ບຸນນະມັດສະການພຣະທາດຫຼວງໄດ້ຈັດຂຶ້ນໃນທຸກໆປີ, ພໍເຖິງຂວບລະດູການມື້ເພັງ 15 ຄໍ່າ ເດືອນ 12, ຊາວລາວທັງມວນຕ່າງກໍຮ່ວມສະເຫຼີມສະຫຼອງ-ຂອບໄຫວ້ສັກກາລະບູຊາພຣະທາດໂລກາຈຸນລະມະນີຄວບຄູ່ກັບການຈັດງານຕະຫຼາດນັກສິນຄ້າທັງພາຍໃນ ແລະຕ່າງປະເທດເປັນເວລາ 7 ມື້ 7 ຄືນ, ສະເພາະພິທີກຳທາງສາດສະໜາມື້ອອກໃໝ່ 14 ຄໍ່າ ເດືອນ 12 ພສ 2567 ຕອນບ່າຍມີການແຫ່ຜະສາດເຜີ້ງ ແລະຕອນເຊົ້າເວລາ 6 ໂມງ ມື້ເພັງ 15 ຄໍ່າ ເດືອນ 12 ພສ 2567 ສາດສະນະພິທີໄຫວ້ພຣະຮັບສິນໃສ່ບາດຢາດນໍ້າຖວາຍປັດໃຈໄທຍະທານຕາມຮີດຄອງປະ ເພນີໃນການບູຊາເຈົ້າອາລັກຫຼັກເມືອງລະນຶກບຸນຄຸນບັນພະບູລຸດ, ລະນຶກເຖິງເຈົ້າພະຍາຜູ້ສ້າງ ແລະລາດຊະດອນທັງ ຫຼາຍລວມເຖິງການທານເຖິງບີດອນ, ມານດາ ຍາດຕິພີ່ນ້ອງທີ່ລ່ວງລັບໄດ້ມີຫໍໂຮງ-ຜາສາດ ລາດຊະວັງໄດ້ຢູ່ຢ່າງສຸກຂິມີຢູ່ມີກິນ ບໍ່ອຶດບໍ່ຢາກໃນພິພົບຂອງຕົນເຫຼົ່ານີ້ເປັນຕົ້ນ.
ບຸນພຣະທາດຫຼວງປີນີ້ຄະນະສາມາຄົມເຊື້ອຊາດລາວຢູ່ຕ່າງແດນຍັງໄດ້ເຕົ້າໂຮມເອົາພີ່ນ້ອງທີ່ອາໄສຢູ່ຕ່າງປະເທດເປັນຈຳນວນຫລວງຫຼາຍມາຢື້ຢາມຖາມຂ່າວພີ່ນ້ອງປ້ອງປາຍ, ປະເທດຊາດບ້ານເມືອງຮ່ວມທຳບຸນໄສ່ບາດສ້າງກຸສົນມາກລົ້ນທັງສົ່ງເສີມພຣະພຸດທະສາດສະໜາ ແລະປະກອບສ່ວນທຶນສ່ວນຕົວເຂົ້າໃນການສ້າງສາພັດທະນາປະເທດຊາດອີກດ້ວຍ.
ພາຍຫຼັງທຳບຸນໄສ່ບາດແລ້ວ, ຊາວລາວເຮົາຍັງມີວັດທະນະທຳການກິນເຂົ້າທີ່ຕິດພັນກັບບຸນທາດຫຼວງທີ່ຂາດບໍ່ໄດ້ແມ່ນການຮັບປະທານຕົ້ມໄກ່ລາດ, ກິນເຂົ້າກໍ່າ, ເຂົ້າເໝົ້າ, ຕໍາໝາກຮຸ່ງ, ເຂົ້າປຸ້ນ ແລະອາຫານເຍື່ອງອື່ນໆອີກດ້ວຍ.
ໃນຕອນບ່າຍຂອງວັນດຽວກັນກ່ອນຈະມີການແຂ່ງຂັນກິລາຕີຄີໄດ້ມີພິທີແຫ່ລູກຄີທີ່ວັດທາດຫຼວງເໜືອແລ້ວມຸ່ງໜ້າສູ່ຫໍຈໍ້າລູກຄີພະຍາໄຊເສດຖາທິລາດເຈົ້າເພື່ອຄອບໄຂ່ວອັງເຊີນລູກຄີນຳໄປທຳການສ່ຽງຊາຕາບ້ານເມືອງຈາກການທວາຍຜົນຊະນະໃນການຫຼິ້ນກິລາພື້ນເມືອງ ແລະຜູກມັດຄວາມສາມັກຄີຮັກແພງລະຫວ່າງຂ້າລັດຖະການກັບລາດຊະດອນ. ຈາກນັ້ນກໍສືບຕໍ່ນຳລູກຄີໄປຍັງເດີ່ນຕີຄີ ແລະຄະນະຈໍ້າລູກຄີໄດ້ທຳການລາຍງານຄະນະເຈົ້າປົກຄອງ ແລະຂໍອະນຸຍາດຫຼິ້ນກິລາຕີຄີຕາມຮີດຄອງປະເພນີ ແລະຄະນເຈົ້າປົກຄອງກ່າວເປີດພິທີຕີລູກຄີຮ່ວມສ່ຽງທາຍລູກຄີຢ່າງເປັນທາງການ. ກະຕິກາການຕີຄີມີນັກກິລາເບື້ອງລະ 50 ຄົນ, ແລະໃຊ້ເວລາຕີ 50 ນາທີ, ແຂ່ງຂັນຄົບ 25 ນາທີປ່ຽນເບື້ອງ, ສາມາດປ່ຽນໂຕນັກກິລາໄດ້ຕະຫຼອດ. ຜົນການແຂ່ງຂັນຕີຄີປີນີ້ປະກົດວ່າທິມລາດຊະດອນຊະນະທິມຂ້າລັດຖະການ 5 ຕໍ່ 4.
ຕອນຄໍ່າເວລາປະມານ 19 ໂມງ ມີພິທີກໍາຂາບສັກກິລະບູຊາພຣະທາດໂລກາຈຸນລະມະນີ ແລະແຫ່ວຽນທຽນຈູດບັ້ງໄຟບູຊາຕາມຮີດຄອງປະເພນີ. ບຸນນະມັດສະການພຣະທາດຫຼວງນອກຈາກເຜີຍແຜ່ຄໍ້າຊູພຣະພຸດທະສາໜາແລ້ວຍັງເປັນນຶ່ງໃນທ່າແຮງສົ່ງເສີມການທ່ອງທ່ຽວທາງດ້ານວັດທະນະທຳຮີດຄອງປະເພນີອັນດີງາມອີກດ້ວຍ.
ຟໍຣັມສະແດງຄວາມຄິດເຫັນ