ການກໍ່ສ້າງຂົວແຫ່ງທີ 3 ລະຫວ່າງ ລາວກັບໄທ ທີ່ເຊື່ອມຕໍ່ເມືອງທ່ານແຂກ ໃນແຂວງ ຄຳມ່ວນ ກັບຈັງຫວັດນະຄອນພະນົມ ໃນພາກອີ່ສານຂອງໄທນັ້ນ ຈະເລີ້ມລົງມື ໃນຕົ້ນເດືອນມີນານີ້.
ຄວາມຄືບໜ້າຂອງການກະກຽມໃນການກໍ່ສ້າງຂົວຂ້າມນ້ຳຂອງແຫ່ງທີ
3 ທີ່ແຂວງຄຳມ່ວນນີ້ ອີງຕາມກອງປະຊຸມໄດ້ປຶກສາຫາລືໄດ້ຮັບຂ່າວຈາກເຈົ້າຂອງກອງທຶນ
ໄດ້ແຈ້ງໃຫ້ຊາບວ່າ ພາຍຫລັງພວກເຮົາໄດ້ເຮັດການມອບຮັບເສັ້ນທາງລົດໄຟທີ່ວຽງຈັນແລ້ວ
ກໍຈະ ເຮັດການວາງສີລາເລີກ ຄາດວ່າໃນລະຫວ່າງຕົ້ນເດືອນ3.
ນີ້ກໍແມ່ນການຖະແຫລງໂດຍທ່ານ ອ່ອນມາ ລາດສະວົງ ຫົວໜ້າພະແໜກໂຍທາທິການ ແລະ ຂົນສົ່ງປະຈຳແຂວງຄຳມ່ວນ ຊຶ່ງທ່ານໄດ້ໃຫ້ການຢືນຢັນວ່າ ໂຄງ ການກໍ່ສ້າງຂົວຂ້າມແມ່ນ້ຳຂອງແຫ່ງທີ3 ລະຫວ່າງລາວ ກັບໄທທີ່ເຊື່ອມ ຕໍ່ ລະຫວ່າງເມືອງ ທ່າແຂກ ໃນແຂວງຄຳມ່ວນຂອງລາວ ກັບຈັງຫວັດນະຄອນພະນົມ ໃນເຂດພາກອີ່ສານຂອງໄທນັ້ນ ຈະເລີ້ມລົງມືດຳເນີນການກໍ່ສ້າງ ນັບຈາກເດືອນມີ ນາປີນີ້ເປັນຕົ້ນໄປ ໂດຍພິທີການວາງສິລາເລີກຈະມີຂຶ້ນຢ່າງເປັນທາງການ ໃນຊ່ວງຕົ້ນເດືອນມີນາດັ່ງກ່າວ ອັນເປັນຊ່ວງດຽວກັນ ກັບການທີ່ຈະມີພິທີເປີດການໃຊ້ ແລະ ເດີນຂະບວນລົດໄຟ ທີ່ເຊື່ອມຕໍ່ຈາກບາງກອກ ເຖິງສະຖານີລົດໄຟ ດົງໂພສີ ຫລື ທ່ານາແລ້ງ ຢູ່ເມືອງ ຫາດຊາຍຟອງ ນະຄອນຫລວງວຽງຈັນຂອງລາວ. ໂດຍຂົວຂ້າມແມ່ນ້ຳຂອງແຫ່ງທີ 3 ລະຫວ່າງລາວ ກັບໄທ ດັ່ງກ່າວນີ້ ຈະເປັນການອອກທຶນກໍ່ສ້າງຝ່າຍດຽວ ໂດຍລັດຖະບານໄທ ໃນວົງເງິນ 1.800 ກວ່າລ້ານບາດ ພາຍໃຕ້ເງື່ອນໄຂທີ່ວ່າ ທາງການໄທຈະເປັນຝ່າຍຄັດເລືອກຜູ້ຮັບເໝົາກໍ່ສ້າງພຽງແຕ່ຝ່າຍດຽວເຊັ່ນກັນ ຊຶ່ງກໍປະກົດວ່າ ທັງການໄທໄດ້ຄັດເລືອກເອົາກຸ່ມບໍລິສັດ ອິດຕາລ້ຽນ ໄທ ເປັນບໍລິສັດຜູ້ຮັບເໝົາແລ້ວ ເນື່ອງຈາກວ່າ ຖືເປັນບໍລິສັດທີ່ມີປະສົບການໃນດ້ານການກໍ່ສ້າງຢູ່ໃນປະເທດລາວ, ທາງການກໍ່ສ້າງຖະໜົນຫົນທາງ, ການກໍ່ສ້າງເຄື່ອນ ແລະ ການກໍ່ສ້າງຂົວເປັນຢ່າງດີນັ້ນເອງ.
