ງານຄອນເສີດ Lao Legends, ເຊິ່ງເປັນງານສະແດງຄອນເສີດຂອງຄົນລາວທີ່ໃຫຍ່ທີ່ສຸດໃນ ສະຫະລັດ ແມ່ນໃກ້ຈະເກີດຂຶ້ນແລ້ວ. ດາຣານັກຮ້ອງທີ່ມີຊື່ສຽງໂດ່ງດັງທັງຫຼາຍຈາກລາວກໍກະກຽມທີ່ຈະອອກເດີນທາງມະ ສະຫະລັດ ແລ້ວ, ຖ້າຍັງບໍ່ທັນມາຮອດເທື່ອ. ແລະ ໃນລາຍການຂອງເຮົາມື້ນີ້, ພຸດທະສອນ ຈະອັບເດດ ກ່ຽວກັບ ຄວາມພ້ອມຂອງງານດັ່ງກ່າວ.
ສະຖານທີ່ຈັດງານຄອນເສີດ The Pavilion at Toyota Music Factory ແມ່ນກຳລັງກຽມພ້ອມທີ່ຈະຕ້ອນບັນດານັກຮ້ອງທີ່ມີຊື່ສຽງໂດ່ງດັງຈາກປະເທດ ລາວ, ຜູ້ທີ່ຈະເຂົ້າຮ່ວມໃນການຄອນເສີດທີ່ເອີ້ນວ່າ Lao Legends. ສະຖານທີ່ຈັດງານດັ່ງກ່າວນີ້ແມ່ນຕ້ອງຢູ່ເມືອງ ເອວິງ ລັດ ເທັກຊັສ ເປັນຄອນເສີດທີ່ໂຄສົກຜູ້ຈັດງານເວົ້າວ່າ ໃຫຍ່ທີ່ສຸດໃນ ສະຫະລັດ.
ທ່ານນາງ ໂທນີ ພລາສເຊັນເຊຍ ໂຄສົກສຳລັບຄອນເສີດ Lao Legends ກ່າວວ່າ “ພວກເຮົາຍັງເຫຼືອອີກປະມານ 10 ວັນກໍຈະຮອດງານຕໍ່ໄປຢູ່ທີ່ນີ້ໃນນະຄອນ ດາລລາສ, ລັດ ເທັກຊັສ ຢູ່ສະຖານທີ່ຈັດງານຄອນເສີດ Toyota Music Factory. ມັນຈະເປັນການເປີດເຜີຍລາວ ແລະ ຄົນລາວຕໍ່ ອາເມຣິກາ ທີ່ໃຫຍ່ທີ່ສຸດ ເພາະວ່ານີ້ແມ່ນບໍ່ເຄີຍເກີດຂຶ້ນມາກ່ອນ. ສະນັ້ນພວກເຮົາຂ້ອນຂ້າງວ່າຕື່ມເຕັ້ນ. ພວກເຮົາຈະຕ້ອນຮັບຄົນໃນເວທີຂະໜາດໃຫຍ່ຢູ່ Toyota Music Factory ເຊິ່ງສາມາດຮອງຮັບຄົນໄດ້ 8,000 ຄົນ. ສະນັ້ນ, ທ່ານຈະສາມາດຈິນຕະນາການໄດ້. ມັນຈະເປັນການສະແດງທີ່ງົດງາມຫຼາຍ. ທ່ານຮູ້ບໍ່ວ່າມັນຈະມີແຕ່ພວກເຮົາຢູ່ເທິງນັ້ນຢູ່ເທິງເວທີ ຫຼິ້ນອຸປະກອນດົນຕຣີ ແລະ ຮ້ອງເພງ, ມັນຈະເປັນການສະແດງຢ່າງເຕັມທີ່. ຄິດມັນດັ່ງກັບການສະແດງລະຄອນ, ການສະແດງເພື່ອສະແດງໃຫ້ເຫັນປີໃໝ່, ບຸນປີໃໝ່ລາວ, ການຟ້ອນຂອງພວກເຮົາ, ວັດທະນະທຳຂອງພວກເຮົາ, ອຸປະກອນດົນຕຣີທີ່ພວກເຮົາຫຼິ້ນ. ສະນັ້ນມັນຈະເປັນການເປີດເຜີນທີ່ຍິ່ງໃຫຍ່ຕໍ່ ອາເມຣິກາ ທີ່ພວກເຮົາຕື່ນເຕັ້ນຫຼາຍ.”
