ບັນດານັກກິລາທັງຫຼາຍແມ່ນກຳລັງທຳການຄັດເລືອກຢ່າງດຸດເດືອດ ເພື່ອເປັນຕົວແທນຂອງປະເທດເຂົ້າແຂ່ງຂັນໃນກິລາໂອລິມປິກ ທີ່ຈະຖືກຈັດຂຶ້ນໃນນະຄອນຫຼວງ ປາຣີ ປະເທດຝຣັ່ງ ໃນອີກບໍ່ເທົ່າໃດເດືອນຈະມາເຖິງນີ້. ສ່ວນນັກກິລາ ອາເມຣິກັນ ເຊື້ອສາຍລາວ ຈຳນວນນຶ່ງທີ່ໄດ້ແຂ່ງຂັນກິລາຊີເກມໃຫ້ປະເທດລາວ ແມ່ນໝົດສິດລົງຄັດເລືອກແຂ່ງຂັນໃຫ້ ສະຫະລັດ ແຕ່ກໍຍັງມີໂອກາດເປັນຕົວແທນໃຫ້ແກ່ ປະເທດບ້ານເກີດຂອງພໍ່ແມ່ ກໍເປັນໄດ້.
ຍັງເຫຼືອອີກ 57 ວັນ ກິລາໂອລິມປິກ ປາຣີ 2024 ກໍຈະໄດ້ເລີ່ມຂຶ້ນຢ່າງເປັນທາງການ, ເຊິ່ງການແຂ່ງຂັນກິລາໂອລິມປິກໃນຄັ້ງນີ້ແມ່ນແຕກຕ່າງຈາກການແຂ່ງຂັນທີ່ຜ່ານມາ, ໂດຍຈະບໍ່ມີການເປີດພິທີການແຂ່ງຂັນໃນສະໜາມກິລາຂະໜາດໃຫຍ່ ແຕ່ຈະເປັນການແຫ່ຂະບວນທາງເຮືອຕາມແມ່ນ້ຳແຊນ ຍາວ 4 ໄມ ຫຼື 6.4 ກິໂລແມັດ ແທນ. ຟັງເບິ່ງແລ້ວໜ້າຕື່ນເຕັ້ນຫຼາຍ.
ນັກກິລາໃນແຕ່ລະປະເທດແມ່ນກຳລັງທຳການຄັດເລືອກຢູ່ ແລະ ໄລຍະຂອງການຄັດເລືອກກິລາໂອລິມປິກ 2024 ແມ່ນແຕກຕ່າງກັນ ຕາມປະເພດຂອງກິລາ.
ການຄັດເລືອກນັກກິລາໂອລິມປິກຂອງສະຫະລັດ ຈຳນວນນຶ່ງແມ່ນໄດ້ສຳເລັດໄປແລ້ວ, ແຕ່ອີກຫຼາຍປະເພດກິລາແມ່ນມີກຳນົດຈະແລ້ວສຳເລັດ ໃນເດືອນມິຖຸນານີ້.
ຂໍ້ຮຽກຮ້ອງສຳລັບການເຂົ້າຄັດເລືອກນັ້ນ, ນັກກິລາແຕ່ລະຄົນຕ້ອງເປັນຄົນໄດ້ຮັບສັນຊາດອາເມຣິກັນ, ແລະ ຕ້ອງເປັນສະມາຊິກຂອງສະມາຄົມແລ່ນແລະລານສະຫະລັດ ເປັນຕົ້ນ.
ນັກກິລາອາເມຣິກັນເຊື້ອສາຍລາວ ຈຳນວນນຶ່ງແມ່ນບໍ່ສາມາດລົງຄັດເລືອກເພື່ອເປັນຕົວແທນໃຫ້ ສະຫະລັດ ໄດ້, ຍ້ອນເຂົາເຈົ້າໄດ້ເປັນຕົວແທນໃຫ້ປະເທດ ລາວ ໃນການແຂ່ງຂັນກິລາຊີເກມ ຄັ້ງທີ່ຜ່ານມາ.
