ງານລູກເສືອໂລກ ແຈມໂບຣີ ໃນເກົາຫລີໃຕ້ ຈະສິ້ນສຸດກ່ອນກຳນົດເນື່ອງຈາກ ພະຍຸໄຕ້ຝຸ່ນທີ່ກຳລັງເຂົ້າມາເຖິງ, ບັນດາຜູ້ຈັດຕັ້ງໄດ້ກ່າວໃນວັນຈັນມື້ນີ້ ໃນຂະນະທີ່ເຂົາເຈົ້າໄດ້ຮ້ອງຂໍໃຫ້ລັດຖະບານເພື່ອຊ່ວຍຢ່າງ “ຮີບດ່ວນ” ກັບຄວາມພະຍາຍາມທີ່ຈະສົ່ງພວກເດັກນ້ອຍຫລາຍສິບພັນຄົນກັບຄືນບ້ານ ອີງຕາມອົງການຂ່າວຝຣັ່ງ (AFP)
ປະມານ 43,000 ຄົນໄດ້ເຂົ້າຮ່ວມງານ ແຈມໂບຣີ ທີ່ໄດ້ເລີ້ມຂຶ້ນໃນແຂວງ ເຈໂອລາເໜືອ ເມື່ອອາທິດແລ້ວນີ້ ແຕ່ວ່າຄື້ນອາກາດຮ້ອນຮຸນແຮງໄດ້ເຮັດໃຫ້ພວກເດັກນ້ອຍລູກເສືອຫລາຍຮ້ອຍຄົນພາກັນລົ້ມປ່ວຍ ບັງຄັບໃຫ້ລັດຖະບານໂຊລ ຕ້ອງສົ່ງພວກນາຍແພດທະຫານ, ສະໜອງລົດບັສຕິດແອເຢັນໄປໃຫ້ ແລະ ປະຕິຍານທີ່ຈະທຳຄວາມພະຍາຍາມສຸດຄວາມສາມາດເພື່ອໃຫ້ການຊ່ວຍເຫຼືອງານດັ່ງກ່າວ.
ກຸ່ມລູກເສືອ ອາເມຣິກັນ ແລະອັງກິດ ທີ່ໄດ້ຖອນຕົວໃນທ້າຍອາທິດທີ່ຜ່ານມາ, ໄດ້ອ້າງເຖິງຄວາມເປັນຫ່ວງ ກ່ຽວກັບ ອາກາດຮ້ອນຮຸນແຮງ, ເຖິງແມ່ນບັນດາຜູ້ຈັດຕັ້ງກ່າວວ່າງານ ແຈມໂບຣີ ຈະສືບຕໍ່ໄປ, ໂດຍຮຽກຮ້ອງໃຫ້ຜູ້ເຂົ້າຮ່ວມພິຈາລະນາມັນດັ່ງກັບ “ເວທີສຳລັບເອົາຊະນະຄວາມທ້າທາຍ.”
ແຕ່ວ່າດ້ວຍການພະຍາກອນວ່າພາຍຸໄຕ້ຝຸ່ນທີ່ກຳລັງຫຍັບເຂົ້າຈະກະທົບໃສ່ພື້ນທີ່ສ່ວນໃຫຍ່ຂອງ ເກົາຫລີໃຕ້ ຮ່ວມທັງທີີ່ພັກເຊົາຂອງພວກລູກເສືອນັ້ນ, ງານ ແຈມໂບຣີ ຈຶ່ງຖືກບັງຄັບໃຫ້ຢຸດກ່ອນກຳນົດ.