ສະຖານທີ່ຈັດງານຄອນເສີດດັ່ງກ່າວແມ່ນສາມາດຮອງຮັບຜູ້ເຂົ້າຊົມໄດ້ເຖິງ 8,000 ຄົນ ແລະ ປັດຈຸບັນນີ້ປີ້ເຂົ້າຊົມແມ່ນໄດ້ຂາຍເປັນຈຳນວນຫຼາຍແລ້ວ, ເຊິ່ງທຸກຄົນທີ່ອາໄສຢູ່ໃນ ສະຫະລັດ ແມ່ນສາມາດຊື້ໄດ້ທີ່ເວັບໄຊ້ Ticketmaster. ສຳລັບລາຄາປີ້ເຂົ້າຊົມນັ້ນແມ່ນມີຫຼາຍຊັ້ນຫຼາຍລາຄາ, ເລີ່ມຕົ້ນທີ່ບ່ອນຕ່ຳສຸດແມ່ນເດີ່ນຫຍ້າ ລາຄາ 50 ໂດລາ, ຊັ້ນກາງ ເຊິ່ງແມ່ນຊັ້ນ Platinum 250 ໂດລາ ແລະ ຊັ້ນໜ້າສຸດເຊິ່ງແມ່ນ Diamond ລາຄາ 500 ໂດລາ.
ທ່ານນາງ ໂທນີ ເວົ້າວ່ານັກຮ້ອງທີ່ເຂົ້າຮ່ວມສະແດງໃນງານແມ່ນຫຼາຍສິບຄົນ, ເຊິ່ງສ່ວນໃຫຍ່ຈະເປັນນັກສິລະປິນຈາກປະເທດລາວ, ພ້ອມກັນນັ້ນກໍຈະມີນັກດົນອາເມຣິກັນ.
ທ່ານນາງ ໂທນີ ກ່າວວ່າ “ຄືວ່າ, ມັນຈະມີນັກສິລະປິນ 30 ຄົນມາ ສະຫະລັດ. ນັກສິລະປິນ ບາງຄົນທີ່ພວກເຮົານຳມາສະແດງແມ່ນມີຊື່ສຽງຫຼາຍຢູ່ພຸ້ນໃນປະເທດ ລາວ ແລະ ພວກເຮົາກໍໄດ້ສະແດງມາຫຼາຍປີແລ້ວ ເຊັ່ນ ຕ່າຍ ອາກາດ ຜູ້ທີ່ໄດ້ເດີນທາງ, ເພື່ອສົ່ງເສີມ ແລະ ຈັດງານສະແດງຄອນເສີດໃນທົ່ວເອເຊຍຕາເວັນອອກສຽງໃຕ້, ແລະກໍຈະມີ Ola Blackeyes. ພວກເຮົາມີລາຍຊື່ນັກດົນຕຣີທີ່ໃຫຍ່ລາຍຖ້າທຸກຄົນເຂົ້າໄວເວັບໄຊ້ www.laolegends.com/lineup ເຈົ້າກໍຈະເຫັນລາຍຊື່ຂອງເຂົາເຈົ້າທັງໝົດຢູ່ຫັ້ນຄືກັນ. ພວກເຮົາມີທ້າວ Sarky ຜູ້ທີ່ຢູ່ພີ້ໃນ ສະຫະລັດ. ລາວໄດ້ທຳການສະແດງມາຫຼາຍສິບປີແລ້ວ, ແລະ ກໍເປັນນຶ່ງໃນນັກດົນຕຣີ ຣັອກ ທີ່ໃຫຍ່ທີ່ສຸດທີ່ເປັນຄົນ ອາເມຣິກັນ ເຊື້ອສາຍລາວ ຜູ້ທີ່ຈະທຳການສະແດງເຊັ່ນກັນ. ຂ້າພະເຈົ້າເຊື່ອວ່າທຸກຄົນຄົງຈະໄດ້ເຫັນລາວຢູ່ໃນສື່ສັງຄົມແລ້ວ. ລາວໄດ້ສົ່ງເສີມ ແລະ ສະໜັບສະໜູນງານ Lao Legends ຫຼາຍ ແລະ ພວກເຮົາກໍດີໃຈຫຼາຍທີ່ມີລາວຢູ່ໃນລາຍຊື່ຜູ້ທຳການສະແດງຂອງພວກເຮົາ.
ໃນງານຄັ້ງນີ້ກໍຈະມີແຂກຄົນສຳຄັນເຂົ້າຮ່ວມເຊັ່ນເອກອັກຄະລັດຖະທູດລາວ ທີ່ໃຫ້ການສະໜັບສະໜູນງານດັ່ງກ່າວ, ເອກອັກຄະລັດຖະທູດ ກຳປູເຈຍ, ເລຂາທິການລັດ ເທັກຊັສ ເຊິ່ງຕາໜ້າໃຫ້ຜູ້ປົກຄອງລັດເທັກຊັສ, ກົມຕຳຫຼວດນະຄອນ ດາລາສ ແລະ ທະຫານຜ່ານເສິກ 500 ຄົນ.
