ລັດຖະມົນຕີກະຊວງປ້ອງກັນປະເທດສະຫະລັດ, ທ່ານ ມາກຄ໌ ແອສເພີ (Mark Esper) ກ່າວວ່າ ກອງທັບສະຫະລັດ ແລະເກົາຫຼີໃຕ້ກຳລັງພິຈາລະນາຫຼຸດການຝຶກຊ້ອມທະຫານຢູ່ໃນແຫລມເກົາຫຼີລົງ ໃນຂະນະທີ່ເກົາຫຼີໃຕ້ດີ້ນຮົນເພື່ອສະກັດກັ້ນການລະບາດຂອງເຊື້ອໄວຣັສໂຄໂຣນາຢູ່ນັ້ນ.
ຜູ້ບັນຊາການກຳລັງທະຫານສະຫະລັດຢູ່ໃນເກົາຫລີ ແລະນາຍພົນຂັ້ນສູງ ຂອງ ເກົາຫຼີໃຕ້ "ກຳລັງຫາທາງທີ່ຈະຫລຸດຄຳສັ່ງໃນທຳການຝຶກຊ້ອມຢູ່ໃນຖານທັບນັ້ນ ລົງ ເນື່ອງຈາກວ່າ ມີຄວາມເປັນຫ່ວງ ກ່ຽວກັບເຊື້ອໄວຣັສໂຄໂຣນາ," ນັ້ນຄືຄຳເວົ້າຂອງທ່ານ ແອສເພີ (Esper) ທີ່ກ່າວຕໍ່ພວກນັກຂ່າວ ໃນວັນຈັນວານນີ້ ຢູ່ກອງປະຊຸມຖະແຫຼງຂ່າວທີ່ທຳນຽບຫ້າແຈ ກັບຄູ່ປະຈຳຕຳແໜ່ງຝ່າຍເກົາຫຼີຂອງເພິ່ນ, ທ່ານ ຈອງ ກີຢອງ-ດູ (Jeong Kyeong-doo).
"ສະຖານະການຮ້າຍແຮງສົມຄວນ," ນັ້ນຄືຄຳເວົ້າຂອງທ່ານຈອງ (Jeong) ຊຶ່ງທ່ານກ່າວເພີ້ມອີກວ່າ ການເຄື່ອນໄຫວໄປມາຫາກັນ ລະຫວ່າງກົມກອງຕ່າງໆຂອງພວກທະຫານ ແມ່ນໄດ້ຖືກຈຳກັດ.
ມາຮອດວັນອາທິດຜ່ານມາ ທະຫານໃນກອງທັບເກົາຫຼີໃຕ້ 13 ຄົນ ຖືກກວດພົບວ່າໄດ້ຕິດເຊື້ອໄວຣັສໂຄໂຣນາ, ອີງຕາມທ່ານ ຈອງ (Jeong). ທ່ານກ່າວຕໍ່ໄປວ່າ ທະຫານຂອງກອງທັບເກົາຫລີເຫລົ່ານັ້ນໄດ້ຖືກຫ້າມບໍ່ໃຫ້ເດີນທາງໄປພັກຜ່ອນ ຫລື ຍ້າຍໄປຢູ່ໃນກອງທະຫານອື່ນເລີຍ ເພື່ອພະຍາຍາມສະກັດກັ້ນບໍ່ໃຫ້ມີການແຜ່ຜາຍຂອງເຊື້ອໄວຣັສເພີ້ມໄປອີກ.
ເຈົ້າໜ້າທີ່ທັງສອງທ່ານເວົ້າວ່າ ຄວາມຄິດເຫັນໃນການປ້ອງກັນຊາດຂອງພັນທະມິດຍັງເຂັ້ມແຂງຢູ່ ເຖິງແມ່ນວ່າຈະມີການປ່ຽນແປງໃນການຝຶກຊ້ອມຍ້ອນເຊື້ອ ໄວຣັສໂຄໂຣນາກໍຕາມ.
ຈຳນວນກໍລະນີຄົນຕິດເຊື້ອໄວຣັສໂຄໂຣນາໄດ້ພຸ້ງສູງຂຶ້ນເຖິງ 833 ລາຍແລ້ວຢູ່ໃນເກົາຫຼີໃຕ້ ແລະຈຳນວນຄົນເສຍຊີວິດຍ້ອນພະຍາດດັ່ງກ່າວໄດ້ຖີບຕົວສູງຂຶ້ນ ເຖິງ 7 ຄົນແລ້ວ.
ສະຫະລັດໄດ້ເພີ້ມການເຕືອນໃຫ້ລະວັງ ໃນການເດີນທາງໄປຍັງເກົາຫຼີໃຕ້ ແລະ ຍີ່ປຸ່ນຍ້ອນມີຄວາມຢ້າກົວຢູ່ທົ່ວໂລກວ່າສອງປະເທດຢູ່ໃນຂົງເຂດເອເຊຍດັ່ງກ່າວ ອາດສາມາດກາຍເປັນແຫລ່ງເພາະການຕິດເຊື້ອຢູ່ນອກປະເທດຈີນ ບ່ອນທີ່ເຊື້ອໄວຣັສທີ່ວ່ານີ້ເລີ້ມຕົ້ນເກີດຂຶ້ນນັ້ນກໍເປັນໄດ້.
