ລິ້ງ ສຳຫລັບເຂົ້າຫາ

logo-print

ເອກ​ອັກ​ຄະ​ລັດ​ຖະ​ທູດ ກ​ຣີ​ແນ​ລ ຈະ​ເຂົ້າ​ຮັບ​ໜ້າ​ທີ່ ເປັນ​ຫົວ​ໜ້າ​ອົງ​ການ​ສືບ​ລັບ ຊົ່ວ​ຄາວ


ເອກ​ອັກ​ຄະ​ລັດ​ຖະ​ທູດ ສ​ຫລ ປະ​ຈຳ​ເຢຍ​ຣະ​ມັນ ທ່ານ​ຣິ​ເຈີດ ກ​ຣີ​ແນ​ລ ປະ​ທາ​ນາ​ທິ​ບໍ​ດີ​ໂກ​ໂຊ​ໂວ ທ່ານ​ຮາ​ຊິມ ທາ​ຊີ ແລະ ປະ​ທາ​ນາ​ທິ​ບໍ​ດີ​ເຊີ​ເບ ທ່ານ​ອາ​ເລັກ​ຊານ​ດາ ວູ​ກິກ ໄປ​ຮ່ວມກອງ​​​ປະ​ຊຸມ​ຄວາມ​ໝັ້ນ​ຄົງ ທີ່​ນະ​ຄອນ​ມິວ​ນິກ ​ເມື່ອ​ວັນ​ທີ 14 ກຸມ​ພາ 2020. REUTERS/Michael Dalder

ຜູ້​ທີ່​ຈະ​ເຂົ້າ​ຮັບ​ໜ້າ​ທີ່​ເປັນຮັກ​ສາ​ການ​ຫົວ​ໜ້າອົງ​ການ​ສືບ​ລັບ​ຂອງ​ສະ​ຫະ​ລັດ​ໃນ​ໄວໆ​ນີ້ ​ກ່າວ​ວ່າ ທ່ານ​ຈະ​ບໍ່​ຮັບ​ໜ້າ​ທີ່​ດັ່ງ​ກ່າວ​ເປັນ​ເວ​ລາ​ດົນ​ນານ​ແຕ່​ຢ່າງ​ໃດ.

ໃນ​ການ​ສົ່ງ​ຂໍ້​ຄວາມ​ທາງ​ທວີດ​ເຕີ້​ໃນ​ວັນ​ພະ​ຫັດ​ວານນີ້ ເອກ​ອັກ​ຄະ​ລັດ​ຖະ​ທູດ​ສະ​ຫະ​ລັດ ​ປະຈຳ​ເຢຍ​ຣະ​ມັນ ທ່ານ​ຣິ​ເຈີດ ກ​ຣີ​ແນ​ລ (Richard Grenell) ໄດ້​ໃຫ້ການ​ຢືນ​ຢັນ​ວ່າ ທ່ານ​ຮັບ​ເອົາ​ຕຳ​ແໜ່ງ​ດັ່ງ​ກ່າວ ​ເປັນ​ການ​ຊົ່ວ​ຄາວ​ເທົ່າ​ນັ້ນ ແລະ “ປະ​ທາ​ນາ​ທິ​ບໍ​ດີຈະ​ປະ​ກາດ​ກ່ຽວ​ກັບ​ການ​ແຕ່ງ​ຕັ້ງເພື່ອເຂົ້າ​ຮັບ​ໜ້າ​ທີ່ (ຊຶ່ງ​ບໍ່​ແມ່ນ​ທ່ານ) ໃນ​ອີກ​ບໍ່​ດົນ​ນີ້.”

ສະ​ຫະ​ລັດ ​ບໍ່​ມີ​ຫົວ​ໜ້າ​ອົງ​ການ​ສືບ​ລັບ​ແຫ່ງ​ຊາດ​ຢ່າງ​ເປັນ​ການ​ຖາ​ວອນ ມາ​ແຕ່​ກາງ​ເດືອນ​ສິງ​ຫາ ປີ 2019 ເວ​ລາ​ທ່ານ​ແດນ ໂຄ​ຕ​ສ໌ ໄດ້​ລາ​ອອກ​ຈາກ​ໜ້າ​ທີ່ ຢ່າງ​ເປັນ​ທາງການ ຫຼັງ​ຈາກ​ໄດ້​ເກີດ​ການ​ປະ​ທະ​ກັນ​ຢ່າງ​ເປີດ​ເຜີຍ​ກັບ​ປະ​ທາ​ນາທິ​ບໍ​ດີ ດໍ​ໂນ​ລ ທ​ຣຳ ກ່ຽວ​ກັບ​ການ​ຊັ່ງ​ຊາ​ໃນ​ເລື້ອງ​ສື​ບ​ລັບ.

