos is on the Rise


ທາງ​ການ​ລາວ​ຍອມຮັບ​ວ່າ ບັນຫາ​ພະຍາດ​ອາດ​ຍາ​ສິດ​ໃນ​ວົງ​ການ​ລັດຖະບານ​ມີ​ທ່າ​ອ່ຽງຂະຫຍາຍ​ກ້ວາງ​ເປັນ​ບັນຫາ​ທີ່​ໃຫຍ່​ຂຶ້ນ ​ໂດຍ​ມີ​ສາ​ເຫດ​ສຳຄັນ​ມາ​ຈາກ​ການ​ປະຕິ​ບັດໜ້າທີ່​ຂອງ​ບັນດາ​ພະນັກງານ​ຂອງ​ລັດ​ທີ່​ບໍ່ຕອບ​ສະໜອງຕາມ​ການ​ຮຽກຮ້ອງ​ຕ້ອງການ​ຂອງ​ປະຊາຊົນ​ລາວ​ຢ່າງ​ແທ້​ຈິງ.

ພະຍາດ​ອາດ​ຍາ​ສິດນີ້ ສະ​ແດງ​ອອກຢູ່​ໃນ​ກົງຈັກ​ຂອງ​ພວກ​ເຮົາ ນັບ​ມື້ນັບ​ໃຫຍ່​ໂຕ​ອອກ ​ແບບ​ແຜນ​ວິທີ​ເຮັດ​ວຽກ ກໍນັບ​ມື້ນັບ​ຫ່າງເຫີນຈາກ​ຕົວ​ຈິງ ຫ່າງເຫີນຈາກປະຊາຊົນ. ທັດສະນະທ່າທີ ​ໃຫ້ການ​ບໍລິການ​ແກ່​ປະຊາຊົນກໍ​ບໍ່ຄື​ເກົ່າ. ແລ້ວເຮັດ​ແນວໃດ​ຈະ​ໃຫ້​ປະຊາຊົນ​ມີ​ຄວາມເຫລື້ອມໃສຕໍ່ພັກຕໍ່ລັດເຮົາ. ທາດແທ້ຂອງ​ລັດ​ເຮົາ ກໍ​ຢູ່​ໃນ​ສະພາບຖືກ​ຂົມ​ຂູ່ ລັດ​ຖະ​ທຳ​ມະນູນໄດ້ຂຽນວ່າ ລັດ​ເຮົາ​ແມ່ນ​ລັດ​ປະຊາຊົນ, ​ໂດຍ​ປະຊາຊົນ ​ແລະ ​ເພື່ອ​ປະຊາຊົນ. ​ແຕ່​ວ່າ ລັດຖະກອນ​ຈັກວ່າແມ່ນ​ເຮັດ​ອີ່ຫຍັງ, ປະຊາຊົນ​ຮຽກຮ້ອງ​ຕ້ອງ ການ​ຢາກ​ຂໍ​ສະເໜີຂໍ້​ຂ້ອງ​ໃຈອັນ​ນີ້ ຢາ​ກຮັບ​ຄຳ​ແນະນຳຈາກ​ເຈົ້າໜ້າທີ່​ເຮົາ, ​ແຕ່​ເຈົ້າໜ້າທີ່​ເຮົາ​ຖື​ວ່າ​ໂຕ​ເປັນອາດຍາ​ເຈົ້ານາຍ ບໍ່​ໄດ້​ສົນກັບ​ປະຊາຊົນ. ສະນັ້ນ ບັນຫາ​ອັນ​ນີ້ ​ແມ່ນ​ພວກ​ເຮົາພວມ​ປະ​ເຊີນໜ້າ.