ໃນການສຳພາດເມື່ອຄັ້ງທີ່ຜ່ານມາກັບທ່ານ ທະນິດ ຈຸນລະມະນີ ຜູ້ອຳນວຍການບໍລິຫານຈັດງານສະແດງເວທີຂອງ Lao Legends ໄດ້ກ່າວວ່າງານຄອນເສີດດັ່ງກ່າວເປັນງານການກຸສົນ, ເຊິ່ງທ່ານນາງ ໂທນີ ຜູ້ເປັນໂຄສົກກໍໄດ້ກ່າວຢ້ຳຕໍ່ພວກເຮົາອີກຄັ້ງນຶ່ງວ່າ
“ສະນັ້ນລາຍໄດ້ກໍຈະຖືກແບ່ງປັນລະຫວ່າງອົງການທີ່ບໍ່ຫວັງຜົນກຳໄລລາວ ແລະ ລາວ ອາເມຣິກັນ. ສະນັ້ນ, ຖ້າຜູ້ໃດກໍຕາມທີ່ຕ້ອງການສຳລັບໂຄງການບໍ່ຫວັງຜົນກຳໄລທີ່ສະເພາະເຈາະຈົງຂອງເຂົາເຈົ້າ ຫຼື ຕ້ອງການຄວາມຊ່ວຍເຫຼືອແນວໃດກໍຕາມ, ພວກເຮົາຂໍໃຫ້ເຂົາເຈົ້າຕິດຕໍ່ຫາຂ້າພະເຈົ້າເອງ ຫຼື ອີເມລ ຫາພວກເຮົາ ແລະ ບອກໃຫ້ເຮົາຮູ້ວ່າເຂົາເຈົ້າຢາກທີ່ຈະເຂົ້າຮ່ວມ ແລະ ຂໍສ່ວນແບ່ງຈາກລາຍໄດ້ນັ້ນ. ພວກເຮົາມີສອງສາມມູນນິທິທີ່ຂໍການຊ່ວຍເຫຼືອແລ້ວຄືມູນນິທິ Lao Heritage ຜູ້ທີ່ຈະໄດ້ຮັບສ່ວນນຶ່ງຂອງລາຍໄດ້ທີ່ໄດ້ມາຈາກງານຄອນເສີດນີ້. ເປົ້າໝາຍຂອງພວກເຮົາແມ່ນເພື່ອລວມເອົາທຸກຄົນໂດຍຊ່ວຍເຫຼືອຄົນລາວ ແລະ ລາວອາເມຣິກັນ ກ່ຽວກັບ ການບໍ່ຫວັງຜົນກຳໄລຢ່າງໃດກໍຕາມ, ຄວາມຝັນຫຍັງກໍຕາມ, ບໍ່ວ່າຈະເປັນຄວາມປາຖະໜາໃດກໍຕາມທີ່ເຂົາເຈົ້າມີ, ພວກເຮົາຢາໃຫ້ເຂົາເຈົ້າມີເວທີທີ່ຈະເຮັດສິ່ງນັ້ນ. ມັນບໍ່ໄດ້ມີຈຳກັດໃຫ້ແຕ່ນຶ່ງອົງການ ຫຼື ຫ້າ ຫຼື ສິບອົງການ ແລະ ຫຼາຍຮ້ອຍ ຫຼາຍພັນອົງການທີ່ພວກເຮົາຊ່ວຍເຫຼືອ. ມັນມີແຕ່ສຳຄັນທີ່ວ່າເຂົາເຈົ້າຕິດຕໍ່ຫາພວກເຮົາ, ສະນັ້ນພວກເຮົາຈຶ່ງຈະຮູ້ວ່າເຂົາເຈົ້າຕ້ອງການມັນ.
ທ່ານານງ ໂທນີ ເວົ້າ ກ່ຽວກັບ ອົງການຂອງລາວຕື່ມວ່າ “ພວກເຮົາແມ່ນອົງການທີ່ບໍ່ຫວັງຜົນກຳໄລ, ແຕ່ພວກເຮົາລະບຸຕົນເອງດັ່ງກັບອົງການທີ່ບໍ່ຫວັງຜົນກຳໄລທີ່ແຕກຕ່າງ. ພວກເຮົາມີສະຖານະ 501C3 ເຊິ່ງໝາຍຄວາມວ່າພວກເຮົາເປັນອົງການທີ່ບໍ່ຫວັງຜົນກຳໄລທີ່ອຸທິດຕົນໃຫ້ຈຸດປະສົງທາງດ້ານການສຶກສາໂດຍສະເພາະ ແລະ ຈຸດປະສົງການກຸສົນເທົ່ານັ້ນ. ສະນັ້ນພວກເຮົາຈະບໍ່ເອົາລາຍໄດ້ໃຫ້ຕົນເອງ, ພວກເຮົາບໍ່ຈ້າງ ຫຼື ຈ່າຍເງິນໃຫ້ຕົນເອງ. ນັກສິລະປະທຸກຄົນທີ່ມາຈາກລາວ ແລະ ຢູ່ ສະຫະລັດ ນີ້ທີ່ເປັນບ້ານເກີດຂອງເຮົານີ້ແມ່ນບໍ່ໄດ້ຖືກຈ້າງ ເຂົາເຈົ້າສະແດງໂດຍບໍ່ໄດ້ຮັບຄ່າຈ້າງຫຍັງ.
ທ່ານນາງ ໂທນີ ເວົ້າວ່າອົງການດັ່ງກ່າວຫວັງວ່າຈະຈັດງານທຸກໆສອງປີເພື່ອຫາເງິນຊ່ວຍເຫຼືອບັນດາອົງການການກຸສົນຕ່າງໆ.
ຟໍຣັມສະແດງຄວາມຄິດເຫັນ