ສະຫະລັດ ໄດ້ອອກຄຳເຕືອນວ່າ ກຸ່ມກໍ່ການຮ້າຍທັງຫລາຍ ອາດຈະວາງແຜນໂຈມຕີ “ໂຮງແຮມໃຫຍ່” ແຫ່ງນຶ່ງທີ່ບໍ່ບອກຊື່ ຢູ່ໃນນະຄອນຫລວງຂອງເຄັນຢາ. ສະຖານເອກອັກຄະລັດຖະທູດສະຫະລັດປະຈຳນະຄອນໄນໂຣບີ ກ່າວໃນວັນພະຫັດວານນີ້ວ່າ ຕົນເຊື່ອວ່າ ໂຮງແຮມແຫ່ງນັ້ນເປັນໂຮງແຮມທີ່ພວກນັກທ່ອງທ່ຽວ ແລະ ຜູ້ເດີນທາງທີ່ເປັນນັກທຸລະກິດນິຍົມໄປພັກ ແລະຮຽກຮ້ອງໃຫ້ພວກທີ່ເດີນທາງໄປທີ່ນັ້ນ ພາກັນມີສະຕິລະວັງຕົວໃນການເດີນທາງຂອງເຂົາເຈົ້າ.
ການໂຈມຕີຂອງພວກກໍ່ການຮ້າຍຢູ່ໃນເຄັນຢາ ບໍ່ແມ່ນເລື້ອງທີ່ຜິດປົກກະຕິແຕ່ຢ່າງໃດເລີຍ. ໃນເດືອນແລ້ວນີ້ ພວກທີ່ຖືກສົງໄສວ່າເປັນພວກກໍ່ການຮ້າຍອາລ-ຊາບັບ ໄດ້ໂຈມຕີໂຮງຮຽນອານຸບານຢູ່ໃກ້ຊາຍແດນໂຊມາເລຍ, ຊຶ່ງເຮັດໃຫ້ນັກຮຽນເສຍຊີວິດ 3 ຄົນ ແລະໄດ້ຮັບບາດເຈັບ 4 ຄົນ.
ກອງທັບເຄັນຢາເວົ້າວ່າ ກຳລັງທະຫານຂອງຕົນໄດ້ສັງຫານຊີວິດຂອງຜູ້ທຳການໂຈມຕີນັ້ນ 2 ຄົນ ໃນຂະນະທີ່ພວກເຂົາກຳລັງພະຍາຍາມຈະລະເບີດເສົາໂທລະຄົມມະນາຄົມ.
ການໂຈມຕີທີ່ເປັນອັນຕະລາຍຫລາຍທີ່ສຸດຢູ່ໃນປະຫວັດສາດສະໄໝໃໝ່ຂອງ ເຄັນຢາ ແມ່ນດຳເນີນການໂດຍເຄືອຂ່າຍອາລ-ຄາຍດາ ໃນປີ 1998 ເມື່ອມັນໄດ້ວາງລະເບີດໃສ່ສະຖານທູດສະຫະລັດໃນເຄັນຢາ ຊຶ່ງເຮັດໃຫ້ຫລາຍກວ່າ 200 ຄົນເສຍຊີວິດນັ້ນ.