ແຕ່​ມາ​ຈົນ​ຮອດ​ເວ​ລານີ້ ຍັງ​ບໍ່​ມີ​ການ​ໃຫ້​ຄວາມ​ເຫັນ​ໃດໆ​ຂອງ​ທຳ​ນຽບ​ຂາວ​ກ່ຽວກັບ​ວ່າ​ເວ​ລາ​ໃດ ຈຶ່ງ​ຈະ​ມີ​ການ​ສະ​ເໜີ​ແຕ່ງ​ຕັ້ງ​ຜູ້​ເຂົ້າ​ຮັບ​ໜ້າ​ທີ່​ຢ່າງ​ເປັນ​ການ​ຖາວອນ​ແທນ​ທ່ານ​ໂຄ​ຕ​ສ໌.

ໃນ​ຂະ​ນະ​ດຽວ​ກັນ ທ່ານກ​ຣີ​ແນ​ລມີ​ກຳ​ນົດ​ທີ່​ຈະ​ເຂົ້າ​ຮັບ​ໜ້າ​ທີ່ ​ແທນ​ຜູ້​ຮັກ​ສາ​ການອຳ​ນວຍ​ການ​ອົງ​ການ​ສືບ​ລັບ​ແຫ່ງ​ຊາດ ທ່ານ​ໂຈ​ເຊັ​ຟ ແມັກ​ກວຍ​ເອີ ຊຶ່ງ​ອີງ​ຕາມກົດ​ໝາຍ​ແລ້ວ ຜູ້​ກ່ຽວ​ບໍ່​ສາ​ມາດ​ຮັບ​ໜ້າ​ທີ່​ຕໍ່​ໄປ​ກາຍ​ວັນ​ທີ 12 ມີ​ນາ​ໄດ້.

ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ ໄດ້​ປະ​ກາດ​ກ່ຽວ​ກັບ​ການແຕ່ງ​ຕັ້ງ​ ທ່ານ​ກ​ຣີ​ແນ​ລ ໃຫ້​ເປັນ​ຜູ້​ຮັກ​ສາ​ການ​ຫົວ​ໜ້າ​ອົງ​ການ​ສືບ​ລັບ​ແຫ່ງຊາດ ໂດຍ​ຜ່ານ​ທາງ​ທວີດ​ເຕີ້ໃນ​ຕອນ​ບ່າຍ​ວັນ​ພຸດ​ຜ່ານ​ມານີ້.

ໃນ​ຖະ​ແຫຼງ​ການ​ສະ​ບັບ​ນຶ່ງທີ່​ອອກ​ໃນ​ວັນ​ພະ​ຫັດ​ວານນີ້ ໂຄ​ສົກ​ຂອງ​ທຳ​ນຽບ​ຂາວ ທ່ານ​ນາງ​ສ​ເຕ​ຟານນີ ກ​ຣີ​ແຊມ ໄດ້​ກ່າວ​ຊົມ​ເຊີຍ ​ທ່ານກ​ຣີ​ແນ​ລ ແລະ​ຄຸນ​ນະ​ສົມ​ບັດ​ຂອງ​ທ່ານ​ໃນ​ການ​ເຂົ້າ​ຮັບ​ໜ້າ​ທີ່​ດັ່ງ​ກ່າວ.

ທ່ານ​ນາງກ​ຣີ​ແຊມ​ກ່າວ​ວ່າ “ທ່ານ​ມີ​ປະ​ສົບ​ພະ​ການ​ເປັນ​ເວ​ລາ​ຫຼາຍໆ​ປີ ໃນ​ການ​ເຮັດ​ວຽກ​ໃຫ້​ແກ່​ປະ​ຊາ​ຄົມ​ສືບ​ລັບ​ຂອງ​ພວກ​ເຮົາຢູ່​ໃນ​ໜ້າ​ທີ່​ວຽກ​ງານ​ຈຳ​ນວນ​ນຶ່ງຮວມ​ທັງ​ເປັນ​ທູດ​ພິ​ເສດ​ ໃນ​ການ​ເຈ​ລະ​ຈາ​ລະ​ຫວ່າງ​ເຊີ​ເບຍແລະ​ໂກ​ໂຊ​ໂວ​ແລະໃນ​ຖາ​ນະ​ເປັນ​ໂຄ​ສົກ​ໃຫ້​ລັດ​ຖະ​ບານ​ສະ​ຫະ​ລັດ​ຢູ່​ໃນ​ອົງ​ການ​ສະ​ຫະ​ປະ​ຊາ​ຊາດ.” ທ່ານ​ນາງ​ກ່າວ​ຕື່ມ​ວ່າ “ທ່ານ​ມີ​ຄວາມ​ໝັ້ນ​ໝາຍ​ໃນ​ວິ​ທີ​ການ​ທີ່​ບໍ່​ແມ່ນ​ການ​ເມືອງບໍ່​ແມ່ນ​ພັກ​ໃດ​ພັກ​ນຶ່ງໃນ​ຖາ​ນະ​ຫົວ​ໜ້າ​ປະ​ຊາ​ຄົມ​ສືບ​ລັບຊຶ່ງ​ຄວາມ​ປອ​ດ​ໄພ​ແລະ​ຄວາມ​ໝັ້ນ​ຄົງ​ຂອງ​ພວກ​ເຮົາ​ກາງ​ຕໍ່​ນຳ​ນັ້ນ.”

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG