ປະທານາທິບໍດີສະຫະລັດ ທ່ານດໍໂນລ ທຣຳ ຂຽນລົງໃນທວີດເຕີ້ໃນວັນສຸກມື້ນີ້ວ່າ ຫາກໍຈົບການສົນທະນາທີ່ດີຫຼາຍ ກັບປະທານປະເທດສີ ຂອງຈີນ ໃນການຫາລືກ່ຽວກັບລາຍລະອຽດຂອງໄວຣັສໂຄໂຣນາ ທີ່ພວມສ້າງຄວາມເສຍຫາຍໃຫ້ແກ່ຫຼາຍໆເຂດ ຂອງໂລກມະນຸດເຮົາ. ຈີນໄດ້ຜ່ານຜ່າບັນຫາສ່ວນໃຫຍ່ໄປແລ້ວແລະກໍໄດ້ມີຄວາມເຂົ້າໃຈເປັນຢ່າງດີ ກ່ຽວກັບເຊື້ອໄວຣັສດັ່ງກ່າວນີ້. ເປັນທີ່ໜ້າເຊື່ອຖືຫຼາຍ!
ນ້ຳສຽງຂອງການສົ່ງຂໍ້ຄວາມນີ້ ແມ່ນແຕກຕ່າງໄປຈາກການໃຫ້ຄວາມເຫັນຂອງປະທານາທິບໍດີເມື່ອໄວໆມານີ້ ໃນລັກສະນະທີ່ສ້າງຄວາມເສຍຫາຍ ໃຫ້ແກ່ຈີນໃນການຖະແຫຼງຂ່າວຂອງທ່ານ ບ່ອນທີ່ທ່ານມັກຈະກ່າວເຖິງພະຍາດນີ້ວ່າ ເປັນເຊື້ອໄວຣັສຂອງຈີນ.
ໃນເວລານີ້ ສະຫະລັດເປັນຜູ້ນຳຂອງໂລກກ່ຽວກັບຈຳນວນກໍລະນີຕິດເຊື້ອໄວຣັສແລະລັດຖະສະພາພວມຈະເອົາມາດຕະການ ເພື່ອຊ່ວຍບັນເທົາຜົນກະທົບທາງດ້ານເສດຖະກິດຢູ່.
ມາຈົນເຖິງແລງວັນພະຫັດວານນີ້ ການນັບຂອງສູນກາງການແພດຈອນສ໌ຮອບ ກິນສ໌ສະແດງໃຫ້ເຫັນວ່າ ສະຫະລັດມີຜູ້ຕິດເຊື້ອ 85,000 ກໍລະນີ ຕິດຕາມດ້ວຍຈີນທີ່ມີຫຼາຍກວ່າ 81,000 ກໍລະນີ ແລະອີຕາລີຫຼາຍກວ່າ 80,500 ກໍລະ ນີ.
ນະຄອນນິວຢອກໄດ້ກາຍເປັນສູນກາງໃນການແຜ່ລະບາດຢູ່ໃນສະຫະລັດ ໂດຍທີ່ນະຄອນນິວຢອກໄດ້ກາຍເປັນຈຸດລະບາດທີ່ຮ້າຍແຮງ. ມີຜູ້ຕິດເຊື້ອຫຼາຍກວ່າ 21,000 ກໍລະນີ ຢູ່ໃນນະຄອນທີ່ໃຫຍ່ທີ່ສຸດຂອງສະຫະລັດ ຊຶ່ງເຈົ້າໜ້າທີ່ກ່າວວ່າ ໂຕເລກດັ່ງກ່າວກຳລັງເພີ້ມຂຶ້ນ 3,000 ຄົນໃນແຕ່ລະມື້.
ໃນວັນສຸກມື້ນີ້ ສະພາຕ່ຳສະຫະລັດ ມີແຜນການທີ່ຈະຮັບຮອງເອົາການບັນເທົາທຸກທາງດ້ານເສດຖະກິດ ມູນຄ່າ 2 ພັນຕື້ໂດລາ ທີ່ທາງສະພາສູງໄດ້ຮັບຜ່ານໃນຄືນວັນພຸດຜ່ານມາແລະປະທານາທິບໍດີທຣຳ ສະແດງໃຫ້ເຫັນວ່າ ທ່ານພ້ອມແລ້ວທີ່ຈະເຊັນ.
ຈຸດສູນກາງຂອງຮ່າງກົດໝາຍນີ້ ແມ່ນການຈ່າຍເງິນສົດໃຫ້ແກ່ສ່ວນບຸກຄົົນທີ່ໄດ້ສູນເສຍວຽກການແລະທຸລະກິດ ທີ່ໄດ້ຖືກບັງຄັບໃຫ້ປິດ ຍ້ອນການລະບາດຂອງເຊື້ອໄວຣັສ.
