ລິ້ງ ສຳຫລັບເຂົ້າຫາ

logo-print

ກຸ່ມ​ຕາ​ລີ​ບານ ປະ​ຕິ​ເສດ ຕໍ່​ການ​ປ່ອຍ​ຊະ​ເລີຍ​ເສິກ ເປັນ​ໄລ​ຍະໆ ຂອງ​ລັດ​ຖະ​ບານ


ຄະ​ນະ​ຜູ້​ແທນ​ຕາ​ລີ​ບານ ອອກ​ມາ​ຈາກ ການ​ເຈ​ລະ​ຈາ​ສັນ​ຕິ​ພາບ ກັບ​ພວກ​ນັກ​ກ​ານ​ເມືອງ​ອັ​ຟ​ກາ​ນິ​ສ​ຖານ ທີ່​ມົ​ສກູ ປະ​ເທດຣັດ​ເຊຍ ເມື່​ອ​ວັນ​ທີ 30 ພຶດ​ສະ​ພາ 2019.

ກຸ່ມ​ຕາ​ລີ​ບານ​ໄດ້​ປະ​ຕິ​ເສດບໍ່​ຍອມ​ຮັບ​ເອົາ​ຄຳ​ສັ່ງ​ຂອງ​ລັດ​ຖະ​ບານ​ອັ​ຟ​ກາ​ນິ​ສ​ຖານທີ່​ອະ​ນຸ​ຍາດ​ໃຫ້ມີ​ການ​ປ່ອຍ​ໂຕ​ຊະ​ເລີຍ​ເສິກ ​ຂອງ​ພວກ​ກະ​ບົດ​ທີ່​ຖືກ​ຈັບຫຼາຍ​ພັນ​ຄົນ ແບບ​ມີ​ເງື່ອນ​ໄຂ ໂດຍ​ເອີ້ນ​ການ​ເຄື່ອນ​ໄຫວ​ຂອງ​ກາ​ບູ​ລ​ວ່າ ​ລະ​ເມີດ​ຕໍ່​ຂໍ້​ຕົກ​ລົງ​ທີ່​ກຸ່ມ​ຕາ​ລີ​ບານໄດ້​ເຊັນ​ກັບ​ສະ​ຫະ​ລັດ ເມື່ອ​ໄວໆ​ມານີ້.

ການ​ເຄື່ອນ​ໄຫວ​ຂອງ​ກຸ່ມ​ຕາ​ລີ​ບານ​ໃນ​ວັນ​ພຸດ​ວານນີ້ ມີ​ຂຶ້ນ​ຫຼັງ​ຈາກ​ປະ​ທາ​ນາ​ທິບໍ​ດີ​ອາ​ສ​ຣາ​ຟ ກາ​ນີ ໄດ້​ສັ່ງ​ໃຫ້​ມີ​ການ​ປ່ອຍ​ໂຕ​ພວກ​ຊະ​ເລີຍ​ຕາ​ລີ​ບານ​ເປັນ​ຂັ້ນໆເລີ້ມ​ໃນ​ວັນ​ເສົາ​ທີ່​ຈະ​ມາ​ເຖິງນີ້.

ແຕ່​ແນວ​ໃດ​ກໍ​ຕາມ ເຈົ້າ​ໜ້າ​ທີ່​ອະ​ວຸ​ໂສ​ຂອງ​ລັດ​ຖະ​ບານ​ອັ​ຟ​ກາ​ນິ​ສ​ຖານ​ຄົນ​ນຶ່ງ ກ່າວ​ຢ້ຳ​ໃນ​ເວ​ລາ​ຕໍ່​ມາ​ວ່າ ການ​ປ່ອຍ​ຊະ​ເລີຍ​ຕາ​ລີ​ບານ ແມ່ນ​ເປັນ​ການ​ປ່ອຍແບບ​ມີ​ເງື່ອນ​ໄຂ. ທ່ານ​ເຊ​ດິກ ເຊ​ດິກ​ກີ ໂຄ​ສົກ​ຂອງ​ປະ​ທາ​ນາ​ທິ​ບໍ​ດີ​ກ່າວ​ກ່ຽວ​ກັບ​ເລື້ອງນີ້​ວ່າ “ການ​ປ່ອຍ​ຊະ​ເລີຍ​ຕາ​ລີ​ບານ 1,500 ຄົນ​ ເລີ້ມ​ໃນ​ວັນ​ທີ 24 ເດືອນ​ຮູດຂອ​ງ​ອັ​ຟ​ກາ​ນິ​ສ​ຖານ ຊຶ່ງ​ກົງ​ກັບ​ວັນ​ທີ 14 ມີ​ນາ ຈະ​ມີ​ການ​ປ່ອຍ​ຊະເລີຍ 100 ​ຄົນ​ໃນ​ແຕ່​ລະ​ມື້ ອີງ​ຕາມ​ເງື່ອນ​ໄຂ ແລະ​ການ​ສະ​ແດງ​ອອກ​ ໃນຄວາມ​ຈິງ​ໃຈຂອງ​ພວກ​ເຂົາ​ເຈົ້າ. ຖ້າ​ການ​ປ່ອຍ​ໃນ​ມື້​ທຳ​ອິດ ທີ​ສອງ ແລະ​ທີ​ສາມ ຍັງ​ມີ​ຄວາມ​ຮຸນແຮງ​ຢູ່ແລະ​ຍັງ​ຢູ່​ໃນ​ລະ​ດັບ​ສູງ​ສຸດ​ແລ້ວ ລັດ​ຖະ​ບານ​ອັ​ຟ​ກາ​ນິ​ສ​ຖານ​ກໍ​ຈະ​ຢຸດ​ເຊົາຂັ້ນ​ຕອນ​ດັ່ງ​ກ່າວ ແຕ່​ຂ້າ​ພະ​ເຈົ້າ​ຢາກ​ຂໍ​ເນັ້ນ​ວ່າ ຈຸດ​ປ​ະ​ສົງ​ທີ່​ໃຫຍ່​ທີ່​ສຸດ ​ຂອງ​ພວກ​ເຮົາກໍ​ແມ່ນ​ຢຸດ​ເຊົາ​ການ​ສູ້​ລົບ​ໃນ​ອັ​ຟ​ກາ​ນິ​ສ​ຖານແລະ​ເຮັດ​ໃຫ້​ຂັ້ນ​ຕອນ​ສັນຕິ​ພາບ​ປະ​ສົບ​ກັບ​ຄວາມ​ສຳ​ເລັດ ຊຶ່ງ​ຈະ​ດຳ​ເນີນ​ການ​ຕໍ່​ໄປ ໂດຍ​ລັດ​ຖະ​ບານ​ອັ​ຟກາ​ນິ​ສ​ຖານ​ແລະ​ສະ​ຫະ​ລັດ ພວກ​ເຮົາ​ຫວັງ​ວ່າ​ຂັ້ນ​ຕອນນີ້​ຈະ​ປະ​ສົບ​ກັບ​ຄວາມ​ສຳ​ເລັດ ແຕ່​ຖ້າ​ຫາກ​ປະ​ສົບ​ກັບ​ຄວາມ​ລົ້ມ​ແຫຼວ ຄວາມ​ຮັບ​ຜິດ​ຊອບ​ທັງ​ໝົດ​ ແມ່ນ​ຢູ່​ກັບ​ກຸ່ມ​ຕາ​ລີ​ບານ.”

ຍັງ​ບໍ່​ມີ​ການ​ຖະ​ແຫຼງ​ຕອບ​ຢ່າງ​ເປັນ​ທາງ​ການ​ໃດໆ​ຈາກ​ກຸ່ມ​ຕາ​ລີ​ບານ ແຕ່​ອົງ​ການຂ່າວ​ເອ​ພີ ພົບ​ຈົດ​ໝາຍ​ສະ​ບັບ​ນຶ່ງ​ທີ່​ມູ​ລ​ລາ ນົວ​ຣຸດ​ດິນ ຕູ​ຣາ​ບີ ຫົວ​ໜ້າ​ກຳ​ມາ​ທິການ​ນັກ​ໂທດ​ຂອງ​ກຸ່ມ​ຕາ​ລີ​ບານ ໄດ້​ສົ່ງ​ໄປ​ຫາ​ພວກ​ນັກ​ໂທດ ຄອບ​ຄົວ​ເຂົາ​ເຈົ້າແລະ​ພວກ​ຜູ້​ນຳ​ຕາ​ລີ​ບານ ໂດຍ​ໃຫ້​ຄຳ​ໝັ້ນ​ສັນ​ຍາ​ວ່າ ຈະ​ບໍ່​ມີ​ການ​ເຈ​ລະ​ຈາ ລະຫວ່າງ​ພັກ​ຝ່າຍ​ຕ່າງໆ​ຂອງ​ອັ​ຟ​ກາ​ນິ​ສ​ຖານ​ເກີດ​ຂຶ້ນຈົນ​ເທົ່າ​ພວກຊະ​ເລີຍ​ທັງ​ໝົດ​ຖືກ​ປ່ອຍ​.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG