ຫຼັງຈາກໄດ້ສູ້ລົບກັນມາເກືອບ 19 ປີແລ້ວນັ້ນ ຜູ້ຕາງໜ້າຂອງສະຫະລັດ ແລະກຸ່ມຕາລີບານໃນອັຟການິສຖານ ຄາດວ່າຈະລົງນາມໃນຂໍ້ຕົກລົງສັນຕິພາບໃນວັນເສົາມື້ນີ້ ທີ່ນະຄອນໂດຮາ ປະເທດກາຕ້າ.
ລັດຖະມົນຕີການຕ່າງປະເທດສະຫະລັດ ທ່ານໄມຄ໌ ພອມພຽວ ແມ່ນຮວມຢູ່ໃນບັນດາ ພວກທີ່ຈະເຂົ້າຮ່ວມເປັນສັກສີພະຍານ ກ່ຽວກັບການລົງນາມໃນຂໍ້ຕົກລົງ ທີ່ແນໃສ່ເພື່ອນຳໄປສູ່ການເຈລະຈາ ລະຫວ່າງເຈົ້າໜ້າທີ່ຂອງກຸ່ມຕາລີບານແລະ ລັດຖະບານອັຟການິສຖານ ເພື່ອຍຸຕິບັນຫາຂັດແຍ້ງແລະການຖອນທະຫານສະຫະລັດ ຈາກຈຳນວນ 13,000 ຄົນ ລົງມາເຫຼືອຢູ່ 8,600 ຄົນ.
ປະທານາທິບໍດີສະຫະລັດ ທ່ານດໍໂນລ ທຣຳ ຮຽກຮ້ອງໃຫ້ກຸ່ມຕາລີບານແລະລັດຖະບານອັຟການິສຖານ “ຍາດເອົາໂອກາດອັນນີ້ເພື່ອສ້າງສັນຕິພາບ” ແລະກ່າວວ່າ ຖ້າພວກເຂົາເຈົ້າຫາກປະຕິບັດຕາມຄວາມໝັ້ນໝາຍແລ້ວ “ພວກເຮົາຈະມີເສັ້ນທາງທີ່ເຂັ້ມແຂງໄປໜ້າ ເພື່ອຍຸຕິສົງຄາມໃນອັຟການິສຖານ ແລະນຳເອົາທະຫານຂອງພວກເຮົາ ກັບຄືນປະເທດ.”
ລັດຖະມົນຕີກະຊວງປ້ອງກັນປະເທດສະຫະລັດ ທ່ານມາກ ແອັສເປີ ກໍຈະອອກຖະແຫຼງການຮ່ວມ ກັບລັດຖະບານອັຟການິສຖານ ອີງຕາມຖະແຫຼງການຂອງທ່ານທຣຳ ໃນວັນສຸກວານນີ້.
ຂໍ້ຕົກລົງຫຼຸດຄວາມຮຸນແຮງ ລະຫວ່າງສະຫະລັດ ກັບກຸ່ມຕາລີບານ ເລີ້ມມີຜົນບັງຄັບໃຊ້ເມື່ອເຈັດມື້ກ່ອນ ແລະຄວາມສຳເລັດຂອງຂໍ້ຕົກລົງນີ້ ຈະແຜ້ວທາງໄປສູ່ການລົງນາມໃນວັນເສົາມື້ນີ້.
ອະດີດປະທານາທິບໍດີອັຟການິສຖານ ທ່ານຮາມິດ ກາຊາຍ ກ່າວຕໍ່ວີໂອເອພະແນກພາສາອັຟການິສຖານວ່າ “ພວກເຮົາດີໃຈຫຼາຍທີ່ໄດ້ເຫັນການລົງນາມມີຂຶ້ນໃນວັນເສົາມື້ນີ້. ມັນເປັນສິ່ງທີ່ໜ້າຊື່ນຊົມ. ແລະຈາກຈຸດນັ້ນ ພວກເຮົາຫວັງວ່າການເຈລະຈາລະຫວ່າງພັກຝ່າຍຂອງອັຟການິສຖານ ຈະເລີ້ມຂຶ້ນໂດຍໄວເທົ່າທີ່ຈະໄວໄດ້ ເພື່ອວ່າຊາວອັຟການິສຖານ ຈະສາມາດນັ່ງລົງນຳກັນ ແລະນຳເອົາສັນຕິພາບອັນຖາວອນ ມາສູ່ປະເທດທີ່ຮັກແລະຫວງແຫນຂອງພວກເຮົາ.”
ການເຈລະຈາລະຫວ່າງກຸ່ມຕາລີບານ ແລະເຈົ້າໜ້າທີ່ອັຟການິສຖານ ຄວນຈະເລີ້ມຂຶ້ນພາຍໃນເວລາສິບວັນ.
