ລິ້ງ ສຳຫລັບເຂົ້າຫາ

ອີກບໍ່ດົນໂຣກມະເຮັງອາດຈະເຮັດໃຫ້ຄົນເສັຽຊີວິດຫລາຍທີ່ສຸດໃນໂລກ

  • Blake
  • Brianna

ອີກບໍ່ດົນໂຣກມະເຮັງອາດຈະກາຍເປັນຕົວການ ທີ່ເຮັດໃຫ້ ຄົນເສັຽຊີວິດຫລາຍທີ່ສຸດໃນໂລກ. ນັກ​ຊ່ຽວຊານດ້ານ​ການ​ແພດເວົ້າວ່າ ສາເຫດທີ່ພາ ໃຫ້ເປັນດັ່ງນັ້ນກໍເພາະ​ວ່າ ​ມີປະຊາຊົນຢູ່ໃນ ບັນດາປະເທດກຳລັງພັທນາ ສູບຢານັບມື້ນັບມີຈຳ ນວນຫລາຍຂຶ້ນ.


ນັກ​ຊ່ຽວຊານດ້ານ​ການ​ແພດຄາດຄະ ເນ​ວ່າ ໃນອີກບໍ່ນານ​ຈະມີ​ພົນລະ​ເມືອງ ໃນໂລກ​ເສັຽຊີວິດ​ຍ້ອນ​ໂຣກມະເຮັງ ຫລາຍ​ກວ່າ ​ໂຣກ AIDS,​ ​ໂຣກປອດ​ແຫ້ງ ​ແລະ ພະຍາດ​ໄຂ້ປ່າຮວມເຂົ້າກັນ. ນັກຊ່ຽວຊານເຫລົ່ານີ້ ຄາດວ່າ ຮອດປີ 2010 ​ໂຣກມະເຮັງຈະເປັນສາຍ​ເຫດອັນດັບໜຶ່ງຂອງໂລກທີ່​ເອົາ​ຊີວິດ​ປະຊາ ຊົນໄປ.


ອົງການ​ອານາມັຍ​ໂລກ ຫລືWorld Health Organization ​ໄດ້​ລາຍ​ງານ​ການ​ຄາດຄະເນ​ໃນເດືອນ ທັນວາ ວ່າ ປັດຈຸ​ບັນນີ້ ​ໂຣກຫົວ​ໃຈ​ແມ່ນ​ພະຍາດທີ່​ນຳໜ້າຂອງ ໂລກ​ ໃນການສັງຫານ​ຊີວິດ​ຄົນ.

ນັກ​ຊ່ຽວຊານ ບອກ​ວ່າ ສາຍ​ເຫດ​ສາຍ​ໜຶ່ງທີ່​ເຮັດໃຫ້ພົນລະ​ເມືອງໂລກເສັຽຊີວິດ ຍ້ອນ​ໂຣກມະ​ເຮັງ​ນັ້ນກໍເພາະວ່າ ມີ​ຄົນ​ຫລາຍ​ຄົນທີ່ຢູ່ໃນ​ປະ​ເທດກຳລັງ​ພັທນານັ້ນ ​ກຳລັງ​ເພີ້ມ​ສູບຢາຫລາຍ​ຂຶ້ນ, ​ແລະ ຈຳ​ນວນ ປະມານ 40% ​ຂອງຈຳນວນຄົນ ສູບຢາໃນໂລກ ຄິດ​ວ່າ​ແມ່ນ​ອາ​ໃສ​ຢູ່ ປະ​ເທດ ຈີນ ​ແລະ ອິນ​ເດັຽ​ເທົ່າ​ນັ້ນ. ​


ນອກຈາກ​ນັ້ນ ສາເຫດອັນ​ອື່ນຊຶ່ງລວມມີການກິນອາຫານ​ທີ່​ມີນ້ຳມັນ​ຫລາຍ ​ແລະ ການຫລຸດ​ກິດຈະກໍາທີ່ ເປັນ​ການ​ອອກກຳລັງ​ກາຍລົງກໍຍັງເຊື່ອວ່າເປັນສາເຫດທີ່​ ເຮັດໃຫ້ຄົນເປັນ​ໂຣກມະເຮັງຫລາຍຂຶ້ນ. ອັດຕາ​ຄົນທີ່ເປັນ​ໂຣກມະ​ເຮັງ​ໃນ​ນົມຢູ່​ປະ​ເທດ ຍີ່​ປຸ່ນ, ສິງ​ກະ​ໂປ ​ແລະ ​ເກົາຫລີ​ໃຕ້ ນັ້ນກໍ ໄດ້​ເພີ້ມຂຶ້ນ​ເປັນ​ສາມ​ເທົ່າ ຂອງຈຳນວນທີ່ມີຢູ່​ໃນ 40 ປີກ່ອນ.


