ລິ້ງ ສຳຫລັບເຂົ້າຫາ

ວັນພຸດ, ໒໙ ພຶດສະພາ ໒໐໒໔

ປ. ທຣຳ ຈະເລືອກແມ່ຍິງ ເພື່ອສະເໜີແຕ່ງຕັ້ງ ໃຫ້ເປັນຜູ້ພິພາກສາສານສູງສຸດ


ທຸງຊາດສະຫະລັດ ພວມປິວສະບັດເຄິ່ງເສົາ ຢູ່ທີ່ສານສູງສຸດ ຫຼັງຈາກໄດ້ຮັບຂ່າວ ການເຖິງແກ່ອະສັນຍະກຳ ຂອງຜູ້ພິພາກສາສານສູງສຸດ ທີ່ນະຄອນຫຼວງວໍຊິງ ເມື່ອວັນທີ 19 ກັນຍາ 2020.
ທຸງຊາດສະຫະລັດ ພວມປິວສະບັດເຄິ່ງເສົາ ຢູ່ທີ່ສານສູງສຸດ ຫຼັງຈາກໄດ້ຮັບຂ່າວ ການເຖິງແກ່ອະສັນຍະກຳ ຂອງຜູ້ພິພາກສາສານສູງສຸດ ທີ່ນະຄອນຫຼວງວໍຊິງ ເມື່ອວັນທີ 19 ກັນຍາ 2020.

ປະທານາທິບໍດີສະຫະລັດ ທ່ານດໍໂນລ ທຣຳ ເບິ່ງຄືວ່າຈະເພັ່ງເລັງໃສ່ການແຕ່ງ ຕັ້ງນຶ່ງໃນສອງນັກກົດໝາຍແມ່ຍິງ ທີ່ທ່ານໄດ້ແຕ່ງຕັ້ງໃຫ້ເປັນຜູ້ພິພາກສາສານອຸທອນຂອງລັດຖະບານກາງ ໃຫ້ເຂົ້າຮັບໜ້າທີ່ແທນ ທ່ານນາງຣູດທ໌ ເບເດີ ກິນສ໌ເບີກ ຜູ້ພິພາກສາສານສູງສຸດຫົວເສລີ ທີ່ເຖິງແກ່ອະສັນຍະກຳໃນອາທິດແລ້ວນີ້.

ທ່ານທຣຳໄດ້ກ່າວຕໍ່ການໂຮມຊຸມນຸມທາງການເມືອງ ໃນຄືນວັນເສົາທີ່ຜ່ານມາ ຢູ່ທີ່ເມືອງແຟແຢັດວິລ ໃນລັດຄາໂຣໄລນາເໜືອ ວ່າ ທ່ານຈະທຳການສະເໜີຊື່ໃນອາທິດນີ້ແລະ “ມັນຈະແມ່ນແມ່ຍິງ.” ກ່ອນໜ້ານີ້ ທ່ານໄດ້ແຕ່ງຕັ້ງໃຫ້ທ່ານນາງເອມີ ຄອນນີ ບາແຣັດ (Amy Coney Barrett) ຈາກສານອຸທອນເຂດ 7 ຢູ່ນະຄອນຊີຄາໂກແລະທ່ານນາງບາບາຣາ ລາໂກອາ (Barbara Lagoa) ຈາກ ສານ circuit ເຂດ 11 ຢູ່ນະຄອນແອັດແລນຕາ ຊຶ່ງອາດຈະເປັນຜູ້ທີ່ທ່ານຈະສະເໜີກໍເປັນໄປໄດ້.

ພວກນະໜັບສະໜຸນຮ້ອງຂຶ້ນວ່າ “ແຕ່ງຕັ້ງບ່ອນນັ່ງນັ້ນ” ແລະທ່ານທຣຳກ່າວວ່າ ນັ້ນຄືສິ່ງທີ່ຂ້າພະເຈົ້າຕັ້ງໃຈຈະເຮັດ.

ແຕ່ຜູ້ສະໝັກປະທານາທິບໍດີຈາກພັກເດໂມແຄຣັດ ທ່ານໂຈ ໄບເດັນ ຮຽກຮ້ອງໃຫ້ສະມາຊິກສະພາສູງພັກຣີພັບບລີກັນ ຢ່າໄດ້ລົງຄະແນນສຽງ ກ່ຽວກັບຜູ້ທີ່ຈະຖືກສະເໜີຊື່ເປັນຜູ້ພິພາກສາສານສູງສຸດ ໄວເກີນໄປ ກ່ອນການເລືອກຕັ້ງ ໃນເດືອນພະຈິກ.

ທ່ານໄບເດັນ ກ່າວໃນວັນອາທິດວານນີ້ ທີ່ນະຄອນຟີລາແດລເຟຍວ່າ “ຜູ້ມີສິດປ່ອນບັດໃນປະເທດນີ້ຄວນຈະມີການຮັບຟັງ... ພວກເຂົາເຈົ້າແມ່ນບຸກຄົນທີ່ລັດຖະທຳມະນູນນີ້ມອງເຫັນວ່າ ຄວນເປັນຜູ້ຕັດສິນໃຈວ່າຜູ້ໃດມີອຳນາດທີ່ຈະທຳການແຕ່ງຕັ້ງນີ້ ການສົ່ງການແຕ່ງຕັ້ງນີ້ເຂົ້າສູ່ສະພາສູງ ມັນເປັນການໃຊ້ສິດອຳນາດດິບທາງດ້ານການເມືອງ.”

ຄວາມຕັ້ງໃຈຂອງທ່ານທຣຳ ທີ່ຈະທຳການແຕ່ງຕັ້ງ 6 ອາທິດກ່ອນທີ່ທ່ານປະເຊີນໜ້າກັບການເລືອງຕັ້ງຢ່າງດຸເດືອດ ກັບທ່ານໄບເດັນໃນວັນທີ 3 ພະຈິກໄດ້ກໍ່ໃຫ້ເກີດການຕໍ່ສູ້ແບບເຈັບໃຈທາງດ້ານການເມືອງຢູ່ທີ່ວໍຊິງຕັນ ລະຫວ່າງສະມາຊິກພັກຣີພັບບລີກັນ ຂອງປະທານາທິບໍດີຢູ່ໃນສະພາສູງ ທີ່ໄດ້ກ່າວວ່າເຂົາເຈົ້າຈະສະໜັບສະໜຸນການແຕ່ງຕັ້ງຂອງທ່ານ ແລະສະມາຊິກພັກເດໂມແຄຣັດທີ່ຮຽກຮ້ອງໃຫ້ເລື່ອນເວລາໃນການແຕ່ງຕັ້ງ ຈົນກວ່າວ່າທ່ານທຣຳ ຫຼືທ່ານໄບເດັນໄດ້ຖືກເລືອກໃຫ້ເຂົ້າໄປຮັບຕຳແໜ່ງທີ່ທຳນຽບຂາວເປັນເວລາ 4 ປີ ໃນເດືອນມັງກອນຈະມາ.

ທ່ານທຣຳຢາກໃຫ້ສະພາສູງຮັບຮອງເອົາການແຕ່ງຕັ້ງຂອງທ່ານໂດຍໄວ ກ່ອນການເລືອກຕັ້ງ ແຕ່ຍັງບໍ່ທັນເປັນທີ່ຈະແຈ້ງວ່າ ພັກຣີພັບບລີກັນທີ່ກຳສຽງສ່ວນຫຼາຍ 53 ຕໍ່ 47 ຢູ່ໃນສະພາສູງນັ້ນຈະດຳເນີນການກ່ອນການເລືອກຕັ້ງຫຼືບໍ່.

ໃນປີ 2016 ພັກຣີພັບບລີກັນໄດ້ປະຕິເສດ ທີ່ຈະພິຈາລະນາການແຕ່ງຕັ້ງຜູ້ພິພາສາສານສູງສຸດ ຂອງອະດີດປະທານາທິບໍດີບາຣັກ ໂອບາມາ ນັ້ນຄືການແຕ່ງຕັ້ງທ່ານແມຣິກ ກາແລນ (Merrick Garland) ຫຼັງຈາກການເສຍຊີວິດຂອງຜູ້ພິພາກສາ ແອນໂທນິນ ສກາເລຍ ໃນເດືອນກຸມພາຂອງປີນັ້ນ. ພວກເຂົ້າເຈົ້າຖົກຖຽງວ່າ ການຫວ່າງລົງຂອງບ່ອນນັ່ງໃນສານສູງສຸດ ຄວນຖືກປະ
ໄວ້ ໃນລະຫວ່າງປີການເລືອກຕັ້ງ ເພື່ອໃຫ້ປະຊາຊົນອາເມຣິກັນສາມາດຊັ່ງຊາໃນການເລືອກເອົາຂອງພວກເຂົາເຈົ້າ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG