ນາຍົກລັດຖະມົນຕີອິສຣາແອລ ທ່ານ ເບັນຈາມິນ ເນຕັນຢາຮູ ກ່າວໃນລະຫວ່າງການຢ້ຽມຢາມຂົງເຂດກາຊາໃນວັນອັງຄານວານນີ້ວ່າ ກຸ່ມຮາມາສ ຈະບໍ່ສາມາດປົກຄອງດິນແດນປາແລັດສະໄຕນ໌ ລຸນຫຼັງສົງຄາມສິ້ນສຸດລົງ, ແລະ ກ່າວອີກວ່າ ອິສຣາແອລ ໄດ້ທຳລາຍປະສິດທິພາບທາງທະຫານຂອງກຸ່ມປະກອບອາວຸດນີ້ແລ້ວ.
ທ່ານ ເນຕັນຢາຮູ ຍັງໄດ້ກ່າວໃນວີດີໂອລະຫວ່າງການຢ້ຽມຢາມຂົງເຂດກາຊາຮ່ວມກັບລັດຖະມົນຕີປ້ອງກັນປະເທດອິສຣາແອລວ່າ ຕົນຈະບໍ່ຍອມຈໍານົນຕໍ່ການຊອກຫາໂຕປະກັນ 101 ຄົນທີ່ເຊື່ອວ່າ ຍັງຄົງຢູ່ໃນຂົງເຂດກາຊາ ພ້ອມກັນນັ້ນ ຍັງສະເໜີໃຫ້ລາງວັນ 5 ລ້ານໂດລາຕໍ່ 1 ຄົນ ຖ້າສົ່ງໂຕປະກັນຄືນໃຫ້ ແລະໄດ້ກ່າວຢ້ຳອີກວ່າ ທ່ານຈະທໍາການລ່າຜູ້ທີ່ທຳຮ້າຍໂຕປະກັນຂອງຕົນ.
ຜູ້ນຳອິສຣາແອລ ກ່າວວ່າ “ໃຜກໍຕາມທີ່ສົ່ງໂຕປະກັນຄືນໃຫ້ ຈະໄດ້ຮັບການຊ່ວຍເຫຼືອພ້ອມຄອບຄົວທັງໝົດຂອງເຂົາ ໃຫ້ອອກຈາກຂົງເຂດນັ້ນຢ່າງປອດໄພ...ເລືອກເອົາສາ, ທາງເລືອກເປັນຂອງພວກເຈົ້າແລ້ວ, ແຕ່ຜົນໄດ້ຮັບຈະຍັງ ຄົງຢູ່ຄືກັນ, ພວກເຮົາຈະເອົາພວກເຂົາເຈົ້າທັງໝົດຄືນມາ.”
ໃນອີກດ້ານນຶ່ງ, ກະຊວງການເງິນຂອງສະຫະລັດ ໄດ້ທໍາການປະກາດມາດຕະ ການລົງໂທດທາງເສດຖະກິດຕໍ່ເຈົ້າໜ້າທີ່ລະດັບສູງຂອງກຸ່ມຮາມາສຕື່ມອີກ 6 ຄົນໃນວັນອັງຄານວານນີ້ ເພື່ອກົດດັນໃຫ້ມີການບັນລຸຂໍ້ຕົກລົງຢຸດຍິງ ແລະປ່ອຍໂຕປະກັນຢູ່ໃນຂົງເຂດກາຊາ.
ໃນນັ້ນ ອິສຣາແອລ ອອກມາເປີດເຜີຍວ່າ ກຸ່ມຮາມາສ ໄດ້ທໍາການໂຈມຕີອິສຣາແອລ ໃນເດືອນຕຸລາປີ 2023 ສົ່ງຜົນເຮັດໃຫ້ມີຜູ້ເສບຊີວິດ 1,200 ຄົນ ແລະ 250 ຄົນຖືກຈັບເປັນໂຕປະກັນ, ໃນຂະນະທີ່ກະຊວງສາທາລະນະສຸກຂອງເຂດກາຊາກ່າວວ່າ ການໂຈມຕີຂອງອິສຣາແອລ ເຮັດໃຫ້ຊາວ ປາແລັສໄຕນ໌ ເສຍຊີວິດຫຼາຍກວ່າ 43,500 ຄົນ ແລະອີກ 2 ລ້ານຄົນ ໄດ້ກາຍມາເປັນຜູ້ພັດພາກຈາກຖິ່ນຖານ ຍ້ອນສົງຄາມໃນຄັ້ງນີ້.
ຟໍຣັມສະແດງຄວາມຄິດເຫັນ