ລາຍ​ງານ​ຂອງ ອົງການ W.H.O ​ໄດ້​ປະ​ເມີນ​ວ່າ ​ໃນໄລຍະ​ປີນີ້ ປະມານ 12 ລ້ານ​ຄົນ ຈະ​ກວດພົບ​ວ່າ​ມີ​ໂຣກມະ​ເຮັງປະ​ເພດ​ໃດ​ປະ​ເທດໜຶ່ງ. ​ ອົງການ​ໄດ້ທຳນາຍ​ວ່າ ມີ​ພົນລະ​ເມືອງ​ຫລາຍ​ກວ່າ 7 ລ້ານ​ຄົນ ຈະ​ເສັຽຊີວິດ​ໄວກວ່າ​ປົກກະຕິ ​ຍ້ອນວ່າເປັນ​ໂຣກມະ​ເຮັງ, ​ແລະ ຈຳນວນ​ຫລາຍ​ກວ່າ 5 ລ້ານ​ຄົນ​ທີ່​ເປັນໂຣກມະເຮັງ ລາຍໃໝ່ຈະແມ່ນ ຄົນທີ່ຢູ່​ໃນ​ປະ​ເທດ​ທີ່​ກຳລັງພັທນາ. ຈຳນວນ​ກໍລະນີຄົນທີ່ ເປັນໂຣກແລະເສັຽຊີວິດ ຍ້ອນໂຣກມະ​ເຮັງຄາດຄະເນວ່າ ຈະເພີ້ມຂຶ້ນ 1% ໃນ ແຕ່ລະປີ. ບັນດານັກຊ່ຽວຊານຄາດວ່າ ອັດຕາ​ຄົນ​ທີ່​ເປັນໂຣກມະເຮັງສູງທີ່ສຸດຈະແມ່ນຢູ່​ໃນ​ປະ​ເທດ ຈີນ, ຣັດເຊັຽ ແລະ ອິນເດັຽ.


ອົງການ ອານະມັຍໂລກເວົ້າ​ວ່າ ຖ້າບໍ່ມີການປິ່ນປົວ ຈຳນວນຄົນທີ່ເປັນໂຣກມະເຮັງລາຍໃໝ່ອາດ ມີຫລາຍຂຶ້ນຮອດ 27 ລ້ານຄົນຕໍ່ປີ ພາຍໃນປີ 2030 ແລະ ຄົນຕາຍຍ້ອນໂຣກນີ້ ສາມາດຂຶ້ນຮອດມີ ຈຳນວນຮອດ 17 ລ້ານ ຄົນຕໍ່ປີ.


ລາຍງານ ອີກອັນນຶ່ງຕ່າງຫາກທີ່ອອກມາໃນເດືອນທັນວາແຈ້ງວ່າ ຜູ້ຊາຍ ແລະ ຜູ້ຍິງທີ່ເສັຽ ຊີວິດຍ້ອນໂຣກມະ ເຮັງ ຢູ່ໃນສະຫະຣັດ ອາເມຣິກາ ໄດ້ຫລຸດລົງເປັນຄັ້ງທຳອິດ ໃນປະຫວັດສາດ. ລາຍງານ ທີ່ພິມຢູ່ໃນວາລະສານ ຂອງສະຖາບັນມະເຮັງແຫ່ງຊາດ (Journal of the National Cancer Institute) ເວົ້າວ່າ ການຫລຸດລົງ ນີ້ສ່ວນໃຫຍ່ກໍແມ່ນ ເປັນຍ້ອນມີຄົນເປັນໂຣກມະເຮັງປອດ, ຕ່ອມນ້ຳກາມ, ແລະ ມະເຮັງລຳໃສ້ໃຫຍ່ ຢູ່ໃນຜູ້ຊາຍ ໜ້ອຍລົງ. ສ່ວນກໍລະນີຂອງຜູ້ຍິງນັ້ນແມ່ນ ຍ້ອນວ່າ ມີຄົນທີ່ເປັນມະເຮັງນົມ ແລະ ລຳໃສ້ໃຫຍ່ຫລຸດລົງ. ສະມາຄົມ ມະເຮັງ ອາເມຣິກັນ (American Cancer Society) ເວົ້າວ່າ ຣັຖບານສາມາດເຮັດຫລາຍວິທີເພື່ອຊ່ວຍປ້ອງ ກັນບໍ່ໃຫ້ມີການເຈັບ ແລະ ຕາຍຍ້ອນມະເຮັງເພີ້ມຂຶ້ນ. ວິທີນຶ່ງກໍຄື ສະໜອງຢາປ້ອງກັນພະຍາດທີ່ ຊ່ວຍປ້ອງກັນ ການຕິດເຊື້ອທີ່ພາໃຫ້ເປັນມະເຮັງ.


ອີກວິທີນຶ່ງທີ່ສະເໜີມາກໍຄືສ້າງຕັ້ງໂຄງການທີ່ຄວບຄຸມຢາສູບໃຫ້ຫລາຍກວ່າເກົ່າ ແລະ ສະມາຄົມ ມະເຮັງ ເວົ້າວ່າ ພະນັກງານການແພດ ແລະ ຣັຖບານຄວນລົງທຶນເຂົ້າໃນການ ຄົ້ນຄວ້າກ່ຽວກັບມະເຮັງ ແລະ ການກວດກາໃຫ້ພົບ ຕັ້ງແຕ່ຫົວທີ.


ລາຍງານໂດຍ Brianna Blake


ແປເປັນພາສາລາວ ໂດຍ ບົວສະຫວັນ ສິມມາລາ


ເຊີນຟັງລາຍງານດ້ານການແພດເປັນພາສາລາວ ໂດຍການaudio file
XS
SM
MD
LG