ສອງປີກວ່າໆຜ່ານມາແລ້ວ ປະທານາທິບໍດີສະຫະລັດ ທ່ານດໍໂນລ ທຣຳ ໄດ້ກ່າວເຖິງການມີຄວາມສຳພັນອັນໃກ້ຊິດ ແລະການຕິດຕໍ່ກັນທາງຈົດໝາຍເລື້ອຍໆ ກັບຜູ້ນຳເກົາຫຼີເໜືອ ທ່ານກິມ ຈົງ ອຶນ. ປື້ມໃໝ່ຫົວນຶ່ງ ອາດຈະເປີດເຜີຍໃຫ້ຮູ້ວ່າ ຄວາມສຳພັນດັ່ງກ່າວນີ້ ໃກ້ຊິດກັນຫຼາຍປານໃດ.
ໃນປື້ມຫົວໃໝ່ຂອງທ່ານ ທີ່ມີຊື່ວ່າ Rage ຫຼືຄວາມຮູ້ສຶກຢ່າງຮຸນແຮງນັ້ນ ທ່ານບອບ ວູດເຫວີດ (Bob Woodward) ນັກຂ່າວການເມືອງອະວຸໂສຂອງສະຫະລັດ ໄດ້ຮັບຈົດໝາຍ 25 ສະບັບ ທີ່ຂຽນຕິດຕໍ່ກັນລະຫວ່າງປະທານາທິບໍດີທຣຳແລະທ່ານກິມ ອີງຕາມຄໍາບັນລະຍາຍຂອງປື້ມທີ່ຂຽນລົງໃນອາເມຊອນໃນຕອນແລງວັນພຸດວານນີ້.
ຍັງບໍ່ທັນເປັນທີ່ຈະແຈ້ງວ່າ ເນື້ອໄນຂອງຈົດໝາຍລະຫວ່າງທ່ານທຣຳແລະທ່ານກິມ ຈະມີການເປີດເຜີຍໜ້ອຍຫຼາຍປານໃດ ຊຶ່ງປື້ມດັ່ງກ່າວມີກຳນົດຈະນຳອອກຈຳໜ່າຍ ໃນວັນທີ 15 ກັນຍາຈາມານີ້. ແຕ່ຄຳບັນລະຍາຍສະແດງໃຫ້ເຫັນວ່າ ຢ່າງໜ້ອຍເນື້ອໄນບາງສ່ວນຂອງຈົດໝາຍຕິດຕໍ່ ຈະຮວມຢູ່ໃນນັ້ນ.
ຄຳບັນລະຍາຍຂອງອາເມຊອນ ກ່າວວ່າ “ທ່ານກິມໄດ້ພັນລະນາເຖິງຄວາມຜູກພັນອັນແໜ້ນແຟ້ນ ລະຫວ່າງພວກຜູ້ນຳທັງສອງ ຄືກັນກັບຢູ່ໃນ “ຮູບເງົາແຫ່ງຄວາມເຟີ້ຝັນ” ໃນຂະນະທີ່ພວກຜູ້ນຳທັງ ສອງພົວພັນກັນທາງດ້ານການທູດພິ ເສດແບບຟ້ອນຈັງຫວະສະໂລ.”
ເຖິງແມ່ນການເຈລະຈາທາງດ້ານນິວເຄລຍລະຫວ່າງສະຫະລັດກັບເກົາຫຼີເໜືອໄດ້ແຕກຫັກລົງແລ້ວກໍຕາມ ທ່ານທຣຳຍັງຢືນຢັດຢູ່ເລື້ອຍໆວ່າ ທ່ານຍັງສືບຕໍ່ “ມີຄວາມສຳພັນອັນຍິ່ງໃຫຍ່” ກັບທ່ານກິມ ແລະພວກທ່ານຍັງສອງຍັງຂຽນໜັງສືແບບສ່ວນຕົວຫາກັນຢູ່. ໃນຈຸດນຶ່ງນັ້ນ ທ່ານທຣຳກ່າວວ່າ ທ່ານເອງແລະທ່ານກິມ “ມີຄວາມຮັກຕໍ່ກັນ.”
ສະຫະລັດແລະເກົາຫຼີເໜືອໄດ້ເປີດເຜີຍວ່າ ມີການຂຽນຈົດໝາຍສ່ວນຕົວຫາກັນ ລະຫວ່າງທ່ານທຣຳ ແລະທ່ານກິມ 10 ເທື່ອ ແຕ່ມາຈົນຮອດປັດຈຸບັນນີ້ ຍັງບໍ່ເຄີຍມີການລາຍງານມາກ່ອນວ່າ ບຸກຄົນທັງສອງໄດ້ຂຽນຈົດໝາຍຫາກັນຢ່າງໜ້ອຍ 25 ເທື່ອ.
