ລິ້ງ ສຳຫລັບເຂົ້າຫາ

ວັນພຸດ, ໑໗ ເມສາ ໒໐໒໔

ໄທ ເພັ່ງ​ເລັງ​ທີ່​ຈະ​ງົດ​ນຳ​ເຂົ້າ​ສາ​ລີ​ຈາກ​ປະ​ເທດ​ເພື່ອນ​ບ້ານ ສືບ​ເນື່ອງ​ມາ​ຈາກ​ມົນ​ລະ​ພິດ​ຝຸ່ນ​ຄວັນ


​ຊ​າວ​ນາ​ຄົນ​ນຶ່ງ​ຂາຍ​ສາ​ລີຫຼາຍ​ຊະ​ນິດ​ໃນ​ນະ​ຄອນຫຼວງ ລີ​ມາ, ປະ​ເທດ ເປ​ຣູ, 7 ກັນ​ຍາ 2010.
​ຊ​າວ​ນາ​ຄົນ​ນຶ່ງ​ຂາຍ​ສາ​ລີຫຼາຍ​ຊະ​ນິດ​ໃນ​ນະ​ຄອນຫຼວງ ລີ​ມາ, ປະ​ເທດ ເປ​ຣູ, 7 ກັນ​ຍາ 2010.

ທາງ​ການ​ໄທ ເປີດ​ເຜີຍ​ໃນ​ວັນ​ພຸດ​ວານນີ້​ວ່າ ຕົນ​ມີ​ແຜນ​ຈະ​ງົດ​ການ​ນຳ​ເຂົ້າ​ສາ​ລີ​ຈາກ​ປະ​ເທດ​ເພື່ອນ​ບ້ານ ສືບ​ເນື່ອງ​ມາ​ຈາກ​ການ​ເຜົາ​ໄໝ້​ໃນ​ພາກ​ສ່ວນ​ກະ​ສິ​ກຳ ທີ່​ມີ​ສ່ວນ​ກ່ຽວ​ຂ້ອງ​ກັບ​ບັນ​ຫາ​ຝຸ່ນ​ຄວັນ​ທີ່​ປົກ​ຄຸມຫຼາຍ​ເມືອງ​ໃນ​ປະ​ເທດ ໄທ ອີງຕາມ​ການ​ລາຍ​ງານ​ຂອງ​ອົງ​ການ​ຂ່າວ ຣອຍ​ເຕີ.

ທ່ານ ໄຊ ວັ​ດ​ສ​ຣົງ ໂຄ​ສົກ​ລັດ​ຖະ​ບານ​ກ່າວ​ວ່າ ມາດ​ຕະ​ການ​ງົດ​ນຳ​ເຂົ້າ​ດັ່ງ​ກ່າວ​ຈະ​ຂັດ​ກັບ​ເຈດ​ຈຳ​ນົງ​ຂອງ ໄທ ທີ່​ມີ​ກັບ​ອົງ​ການ​ການ​ຄ້າ​ໂລກ ແລະ ການ​ຫ້າມ​ນຳ​ເຂົ້າ​ກະ​ຖືກ​ບັງ​ຄັບ​ໃຊ້ຫຼັງ​ຈາກຜ່ານພະ​ຣາ​ຊະ​ບັນ​ຍັດອາ​ກາດ​ສະ​ອາດ​ເພື່ອ​ປະ​ຊາ​ຊົນ.

ປັດ​ຈຸ​ບັນ​ຮ່າງ​ພະ​ຣາ​ຊະ​ບັນ​ຍັດ​ອາ​ກາດ​ສະ​ອາດ ກຳ​ລັງ​ຢູ່​ໃນ​ຂັ້ນ​ຕອນ​ຫາ​ລື​ໃນ​ທາງ​ລາຍ​ລະ​ອຽດຫຼັງ​ລັດ​ຖະ​ສະ​ພາ​ໄດ້ມີມະ​ຕິ​ຢ່າງ​ເປັນ​ເອ​ກະ​ສັນເພື່ອ​ຮັບ​ຮອງຫຼັກ​ການ​ຂອງ​ຮ່າງ ໃນ​ວາ​ລະ​ທີ​ນຶ່ງ​ໄປ​ເມື່ອ​ເດືອນ​ມັງ​ກອນ​ທີ່​ຜ່ານ​ມາ ໂດຍ​ກົດ​ໝາຍນີ້​ມີ​ຈຸດ​ມຸ່ງ​ໝາຍ​ເພື່ອ​ກຳ​ກັບ​ຄວບ​ຄຸມ​ກິດ​ຈະ​ກຳ​ທີ່​ສ້າງ​ມົນ​ລະ​ພິດ​ໃນຫຼາຍ​ພາກ​ສ່ວນ​ລວມ​ເຖິງ​ພາກ​ສ່ວນ​ອຸດ​ສາ​ຫະ​ກຳ, ທຸ​ລະ​ກິດ, ກະ​ສິ​ກຳ ແລະ ການ​ຂົນ​ສົ່ງ.

ແຜນ​ມາດ​ຕາ​ການ​ງົດ​ນຳ​ເຂົ້າ​ຄັ້ງ​ນີ້​ເກີດ​ຂຶ້ນ​ສືບ​ເນື່ອງ​ຈາກ​ບັນ​ຫາ​ຝຸ່ນ​ຄວັນ​ໃນ​ພື້ນ​ທີ່​ພາກ​ເໜືອ​ຂອງ​ປະ​ເທດທີ່​ມີ​ດິນ​ແດນ​ຕິດ​ກັບ ມຽນ​ມາ ແລະ ລາວ ຊຶ່ງ​ຢູ່​ໃນ​ສະ​ຖາ​ນະ​ການ​ທີ່​ຄຸນ​ນະ​ພາບ​ອາ​ກາດ​ບໍ່​ດີ ເຂົ້າ​ລະ​ດັບ​ອັນ​ຕະ​ລາຍ​ໃນ​ຊ່ວງບໍ່​ເທົ່າ​ໃດ​ອາ​ທິດ​ທີ່​ຜ່ານ​ມາ.

ເມື່​ອ​ອາ​ທິດ​ແລ້ວນີ້, ຂໍ້​ມູນ​ຈາກ​ລະ​ບົບ​ຕິດ​ຕາມ​ຄຸນນ​ະ​ພາບ​ອາ​ກາດ​ ສວິດ​ເຊີ​ແລນ IQAir ລະ​ບຸ​ວ່າ​ຈັງ​ຫວັດ​ຊຽງ​ໃໝ່ ຕິດ​ອັນ​ດັບ​ເມືອງ​ທີ່​ມີ​ມົນ​ລະ​ພິດ​ທາງ​ອາ​ກາດ​ສູງ​ທີ່​ສຸດ​ໃນ​ໂລກ.

ຝຸ່ນ​ຄວັນ​ທີ່​ເກີດ​ຂຶ້ນ​ມີ​ສາ​ເຫດ​ມາ​ຈາກ​ການ​ເຜົາ​ໄໝ້​ໃນ​ພາກກ​ະ​ສິ​ກຳ, ພົນ​ລະ​ພິດ​ຈາກ​ພາກ​ອຸດ​ສາ​ຫະ​ກຳ, ລວມ​ເຖິງ​ການ​ເຜົາ​ໄໝ້​ຂອງ​ຍານ​ພາ​ຫະ​ນະ​ທີ່​ໃຊ້​ໃນ​ການ​ສັນ​ຈອນ​ສົ່ງ​ຜົນ​ໃຫ້​ເມືອງຫຼາຍ​ແຫ່ງ​ໃນ​ປະ​ເທດ​ຖືກ​ປົກ​ຄຸມ​ໄປ​ດ້ວຍ​ຝຸ່ນ​ຄວັນ.

ຟໍຣັມສະແດງຄວາມຄິດເຫັນ

XS
SM
MD
LG