ນາຍົກລັດຖະມົນຕີອັງກິດ ທ່ານນາງເທີຣິຊາ ເມ ໄດ້ຖະແຫຼງຢູ່ຕໍ່ໜ້າບັນດາຜູ້ນຳສະຫະ
ພາບຢູໂຣບໃນວັນພຸດມື້ນີ້ ໃນຂະນະທີ່ທັງສອງຝ່າຍປະເຊີນໜ້າກັບການເຈລະຈາທີ່
ຕົກຢູ່ໃນສະພາບບໍ່ໄປບໍ່ມາ ກ່ຽວກັບການຖອນໂຕຂອງອັງກິດອອກຈາກກຸ່ມດັ່ງກ່າວ.
ການເຈລະຈາເປັນເວລາຫຼາຍເດືອນ ໄດ້ພາໃຫ້ມີການບັນລຸຂໍ້ຕົກລົງໃນຫຼາຍໆຂົງເຂດ
ເພື່ອຢຸດເຊົາຄວາມສຳພັນກັນແບບໃດ ແຕ່ກໍຍັງມີບັນຫາຄ້າງຄາທີ່ສຳຄັນຈຳນວນນຶ່ງ
ຮວມທັງວ່າ ຈະຈັດການຢ່າງໃດກັບເລື້ອງຊາຍແດນລະຫວ່າງ ໄອຣ໌ແລນເໜືອ ແລະ
ໄອຣ໌ແລນທີ່ເປັນສະມາຊິກຂອງສະຫະພາບຢູໂຣບ.
ຫຼັງຈາກທ່ານນາງເມ ໄດ້ຖະແຫຼງຕໍ່ກຸ່ມດັ່ງກ່າວແລ້ວ ພວກຜູ້ນຳຂອງ 27 ປະເທດກໍ
ຈະຮັບປະທານອາຫານຄ່ຳຂອງພວກທ່ານ ເພື່ອຫາລືກ່ຽວກັບການເຈລະຈາໃນ
ການຖອນຕົວຂອງອັງກິດ.
ປະທານສະພາສະຫະພາບຢູໂຣບທ່ານດໍໂນລ ທັສກ໌ ກ່າວກ່ອນໜ້າກອງປະຊຸມໃນ
ວັນພຸດມື້ນີ້ວ່າ ທ່ານມີແຜນທີ່ຈະຖາມທ່ານນາງເມວ່າ “ທ່ານນາງມີແຜນທີ່ໜັກແໜ້ນ
ຫຼືບໍ່ ທີ່ຈະທັບມ້າງສະພາບການບໍ່ໄປບໍ່ມາຢ່າງໃດ.”
ທ່ານທັສກ໌ກ່າວວ່າ ນັ້ນຈະເປັນສິ່ງຕັດສິນຊີ້ຂາດວ່າ ມັນເປັນໄປໄດ້ຫຼືບໍ່ທີ່ຈະແກ້ໄຂ
ຂໍ້ຂັດແຍ້ງ ແລະດຳເນີນໄປໜ້າ ກ່ຽວກັບແຜນການຖອນຕົວຢ່າງເປັນລະບຽບ ໃນ
ເດືອນມີນາປີໜ້ານີ້.
ທ່ານຍັງໄດ້ເຕືອນວ່າ ບັນດາຜູ້ນຳສະຫະພາບຢູໂຣບ ຈຳເປັນຕ້ອງໄດ້ຫາລືກັນເພື່ອ
ກະກຽມໃນອັນທີ່ຮ້ອງວ່າ “ການຕົກລົງກັນບໍ່ໄດ້ກ່ຽວກັບການຖອນຕົວຂອງອັງກິດ”
ຊຶ່ງພາຍໃຕ້ສະພາບການດັ່ງກ່າວ ອັງກິດຈະອອກໄປຈາກສະຫະພາບ ຢູໂຣບໂດຍ|
ປາດສະຈາກມາດຕະການທີ່ເປັນທາງການເພື່ອແກ້ໄຂບັນຫາຕ່າງໆເຊັ່ນວ່າເລື້ອງ
ການຄ້າ ແລະເສລີພາບໃນການເຄື່ອນໄຫວໄປມາ.
ບັນດາຜູ້ນຳຢູໂຣບຈະຕັດສິນໃຈວ່າ ຈະຈັດກອງປະຊຸມສຸດຍອດພິເສດໃນເດືອນ
ພະຈິກຈະມາເຖິງນີ້ຫຼືບໍ່ ແຕ່ທ່ານທັສກ໌ ກ່າວວ່າ ມີເຫດຜົນໃນຄວາມຈຳເປັນທີ່ເຊື່ອ
ວ່າ ທັງສອງຝ່າຍໃກ້ຈະບັນລຸການຕົກລົງກັນໄດ້ແລ້ວ..
ສະຫະພາບຢູໂຣບຕ້ອງການໃຫ້ໄອຣ໌ແລນເໜືອ ໂດຍທີ່ບໍ່ກ່ຽວເລີຍວ່າຈະມີຂໍ້ຕົກ
ລົງທາງການຄ້າ ທີ່ຕິດຕາມມາຢ່າງໃດກໍຕາມກັບອັງກິດ ຍັງສືບຕໍ່ ຢູ່ໃນກຸ່ມເກັບ
ພາສີຂອງສະຫະພາບຢູໂຣບ ເພື່ອຫລີກລ່ຽງຄວາມຈຳເປັນ ຂອງການຄວບຄຸມ
ຊາຍແດນລະຫວ່າງແຂວງດັ່ງກ່າວຂອງອັງກິດ ແລະສາທາລະນະລັດໄອຣ໌ແລນ.
ບຣັສເຊີລສ໌ໄດ້ໃຫ້ການໜູນຫຼັງຕໍ່ຄຳຮຽກຮ້ອງດັ່ງກ່າວໂດຍລັດຖະບານໄອຣ໌ແລນ
ຊຶ່ງຕ້ອງການຢາກໃຫ້ໄອຣ໌ແລນເໜືອຍັງສືບຕໍ່ຢ່າງມີຄວາມສຳພັນຢ່າງໃກ້ຊິດ
ກັບລະບຽບການຂອງສະຫະພາບຢູໂຣບ ກ່ຽວກັບເລື້ອງສິນຄ້າ ແລະການບໍລິ
ການ ຮວມທັງການຈັດແຈງກ່ຽວກັບພາສີ ຫຼັງຈາກອັງກິດຖອນຕົວອອກໄປຈາກ
ກຸ່ມດັ່ງກ່າວແລ້ວ.
ທ່ານນາງເມກ່າວວ່າ ການປະຕິບັດຕໍ່ໄອຣ໌ແລນເໜືອ ແຕກຕ່າງໄປຈາກອັງກິດ
ທັງໜົດນັ້ນ ຈະໝາຍຄວາມວ່າ ໃນຄວາມຈິງແລ້ວ ຈະຕ້ອງມີ “ຊາຍແດນຢູ່ໃນ
ທະເລໄອຣ໌ແລນ” ເພື່ອແຍກສອງເຂດຂອງອັງກິດອອກຈາກກັນ