ນີ້ກໍ​ແມ່ນ​ການປະກອບ​ຄວາມ​ເຫັນ​ຂອງ​ ທ່ານ ສົມ​ສະຫວາດ ​ເລັ່ງ​ສະຫວັດ ຮອງ​ນາຍ​ຍົກ​ລັດຖະມົນ​ຕີ​, ຜູ້​ປະຈຳການຄະນະລັດຖະບານ​ລາວ ຊຶ່ງ​ທ່ານ​ໄດ້​ກ່າວ​ຕໍ່ບັນດາ​ເຈົ້າໜ້າທີ່​ຂັ້ນສູງໃນ​ວົງ​ການ​ ການ​ປົກຄອງ​ຂອງ​ລາວ ຈຳນວນ​ຫລາຍ​ກວ່າ 100 ຄົນ ທີ່​ໄດ້​ເຂົ້າຮ່ວມ​ໃນ​ກອງ​ປະຊຸມ​ສຳ​ມະ​ນາ​ເພື່ອ​ສະຫລຸບ​ຜົນ ​ແລະ ຖອດຖອນ​ບົດຮຽນກ່ຽວກັບ​ການ​ທົດ​ລອງ​ປັບປຸງ​ອົງການ​ບໍລິຫານ​ຂອງ​ລັດ​ໃນ​ລະດັບ​ເມືອງ ຊຶ່ງ​ໄດ້​ຈັດ​ຂຶ້ນ ​ໂດຍ​ຖະບວງການ​ປົກຄອງ ​ແລະ ຄຸ້ມ​ຄອງ​ລັດຖະກອນ ພາຍ​ໃຕ້​ໃນ​ການ​ເປັນ​ປະທານໃນ​ກອງປະຊຸມ​ໂດຍ ທ່ານນາງ ບຸນເພັງ ມູນ​ໂພ​ໄຊ ລັດຖະມົນຕີປະຈຳ​ສຳນັກງານ​ນາຍ​ຍົກ​ລັດຖະມົນຕີລາວ ​ໃນ​ຖານະ​ຫົວໜ້າ ຖະບວງການ​ປົກ​ຮອງ ​ແລະ ຄຸ້ມ​ຄອງ​ລັດຖະກອນ​ດັ່ງກ່າວ. ​ໂດຍ​ການ​ປະກອບ​ຄວາມ​ເຫັນ​ຂອງ ​ທ່ານ ​ສົມ ສະຫວາດ ​ໃນຄັ້ງນີ້ ທ່ານ​ບໍ່ພຽງ​ແຕ່​ຈະ​ໄດ້​ໃຫ້ການ​ຍອມຮັບ​ວ່າ ບັນຫາ​ພະຍາດ​ອາດຍາສິດ ​ໄດ້​ເປັນ​ບັນຫາ​ທີ່​ໃຫຍ່​ຂຶ້ນ ​ແລະ ກໍ​ໄດ້​ເກີດ​ຂຶ້ນຢ່າງ​ກ້ວາງ​ຂວາງ​ໃນ​ວົງ​ການ​ການ​ປົກຄອງ​ຂອງ​ລັດຖະບານ​ລາວ​ເທົ່າ​ນັ້ນ ຫາກ​ແຕ່​ທ່ານ​ຍັງ​ໄດ້​ຍອມຮັບ​ດ້ວຍ​ວ່າ ບັນຫາ​ດັ່ງກ່າວ​ນີ້ ​ໄດ້​ເຮັດ​ໃຫ້ການ​ຍອມຮັບ​ຂອງ​ປະຊາຊົນທີ່​ມີ​ຕໍ່ການ​ນຳພາ​ຂອງ​ພັກ​ປະຊາຊົນ​ປະຕິວັດ​ລາວ ​ແລະ ລັດຖະບານ​ລາວ​ດ້ວຍ​ນັ້ນ ນັບ​ມື້ນັບ​ຫລົດໜ້ອຍຖອຍ​ລົງ​ເລື້ອຍໆ.

ທັງນີ້ກໍ​ເນື່ອງ​ຈາກ​ວ່າ ບັນດາ​ພະນັກງານ​ຂອງ​ລັດຖະບານ​ນັ້ນ ບໍ່​ໄດ້​ໃຫ້​ຄວາມ​ສຳ​ຄັນ​ທີ່​ຈະ​ຕອບ​ສະໜອງຕາມ​ກະ​ແສ​ສຽງການ​ຮຽກຮ້ອງ​ຕ້ອງການ​ຂອງປະຊາຊົນລາວບັນດາເຜົ່າ​ຢ່າງ​ແທ້​ຈິງ​ເລີຍ ຊຶ່ງ​ກໍ​ນັບ​ໄດ້ວ່າ ​ເປັນ​ສະພາບ​ການ​ຂອງ​ບັນຫາ​ທີ່​ພັກ ​ແລະ ລັດ​ກຳລັງ​ປະ​ເຊີນ​ຢູ່​ໂດຍ​ກົງ ໃນ​ເວລາ​ນີ້ ​ແລະ ກໍ​ມີ​ແນວ​ໂນ້ມ ທີ່​ຈະໜັກໜ້າຂຶ້ນເລື້ອຍໆ ຖ້າ​ຫາກ​ວ່າຍັງ​ຄົງບໍ່ມີ​ການ​ແກ້​ໄຂ ແ​ລະ​ ປັບປຸງ​ໃຫ້​ດີ​ຂຶ້ນ ທັງ​ໃນ​ດ້ານ​ການ​ບໍລິຫານ​ອົງການ​ປົກຄອງ ​ແລະ ການ​ພັດ​ທະນາ​ປະຊສິດທິ​ພາບ​ໃນ​ການ​ປະຕິບັດ​ວຽກງານ​ຂອງ​ບັນດາ​ພະນັກງານ​ລັດຖະບານ​ທຸກ​ລະດັບ​ໃນ​ທົ່ວ​ປະ​ເທດ​ຢ່າງ​ຮີບ​ດ່ວນ​ທີ່​ສຸດ.

