ສະຫະລັດກ່າວໃນວັນສຸກວານນີ້ວ່າ ຕົນໄດ້ເລື່ອນເວລາກອງປະຊຸມສຸດຍອດພິເສດກັບສະມາຄົມບັນດາປະຊາຊາດໃນເຂດເອເຊຍຕາເວັນອອກສຽງໃຕ້ ຫຼືອາຊຽນ ອອກໄປ ໃນຂະນະທີ່ປະເທດຕ່າງໆທົ່ວໂລກ ພວມທຳການຕໍ່ສູ້ຫາທາງຍຸຕິການລະບາດຂອງເຊື້ອໄວຣັສໂຄໂຣນາ ຫຼື COVID-19 ຢູ່.
ເຈົ້າໜ້າທີ່ອະວຸໂສຄົນນຶ່ງຂອງລັດຖະບານສະຫະລັດ ກ່າວວ່າ “ໃນຂະນະທີ່ປະຊາຄົມນາໆຊາດ ພວມເຮັດວຽກຮ່ວມກັນ ເພື່ອເອົາຊະນະເຊື້ອໄວຣັສໂຄໂຣນາສາຍພັນໃໝ່ ສະຫະລັດ ໃນການປຶກສາຫາລືກັບສະມາຄົມອາຊຽນທີ່ເປັນຄູ່ຮ່ວມງານ ໄດ້ເຮັດການຕັດສິນໃຈທີ່ຫຍຸ້ງຍາກ ເພື່ອເລື່ອນການພົບປະກັບພວກຜູ້ນຳຂອງອາຊຽນອອກໄປ ຊຶ່ງກ່ອນໜ້ານີ້ ມີກຳນົດຈັດໃສ່ກາງເດືອນມີນາ.”
ສະຫະລັດ ແລະ 10 ປະເທດຈາກເຂດເອເຊຍຕາເວັນອອກສຽງໃຕ້ ມີກຳນົດຈະຈັດກອງປະຊຸມສຸດຍອດພິເສດຂຶ້ນ ເພື່ອເສີມຂະຫຍາຍສາຍພົວພັນ ໃນເວລາທີ່ພວກນັກວິເຄາະກ່າວວ່າ ຈີນຍັງສືບຕໍ່ຂະຫຍາຍອິດທິພົນຂອງຕົນຢູ່ໃນເຂດເອເຊຍຕາເວັນອອກສຽງໃຕ້ ໃນຂະນະທີ່ພວມຫາທາງໃຫ້ເກີດຄວາມແຕກແຍກລະຫວ່າງວໍຊິງຕັນ ແລະພັນທະມິດທີ່ມີມາແຕ່ໃດໆຂອງສະຫະລັດ ຢູ່ໃນຂົງເຂດ.
ເຈົ້າໜ້າທີ່ກ່າວວ່າ “ສະຫະລັດມອງເຫັນຄຸນຄ່າໃນສາຍພົວພັນຂອງພວກເຮົາກັບປະເທດຕ່າງໆທີ່ຢູ່ໃນຂົງເຂດ ແລະຫວັງວ່າຈະໄດ້ພົບພໍ້ກັນໃນອະນາຄົດນີ້.”
ກອງປະຊຸມສຸດຍອດຕົ້ນຕໍແລ້ວມີກຳນົດຈັດໃສ່ ວັນທີ 14 ມີນາທີ່ນະຄອນລາສເວກັສ. ການປະຊຸມສອງຝ່າຍລະຫວ່າງປະທານາທິບໍດີສະຫະລັດ ທ່ານດໍໂນລ ທຣຳ ແລະພວກຜູ້ນຳຂອງອາຊຽນກໍໄດ້ມີການວາງແຜນກັນໄວ້ເຊັ່ນດຽວກັນ.
ສະພາທຸລະກິດ ສະຫະລັດ-ອາຊຽນ ກໍໄດ້ມີການຈັດແຈງ ກອງປະຊຸມສຸດຍອດທາງດ້ານເທັກໂນໂລຈີຄັ້ງສຳຄັນ ຄຽງຄູ່ໄປກັບກອງປະຊຸມສຸດຍອດພິເສດໃນເດືອນມີນາ.
ຮອງປະທານສະພາທຸລະກິດສະຫະລັດ-ອາຊຽນ ທ່ານນາງເອລີຊາເບັດ ດູແກນ ກ່າວລຸນຫລັງທີ່ໄດ້ມີການເລື່ອນກອງປະຊຸມສຸດຍອດວ່າ “ປະຊາຄົມທຸລະກິດອາເມຣິກັນ ຮັບຮູ້ເຖິງຄວາມສຳຄັນຂອງກອງປະຊຸມສຸດຍອດສຳລັບພວກຜູ້ນຳຂອງອາຊຽນ ແລະລັດຖະບານສະຫະລັດ ໃນຖານະທີ່ມີສ່ວນກ່ຽວພັນກັບຍຸດທະສາດອິນໂດປາຊີຟິກ” ແລະທ່ານນາງກ່າວຕື່ມວ່າ ທາງສະພາ "ຫວັງວ່າ ຈະໄດ້ເຮັດວຽກຢ່າງໃກ້ຊິດ ກັບພວກຜູ້ນຳຂອງສະຫະລັດ ແລະອາຊ່ຽນ ເພື່ອຄ້ຳປະກັນເຖິງຄວາມສຳເລັດ ໃນການພົວພັນທີ່ສຳຄັນນີ້ ໃນໂອກາດຂັ້ນຕໍ່ໄປ.
