ຄະນະກົມການເມືອງພັກ ອອກຄຳສັ່ງໃຫ້ເຂັ້ມງວດໃນການຕິດຕາມ ກວດກາ ແລະ ຕອບໂຕ້ທຸກການນຳສະເໜີຂໍ້ມູນຂ່າວສານ ທີ່ແນໃສ່ທຳລາຍການນຳພາຂອງພັກປະຊາຊົນປະຕິວັດລາວ. ຊົງຣິດ ໂພນເງິນ ມີລາຍງານກ່ຽວກັບເລື້ອງນີ້ ຈາກບາງກອກ.
ເຈົ້າໜ້າທີ່ຂັ້ນສູງໃນສູນກາງພັກປະຊາຊົນປະຕິວັດລາວ ໄດ້ເປີດເຜີຍວ່, ກົມການເມືອງສູນກາງພັກໄດ້ອອກຄຳສັ່ງໃຫ້ບັນດາອົງການຈັດຕັ້ງພັກໃນທົ່ວປະເທດ ເພີ່ມທະວີຄວາມເຂັ້ມງວດໃນການຮັກສາຄວາມສະຫງົບຮຽບຮ້ອຍ ແລະ ໃຫ້ຕິດຕາມທຸກການເຄື່ອນໄຫວໃນສັງຄົມລາວ ເນື່ອງໃນໂອກາດລັດຖະບານລາວ ເປັນປະທານຂອງອາຊຽນ ໃນຕະຫຼອດປີ 2024 ໂດຍສະເພາະແມ່ນການຕອບໂຕ້ຕໍ່ການນຳສະເໜີຂໍ້ມູນຂ່າວສານໃນສື່ສັງຄົມອອນລາຍທັງໃນລາວ ແລະ ຕ່າງປະເທດ ທີ່ປະກົດວ່າເປັນການທຳລາຍອຳນາດແລະການນຳພາຂອງພັກແລະລັດຖະບານລາວນັ້ນ ຈະຕ້ອງໃຫ້ຖືວ່າເປັນຄວາມຮັບຜິດຊອບຂອງທຸກຂະແໜງການ ໃນນີ້ ລວມເຖິງ ກໍຣະນີ ທີ່ ສື່ສັງຄົມ ອອນລາຍ ນຳສະເໜີຂໍ້ມູນຂ່າວສານທີ່ເປັນການໂຈມຕີຣັຖບານລາວໃນຖານະທີ່ເປັນປະທານອາຊຽນ ທີ່ຈະຕ້ອງຈັດກອງປະຊຸມສຸດຍອດອາຊຽນຄັ້ງທີ 44 ແລະ 45 ໃນຊ່ວງລະຫວ່າງ ວັນທີ 6-12 ຕຸລາ 2024 ດັງເຈົ້າໜ້າທີ່ຂັ້ນສູງໃນສູນກາງພັກ ໄດ້ຢືນຢັນວ່າ:
“ກຸ່ມຄົນບໍ່ດີໄດ້ພະຍາຍາມສ້າງຂ່າວທີ່ບິດເບືອນຄວາມຈິງ ຂ່າວປອມແລະໄດ້ກ່າວຫາບັນຫາສິດທິມະນຸດ ບັນຫາປະຊາທິປະໄຕ, ບັນຫາຊົນເຜົ່າ ບັນຫາສາສະໜາ ການຈັດ ຕັ້ງປະຕິບັດເສັ້ນທາງລົດໄຟ ລາວ-ຈີນ ບັນຫາເງິນເຟີ້ ການແກ້ໄຂບັນຫາຢາເສບຕິດ ແລະບັນດາຂໍ້ມູນທີ່ບິດເບືອນ ຂ່າວທີ່ບໍ່ມີມູນຄວາມຈິງໃດໆ ຂ່າວໃສ່ຮ້າຍປ້າຍສີທີ່ກຸ່ມຄົນບໍ່ດີ ແລະອິດທິກຳລັງປອລະປັກຕໍ່ຕ້ານການນຳພາຂອງພັກ ແລະ ລັດນັ້ນ ກໍ່ຄືອວຽກງານປົກປັກຮັກສາ ແລະ ພັດທະນາປະເທດຊາດ.”
