ບັນດານັກກູໄພໃນ ໄຕ້ຫວັນ ໄດ້ປະເຊີນກັບໄພຂົ່ມຂູ່ຂຶ້ນຕື່ມຈາກດິນເຈື່ອນ ແລະ ກ້ອນຫີນຕົກລົງມາໃນການຄົ້ນຫາຂອງເຂົາເຈົ້າ ໃນວັນສຸກມື້ນີ້ ສຳລັບປະຊາຊົນຫຼາຍກວ່າສິບຄົນທີ່ຍັງຫາຍສາບສູນຈາກເຫດແຜ່ນດິນໄຫວຂອງອາທິດນີ້, ໃນຂະນະທີ່ຈຳນວນຜູ້ເສຍຊີວິດສູງສຸດໄດ້ເພີ່ມຂຶ້ນເປັນ 12 ຄົນ ແລະ ຜູ້ທີ່ຕິດຄ້າງຈຳນວນນຶ່ງແມ່ນໄດ້ຖືກນຳມາສູ່ຄວາມປອດໄພ, ອີງຕາມອົງການຂ່າວ ຣອຍເຕີສ໌.
ບັນດານັກຄົ້ນຫາໄດ້ຄົ້ນພົບສົບຜູ້ເສຍຊິວິດອີກສອງຄົນຫຼັງຈາກແຜ່ນດິນໄຫວຄວາມແຮງ 7.2 ຂອງວັນພຸດທີ່ຜ່ານມາ ໄດ້ເກີດຂຶ້ນໃນເມືອງ ຮວາລຽນ ທີ່ມີປະຊາກອນໜາແໜ້ນຢ່າງກະຈັດກະຈາຍ, ແລະ ສ່ວນໃຫຍ່ ເປັນເຂດຊົນນະບົດ, ເຮັດໃຫ້ຫຼາຍຮ້ອຍຄົນຕິດຄ້າງຢູ່ສວນອຸດທະຍານແຫ່ງຊາດ ໃນຂະນະທີ່ກ້ອນຫີນໃຫຍ່ຫຼາຍສິບໂຕນໄດ້ກິ້ງລົງພູ, ຕັດຖະໜົນຫຼາຍເສັ້ນຂາດ.
ໃນຂະນະທີ່ແຜ່ນດິນໄຫວນ້ອຍຕິດຕາມມາປະມານ 50 ຄັ້ງ ໄດ້ສັ່ນສະເທືອນຢູ່ເຂດດັ່ງກ່າວ ໃນຕອນຂ້າມຄືນທີ່ຜ່ານມານັ້ນ, ການສັ່ນສະເທືອນບາງຄັ້ງແມ່ນສາມາດຮູ້ສຶກໄດ້ໃນນະຄອນຫຼວງ ໄທເປ ທີ່ຕັ້ງຢູ່ຫ່າງໄກອອກໄປ, ບັນດານັກກູ້ໄພໄດ້ກ່າວວ່າ 400 ຄົນທີ່ບໍ່ສາມາດຕິດຕໍ່ໄດ້ ໃນໂຮງແຮມຫຼູແຫ່ງນຶ່ງ ໃນສວນອຸດທະຍານແຫ່ງຊາດ ຕາໂຣໂກ ກອດຈ໌ ແມ່ນປອດໄພ, ດ້ວຍເຮືອບິນເຮລິຄັອບເຕີໄດ້ຂົນຜູ້ທີ່ບາດເຈັບອອກມາ ແລະ ນຳເອົາສະບຽງໄປສົ່ງໃຫ້. “ຝົນໄດ້ເພີ່ມຄວາມສ່ຽງຂອງກ້ອນຫີນຕົກ ແລະ ດິນເຈື່ອນ, ເຊິ່ງແມ່ນສິ່ງທ້າທາຍທີ່ໃຫຍ່ທີ່ສຸດໃນປັດຈຸບັນນີ້, ອີງຕາມການກ່າວຂອງທ່ານ ຊູ ຢູ-ມິງ, ຜູ້ນຳພາທີມຄົ້ນຫາທີ່ຊ່ວຍເຫຼືອໃນປະຕິບັດການກູ້ໄພ.
ປັດໄຈດັ່ງກ່າວນີ້ ແມ່ນບໍ່ສາມາດຄາດການໄດ້, ເຊິ່ງໝາຍຄວາມວ່າພວກເຮົາບໍ່ສາມາດຢືນຢັນຕົວເລກຂອງຈຳນວນວັນທີ່ຕ້ອງການສຳລັບປະຕິບັດການຄົ້ນຫາ ແລະ ກູ້ໄພ.”
ກົມດັບໄພຂອງ ໄຕ້ຫວັນ ໄດ້ກ່າວວ່າສົບຂອງສອງຄົນໄດ້ຖືກພົບເຫັນຢູ່ໃນພູ, ແຕ່ບໍ່ໄດ້ໃຫ້ຂໍ້ມູນໃໝ່ໃນທັນທີສຳລັບຈຳນວນຜູ້ເສຍຊີວິດສູງສຸດ. ເຂົາເຈົ້າໃຫ້ຕົວເລກຜູ້ຫາຍສາບສູນ 18 ຄົນ, ເຊິ່ງສາມຄົນໃນນັ້ນ ແມ່ນຄົນຕ່າງປະເທດຈາກ ອອສເຕຣເລຍ ແລະ ການາດາ.
ຟໍຣັມສະແດງຄວາມຄິດເຫັນ