ລິ້ງ ສຳຫລັບເຂົ້າຫາ

ລາຍງານຂ່າວແຈ້ງວ່າ ທະຫານເກົາຫລີເໜືອ ຄຸມຂັງນັກຂ່າວອະເມຣິກັນ 2 ຄົນ


ເກົາຫລີເໜືອຈັບນັກຂ່າວອະເມຣິກັນ: ສື່ມວນຊົນຂອງເກົາຫລີໃຕ້ກ່າວວ່າ ທະຫານ ເກົາຫລີເໜືອ ໄດ້ຄຸມຂັງນັກຂ່າວອະເມຣິກັນ 2 ຄົນ ໃນບໍຣິເວນຊາຍແດນເກົາຫລີເໜືອ ທີ່ຕິດ ກັບຈີນ. ລາຍງານຂ່າວແຈ້ງວ່າ ນັກຂ່າວອະເມຣິກັນທັງ 2 ໄດ້ຖືກຈັບ ໃນມື້ວານນີ້ ໃນບໍຣິເວນແມ່ນ້ຳ YALU ທີ່ເປັນເສັ້ນແບ່ງເຂດແດນ ຣະຫວ່າງເກົາຫລີເໜືອກັບຈີນ. ມີລາຍງານ ຂ່າວວ່າ ນັກຂ່າວທັງສອງ ບໍ່ໄດ້ເອົາຫົວຊາຕໍ່ຄຳເຕືອນ ຂອງຍາມເກົາຫລີເໜືອ ທີ່ໃຫ້ຢຸດເຊົາຖ່າຍຮູບ. ລາຍງານ ຂ່າວແຈ້ງໃຫ້ຊາບຕື່ມວ່າ ນັກຂ່າວທັງສອງຊື່​ງເປັນແມ່ຍິງກຳລັງ​ເຮັດວຽກຖ່າຍຮູບ​ເງົາ ໃຫ້ແກ່ບໍຣິສັດຂ່າວ ອິນເຕີແນັດ CURRENT TV ທີ່ມີສຳນັກງານຢູ່ຣັດຄາລີຟໍເນັຽ ທາງພາກຕາເວັນຕົກຂອງສະຫະຣັດ. ໂຄສົກ ສະຖານທູດສະຫະຣັດຄົນນຶ່ງ ທີ່ກຸງໂຊລໄດ້ແນະໃຫ້ຖາມ ກ່ຽວກັບເຣື່ອງດັ່ງກ່າວ ກັບກະຊວງການຕ່າງປະເທດສະຫະຣັດ ຊຶ່ງໃນເວລານີ້ ຍັງບໍ່ທັນໃຫ້ຄວາມເຫັນໃດໆເທື່ອ ຕໍ່ລາຍງານຂ່າວທີ່ວ່ານີ້. ເຫດການດັ່ງກ່າວ ເກີດຂຶ້ນໃນຂະນະທີ່ ພວມມີຄວາມຫລໍ່ແຫລມ ໃນຄວາມສັມພັນ ຣະຫວ່າງສະຫະຣັດກັບເກົາຫລີເໜືອ ໂດຍທີ່ຄອມມູນິສເກົາຫລີເໜືອ ກຳລັງກະກຽມ ໃນອັນທີ່ເອີ້ນວ່າ ການສົ່ງດາວທຽມ ຂຶ້ນສູ່ວົງໂຄຈອນ ໃນຕົ້ນເດືອນໜ້າ. ສະຫະຣັດແລະເກົາຫລີໃຕ້ກ່າວວ່າ ການສົ່ງດາວທຽມ ທີ່ວ່ານີ້ ທີ່ຈິງແລ້ວ ແມ່ນເພື່ອເປັນການປົກປິດ ການທົດລອງລູກສອນໄຟຂີປະນາວຸດ ໄລຍະໄກ.

ຈີນ - ໝູ່ເກາະສແປຣັດລີ: ເຈົ້າໜ້າທີ່ຈີນ ຄົນນຶ່ງ ກ່າວຕໍ່ສື່ມວນຊົນ ຂອງທາງການຈີນວ່າ ຈີນອາດຈະດັດແປງ ກຳປັ່ນຂອງກອງທັບ ໃຫ້ເປັນເຮືອຫາປາ ໃນຈຳນວນເພີ້ມຂຶ້ນ ເພື່ອທຳການລາຕເວນ ໃນເຂດທະເລຈີນໃຕ້. ໃນລາຍງານຂ່າວ ທີ່ພິມເຜີຍແຜ່ ໂດຍໜັງສືພິມ CHINA DAILY ຂອງທາງການຈີນ ສະບັບທີ່ອອກໃນມື້ນີ້ ທ່ານ WU SHUANG ອະທິບໍດີກົມປະມົງ ຂອງຈີນກ່າວວ່າ ການລາຕເວນເພີ້ມຂຶ້ນ ແມ່ນມີຄວາມຈຳເປັນ ເພື່ອຮັບມືກັບການທ້າທາຍ​ໃໝ່ໆ ແລະບັນຫາສລັບຊັບຊ້ອນ ກ່ຽວກັບການຄຸ້ມຄອງຫຼາຍໆເຂດ ໃນທະເລຈີນໃຕ້ ທີ່ຈີນອ້າງກັມມະສິດວ່າ ເປັນດິນແດນຂອງຕົນນັ້ນ. ທ່ານ WU ກ່າວວ່າ ຂະນະທີ່ຈີນ ປະເຊີນກັບ ບັນຫາຂັດແຍ້ງ ເພີ້ມຂຶ້ນ ແລະອັນທີ່ທ່ານເອີ້ນວ່າ ການອ້າງກັມມະສິດໃນດິນແດນ ຢູ່ໃນເຂດທະເລຈີນໃຕ້ ທີ່ບໍ່ມີຫຼັກຖານສນັບສນຸນ ຂອງປະເທດອື່ນໆນັ້ນ ຈຶ່ງມີຄວາມຈຳເປັນທີ່ຈະຕ້ອງໄດ້ເພີ້ມ ການລາຕເວນ ເພື່ອປົກປ້ອງຄຸ້ມຄອງ ສິດທິແລະຜົນປໂຍດຂອງຈີນ. ໃນສັບປະດາແລ້ວນີ້ ຟີລິບປິນໄດ້ຮັບຜ່ານ ຮ່າງກົດໝາຍສະບັບນຶ່ງ ຢືນຢັນອະທິປະໄຕຂອງຕົນ ເໜືອດິນແດນບາງສ່ວນ ຂອງ 2 ໝູ່ເກາະ ໃນເຂດທະເລຈີນໃຕ້ ຄືໝູ່ເກາະ SPRATLYS ແລະໝູ່ເກາະ SCARBOROUGH. ຈີນກ່າວ ວ່າຕົນມີ​ສິດ​ຄວບຄຸມດິນແດນທັງສອງ ແບບບໍ່ມີໃຜສາມາດໂຕ້ແຍ້ງໄດ້ ​ແລະຄັດຄ້ານ ຕໍ່ການອ້າງກັມມະສິດ ຂອງຟີລິບປິນ.

ການເມືອງໃນໄທ: ສະມາຊິກສະພາແຫ່ງຊາດ ຂອງໄທ ເລີ້ມການອະພິປາຍ ເປັນເວລາ 2 ມື້ ກ່ຽວກັບ ການລົງມະຕິ ບໍ່ໄວ້ວາງໃຈ ນາຍົກຣັຖມຸນຕຣີອະພິຊິດ ເວດຊາຊີວິດ ແລະຄະນະຣັຖບານຂອງທ່ານ. ພັກເພື່ອໄທ ຊຶ່ງເປັນພັກຝ່າຍຄ້ານ ທີ່ເປັນພັນທະມິດ ກັບອະດີດນາຍົກຣັຖ ມຸນຕຣີທັກສິນ ຊິນນະວັດ ໄດ້ກ່າວຫາ ທ່ານອະພິຊິດ ແລະຣັຖມຸນຕຣີຫລາຍໆທ່ານວ່າ ສໍ້ຣາດບັງຫລວງ ແລະບໍຣິຫານງານ ທີ່ຜິດພາດ. ເປັນທີ່ຄາດ ກັນວ່າ ພັກຝ່າຍຄ້ານຈະຕັ້ງກະທູ້ຖາມ ກ່ຽວກັບຄວາມສັມພັນ ຂອງຣັຖມຸນຕຣີການຕ່າງປະເທດ ທ່ານກະສິດ ພິຣົມ ກັບພວກປະທ້ວງຕໍ່ຕ້ານຣັຖບານ ທີ່ເຂົ້າຢຶດສນາມບິນ 2 ແຫ່ງ ທີ່ບາງກອກໃນປີກາຍນີ້. ທ່ານກະສິດໄດ້ ໃຫ້ການສນັບສນຸນ ຢ່າງເປັນການເປີດເຜີຍ ຕໍ່ກຸ່ມພັນທະມິດປະຊາຊົນເພື່ອປະຊາທິປະໄຕ ໃນຣະຫວ່າງການ ເຂົ້າຢຶດເອົາສນາມບິນ ຊຶ່ງເປັນພາກສ່ວນນຶ່ງ ຂອງແຜນການປະທ້ວງ ໃນຂອບເຂດທີ່ກວ້າງຂວາງ ເພື່ອຕໍ່ຕ້ານຣັຖບານ ທີ່ນິຍົມທ່ານທັກສິນ ທີ່ກຳອຳນາດໃນເວລານັ້ນ. ມະຕິບໍ່ໄວ້ວາງໃຈ ໄດ້ກ່າວຫາພັກປະຊາທິປັດ ຊຶ່ງເປັນພັກຣັຖບານຂອງທ່ານອະພິຊິດວ່າ ໄດ້ຮັບເງິນບໍຣິຈາກ ທີ່ຜິດກົດໝາຍຈຳນວນນຶ່ງ.

ຟີລິບປິນ - ໂຕປະກັນ: ທີ່ຟີລິບປິນ ພວກມຸສລິມ ຫົວຮຸນແຮງ ໄດ້ຕົກລົງ ທີ່ຈະປ່ອຍພະນັກງານ ສະພາກາແດງ ຄົນນື່ງ​ ໃນ​ຈຳ​ນວນ 3 ຄົນ ທີ່ຖືກຈັບໄປເປັນ​ໂຕປະກັນ ໃນເດືອນມັງກອນ ຜ່ານມາ. ປະທານ ສະພາກາແດງຟີລິບປິນ, ສະມາຊິກສະພາສູງ RICHARD GORDON ກ່າວວ່າ ທ່ານໄດ້ຮັບຄຳໝັ້ນສັນຍາ ຈາກຜູ້ນຳຂອງກຸ່ມ ABU SAYYAF ນາຍ ALBADER PARAD ໃນຕອນແລງມື້ນີ້. ຜູ້ນຳກະບົດ ໄດ້ຕົກລົງ ທີ່ຈະປ່ອຍນຶ່ງໃນຈຳນວນໂຕປະກັນ ຫລັງຈາກກອງທັບຟີລິບປິນ ກ່າວວ່າ ຕົນຈະຍ້າຍທີ່ຕັ້ງຂອງກຳລັງທະຫານ. ການເຄື່ອນໄຫວທີ່ວ່ານີ້ ມີຂຶ້ນຫລັງຈາກນາຍ PARAD ຂູ່ວ່າ ຈະຕັດຄໍ ພະນັກງານສະພາກາແດງ ທີ່ເປັນຄົນສວິດ, ອີຕາລີ ແລະຟີລິບປິນ ຖ້າກຳລັງທະຫານຣັຖບານຍັງຕາມລ່າພວກກະບົດຢູ່. ນາຍ PARAD ໄດ້ກ່າ​ວຄຳຂູ່ໃນການໃຫ້ສຳພາດ ທາງວິທຍຸໃນມື້ວານນີ້ ຫລັງຈາກໄດ້ເກີດການປະທະກັນ ທີ່ເຮັດໃຫ້ທະຫານ ຣັຖບານຢ່າງນ້ອຍ 3 ຄົນ ແລະພວກຫົວຮຸນແຮງ 2 ຄົນເສັຽຊີວິດ.

ສະຫະຣັດ - ເສຖກິດ: ປະທານາທິບໍດີ ສະຫະຣັດ ທ່ານ BARACK OBAMA ມ້ວນທ້າຍການເດີນທາງ ໄປຢ້ຽມຢາມ ຣັດກາລີຟໍເນັຽ ເປັນເວລາ 2 ມື້​ ໃນ​ມື້​ນີ້ ຊຶ່ງຈຸດສຳຄັນໃນການຢ້ຽມຢາມ ກໍແມ່ນ ການປະຊຸມແບບ TOWN HALL ຄັ້ງທີ 2 ແລະການປາກົດໂຕ ໃນລາຍການໂອ້ລົມ ທາງໂທຣະພາບຕອນເດິກ ເພື່ອຊອກຫາສຽງ ສນັບສນຸນເພິ້ມຕື່ມ ຕໍ່ນະໂຍບາຍເສຖກິດຂອງທ່ານ. ມື້ວານ​ນີ້ ທ່ານ OBAMA ​ໄດ້ກ່າວຕໍ່ພວກສນັບສນຸນ ທີ່ພາກັນໂຮ່ຮ້ອງ​ເຊັຽ​ທ່ານ ປະມານ 1300 ຄົນ ທີ່ເມືອງ COSTA MESA ໃນເຂດພາກໃຕ້ ຂອງຣັດກາລີຟໍເນັຽ ທີ່ໄດ້ຮັບຄວາມກະທົບ ຢ່າງໜັກ ຈາກສະພາບການຊັກຊ້າລົງຂອງເສຖກິດ ໃນຄືນວານນີ້. ທ່ານກ່າວວ່າ ທ່ານໄດ້ ສືບທອດບັນຫາທາງດ້ານການເງິນ ແຕ່ທ່ານຈະຮັບເອົາຄວາມຮັບຜິດຊອບ ກ່ຽວກັບເຣື່ອງນີ້. ປະທານາທິບໍດີ OBAMA ໄດ້ຮັບຮູ້ ເຖິງຄວາມໂກດແຄ້ນຂອງປະຊາຊົນ ກ່ຽວກັບການຈ່າຍເງິນບຳເນັດ ທີ່ເປັນບັນຫາໂຕ້ແຍ້ງ ໃຫ້ແກ່ຄະນະບໍຣິຫານ ຂອງບໍຣິສັດ AIG ຊຶ່ງເປັນກຸ່ມປະກັນພັຍ ຍັກໃຫຍ່ຣະຫວ່າງປະເທດ ຂອງສະຫະຣັດ ທີ່ໄດ້ຮັບເງິນຊ່ອຍເຫລືອ ຈາກຣັຖບານກາງສະຫະຣັດນັ້ນ.

ສຳລັບຂ່າວລາຍລະອຽດເຊິນຟັງສຽງທີ່ບັນທຶກໄວ້.

XS
SM
MD
LG