ຍິ່ງ​ໄປ​ກວ່າ​ນັ້ນ ບັນດາ​ພະຍາດ​ອາດ​ຍາ​ສິດ​ໃນ​ວົງ​ການ​ລັດຖະບານ​ລາວ ກໍ​ຍັງ​ຖື​ອີກ​ເປັນ​ປັດ​ໃຈ​ນຶ່ງ​ທີ່​ສຳຄັນ ທີ່​ເຮັດ​ໃຫ້​ເກີດ​ບັນຫາ​ການ​ສໍ້ລາດ​ບັງ​ຫລວງ​ຂຶ້ນຢ່າງ​ກ້ວາງ​ຂວາງ​ໃນ​ວົງ​ການ​ລັດຖະບານ​ລາວ​ອີກ​ດ້ວຍ ​ໂດຍເຖິງ​ແມ່ນ​ວ່າ ​ໃນ​ຕະຫລອດ​ໄລຍະ​ກວ່າ 33 ປີ​ມານີ້​ທາງ​ການພັກ ​ແລະ ລັດ ຖະບານ​ລາວ ຈະ​ໄດ້​ໃຫ້​ຄວາມ​ສຳຄັນກັບ​ບັນຫາ​ດັ່ງກ່າວ​ນີ້ ບໍ່ໜ້ອຍກໍ​ຕາມ ຫາກ​ແຕ່​ວ່າພັກ​ ​ແລະ ລັດຖະບານ​ລາວ ​ກໍ​ບໍ່​ເຄີຍ​ກວດວັດ ​ແລະ ສະ​ແດງ​ໃຫ້​ເຫັນ​ເຖິງ​ລະດັບ​ຂອງ​ຄວາມ​ຮຸນ​ແຮງ​ຂອງ​ການ​ສໍ້​ລາດ​ບັງ​ຫລວງ​ຢູ່​ໃນ​ລາວ ​ໄດ້​ຢ່າງ​ເປີດ​ເຜີຍ​ມາ​ກ່ອນ​ເລີຍ. ​ແຕ່​ຢ່າງ​ໃດ​ກໍ​ຕາມ ຖ້າ​ຫາກ​ອີງ ຕາມ​ການ​ສຳ​ຫລວດ​ຂອງ​ອົງການ​ເພື່ອ​ຄວາມ​ໂປ່​ງ​ໃສລະຫວ່າງ​ປະ​ເທດ ຫລື ​Transparency International ນັ້ນ ກໍ​ໄດ້​ຈັດ​ໃຫ້​ລາວ​ຢູ່​ໃນ​ອັນ​ດັບ​ທີ່ 151 ຈາກ​ທັງໝົດ 180 ປະ​ເທດ​ໃນ​ທົ່ວ​ໂລກ ​ໂດຍ​ປະ​ເທດ​ທີ່​ຖືກ​ຈັດ​ໃຫ້​ເປັນ​ອັນ​ດັບ​ສຸດ​ທ້າຍ​ກໍ​ຄື​ປະ​ເທດ​ທີ່​ມີ​ການສໍ້​ລາດ​ບັງຫລວງ ໃນ​ວົງການ​ລັດຖະບານ​ຫລາຍ​ທີ່​ສຸດ​ໃນ​ໂລກ ຊຶ່ງ​ກໍໝາຍຄວາມ​ວ່າ ລາວ​ນັ້ນໄດ້​ຖືກ​ຈັດ​ໃຫ້​ຢູ່​ໃນກຸ່ມ​ປະ​ເທດ​ທີ່​ມີ​ການ​ສໍ້​ລາດ​ບັງ​ຫລວງ ​ໃນ​ລະດັບ​ທີ່​ສູງ​ທີ່​ສຸດ​ໃນ​ໂລກ​ເຊັ່ນ​ດຽວກັນ. ທັງນີ້ກໍ​ເພາະ ວ່າ ລະດັບ​ຄະ​ແນນ​ທີ່​ລາວ​ໄດ້​ຮັບ​ນັ້ນ ​ໄດ້​ພຽງ​ແຕ່ 2 ຄະ​ແນນ ຈາກ​ຄະ​ແນນ​ເຕັມ 10 ຄະ​ແນນນັ້ນ​ເອງ. ສ່ວນ​ກ່ຽວກັບ​ການ​ດຳ​ເນີນ​ມາດ​ຕະການ​ແກ້​ໄຂບັນຫາ​ດັ່ງກ່າວ​ນີ້ ທາງ​ການ​ລາວ​ກໍ​ໄດ້​ລິ​ເລີ້ມທົດ​ລອງ​ປັບປຸງ​ອົງການ​ບໍລິຫານ​ລັດ​ໃນ​ເຂດ 6 ​ເມືອງ ນັ້ນກໍ​ຄື ​ເມືອງ​ຫລວງ​ນ້ຳທາ​ໃນ​ແຂວງ​ຫລວງ​ນ້ຳທາ, ​ເມືອງ​ຫລາ​ ໃນ​ແຂວງ​ອຸ​ດົມ​ໄຊ, ​ເມືອງ​ມື່ນ ​ໃນ​ແຂວງ​ວຽງຈັນ ​ເມືອງ​ເຊ​ບັ້ງ​ໄຟ ​ໃນ​ແຂວງ​ຄຳ​ມ່ວນ, ​ເມືອງນະຄອນ​ເພັງ​ ​ໃນ​ແຂວງ​ສາ​ລະວັນ ​ແລະ ​ເມືອງ​ພູ​ວົງໃນ​ແຂວງ​ອັດ​ຕະປື ​ໂດຍ​ໄດ້​ເລີ້ມທົດ​ລອງ​ນັບຈາກ​ປີ 2008 ​ເປັນຕົ້ນມາ​ແລ້ວ ດ້ວຍ​ຄວາມ​ຊ່ວຍ​ເຫລືອ​ຈາກ​ອົງການ​ສາ​ຫະ​ປະຊາ​ຊາດ ​ແລະ ຫວຽດນາມ ​ໂດຍ​ຖ້າ​ຫາກ​ວ່າ ປະສົບ​ຜົນສຳ​ເລັດ​ເປັນ​ຢ່າງ​ດີ ກໍ​ຈະ​ຂະຫຍາຍ​ໄປຍັງ​ເມືອງ​ອື່ນໆ​ ໃນ​ທົ່ວ​ປະ​ເທດ​ລາວ​ຕໍ່​ໄປອີກ​ດ້ວຍ.

ຊົງຣິດ ໂພນເງິນ ລາຍ​ງານ​ຈາກ​ບາງ​ກອກ ເມື່ອວັນທີ 02 ມີນາ 2009
ຟັງສຽງພາສາລາວໄດ້ ໂດຍການກົດປຸ່ມຢູ່ຂວາມືຂ້າງເທິງ


XS
SM
MD
LG