ປະທານາທິບໍດີສະຫະລັດ ທ່ານດໍໂນລ ທຣຳ ກ່າວໃນວັນພຸດວານນີ້ວ່າ ທ່ານບໍ່ຄິດວ່າ ການລະບາດຂອງໄວຣັສໂຄໂຣນາໃໝ່ທີ່ຕິດແປດໃສ່ຫຼາຍກວ່າ 80,000 ຄົນ ຢູ່ໃນຢ່າງໜ້ອຍ 37 ປະເທດນັ້ນ ສະຫະລັດຈະສາມາດຫຼີກລ່ຽງໄດ້ ແຕ່ກໍໄດ້ສະແດງຄວາມເຊື່ອໝັ້ນວ່າ ລັດຖະບານຂອງທ່ານແມ່ນພ້ອມແລ້ວທີ່ຈະຮັບມື.
ທ່ານກ່າວຕໍ່ພວກນັກຂ່າວທີ່ທຳນຽບຂາວວ່າ “ຂ້າພະເຈົ້າບໍ່ຄິດວ່າມັນຈະສາມາດຫຼີກລ່ຽງໄດ້ ບາງທີມັນອາດຈະ ມັນຄົງອາດຈະ. ມັນອາດຈະຢູ່ໃນລະດັບນ້ອຍໆ ຫຼືອາດຈະຢູ່ໃນລະດັບໃຫຍ່. ບໍ່ວ່າແມ່ນຫຍັງຈະເກີດຂຶ້ນກໍຕາມ ພວກເຮົາແມ່ນກຽມພ້ອມແລ້ວ.”
ທ່ານທຣຳ ກ່າວຕື່ມວ່າ “ຄວາມສ່ຽງ ຂອງປະຊາຊົນອາເມຣິກັນ ແມ່ນຍັງຕ່ຳຫຼາຍ.”
ການໃຫ້ຄວາມເຫັນຂອງທ່ານທຣຳ ມີຂຶ້ນນຶ່ງມື້ ຫຼັງຈາກເຈົ້າໜ້າທີ່ຢູ່ສູນກາງຄວບຄຸມແລະປ້ອງກັນພະຍາດຂອງສະຫະລັດ ກ່າວວ່າ ມີພຽງຄຳຖາມດຽວກໍຄືວ່າເວລາໃດແທ້ເຊື້ອໄວຣັສດັ່ງກ່າວຈຶ່ງຈະລະບາດ ແລະມີຜູ້ຄົນຫຼາຍປານໃດຢູ່ໃນສະຫະລັດຈະລົ້ມປ່ວຍຢ່າງແຮງ.
ມາຈົນຮອດເວລານີ້ ມີຜູ້ເຊື້ອທັງໝົດ 60 ກໍນະລີຢູ່ໃນສະຫະລັດ. ສາມຄົນໃນຈຳນວນດັ່ງກ່າວ ແມ່ນເຄີຍໄປຢ້ຽມຢາມເມືອງວູຮານ ໃນປະເທດຈີນ ຊຶ່ງເປັນຈຸດສູນກາງໃນການແຜ່ລະບາດ ໃນຂະນະທີ່ອີກ 42 ຄົນນຳເອົາເຊື້ອໄວຣັສເຂົ້າມາໃນສະຫະລັດ ຫຼັງຈາກໄດ້ຕິດເຊື້ອຢູ່ເທິງກຳປັ່ນສຳລານບ່ອນທີ່ຫຼາຍຮ້ອຍຄົນໄດ້ພາກັນລົ້ມປ່ວຍ ເມື່ອໄດ້ຮັບຄຳສັ່ງໃຫ້ຖືກກັກເພື່ອກວດວ່າໃຜຕິດເຊື້ອຢູ່ນອກແຄມຝັ່ງທະເລຂອງປະເທດຍີປຸ່ນ.
ພວກເຈົ້າໜ້າທີ່ສາທາລະນະສຸກແມ່ນມີຄວາມເປັນຫ່ວງ ກ່ຽວກັບອັນທີ່ພວກເຂົາເຈົ້າເອີ້ນວ່າ “ການລະບາດໃນຊຸມຊົນ” ຫຼືໃນເວລາທີ່ປະຊາຊົນບໍ່ຮູ້ຈັກວ່າ ເຂົາເຈົ້າໄດ້ຕິດເຊື້ອແບບໃດ ຫຼືຢູ່ບ່ອນໃດ.
ສູນກາງຄວບຄຸມແລະປ້ອງກັນພະຍາດຂອງສະຫະລັດ ລາຍງານໃນວັນພຸດວານນີ້ວ່າ ຄວາມເປັນໄປໄດ້ກ່ຽວກັບກໍລະນີນຶ່ງ ທີ່ໄດ້ກວດພົບວ່າຕິດເຊື້ອໄວຣັສ ຢູ່ລັດຄາລີຟໍເນຍ ຜູ້ຊຶ່ງມີລາຍງານວ່າບໍ່ເຄີຍມີປະຫວັດການເດີນທາງໄປຍັງເຂດທີ່ເຊື້ອໄວຣັສກຳລັງແຜ່ລະບາດ ຫຼືຢູ່ໃກ້ຄົນປ່ວຍທີ່ຮູ້ຈັກກັນ.
