ລິ້ງ ສຳຫລັບເຂົ້າຫາ

logo-print

ມີ​ຄົນ​ປ່ວຍລາຍ​ທຳ​ອິດ ຖືກ​ຢືນ​ຢັນ​ວ່າ ຕິດເຊື້ອ ໄວຣັສໂຄໂຣນາ ຢູ່ໃນ​ອັ​ຟ​ກາ​ນິ​ສ​ຖານ


ພະ​ນັກ​ງານ​ການ​ແພດອັ​ຟ​ກາ​ນິ​ສ​ຖານໃສ່​ເຄື່ອງ​ປ້ອງ​ກັນ​ການ​ຕິດ​ເຊື້ອ​ຄຸມໜ້າໄວ້ ​ຂະ​ນະ​ທີ່​ລົມ​ກັບຄົນ​ໂດຍ​ສານ​ທີ່​ເດີນ​ທາ​ງ​ມາ​ຈາກ ຈີນ ໃນເວ​ລາທີ່ກວດ​ກາຫາ​ເຊື້ອ​ໄວ​ຣັ​ສ​ໂຄ​ໂຣ​ນາຢູ່​ສະ​ໜ​າມບິນ ສາ​ກົນ Hamid Karzai ໃນ​ນະ​ຄອນກາບ​ູ​ລ, ວັນ​ທີ 3 ກຸມ​ພາ, 2020

ບັນ​ດາ​ເຈົ້າ​ໜ້າ​ທີ່ອັ​ຟ​ກາ​ນິ​ສ​ຖານ ກ່າວ​ໃນ​ວັນ​ຈັນ​ວານນີ້​ວ່າ ຄົນ​ປ່ວຍ​ຜູ້​ນຶ່ງ​ທີ່​ໄປ ຢ້ຽມ​ຢາມ​ອີ​ຣ່ານ​ ທີ່​ເປັນປະ​ເທດໃກ້​ຄຽງ​ນັ້ນ ໄດ້​ຖືກ​ກວດ​ພົບ​ວ່າຕິດເຊື້ອ ໄວຣັສ ໂຄໂຣນາ ແລະໄດ້​ຖືກກັກ​ໃຫ້​ຢູ່​ຜູ້​ດຽວຢູ່​ໃນ​ໂຮງ​ໝໍ​ແຫ່ງ​ນຶ່ງຢູ່​ໃນ​ແຂວງເຮີແຣດ (Herat) ທີ່​ມີ​ຊາຍ​ແດນ​ຕິດ​ກັບ​ປະ​ເທດອີ​ຣ່ານນັ້ນ.

​ການ​ເປີດ​ເຜີຍ​ດັ່ງ​ກ່າວ​ມີ​ຂຶ້ນ​ໃນ​ຂະ​ນະ​ທີ່​ມີ​ການ​ລະ​ບາດ​ຂອງ​ພະ​ຍາດ​ທີ່​ເອີ້ນ​ວ່າ ໂຄວິດ (COVID)-19 ໄດ້​ສັງ​ຫານ​ຊີ​ວິດ​ຂອງ 12 ຄົນ ​ຢູ່​ໃນ​ອີ​ຣ່ານ ແລະ​ໄດ້​ເຮັດ​ໃຫ້​ຫລາຍ​ສິບ​ຄົນຕິດ​ເຊື້ອ ນັບ​ແຕ່​ວັນ​ພຸດ​ແລ້ວນີ້​ເປັນ​ຕົ້ນ​ມາ ເມື່ອ​ປະ​ເທດ​ດັ່ງ​ກ່າວໄດ້​ລາຍ​ງານຄັ້ງທຳ​ອິດ​ວ່າ ມີ​ຄົນ​ປ່ວຍຕິ​ດ​ພະ​ຍາດນີ້​ຢູ່​ປະ​ເທດນັ້ນ.

