ຜູ້ສະໝັກແຂ່ງຂັນໃຫ້ຖືກແຕ່ງຕັ້ງຈາກພັກເດໂມແຄຣັດເພື່ອໄປແຂ່ງເປັນປະທານາທິບໍດີ 7 ທ່ານ ຈະຂຶ້ນໄປເທິງເວທີໂຕ້ວາທີໃນຕອນຄ່ຳຂອງວັນອັງຄານມື້ນີ້ ຢູ່ໃນລັດຄາໂຣໄລນາໃຕ້, ທີ່ຢູ່ທາງພາກໃຕ້ຂອງປະເທດນັ້ນ.
ທ່ານເບີນີ ແຊນເດີຣ໌ສ, ສະມາຊິກສະພາສູງຈາກລັດເວີມັນທ໌ ໄດ້ຮັບພະລັງຜັກດັນຈາກໄຊຊະນະທີ່ດັງກ້ອງກັງວານຢູ່ໃນກອງປະຊຸມເລືອກຕັ້ງ ຢູ່ໃນລັດເນວາດາ ໃນວັນເສົາຜ່ານມາ ພ້ອມກັບການໄດ້ຮັບຄະແນນນຳໜ້າ ຢູ່ໃນການນັບຜູ້ເປັນຕົວແທນການເລືອກຕັ້ງທັງໝົດ ທີ່ບັນດາຜູ້ສະໝັກເລືອກຕັ້ງ ຕ້ອງໄດ້ຮັບ ເພື່ອຈະໃຫ້ຖືກເລືອກເປັນຜູ້ຕາງໜ້າພັກເດໂມແຄຣັດ ໄປແຂ່ງກັບປະທານາທິບໍດີ ດໍໂນລ ທຣຳໃນເດືອນພະຈິກນີ້ໄດ້.
ສະຖານະພາບໃນການເປັນຜູ້ມີຄະແນນນຳໜ້າໝູ່ ສາມາດເຮັດໃຫ້ຜູ້ສະໝັກເລືອກຕັ້ງຄົນນຶ່ງກາຍເປັນເປົ້າໝາຍຂອງຄົນອື່ນ ຢູ່ໃນການໂຕ້ວາທີໄດ້ ແຕ່ວ່າ ການຢ່ງຫາງສຽງທົ່ວໄປຢູ່ໃນລັດຄາໂຣໄລນາໃຕ້ ອາດຈະເຮັດໃຫ້ບາງຄົນໃນນັ້ນ ຫັນໄປເພັ່ງເລັງໃສ່ອະດີດປະທານາທິບໍດີ ໂຈ ໄບເດັນ ກໍເປັນໄດ້.
ທ່ານໄບເດັນໄດ້ເປັນທີ 3 ຢູ່ໃນການນັບຄະແນນຜູ້ເປັນຕົວແທນການເລືອກຕັ້ງ ພາຍຫລັງທີ່ໄດ້ເປັນທີ 2 ເມືຶ່ອການເລືອກຕັ້ງຂັ້ນຕົ້ນໃນລັດເນວາດາສິ້ນສຸດລົງ ຊຶ່ງເປັນຊ່ວງເວລາທີ່ດີທີ່ສຸດເທົ່າທີ່ມີມາຂອງທ່ານ ນັບຕັ້ງແຕ່ພວກປ່ອນບັດໄດ້ເລີ້ມລົງຄະແນນສຽງໃນເດືອນນີ້ເປັນຕົ້ນມາ. ການຢັ່ງຫາງສຽງສະແດງໃຫ້ເຫັນວ່າ ທ່ານເປັນຄົນທີ່ໄດ້ຮັບຄວາມນິຍົມຫລາຍຢູ່ໃນລັດຄາໂຣໄລນາໃຕ້ ໂດຍທີ່ມີຄະແນນລື່ນທ່ານ ແຊນເດີຣ໌ສ ຢູ່ຫລາຍເປີເຊັນ.
ການຢັ່ງຫາງສຽງຍັງຊີ້ໃຫ້ເຫັນວ່າ ມັນເປັນໂອກາດດີ ຢ່າງຫລວງຫລາຍສຳລັບ ເສດຖີເງິນຕື້ ທອມ ສເຕເຢີ (Tom Steyer) ທີ່ຈະໄດ້ເປັນທີຂອງທ່ານເປັນຜູ້ເດັ່ນຂຶ້ນ ຢູ່ໃນການແຂ່ງຂັນໃນພັກເດໂມແຄຣັດ ໂດຍມີການສະໜັບສະໜຸນທີ່ທ່ານຍັງບໍ່ທັນເຄີຍໄດ້ເຫັນເທື່ອ. ແຕ່ວ່າ ໃນການມີຜູ້ເປັນຕົວແທນພຽງຜູ້ດຽວ, ການຢັ່ງຫາງສຽງສະແດງໃຫ້ເຫັນວ່າ ທ່ານໄດ້ທີສາມຢູ່ໃນລັດຄາໂຣໄລນາໃຕ້ ໂດຍນຳໜ້າ ອະດີດເຈົ້າເມືອງຊາວເບນ, ລັດອິນເດຍນາ, ທ່ານ ພີດ ບູດິເຈຈ (Pete Buttigieg), ສະມາຊິກສະພາສູງຈາກລັດແມັສຊາຈູແຊັສ, ທ່ານນາງເອລີຊາເບັດ ວໍເຣນ (Elizabeth Warren) ແລະ ສະມາຊິກສະພາສູງຈາກລັດມິນເນໂຊຕາ, ທ່ານນາງເອມມີ ໂຄລບູຈາ (Amy Klobuchar).
ການໂຕ້ວາທີໃນວັນອັງຄານມື້ນີ້ ບໍ່ພຽງແຕ່ຈະໂອກາດທີ່ບັນດາຜູ້ສະໝັກເລືອກຕັ້ງຈະສ້າງຄວາມປະທັບໃຈ ຕໍ່ພວກປ່ອນບັດຢູ່ໃນລັດຄາໂຣໄລນາໃຕ້ ເທົ່ານັ້ນ ມັນຍັງຈະເປັນໂອກາດໄດ້ສ້າງຄວາມປະທັບໃຈໃຫ້ແກ່ພວກທີ່ປ່ອນບັດຢູ່ໃນລັດອື່ນ ທີ່ຈະທຳການປ່ອນບັດໃນວັນທີ 3 ເດືອນມີນາຈະມາເຖິງນີ້ ທີ່ຈະອະນຸຍາດໃຫ້ປະຊາຊົນໄປປ່ອນບັດກ່ອນການເລືອກຕັ້ງຂັ້ນຕົ້ນນັ້ນອີກດ້ວຍ.
ວັນທີ 3 ມີນາໄດ້ຖືກຳນົດໃຫ້ເປັນວັນສຳຄັນໃນການສົ່ງຜົນສະທ້ອນຕໍ່ການແຂ່ງ ຂັນໂດຍມີການປ່ອນບັດຢູ່ໃນ 14 ລັດ ພ້ອມໆກັນ ກັບຢູ່ໃນເກາະຊາມົວທີ່ເປັນດິນແດນຂອງສະຫະລັດແຫ່ງນຶ່ງນັ້ນ. ຈະມີຜູ້ເປັນຕົວແທນ ໃນການເລືອກຕັ້ງ 1,357 ຄົນ ເພື່ອໃຫ້ຜູ້ສະໝັກແຂ່ງກັນເອົາຢູ່ໃນການເລືອກຕັ້ງມື້ນັ້ນ ເມື່ອທຽບໃສ່ກັບ 54 ຄົນ ຢູ່ໃນການເລືອກຕັ້ງໃນລັດຄາໂຣໄລນາໃຕ້.
ຜູ້ທີ່ບໍ່ໄດ້ຢູ່ໃນລາຍຊື່ໃຫ້ຄົນປ່ອນບັດເອົາຢູ່ໃນລັດຄາໂຣໄລນາໃຕ້ ແຕ່ກໍເຂົ້າຮ່ວມການໂຕ້ວາທີຄັ້ງນີ້ກໍຄືອະດີດເຈົ້າຄອງນະຄອນນິວຢອກ, ທ່ານໄມໂຄ ບລູມເບີກ (Michael Bloomberg).