ໂດຍໃນວັນທີ 10 ກໍລະກົດ 2024, ມີລາຍງານວ່າ, ເຈົ້າໜ້າທີ່ຕຳຫຼວດລາວໄດ້ກັກຕົວຊາຍຊາວລາວຄົນໜຶ່ງ. ໃນຂະນະທີ່ພວກກ່ຽວໄດ້ຖືປ້າຍຜ້າທີ່ຂຽນວ່າ, “ບໍ່ເອົາພວກສໍ້ລາດບັງຫຼວງ” ຍູ່ໃກ້ໆປະຕູໄຊ. ສ່ວນກ່ອນຫນ້ານີ້ ຜູ້ກ່ຽວຍັງໄດ້ຖືປ້າຍຜ້າທີ່ຂຽນວ່າ: "ບໍ່ເອາຜະເດັດການ" ໂດຍຢືນຢູ່ທາງຫນ້າຫ້ອງການຂອງ ສະຫະປະຊາຊາດ ທີ່ວຽງຈັນແລະຍັງບໍ່ເປັນທີ່ຈະແຈ້ງວ່າຕໍາຣວດລາວໄດ້ດໍາເນີນຄະດີຫລືລົງໂທດຜູ້ກ່ຽວຫລືບໍ່.ສ່ວນຜູ້ນຳ ຊາວໜຸ່ມລາວ ທີ່ໄປເຮັດວຽກ ຢູ່ໄທ ໃຫ້ທັດສະນະວ່າ ຈຸດປະສົງ ຂອງການ ກັກຂັງ ດັ່ງກ່າວ ແມ່ນເພື່ອຈຳກັດສິດເສຣີພາບ ໃນການປາກເວົ້າຂອງປະຊາຊົນເພື່ອຮັກສາອຳນາດການເມືອງຂອງພັກປະຊາຊົນປະຕິວັດລາວ ເປັນສຳຄັນ ທາງດ້ານກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ມີຄໍາສັ່ງເຖິງສື່ມວນຊົນຂອງ. ລັດ ເພື່ອໃຫ້ຕື່ນຕັວໃນການຕອບໂຕ້ຕໍ່ສື່ສັງຄົມທີ່ເປັນສັດຕູຂອງພັກ-ລັດຍ່າງເທ່າທັນ ດັ່ງທີ່ ທ່ານນາງສວນສະຫວັນ ວິຍະເກດ ລັດ ຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ຍືນຍັນວ່າ:
“ໃນໄລຍະຜ່ານມາ ກະຊວງຂອງພວກເຮົາ ກໍໄດ້ຮັບການສົ່ງຂ່າວຫຼາຍວ່າ ພວກເຮາຍັງບໍ່ສາມາດຕອບໂຕ້ທັນກັບສະຖາບການຕໍ່ຫາງສຽງຕ່າງໆທີ່ຕຳຫນິຫຼືວ່າທີ່ວິພາກວິຈານຕໍ່ການຊີ້ນຳ ນຳພາຂອງພັກ ຫຼືວ່າກ່ຽວກັບບັນຫາເສດຖະກິດຕ່າງໆ ຂອງປະເທດເຮາຫັ່ນຫນະ ດັ່ງນັ້ນ ພວກເຮາກໍຕ້ອງໄດ້ຄົ້ນຄ້ວາ ເພື່ອຊອກຫາວິຖີທາງ ເພື່ອແກ້ໄຂ, ຊີ້ແຈງ ອະທິບາຍໃຫ້ສັງຄົມໄດ້ຮັບຮູ້ແລະເຂົ້າໃຈຢ່າງທັນການ, ສະນັ້ນ ພວກເຮາກໍຕ້ອງຮັບຜິດຊອບໜ້າທີ່ການເມືອງຂອງຕົນ.”
ໃນປັດຈຸບັນ, ລາວມີສື່ສັງຄົມອອນລາຍ 100 ກວ່າແຫ່ງທີ່ຈົດທະບຽນຖືກຕ້ອງຕາມກົດໝາຍສື່ມວນຊົນ. ແຕ່ກໍຍັງມີອີກຫຼາຍສິບລາຍທີ່ເຜີຍແຜ່ຂ່າວສານທີ່ກ່ຽວກັບລາວຍູ່ຕ່າງປະເທດທີ່ອຳນາດການປົກຄອງລາວບໍ່ສາມາດຄວບຄຸມໄດ້.ຈຶ່ງຕ້ອງການຈະພັດທະນາລະບົບເຄືອຂ່າຍສື່ມວນຊົນໃນລາວໃຫ້ມີຄວາມທັນສະໄໝ. ດ້ວຍການຊ່ວຍເຫຼືອດ້ານວິຊາການແລະເຕັກໂນໂລຊີທີ່ກ້າວຫນ້າຈາກຈີນ ເພື່ອເຮັດໃຫ້ສາມາດຕອບໂຕ້ກັບສື່ສັງຄົມຢູ່ຕ່າງປະເທດໄດ້ຢ່າງທັນການ”
ຍິ່ງໄປກວ່ານັ້ນ, ກະຊວງຖະແຫລງຂ່າວ-ວັດທະນະທຳ ແລະ ທ່ອງທ່ຽວ ຍັງໄດ້ກວດກາ ແລະ ຄວບຄຸມການເຜີຍແຜ່ຂໍ້ມູນຂ່າວສານ ແລະຄວາມຄິດເຫັນຂອງປະຊາຊົນລາວ ໃນສື່ສັງຄົມຢ່າງເຂັ້ມງວດ. ໂດຍຖ້າໃຜຢາກເຜີຍແຜ່ຂໍ້ມູນຂ່າວສານ-ຂ່າວສານຈໍ່ສາທາລະນະໃນລາວ ກໍຕ້ອງໄດ້ລົງທະບຽນຕາມກົດໝາຍສື່ມວນຊົນ ຈຶ່ງຈະສາມາດ ດໍາເນີນການໄດ້. ແຕ່ຖ້າຫາກວ່າຜູ້ໃດຍັງບໍ່ທັນໄດ້ຮັບການອະນຸຍາດດັ່ງກ່າວ ກໍຈະຖືວ່າເປັນສື່ສັງຄົມທີ່ຜິດກົດໝາຍໃນລາວ.
ຟໍຣັມສະແດງຄວາມຄິດເຫັນ