ລັດ​ຖະ​ມົນ​ຕີ​ກະ​ຊວງ​ສາ​ທາ​ລະ​ນະ​ສຸກ​ຂອງອັ​ຟ​ກາ​ນິ​ສ​ຖານ, ທ່ານເຟ​ໂຣຊຸດ​ດິນ ເຟ​ໂຣສ໌ (Ferozuddin Feroz), ກ່າວ​ຕໍ່​ພວກ​ນັກ​ຂ່າວ​ຢູ່​ໃນນະ​ຄອນກາ​ບູ​ລ ວ່າໄດ້​ມີ​ການ​ປະ​ກາດພາ​ວະ​ສຸກ​ເສີນ​ຢູ່​ໃນແຂວງເຮີແຣດ (Herat) ເພື່ອ​ຈະພະ​ຍາ​ຍາມ​ຫລຸດ​ຜ່ອນ​ການ​ແຜ່​ຜາຍຂອງເຊື້ອໄວຣັສໂຄໂຣນາ. ທ່ານ​ກ່າວ​ວ່າ "ຂ້າ​ພະ​ເຈົ້າ​ຂໍໃຫ້ປະ​ຊາ​ຊົນ ພະ​ຍາ​ຍາມພາ​ກັນຢູ່​ເຮືອນ ແລະ​ຈຳ​ກັດ​ການ​ເຄື່ອນ​ໄຫວ​ໄປ​ມາ​ຂອງ​ເຂົາ​ເຈົ້າ.”

ລັດ​ຖະ​ບານ​ຂອງອັ​ຟ​ກາ​ນິ​ສ​ຖານໄດ້​ງົດ​ການ​ເດີນ​ທາງ ທາ​ງອ​າກາດ ແລະ​ທາງ​ບົກທຸກ​ຢ່າງ​ທີ່ໄປ​ຫາ ແລະ​ມາ​ຈາກ​ອີ​ຣ່ານນັ້ນ​ໄວ້ໝົດ ​ໃນ​ວັນ​ເສົາ​ຜ່ານ​ມາ ພາຍ ໃນ​ບໍ່​ເທົ່າ​ໃດ​ຊົ່ວ​ໂມງ ຫລັງຈາກ​ເຈົ້າ​ໜ້າ​ທີ່​ຢູ່​ໃນແຂວງຊາຍ​ແດນແຫ່ງນັ້ນ ໄດ້​ກວດ​ພົບ 3 ຄົນ​ ທີ່​ສົງ​ໄສວ່າຕິດເຊື້ອໄວຣັສໂຄໂຣນານີ້. ລັດ​ຖະ​ບານ​ປະ​ເທດ​ດັ່ງ​ກ່າວ​ຍັງ​ໄດ້ງົດ​ການ​ນຳ​ເຂົ້າ​ຜະ​ລິດ​ຕະ​ພັນສັດ​ປີກ​ຂອງ​ອີ​ຣ່ານ, ຕົ້ນ​ຕໍ​ແມ່ນ​ໄກ່ ແລະ​ໄຂ່.

ທ່ານ ເຟ​ໂຣສ໌ ເວົ້າ​ວ່າ ນຶ່ງ​ໃນ​ສາມ​ກໍ​ລະ​ນີນັ້ນ​ ໄດ້​ຮັບ​ການ​ຢືນ​ຢັນ​ວ່າ​ຕິດ​ເຊື້ອ. ຊາວ​ອັ​ຟ​ກາ​ນິ​ສ​ຖານ 3 ຄົນທີ່​ວ່ານີ້ ໄດ້​ກັບ​ມາ​ຈາກ​ເມືອງ​ສັກ​ສິດໂກມ (Qom) ຂອງອີ​ຣ່ານ ທີ່​ເປັນ​ຈຸດ​ສູນ​ກາງ​ຂອງ​ການ​ລະ​ບາດພະ​ຍາດນີ້.

