ລິ້ງ ສຳຫລັບເຂົ້າຫາ

logo-print

ອົງ​ການ​ອະ​ນາ​ໄມ​ໂລກ ກ່າວ​ວ່າ ໄວ​ຣັ​ສ​ໂຄ​ໂຣ​ນາ ລະ​ບາດ​ຢ່າງ​ໄວ ໂດຍ​ມີ​ປະ​ເທດ​ຕິ​ດ​ເຊື້ອ​ເພີ້ມ​ຂຶ້ນ


ຜູ້​ອຳ​ນວຍ​ການ​ອົງ​ການ​ອະ​ນາ​ໄມ​ໂລກ ທ່ານ​ເທ​ໂດ​ຣ​ສ ອາ​ດາ​ນອມ ເກ​ເບ​ຣ​ເຢ​ຊຸ​ສ ເຂົ້າ​ຮ່ວມ​ການ​ຖະ​ແຫຼງ​ຂ່າວ​ປະ​ຈຳ​ວັນ ກ່ຽວ​ກັບ​ໄວ​ຣັ​ສ ໂຄວິດ-19 ທີ່​ສຳ​ນັກ​ງານ​ໃຫຍ່ ອົງ​ການ​ອະ​ນາ​ໄມ​ໂລກ ເມື່ອ​ວັນ​ທີ 6 ມີ​ນາ 2020 ທີ່​ນະ​ຄອນ​ເຈ​ນີ​ວາ.

ອົງ​ການ​ອະ​ນາ​ໄມ​ໂລກ ໃນ​ວັນ​ພຸດ​ວານນີ້ ໄດ້​ປະ​ກາດ​ວ່າ ການ​ລະ​ບາດ​ຂອງ​ໄວ​ຣັ​ສໂຄ​ໂຣ​ນາ ເປັນ​ໂຣກ​ລະ​ບາດ​ລະ​ດັບຮ້າຍ​ແຮງໃນ​ທົ່ວ​ໂລກ ຊຶ່ງ​ມີ 114 ປະ​ເທດ​ໄດ້​ໃຫ້​ການ​ຢືນ​ຢັນກ່ຽວ​ກັບ​ກໍ​ລະ​ນີ​ ຕິດ​ເຊື້ອ ໃນ​ຂະ​ນະ​ທີ່​ສະ​ຫະ​ລັດ​ປະ​ກາດ​ຫ້າມ​ການ​ເດີນ​ທາງ​ຈາກ​ຢູໂຣບ ແລະ​ສະ​ມາ​ຄົມ​ບາ​ນ​ບ້ວງ​ຫຼື​ບາ​ສ​ແກັ​ສ​ບານ​ແຫ່ງ​ຊາດ ກ່າວ​ວ່າ ຕົນ​ໄດ້​ໂຈະການ​ແຂ່ງ​ຂັນ​ຂອງ​ຕົນ​ໃນ​ປັດ​ຈຸ​ບັນ​ນີ້.

ຫົວ​ໜ້າ​ອົງ​ການ​ອະ​ນາ​ໄມ​ໂລກ ທ່ານ​ເທ​ໂດ​ຣ​ສ ອາ​ດາ​ນອມ ເກ​ເບ​ຣ​ເຢ​ຊຸ​ສ ກ່າວ​ໃນ​ວັນ​ພຸດ​ວານນີ້​ວ່າ “ໃນ​ຮອບ​ສອງ​ອາ​ທິດ​ທີ່​ຜ່ານ​ມານີ້ ຈຳ​ນວນ​ກໍ​ລະ​ນີ​ຕິດ​ເຊື້ອ ໂຄວີດ-19 ຢູ່ນອກ​ປະ​ເທດ​ຈີນ ໄດ້​ເພີ້ມ​ຂຶ້ນ 13 ເທົ່າແລະ​ຈຳ​ນວນ​ປະ​ເທດ​ທີ່​ໄດ້ຮັບ​ຜົນ​ກະ​ທົບ ແມ່ນ​ເພີ້ມ​ຂຶ້ນ 3 ເທົ່າ.”

ທ່ານ​ເທ​ໂດ​ຣ​ສເຕືອນ​ວ່າ ການ​ລະ​ບາດ​ທີ່​ຮ້າຍ​ແຮງສຸດ​ຍັງ​ບໍ່​ທັນ​ມາ​ຮອດ​ເທື່ອ ຊຶ່ງ​ ທາງ​ອົງ​ການ​ອະ​ນາ​ໄມ​ໂລກ “ແມ່ນ​ມີ​ຄວາມ​ເປັນ​ຫ່ວງ​ຢ່າງ​ເລິກ​ເຊິ່ງທັງ​ໃນ​ລະ​ດັບທີ່ຕື່ນ​ຕົກ​ໃຈ ​ແລະ​ຄວາມ​ຮ້​າຍ​ແຮງ​ຂອງ​ການລະ​ບາດ ແລະ​ການ​ບໍ່​ເອົາ​ມາດ​ຕະ​ການ​ທີ່​ໜ້າ​ກັງ​ວົນ.”

ທ່ານ​ກ່າວ​ຕື່ມ​ວ່າ “ໃນ​ຊຸມມື້​ແລະ​ອາ​ທິດ​ຕໍ່​ໜ້ານີ້ ພວກ​ເຮົາ​ຄາດ​ວ່າ​ຈະ​ໄດ້​ເຫັນ​ຈຳນວນ​ກໍ​ລະ​ນີ​ຕິດ​ເຊື້ອ​ແລະ​ການ​ເສຍ​ຊີ​ວິດ ພ້ອມ​ທັງ​ຈຳ​ນວນ​ປະ​ເທດ​ທີ່​ໄດ້​ຮັບ​ຜົນ​ກະ​ທົບ ເພີ້ມ​ຂຶ້ນ​ສູງກວ່ານີ້.”

ທ່ານ​ເທ​ໂດ​ຣ​ສ​ ກ່າວ​ວ່າ ​ອົງ​ການ​ອະ​ນາ​ໄມ​ໂລກ “ໄດ້​ອອກ​ຄຳ​ເຕືອນ​ຢ່າງ​ໜັກ​ແໜ້ນແລະ​ຢ່າງ​ຈະ​ແຈ້ງ” ແລະ​ປະ​ເທດ​ເຫຼົ່າ​ນັ້ນ “ສາ​ມາດ​ປ່ຽນ​ທິດ​ທາງ​ຂອງ​ໂຣກ​ລະ​ບາດ​ຮ້າຍ​ແຮງນີ້​ໄດ້.”

ສ່ວນ​ປະ​ທາ​ນາ​ທິ​ບໍ​ດີ​ສະ​ຫະ​ລັດ ທ່ານ​ດໍ​ໂນ​ລ ທ​ຣຳ ​ກໍໄດ້​ກ່າວ​ຄຳ​ປາ​ໄສ​ຕໍ່​ປະ​ເທດ​ຊາດ​ໃນ​ແລງວັນ​ພຸດ​ວານນີ້ ໂດຍ​ປະ​ກາດ​ວ່າ “ເຊື້ອ​ໄວ​ຣັ​ສນີ້ຈະ​ບໍ່​ມີ​ໂອ​ກາດ​ເລີຍຕໍ່​ສະ​ຫະ​ລັດ” ແລະ​ໄດ້​ປະ​ກາດ​ໃຫ້​ໂຈະ​ທຸກ​ການ​ເດີນ​ທາງ​ເປັນ​ເວ​ລາ 30 ມື້​ຈາກຢູ​ໂຣບ​ຫາ​ສະ​ຫະ​ລັດ ເລີ້ມ​ແຕ່​ວັນ​ສຸກ ມື້​ອື່ນນີ້ ເປັນ​ຕົ້ນ​ໄປ. ການ​ເດີນ​ທາງ​ມາ​ຈາກ​ອັງ​ກິດ ແມ່ນ​ໄດ້​ຮັບ​ການ​ຍົກ​ເວັ້ນ ດັ່ງ​ດຽວ​ກັນ​ກັບ​ປະ​ຊາ​ຊົນ​ຂອງ​ສະ​ຫະລັດ ຜູ້​ທີ່ມີ​ສິດ​ຢູ່​ຢ່​າງ​ຖືກ​ຕ້ອງ​ຕາມ​ກົດ​ໝາຍ ແລະ​ຄອບ​ຄົວ​ຂອງ​ເຂົາ​ເຈົ້າ.

ນອກນັ້ນ ທ່ານ​ທ​ຣຳ​ຍັງ​ໄດ້​ປະ​ກາດ​ກ່ຽວ​ກັບ​ການ​ຊ່ວຍ​ບັນ​ເທົາ​ທາງ​ດ້ານ​ການ​ເງິນສຳ​ລັບ​ຜູ້​ຄົນ​ແລະ​ທຸ​ລະ​ກິດ​ທີ່​ໄດ້​ຮັບ​ຜົນ​ກະ​ທົບ​ຈາກ​ເຊື້ອ​ໄວ​ຣັ​ສ.

ໃນ​ວັນ​ພຸດ​ວານນີ້ ກະ​ຊວງ​ການ​ຕ່າງ​ປະ​ເທດ​ຂອງ​ສະ​ຫະ​ລັດ​ກໍ​ໄດ້​ອອກ​ຂໍ້​ຊີ້​ແນະ​ທີ່​ໄດ້​ຮັບ​ການ​ແກ້​ໄຂ​ໃໝ່ ​ເພື່ອ​ແນະ​ນຳ​ໃຫ້​ສະ​ຫະ​ລັດ “ພິ​ຈາ​ລະ​ນາ​ຄືນ​ໃໝ່​ກ່ຽວ​ກັບການ​ເດີນ​ທາງ​ໄປ​ຕ່າງ​ປະ​ເທດ” ຍ້ອນ​ການ​ລະ​ບາດ​ຂອງ​ໄວ​ຣັ​ສ​ໂຄ​ໂຣ​ນາ.

ເວລານີ້ ມີ​ຜູ້​ຕິ​ດ​ເຊື້ອ​ທີ່​ໄດ້​ຮັບ​ການ​ຢືນ​ຢັນ​ແລ້ວ​ຫຼາຍກວ່າ 1,200 ​ກໍ​ລະ​ນີ ແລະ​ໃນ​ເດືອນ​ແລ້ວນີ້ ມີ​ພຽງ​ແຕ່ 15 ກໍ​ລະ​ນີ​ເທົ່າ​ນັ້ນ ຊຶ່ງ​ທ່ານ​ທ​ຣຳ​ກ່າວ​ວ່າ ໃນ​ອີກ​ບໍ່ດົນ​ນີ້ ກໍ​ລະ​ນີ​ທັງ​ໝົດ​ຈະ​ຫຼຸດ​ລົງ​ເປັນ​ສູນ. ​ນັບ​ແຕ່ນັ້​ນ​ມາການ​ລະ​ບາດ​ໄດ້​ແຜ່​ອອກໄປ​ໃສ່​ປະ​ມານ 40 ຂອງ​ຈຳ​ນວນ​ທັງ​ໝົດ 50 ລັດ​ໃນ​ສະ​ຫະ​ລັດ. ມີ​ຜູ້​ເສຍ​ຊີ​ວິດແລ້ວ 32 ຄົນ.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG