ນັກຂ່າວກາເມຣູນຄົນນຶ່ງ ທີ່ເຮັດວຽກຢ່າງເປັນອິດສະຫຼະໃຫ້ແກ່ວີໂອເອ ກ່າວວ່າ ລາວໄດ້ຖືກຮາວີລົບກວນ ໂດຍຕຳຫຼວດ ທີ່ໄດ້ຍຶດເອົາອຸບປະກອນຂອງລາວ ຢູ່ນະຄອນຫຼວງຢາອຸນເດ ໃນມື້ວັນເສົາທີ່ຜ່ານມາ.
ທ່ານໂມກີ ເອັດວິນ ກິນເຊກາ (Moki Edwin Kindzeka) ກ່າວວ່າ ລາວໄດ້ຖືກສັ່ງໃຫ້ເວົ້າແຕ່ພາສາຝຣັ່ງເທົ່ານັ້ນ.
ໃນການຂຽນລົງທາງສື່ສັງຄົມນັ້ນ ທ່ານກິນເຊກາ ເວົ້າວ່າ “ພວກຜູ້ຊາຍເຫຼົ່ານີ້ບໍ່ຄວນທຳຮ້າຍຄົນ ພຽງແຕ່ເຂົາເຈົ້າເວົ້າພາສາອັງກິດ.”
ສະມາຄົມນັກຂ່າວກາເມຣູນ ທີ່ເວົ້າພາສາອັງກິດ ໄດ້ປະນາມ ຜ່ານທາງທວີດເຕີ້ “ໃນການກະທຳນີ້ ດ້ວຍຄຳເວົ້າທີ່ແຮງສຸດ.” ສະມາຄົມດັ່ງກ່າວໄດ້ທວງໃຫ້ມີການຂໍຂະມາໂທດ.
[[ https://twitter.com/CamasejN/status/1276998429227601920 ]]
ທ່ານກິນເຊກາ ຍັງເປັນນັກຂ່າວ ເຮັດວຽກໃຫ້ແກ່ໂທລະພາບ ຂອງທາງການກາເມຣູນ CRTV.
ວາລະສານ Timescape ລາຍງານວ່າ ການໂຈມຕີຕໍ່ທ່ານກນິເຊກາ ມີຂຶ້ນໃນລະຫວ່າງການບຸກເຂົ້າໄປກວດຄົ້ນຂອງພວກທະຫານໃນມື້ວັນເສົາແລ້ວ ຢູ່ທີ່ຄຸ້ມ Anglaphone ໃນນະຄອນຫຼວງກາເມຣູນ ຊຶ່ງມີຫຼາຍໆຄົນໄດ້ຖືກຈັບ ແລະຖືກສັ່ງໃຫ້ເວົ້າແຕ່ພາສາຝຣັ່ງ.
ກາເມຣູນພວມປະເຊີນກັບບັນຫາການແບ່ງແຍກດິນແດນ ທີ່ກຳລັງດຳເນີນຢູ່ ຊຶ່ງອົງການສະຫະປະຊາຊາດກ່າວວ່າ ມີຜູ້ເສຍຊີວິດໄປແລ້ວຫຼາຍກວ່າ 3,200 ຄົນ ແລະຫຼາຍກວ່າ 5 ແສນຄົນຕ້ອງໄດ້ອົບພະຍົບຫລົບໄພ.
ບັນຫາຂັດແຍ້ງດັ່ງກ່າວນີ້ ເລີ້ມຂຶ້ນໃນປີ 2016 ເວລາພວກນາຍຄູແລະທະນາຍ ຄວາມທີ່ເວົ້າພາສາອັງກິດພາກັນປະທ້ວງຕໍ່ຕ້ານພວກຊາວກາເມຣູນທີ່ເວົ້າພາສາ ຝຣັ່ງ ພາໃຫ້ບາງຄົນຕ້ອງໄດ້ຈັບອາວຸດລຸກຂຶ້ນຕໍ່ສູ້.
ກອງທັບກາເມຣູນໄດ້ປະກາດສົງຄາມກັບພວກກະບົດ ຊຶ່ງໄດ້ພາກັນເລີ້ມຕໍ່ສູ້ມາແຕ່ປີ 2017 ເພື່ອສ້າງຕັ້ງປະເທດເອກກະລາດ ທີ່ປາກພາສາອັງກິດ.