ອັດຕາຄ່າຈ້າງຂັ້ນຕໍ່າຂອງລາວ ເພີ້ມຂຶ້ນ
ລັດຖະບານລາວອານຸມັດໃນຫລັກການໃຫ້ປັບຂຶ້ນອັດຕາຄ່າຈ້າງຂັ້ນຕໍ່າ ໃຫ້ແກ່ບັນດາແຮງງານລາວ ໃນອັນຕາສະເລ່ຍ 20% ຈາກເດີມ. ຫາກແຕ່ກໍຍັງເປັນອັດຕາຄ່າຈ້າງທີ່ຕໍ່າກວ່າລະດັບຄວາມຕ້ອງການທີ່ເປັນຈິງຂອງແຮງງານລາວ ໃນລະດັບທີ່ເກີນກວ່າ 50%, ດ້ວຍເຫດນີ້ ຈຶ່ງເຮັດໃຫ້ເຊື່ອວ່າ ບັນດາແຮງງານລາວສ່ວນໃຫຍ່ຈະຍັງຄົງພາກັນລັກລອບທຳງານໂດຍຜິດກົດໝາຍຢູ່ໃນເມືອງໄທຫລາຍຂຶ້ນ.
ຄະນະເລຂາທິການ ປະຈຳສຳນັກງານນາຍຍົກລັດຖະມົນຕີລາວລາຍງານວ່າ ຄະນະລັດຖະບານລາວພາຍໃຕ້ການເປັນປະທານຂອງ ທ່ານ ບົວສອນ ບຸບຜາວັນ ນາຍຍົກລັດຖະມົນຕີລາວນັ້ນ ໄດ້ອານຸມັດໃຫ້ປັບ ຂຶ້ນອັດຕາຄ່າຈ້າງຂັ້ນຕໍ່າ ສຳລັບແຮງງານລາວຈາກເດີມ 290.000 ກີບ ຕໍ່ເດືອນ ເປັນ 348.000 ກີບ ຕໍ່ເດືອນ ຢ່າງເປັນທາງການແລ້ວ ນັບຕັ້ງແຕ່ວັນທີ 18 ກຸມພາ ເປັນຕົ້ນມາ ແລະ ກໍໄດ້ມອບໝາຍໃຫ້ກະ ຊວງແຮງງານ ແລະ ສະຫວັດດີການສັງຄົມຂອງລາວ ໂດຍລັດຖະມົນຕີວ່າການກະຊວງດັ່ງກ່າວ ເປັນພາກ ສ່ວນຮັບຜິດຊອບໃນການກຳນົດໃຫ້ມີການປັບຂຶ້ນອັດຕາຄ່າຈ້າງຂັ້ນຕໍ່າໃນຄັ້ງນີ້ ມີຜົນບັງຄັບໃຊ້ຕໍ່ໄປ. ແຕ່ຢ່າງໃດກໍຕາມ ມາຮອດປະຈຸບັນ ກໍຍັງຄົງບໍ່ມີຄວາມຊັດເຈນວ່າ ລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມຂອງລາວ ຈະກຳນົດໃຫ້ມີການບັງຄັບໃຊ້ມັດຕິອານຸມັດໃນຄັ້ງຫລ້າສຸດຂອງຄະ ນະລັດຖະບານລາວເມື່ອໃດແທ້ ເນື່ອງຈາກວ່າ ຍັງຄົງຕ້ອງມີການໃຫ້ໄລຍະເວລາໄລຍະນຶ່ງ ເພື່ອໃຫ້ບັນດານາຍຈ້າງໃນລາວນັ້ນໄດ້ຕັ້ງຕົວ ເພື່ອທີ່ວ່າຈະເຮັດໃຫ້ສາມາດປະຕິບັດຕາມມັດຕິການອານຸມັດຂອງລັດຖະ ບານລາວໄດ້ຢ່າງແທ້ຈິງ. ກັບທັງຍັງເພື່ອເປັນການໃຫ້ເວລາແກ່ນາຍຈ້າງໃນການຫລຸດຜ່ອນບັນຫາຜົນກະ ທົບຈາກວິກິດການທາງເສດຖະກິດການເງິນໂລກອີກດ້ວຍ.
ການປັບຂຶ້ນອັດຕາຄ່າຈ້າງຂັ້ນຕໍ່າໃນຄັ້ງຫລ້າສຸດນີ້ ເປັນການອານຸມັດໃນຫລັກການ ແລະ ກໍຖືວ່າເປັນການປັບຂຶ້ນໃນອັດຕາສະເລ່່ຍ 20% ຈາກອັດຕາເດີມ. ຫາກແຕ່ວ່າ ກ່ອນໜ້ານີ້ ສະຫະພັນກຳມະການລາວ ໄດ້ສະເໜີຂໍປັບຂຶ້ນອັດຕາຄ່າຈ້າງຂັ້ນຕໍ່າ ຈາກເດີມ 290.000 ກີບ ຕໍ່ເດືອນ ເປັນບໍ່ໜ້ອຍກວ່າ 700.000 ກີບ ຕໍ່ເດືອນ ດ້ວຍເຫດຜົນທີ່ວ່າ ອັດຕາຄ່າຄອງຊີບທີ່ເປັນຈິງຢູ່ໃນລາວນັ້ນ ໄດ້ປັບຕົວສູງຂຶ້ນຢ່າງຕໍ່ເນື່ອງ ນັບຈາກປີ 1997 ເປັນຕົ້ນມາ ຊຶ່ງກໍເຮັດໃຫ້ມີທາງເລືອກດຽວເທົ່ານັ້ນ ທີ່ຈະເຮັດໃຫ້ບັນດາແຮງງານລາວສາ ມາດທີ່ຈະຄອງຊີບຢູ່ໄດ້ ດ້ວຍການຮັບຄ່າຈ້າງໃນອັດຕາທີ່ເປັນຢູ່ໃນປະຈຸບັນນີ້ ຊຶ່ງກໍຄື ການທຳງານເກີນເວ ລາປົກກະຕິ ມື້ລະຫລາຍຊົ່ວໂມງ. ແຕ່ກໍປາກົດວ່າ ມີພາກການຜະຫລິດຢ່າງຈຳກັດຫລາຍ ທີ່ຈະເປີດໂອ ກາດໃຫ້ແຮງງານລາວ ໃຫ້ສາມາດທີ່ຈະທຳງານເກີນເວລາປົກກະຕິໄດ້ ຕົວຢ່າງກໍຄື ໂຮງງານແປຮູບໄມ້ ຫລື ໂຮງງານເລື່ອຍໄມ້ ແລະ ໂຮງງານຕັດຫຍິບເທົ່ານັ້ນ. ດ້ວຍເຫດນີ້ ຈຶ່ງເຮັດໃຫ້ແຮງງານລາວສ່ວນໃຫຍ່ ຍັງຄົງພາກັນເດີນທາງເຂົ້າໄປລັກລອບທຳງານໂດຍຜິດກົດໝາຍຢູ່ໃນປະເທດໄທ ຫລາຍຂຶ້ນນັບມື້. ເຖິງແມ່ນວ່າ ຈະໄດ້ຮັບອັດຕາຄ່າຈ້າງຕໍ່າກວ່າແຮງງານຄົນໄທກໍຕາມ ຫາກແຕ່ກໍຍັງຖືວ່າເປັນອັດຕາຄ່າຈ້າງທີ່ສູງກວ່າຄ່າຈ້າງຂັ້ນຕໍ່າຢູ່ໃນປະເທດລາວ ເຖິງສີ່ເທົ້າຕົວນັ້ນເອງ.
ແຕ່ຢ່າງໃດກໍຕາມ ແຮງງານລາວທີ່ເດີນທາງເຂົ້າໄປຊອກຫາວຽກເຮັດງານທຳ ຢູ່ໃນປະເທດໄທສ່ວນຫລາຍ ກໍບໍ່ນິຍົມທີ່ຈະສະມັກງານໂດຍຜ່ານບໍລິສັດຈັດຫາງານທີ່ມີຢູ່ 9 ແຫ່ງໃນປະເທດລາວ ທີ່ໄດ້ຮັບການອານຸ ຍາດຈາກລັດຖະບານລາວແຕ່ຢ່າງໃດ ເນື່ອງຈາກ ຕ້ອງເສຍອັດຕາຄ່າທຳນຽມຕ່າງໆ ເຖິງ 20.000 ບາດ ກັບທັງຍັງມີຂັ້ນຕອນທີ່ຈະຕ້ອງດຳເນີນການຢ່າງຫຍຸ້ງຍາກ ຈຶ່ງເຮັດໃຫ້ແຮງງານລາວສ່ວນໃຫຍ່ ນິຍົມທີ່ຈະເດີນທາງໂດຍຜ່ານນາຍໜ້າ ຈັດຫາງານຢູ່ຊາຍແດນລາວ-ໄທ ເປັນຫລັກ ດັ່ງທີ່ ທ່ານ ຄຳປານ ອິນທະວົງ ຜູ້ອຳນວຍການບໍລິຫານ ບໍລິສັດສົ່ງເສີມແຮງງານລາວຈຳກັດ ໄດ້ກ່າວຊີ້ແຈງເຖິງສະພາບການທີ່ເປັນຢູ່ໃນເວລານີ້ ວ່າ:
ໃນໄລຍະຜ່ານມານີ້ ກ່ຽວກັບຂໍ້ຫຍຸ້ງຍາກ ແລະ ສິ່ງແວດລ້ອມຕ່າງໆນີ້ ກໍມີຫລາຍອັນ ເຮັດໃຫ້ບໍລິສັດນີ້ທໍ້ຖອຍໃຈ ແມ່ນແຮງງານ ທີ່ລຽບຕາມຝັ່ງແມ່ນ້ຳຂອງ ຕັ້ງແຕ່ແຂວງໄຊຍະບູລີ ລົງເຖິງຈຳປາສັກ ສາລະວັນ ແມ່ນລັກຂ້າມໄປແບບຜິດກົດໝາຍ, ເອີ້ນວ່າເປັນແຮງງານລະດູການ ຍາມເຮັດນາ ກັບມາເຮັດນາ, ຍາມເຮັດນາກ່ຽວເຂົ້າແລ້ວ ໂຕນຂ້າມ ໄປເມືອງໄທເພື່ອຮັບຈ້າງ ໂດຍບໍ່ໄດ້ຜ່ານພະນັກງານການຈັດຕັ້ງຂອງພັກຂອງລັດ ຫລື ບໍລິສັດທີ່ກ່ຽວຂ້ອງ.
ຊົງຣິດ ໂພນເງິນ ລາຍງານຈາກບັງກອກ ເມື່ອວັນທີ 02 ມີນາ 2009
ນຳສະເໜີ ໂດຍ ບົວສວັນ ສິມມາລາ
ຟັງສຽງພາສາລາວ ແລະ ອ່ານຂ່າວນີ້ເປັນພາສາອັງກິດໄດ້ ໂດຍການກົດປຸ່ມຢູ່ຂວາມືຂ້າງເທິງ