ທ່ານ ຈອນ ເມສຊີນາ ມີລູກສາວກົກຊື່ວ່າ ນາງແອນເຈີລິນາ ແມັສຊິນາ ທີ່ເຄີຍຜ່ານເຂົ້າຄັດເລືອກທີມນັກລອຍນ້ຳ ໂອລິມປິກ ຂອງສະຫະລັດ, ແຕ່ບໍ່ສາມາດຄັດເລືອກອີກຍ້ອນລາວ ໄດ້ລົງແຂ່ງຂັນໃຫ້ທີມຊາດລາວ ໃນກິລາຊີເກມຄັ້ງທີ່ຜ່ານມາ ໃນປະເທດ ກຳປູເຈຍ.
ທ່ານຈອນ ເມສຊີນາ ກ່າວວ່າ “ລູກສາວຂອງຂ້ອຍແມ່ນນັກລອຍນ້ຳຢູ່ມະຫາວິທະຍາໄລ ພິດສເບີກ. ລາວໄດ້ຜ່ານເຂົ້າຄັດເລືອກນັກກິລາໂອລິມປີກຄັ້ງທີ່ຜ່ານມາ ກ່ອນ Tokyo Game. ແລະ ລາວໄດ້ເຂົ້າຄັດເລືອກ ແລະ ເຮົາເຊື່ອວ່າລາວເປັນຄົນອາເມຣິກັນເຊື້ອສາຍລາວ ຄົນທຳອິດ ທີ່ໄດ້ລອຍໃນການຄັດເລືອກທີມໂອລິມປິກ ສະຫະລັດ. ແມ່ຂອງລາວ, ເຊິ່ງແມ່ນເມຍຂອງຂ້ອຍເກີດຢູ່ວຽງຈັນ ປະເທດ ລາວ ແລະ ໄດ້ມາ ສະຫະລັດ ແຕ່ຕອນຍັງນ້ອຍ. ຕໍ່ມາລູກສາວຂອງຂ້ອຍໄດ້ຕັດສິນໃຈທີ່ຈະເປັນຕົວແທນໃຫ້ປະເທດ ລາວ ໃນການແຂ່ງຂັນກິລາລອຍນ້ຳສາກົນ. ເພາະວ່າ ແທ້ຈິງແລ້ວ ປະເທດລາວໄດ້ຮັບຜ່ານກົດໝາຍໃນປະມານປີ 2019 ທີ່ອະນຸຍາດໃຫ້ນັກກິລາທີ່ມີເຊື້ອສາຍຈາກລາວ ກັບໄປປະເທດ ແລະເອົາສັນຊາດກິຕິມະສັກ ແລະ ເປັນຕົວແທນໃຫ້ປະເທດແຂ່ງຂັນໃນກິລາສາກົນ. ພວກເຮົາໄດ້ດຳເນີນຂັ້ນຕອນຕ່າງໆ ແລະ ໃຫ້ລາວໄດ້ສັນຊາດ ແລະ ເຂົ້າຮ່ວມການແຂ່ງຂັນກິລາຊີເກມປີ 2023 ໃນປະເທດ ກຳປູເຈຍ. ລາວ ມີຄວາມສຸກຫຼາຍ ແລະ ມີແຜນທີ່ຈະສືບຕໍ່ເປັນຕົວແທນ ລາວ ໃນການແຂ່ງຂັນໃນອະນາຄົດ.”
ທ່ານ ຈອນ ເມັສຊີນາ ກ່າວອີກວ່າ ນັກກິລາທີ່ຈະທຳການຄັດເລືອກຕິດທີມຊາດ ຕ້ອງປະຕິບັດຕາມມາດຕະຖານຕ່າງໆຕາມກົດລະບຽບຂອງກິລາ ສະຫະລັດ. ຕົວຢ່າງກິລາລອຍນ້ຳ ເຂົາເຈົ້າມີເວລາມາດຕະຖານທີ່ຖືກກຳນົດໄວ້ ໃນປະເພດຕ່າງໆ. ຫຼັງຈາກນັກກິລາແຂ່ງໄດ້ຕາມເວລາທີ່ກຳນົດໄວ້ນັ້ນ ເຂົາເຈົ້າກໍຈະສາມາດຜ່ານໄປຂັ້ນຕໍ່ໄປ ເຊິ່ງແມ່ນການຄັດເລືອກຕົວແທນທີມຊາດ, ໃນນີ້ເຂົາເຈົ້າຈະເລືອກເອົາແຕ່ສອງຄົນສຳລັບການແຂ່ງຂັນແຕ່ລະປະເພດ, ຍົກຕົວຢ່າງລອຍທ່າ ຟຣີສໄຕລ໌ ສອງຄົນ, ແມງກະເບື້ອສອງຄົນ ແລະ ອື່ນໆ..
