ຜູ້ຊາຍທີ່ຖືກກ່າວຫາວ່າ ຢູ່ເບື້ອງຫຼັງການໂຈມຕີຢູ່ນະຄອນມູມບາຍ ປະເທດອິນເດຍ ເມື່ອນຶ່ງທົດສະວັດກວ່າໆຜ່ານມາແລ້ວ ໄດ້ຖືກພົບເຫັນວ່າມີຄວາມຜິດ ຢູ່ໃນປະເທດປາກິສຖານທີ່ເປັນເພື່ອນບ້ານ ໃນຄະດີທີ່ພົວພັນກັບການກໍ່ການຮ້າຍ 2 ຄະດີ.
ນັກສອນສາສະໜາຫົວຮຸນແຮງ ຮາຟິສ ຊາອີດ (Hafiz Saeed) ໄດໄປປາກົດໂຕ ຢູ່ໃນຫ້ອງສານ ທີ່ນະຄອນລາຮໍ ຫົວເມືອງໃຫຍ່ສຸດອັນດັບ 2 ຂອງປາກິສຖານ ເວລາຜູ້ກ່ຽວຖືກພົບເຫັນວ່າມີຄວາມຜິດ ໃນຖານະທີ່ເປັນສະມາຊິກຂອງກຸ່ມທີ່ຖືກຫ້າມ ແລະແຜ່ເງິນເພື່ອສະໜັບສະໜຸນກິດຈະການກໍ່ການຮ້າຍ.
ລາວໄດ້ຖືກຕັດສິນໂທດ ໃຫ້ຈຳຄຸກ ຄະດີລະ 5 ປີເຄິ່ງ ຕິດຕໍ່ກັນ.
ທ້າວຊາອີດ ແມ່ນເປັນບຸກຄົນທີ່ຮູ້ກັນດີໃນທົ່ວໂລກ ເວລາກຸ່ມ ລາສກາ-ອີ-ຕາຍຢີບາ ທີ່ລາວເປັນຜູ້ນຳໃນເວລານັ້ນ ຖືກຖິ້ມໂທດໃສ່ວ່າ ເປັນຜູ້ປະສານງານໃນການໂຈມຕີ 4 ມື້ຢູ່ນະຄອນມູມບາຍ ຊຶ່ງເປັນສູນກາງທາງດ້ານການເງິນຂອງປະເທດອິນເດຍ ເມື່ອເດືອນພະຈິກປີ 2008. ການໂຈມຕີດັ່ງກ່າວເຮັດໃຫ້ມີຜູ້ເສຍຊີວິດ 166 ຄົນ ຊຶ່ງມີຊາວອາເມຣິກັນ ຊາວການາດາ ແລະຊາວຢູໂຣບຈຳນວນນຶ່ງຮວມຢູ່ໃນນັ້ນ.
ບໍ່ດົນຫຼັງຈາກນັ້ນ ສະພາຄວາມໝັ້ນຄົງອົງການສະຫະປະຊາຊາດ ກໍໄດ້ປະກາດລົງໂທດທັງທ້າວຊາອີດ ແລະກຸ່ມຂອງລາວ. ນອກນັ້ນແລ້ວ ລາວຍັງມີຊື່ຢູ່ໃນບັນຊີດຳ ທີ່ລະບຸຊື່ວ່າເປັນຜູ້ກໍ່ການຮ້າຍຂອງໂລກ ໂດຍສະຫະລັດ ຊຶ່ງໄດ້ໃຫ້ຄ່າຫົວລາວ 10 ລ້ານໂດລາ ສຳລັບການຈັບກຸມໃນປີ 2012. ພ້ອມດຽວກັນນັ້ນ ອິນເດຍກໍຕ້ອງການໂຕ ທ້າວຊາວຊາອີດ ທີ່ຖືກກ່າວຫາວ່າ ມີບົດບາດໃນການໂຈມຕີດັ່ງກ່າວ.
ປາກິສຖານໄດ້ອອກປະກາດຫ້າມກຸ່ມລາສກາ-ອີ-ຕາຍຢີບາ ແຕ່ບໍ່ດົນຫຼັງຈາກນັ້ນກຸ່ມຕັ້ງກ່າວກໍມີຊື່ໃໝ່ວ່າ ຈາມາອາດ ອູດ ດາວາ ຫຼື JuD ຊຶ່ງຕໍ່ມາກໍໄດ້ຖືກຫ້າມໂດຍອົງການສະຫະປະຊາຊາດແລະສະຫະລັດ.