ຂົວຂ້າມແມ່ນ້ຳຂອງແຫ່ງທີ 3 ລະຫວ່າງ ລາວ ກັບໄທ ດັ່ງກ່າວນີ້ ຈະມີຈຸດທີ່ຕັ້ງຢູ່ໃນເຂດບ້ານເວີນໃຕ້ຫ່າງຈາກເຂດເທດສະບານ ເມືອງທ່າແຂກ ຂຶ້ນໄປທາງເໜືອ ປະມານ 13 ກິໂລແມັດ ຊຶ່ງຕັ້ງຢູ່ຕົງກັນຂ້າມກັບ ບ້ານຫ້ອມ ໃນເຂດອຳເພີເມືອງນະຄອນພະນົມ ໂດຍຈະມີຄວາມຍາວຂອງຕົວຂົວ 700 ກວ່າແມັດ ແລະ ກໍຈະມີຄວາມກ້ວາງ 7 ແມັດ. ສ່ວນຖະໜົນທີ່ເຊື່ອມຕໍ່ຈາກຂົວທັງສອງດ້ານນັ້ນ ກໍຈະມີລະຍະທາງຍາວລວມກັນ ເຖິງກວ່າ 5.000 ແມັດ ຊຶ່ງກໍຈະຕ້ອງໃຊ້ເວລາໃນການດຳເນີນການກໍ່ສ້າງໃຫ້ແລ້ວເສັດພາຍໃນສາມປີຂ້າງໜ້າ.
ທາງການລາວ ແລະ ໄທ ໂດຍສະເພາະແມ່ນແຂວງຄຳມ່ວນ ແລະ ຈັງຫວັດນະຄອນພະນົມນັ້ນ ໄດ້ຄາດຫວັງໄວ້ວ່າ ຂົວແຫ່ງນີ້ຈະມີສ່ວນຢ່າງສຳຄັນ ໃນການເສີມຂະຫຍາຍຄວາມຮ່ວມມືທາງດ້ານການຄ້າການລົງທຶນ ແລະ ການບໍລິການການທ່ອງທ່ຽວ ທີ່ເຊື່ອມໂຍມໄປເຖິງ ເຂດແຂວງໃນພາກການຂອງປະເທດຫວຽດນາມອີກດ້ວຍ ໂດຍຈຸດພິເສດຂອງການເຊື່ອມຕໍ່ ຂອງທາງດ້ານການຄົມນະຄົມຂົນສົ່ງຢູ່ໃນເຂດດັ່ງກ່າວນີ້ກໍຄື ຖືເປັນເຂດທີ່ມີໄລຍະທາງສັ້ນທີ່ສຸດ ໃນການເຊື່ອມຕໍ່ລະ ຫວ່າງ 3 ປະເທດກໍຄື ຈາກໄທ ໄປ ລາວ ແລະ ຫວຽດນາມ ໂດຍມີເສັ້ນທາງແລກ 12 ໃນແຂວງຄຳມ່ວນ ເປັນເສັ້ນທາງເຊື່ອມຕໍ່ດ້ວຍໄລຍະທາງຍາວພຽງແຕ່ 170 ກິໂລແມັດ ເທົ່ານັ້ນ. ຊຶ່ງດ້ວຍຈຸດພິເສດດັ່ງກ່າວນີ້ ກໍຍັງເຮັດໃຫ້ທາງການແຂວງຄຳມ່ວນໄດ້ມອງໄປເຖິງການທີ່ຈະພັດທະນາ ແລະ ຍົກລະດັບໃຫ້ແຂວງຄຳມ່ວນເປັນສູນກາງທາງດ້ານການບໍລິການ ແລະ ການທ່ອງທ່ຽວຢ່າງຄົບຊຸດໃຫ້ໄດ້ ຫລັງຈາກທີ່ຂົວດັ່ງກ່າວນີ້ ໄດ້ດຳເນີນການກໍ່ສ້າງສຳເລັດສົມບູນແລ້ວ. ແຕ່ຢ່າງໃດກໍຕາມ ໃນ ປະຈຸບັນນີ້ ທົ່ວແຂວງຄຳມ່ວນ ກໍຍັງຄົງມີໂຮງແຮມພຽງແຕ່ 7 ແຫ່ງບ້ານພັກ 41 ແຫ່ງ ແລະ ຮ້ານອາຫານ 51 ແຫ່ງ ໃນຂະນະທີ່ແຫລ່ງທ່ອງທ່ຽວທີ່ມີຢູ່ເຖິງ 146 ແຫ່ງນັ້ນ ກໍຍັງຄົງຈະຕ້ອງດຳເນີນການພັດທະຫນາໃຫ້ໄດ້ມາດຕະຖານສາກົນຕໍ່ໄປ.