ລູກສາວຂອງທ່ານຈະບໍ່ແຂ່ງຂັນໃຫ້ ສະຫະລັດ ອີກແລ້ວ, ແຕ່ຈະແຂ່ງໃຫ້ລາວ ແທນ.
ທ່ານ ຈອນ ກ່າວວ່າ “ລາວຈະບໍ່ແຂ່ງໃຫ້ ສະຫະລັດ ອີກຕໍ່ໄປ. ລາວມີແຕ່ຈະແຂ່ງໃຫ້ປະເທດ ລາວ ຕໍ່ໄປເລື້ອຍໆ. ສະນັ້ນລາວຈະບໍ່ເຂົ້າຮ່ວມໃນການຄັດເລືອກກິລາໂອລິມປິກ.”
ທ່ານ ຈອນ ເວົ້າວ່າ ການແຂ່ງຂັນລາຍການຕໍ່ໄປສຳລັບລູກສາວຂອງທ່ານກໍຈະເປັນກິລາຊີເກມ 2025 ທີ່ຈະຈັດຂຶ້ນໃນປະເທດ ໄທ, ເຊິ່ງຈະມີຄົນອາເມຣິກັນເຊື້ອສາຍລາວ ອີກ 4 ຄົນເຂົ້າຮ່ວມນຳກັນ. ທ່ານກ່າວວ່າ ເຂົາເຈົ້າຈະຝຶກຊ້ອມເພື່ອກະກຽມເຂົ້າແຂ່ງຂັນຢູ່ໃນ ສະຫະລັດ ກັບທີມມະຫາວິທະຍາໄລຂອງເຂົາເຈົ້າ, ເພາະວ່າ ລັດຖະບານລາວບໍ່ສາມາດທີ່ຈະນຳເອົານັກກິລາໄປຝຶກຊ້ອມຢູ່ໃນປະເທດ.
ໃນກິລາໂອລິມປິກ ປາຣີ 2024 ຈະມີນັກກິລາເຂົ້າຮ່ວມປະມານ 10,500 ຄົນ ເພື່ອແຂ່ງຂັນເອົາຫຼຽນລາງວັນຈາກ 32 ປະເພດກິລາ. ສຳລັບນັກກິລາລາວທີ່ຈະເຂົ້າຮ່ວມແຂ່ງຂັນໃນຄັ້ງນີ້ ແມ່ນຄາດວ່າ ຈະບໍ່ມີຈັກຄົນ.
ໃນອະນາຄົດ, ບັນດານັກກິລາ ອາເມຣິກັນ ເຊື້ອສາຍລາວ ທີ່ເກັ່ງແລະມີພອນສະຫວັນໃນກິລາປະເພດຕ່າງໆ ແມ່ນມີແຜນທີ່ຈະໄປຝຶກຊ້ອມໃຫ້ນັກກິລາຢູ່ລາວ, ເຊິ່ງ ທ່ານ ຈອນ ຫວັງວ່າ ຫຼັງຈາກກິລາຊີເກມຄັ້ງຕໍ່ໄປ ຈະນຳເອົາກຸ່ມນັກກິລາເຂົ້າໄປເປີດຄລີນິກສອນ ແລະ ຝຶກຊ້ອມໃຫ້ນັກກິລາລາວ ໃນທ້ອງຖິ່ນເພື່ອໃຫ້ມີຄວາມສາມາດທີ່ດີຂຶ້ນກວ່າເກົ່າ ເພື່ອເຂົ້າຮ່ວມການແຂ່ງຂັນໃນລະດັບໂລກໄດ້.
ຟໍຣັມສະແດງຄວາມຄິດເຫັນ