ຜູ້ສະໝັກເປັນປະທານາທິບໍດີຈາກພັກເດໂມແຄຣັດ ທ່ານໂຈ ໄບເດັນ ໃນແລງວັນພະຫັດວານນີ້ ໄດ້ຕ້ອງຕິໃນອັນທີ່ທ່ານຮ້ອງວ່າ ການຮັບມືກັບໂຣກລະບາດໄວຣັສໂຄໂຣນາ “ແບບຕື່ນຕົກໃຈ” ຂອງປະທານາທິບໍດີດໍໂນລ ທຣຳໃນຂະນະທີ່ທ່ານທຣຳ ໄດ້ກ່າວປ້ອງກັນ ການຮັບມືກັບວິກິດການດັ່ງກ່າວຂອງທ່ານ ທີ່ເຮັດໃຫ້ຊາວອາເມຣິກັນ ເສຍຊີວິດໄປແລ້ວຫຼາຍກວ່າ 217,000 ຄົນ ອີງຕາມລາຍງານ ຂອງອົງການຂ່າວຣອຍເຕີ້.
ໃນການຖະແຫຼງຕໍ່ກອງປະຊຸມຕອບຄຳຖາມທີ່ຈັດຂຶ້ນແຂ່ງກັນ ແລະອອກອາກາດ ພ້ອມໆກັນຄົນລະຕາໜ່າງໂທລະພາບ ຫຼັງຈາກການໂຕ້ວາທີ ຊຶ່ງຕົ້ນຕໍກຳນົດໃສ່ແລງວັນພະຫັດໄດ້ມີການຍົກເລີກ ລຸນຫຼັງທີ່ທ່ານທຣຳໄດ້ຕິດໂຄວິດ-19 ຊຶ່ງເປັນພະຍາດທີ່ມາຈາກໄວຣັສໂຄໂຣນາ.
ການປະຊຸມຕອບຄຳຖາມທີ່ມີການແບ່ງກັນໃນຈໍໂທລະພາບແມ່ນເປັນການເຕືອນຢ່າງຈະແຈ້ງໃນຫຼາຍດ້ານ ເຖິງການໂຄສະນາຫາສຽງທີ່ໄດ້ມີການປ່ຽນແປງຍ້ອນໂຣກລະບາດໂຄວິດ-19 ທີ່ໄດ້ພາໃຫ້ 18 ລ້ານກວ່າຄົນພາກັນໄປປ່ອນບັດລ່ວງໜ້າສອງອາທິດກ່ອນການເລືອກຕັ້ງໃນວັນທີ 3 ພະຈິກ.
ທ່ານໄບເດັນໄດ້ກ່າວຕໍ່ຜູ້ມີສິດປ່ອນບັດຢູ່ນະຄອນຟີລາແດລເຟຍຜ່ານທາງໂທລະພາບ ABC ໂດຍໄດ້ຖິ້ມໂທດໃສ່ປະທານາທິບໍດີສັງກັດພັກຣີພັບບລີກັນວ່າ ປິດບັງຄວາມຮ້າຍແຮງຂອງເຊື້ອໄວຣັສ ທີ່ໄດ້ຕິດແປດໃສ່ເກືອບ 8 ລ້ານຄົນແລ້ວ ຢູ່ໃນສະຫະລັດ.
ທ່ານໄບເດັນກ່າວວ່າ “ທ່ານເວົ້າວ່າ ທ່ານບໍ່ໄດ້ບອກໃຫ້ຜູ້ໃດຮູ້ ຍ້ອນທ່ານຢ້ານວ່າຊາວອາເມຣິກັນຈະຕື່ນຕົກໃຈ. ຊາວອາເມຣິກັນ ບໍ່ໄດ້ຕື່ນຕົກໃຈເລີຍ. ທ່ານເປັນຜູ້ຕື່ນຕົກໃຈ.”
ປະທານາທິບໍດີທຣຳ ໄດ້ກ່າວປ້ອງກັນການຮັບມືຂອງທ່ານ ກັບໂຣກລະບາດດັ່ງກ່າວ ພ້ອມທັງການປະພຶດປະຕິບັດສ່ວນໂຕຂອງທ່ານ ຮວມທັງການຈັດພິທີ ທີ່ສວນດອກກຸຫຼາບຂອງທຳນຽບຂາວ ທີ່ມີພຽງບໍ່ເທົ່າໃດຄົນທໍ່ນັ້ນ ໃສ່ໜ້າກາກປິດປາກ ຫຼືຮັກສາໄລຍະຫ່າງກັນ ຊຶ່ງເຮັດໃຫ້ມີຜູ້ໄປຮ່ວມພິທີຈຳນວນນຶ່ງຕິດເຊື້ອໄວຣັສດັ່ງກ່າວ.
ທ່ານທຣຳກ່າວຜ່ານໂທລະພາບ NBC ຕໍ່ໜ້າແຂກຜູ້ມິີສິດປ່ອນບັດຈຳນວນນຶ່ງທີ່ໂຮມຊຸມນຸມກັນຢູ່ຂ້າງນອກ ໃນນະຄອນໄມອາມີ ໂດຍເວົ້າວ່າ “ເຮ ຂ້າພະເຈົ້າເປັນປະທານາທິບໍດີ ຂ້າພະເຈົ້າຕ້ອງພົບພໍ້ຜູ້ຄົນ ຂ້າພະເຈົ້າບໍ່ສາມາດໄປລີ້ຢູ່ໃນຫ້ອງຊັ້ນໃຕ້ດິນ” ຊຶ່ງເປັນການຕ້ອງຕິແບບເປັນໄນ ຕໍ່ທ່ານໄບເດັນ ທີ່ໄດ້ຢຸດເຊົາການໂຄສະນາຫາສຽງເປັນເວລາຫຼາຍໆເດືອນ ໃນລະຫວ່າງທີ່ເກີດໂຣກລະບາດຢູ່ນັ້ນ.
ທ່ານທຣຳບໍ່ໄດ້ຕອບຄຳຖາມ ກ່ຽວກັບວ່າ ທ່ານກວດເປັນລົບ ເທື່ອສຸດທ້າຍ ໃນເວລາໃດແທ້ ກ່ອນຕິດເຊື້ອໄວຣັສ ໂດຍເວົ້າວ່າ ທ່ານຈື່ບໍ່ໄດ້ວ່າແມ່ນຍາມໃດ.
ທ່ານທຣຳ ຊຶ່ງໄດ້ລົບກວນທ່ານໄບເດັນ ໃນລະຫວ່າງການໂຕ້ວາທີ ທີ່ວຸ້ນວາຍ ເມື່ອ 2 ອາທິດກ່ອນນັ້ນ ຢືນຢັດດ້ວຍນ້ຳສຽງທີ່ແຂງຂັນ ໂຕ້ຖຽງເລື້ອຍໆກັບຜູ້ຈັດລາຍການ ຊາແວນນາ ກູທຣີ (Savannah Guthrie.)