ພວກຕຳ​ໜິທັງ​ຫລາຍຢ້ານ​ວ່າ ການ​ລະ​ບາດ​ຂອງເຊື້ອໄວຣັສໂຄໂຣນາ ອາດ​ຈະ​ເປັນ​ບັນ​ຫາທ້າ​ທາຍ​ທີ່​ຮ້າຍ​ແຮງ​ແກ່​ເຈົ້າ​ໜ້າ​ທີ່​ໃນອັ​ຟ​ກາ​ນິ​ສ​ຖານ, ບ່ອນ​ທີ່​ມີ​ສົງ​ຄາມ​ແກ່​ຍາວ​ມາ​ໄດ້​ຫລາຍ​ປີ ແລະ​ການ​ສໍ້​ລາດ​ບັງ​ຫລວງ​ທີ່​ໄດ້​ຫັນ​ເອົາລະ​ບົບ​ການປິ່ນ​ປົວ​ສຸ​ຂະ​ພາບ​ທີ່​ມີ​ຄຸນ​ນະ​ພາບ​ຕ່ຳ​ຢູ່​ແລ້ວນັ້ນ ໃຫ້​ເປັນ​ລະ​ບົບ​ທີ່​ຊາວອັ​ຟ​ກາ​ນິ​ສ​ຖານ ຫລາຍ​ຄົນ​ຖືກ​ຈຳ​ກັດ ຫລື ບໍ່ມີ​ຊ່ອງ​ທາງ​ເຂົ້າ​ເຖິງ​ລະ​ບົບ​ການປິ່ນ​ປົວ​ສຸ​ຂະ​ພາບທີ່ມີ​ຄຸນ​ນະ​ພາບ​ຕໍ່າ​ສຸດອັນ​ນຶ່ງ​ຂອງ​ໂລ​ກນັ້ນ​ໄດ້ເລີຍ.

ສະ​ພາບ​ຄວາມວຸ້ນ​ວາຍ​ໄດ້​ກະ​ທົບ​ໃສ່​ປະ​ເທດທີ່ຂາດ​ສະ​ຖານ​ທີ່​ກັກ​ກັນ​ຄົນ​ໄວ້ ແລະບໍ່​ມີວິ​ທີ​ການ, ພະ​ນັກ​ງານ​ການ​ແພດ ​ທີ່​ໄດ້​ຮັບ​ການ​ອົບ​ຮົມ ແລະ​ອຸ​ປະ​ກອນ​ການ​ແພດ​ແຫ່ງນັ້ນ.

ສະ​ຖານ​ທີ່​ການ​ແພດ​ຕ່າງໆຂອງ​ອີ​ຣ່ານ ເປັນ​ບ່ອນ​ທີ່ຖືກ​ລາຍ​ງານ​ວ່າ ມີ​ຄົນ​ເສຍ​ຊີວິດທີ່​ກ່ຽວ​ພັນ​ກັບເຊື້ອໄວຣັສໂຄໂຣນາຫລາຍ​ທີ່​ສຸດ ຢູ່ນອກ​ປະ​ເທດ​ຈີນ ບ່ອນ​ທີ່​ພະ​ຍາດ​ດັ່ງ​ກ່າວ​ໄດ້​ຖືກກວດ​ພົບ​ທໍ​າ​ອິດ​ໃນ​ເດືອນ​ທັນ​ວາ​ຜ່ານ​ມາ.

ເຕ​ຫະ​ຣ່ານໄດ້​ປະ​ກາດໃນ​ວັນ​ເສົາ​ຜ່າມ​ນາ​ວ່າ​ໃຫ້​ປິດ​ໂຮງ​ຮ​ຽນ, ມະ​ຫາ​ວິ​ທະ​ຍາ​ໄລ ແລະ​ສູນ​ກາງວັດ​ທະ​ນາ​ທຳ​ຕ່າງໆ ຢູ່​ທົ່ວ 14 ແຂວງ ​ຂອງ​ປະ​ເທດ​ໄວ້​ນຶ່ງ​ອາ​ທິດ ເພື່ອຈະ​ພະ​ຍາ​ຍາມ​ທີ່​ຈະ​ຫລຸດ​ຜ່ອນການ​ຕິດເຊື້ອໄວຣັສໂຄໂຣນາລົງ.

ສ່ວນ​ປາ​ກິສ​ຖານ ກໍ​ໄດ້​ປິດ​ຊາຍ​ແດນ​ຂອງ​ຕົນ ​ທີ່​ຕິດ​ກັບ​ອີ​ຣ່ານ​ໄວ້​ຊົ່ວ​ຄາວ.

ອ່ານ​ຂ່າວນີ້​ເພີ້​ມ​ເປັນ​ພາ​ສາ​ອັງ​ກິດ

ເບິ່ງວີ​ດິ​ໂອ​ກ່ຽວຂ​້ອງ​ກັບ​ຂ່າວນີ້​ເພີ້ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG