ເຈົ້າໜ້າທີ່ໃນແຂວງຮູເບ ທາງພາກກາງຂອງຈີນ ກ່າວວ່າ ມີ 234 ຄົນໄດ້ເສຍຊີວິດຕື່ມອີກ ຍ້ອນໄວຣັສໂຄໂຣນາ ທີ່ເຮັດໃຫ້ມີຄົນຕາຍໄປແລ້ວ 1,300 ກວ່າຄົນນັບແຕ່ເດືອນທັນວາເປັນຕົ້ນມາ.
ການປະກາດກ່ຽວກັບໂຕເລກຜູ້ເສຍຊີວິດໃໝ່ ມີຂຶ້ນຫຼັງຈາກທາງການຈີນກ່າວໃນວັນພຸດວານນີ້ວ່າ ຈຳນວນຜູ້ເສຍຊີວິດໄດ້ຫຼຸດລົງເປັນມື້ທີສອງລຽນຕິດ. ເຈົ້າໜ້າທີ່ສາທາລະນະສຸກໃນແຂວງຮູເບ ຊຶ່ງເປັນຈຸດສູນກາງໃນການລະບາດມາໄດ້ 2 ເດືອນແລ້ວນັ້ນກ່າວວ່າ ເຂົາເຈົ້າໄດ້ປ່ຽນວິທີນັບຜູ້ຕິດເຊື້ອຈາກການກວດຢູ່ຫ້ອງ ແລັບ ມາເປັນການໃຊ້ຄອມພິວເຕີ້ສະແກນ. ການປ່ຽນວິທີນັບນີ້ ຍັງໄດ້ເຮັດຈຳນວນກໍລະນີຜູ້ຕິດເຊື້ອທັງໝົດທີ່ໄດ້ຮັບການຢືນຢັນແລ້ວໃນແຂວງຮູເບເພີ້ມຂຶ້ນເປັນເກືອບ 15,000 ຄົນ.
ທ່ານເທໂດຣສ ເກເບຣເຢຊຸດ ຫົວໜ້າອົງການອະນາໄມໂລກ ໄດ້ກ່າວຊົມເຊີຍກ່ຽວກັບການແຜ່ລະບາດທີ່ຊັກຊ້າລົງດ້ວຍຄວາມລະມັດລະວັງ ໃນວັນພຸດວານນີ້ ໂດຍກ່າວວ່າ ການແຜ່ລະບາດ “ຍັງສາມາດທີ່ຈະດຳເນີນໄປໃນທິດທາງໃດກໍໄດ້.”
ການລະບາດດັ່ງກ່າວໄດ້ພາໃຫ້ມີການປົດທ່ານຈຽງ ຈາວຫຼຽງ ຫົວໜ້າພັກຄອມມູນິສໃນແຂວງຮູເບ ບໍ່ເທົ່າໃດມື້ ຫຼັງຈາກເຈົ້າໜ້າທີ່ສາທາລະນະສຸກອະວຸໂສສອງທ່ານໄດ້ຖືກປົດອອກຈາກຕຳແໜ່ງ. ອົງການຂ່າວຊິນຫົວຂອງທາງການຈີນລາຍງານວ່າ ອະດີດເຈົ້າຄອງນະຄອນຊຽງໄຮ້ ທ່ານຢິງ ຢົງ (Ying Yong) ຈະເຂົ້າຮັບໜ້າທີ່ແທນທ່ານຈຽງ ຜູ້ທີ່ໄດ້ຖືກຕ້ອງຕິໂດຍປະຊາຊົນຕໍ່ການຮັບມືກັບການລະບາດຂອງເຊື້ອໄວຣັສ COVID-19.
ເປັນທີ່ເຊື່ອກັນວ່າ ເຊື້ອໄວຣັສດັ່ງກ່າວໄດ້ປາກົດໂຕໃນທ້າຍປີກາຍນີ້ ຢູ່ຕະຫຼາດອາຫານທະເລແຫ່ງນຶ່ງໃນເມືອງວູຮານ ທີ່ລັກຂາຍສັດປ່າແບບຜິດກົດໝາຍ.
ນອກນັ້ນແລ້ວ ໃນວັນພະຫັດມື້ນີ້ ຍັງມີອີກ 44 ຄົນ ເທິງກຳປັ່ນສຳລານທີ່ຈອດຢູ່ນອກແຄມຝັ່ງທະເລຍີ່ປຸ່ນ ຖືກກວດພົບວ່າຕິດເຊື້ອໄວຣັສດັ່ງກ່າວ ເຮັດໃຫ້ຈຳນວນກໍລະນີ ທີ່ໄດ້ຮັບການຢືນຢັນທັງໝົດ ເພີ້ມຂຶ້ນເປັນ 218 ຄົນ. ກຳປັ່ນສຳລານ Diamond Princess ໄດ້ຖືກບໍລິເວນມາແຕ່ອາທິດແລ້ວຫຼັງຈາກມີການເປີດເຜີຍໂດຍຜູ້ໂດຍສານຄົນນຶ່ງທີ່ລົງຈາກກຳປັ່ນຢູ່ຮົງກົງ ກວດພົບວ່າຕິດເຊື້ອໄວຣັສ COVID-19. ຜູ້ໂດຍສານທັງໝົດໄດ້ຖືກກັກໃຫ້ຢູ່ໃນບ່ອນພັກຂອງເຂົາ
ເຈົ້າແລະຈະບໍ່ໄດ້ຮັບອະນຸຍາດໃຫ້ອອກຈາກກຳປັ່ນ ຈົນເທົ່າວັນທີ 19 ເດືອນນີ້.
ໃນຂະນະດຽວກັນ ກຳປັ່ນສຳລານອີກລຳນຶ່ງ ຊື່ Westerdam ໃນທີ່ສຸດກໍໄດ້ໄປຖິ້ມສະໝໍຈອດຢູ່ນອກແຄມຝັ່ງຂອງກຳປູເຈຍໃນວັນພະຫັດມື້ນີ້ ຫຼັງຈາກໄດ້ແລ່ນຢູ່ກາງທະເລມາໄດ້ເກືອບ 2 ອາທິດ. ກຳປັ່ນລຳນີ້ໄດ້ຖືກປະຕິເສດບໍ່ໃຫ້ເຂົ້າຈອດຢູ່ຍີປຸ່ນ ປະເທດໄທ ໄຕ້ຫວັນ ຟີລິບປິນ ຕະຫລອດທັງເກາະກວາມ ຍ້ອນມີຄວາມຢ້ານກົວວ່າກຳປັ່ນທີ່ບັນທຸກຜູ້ໂດຍສານແລະລູກເຮືອ 2,200 ຄົນນັ້ນອາດຕິດເຊື້ອໄວຣັສ. ພວກທ່ານໝໍຈຸນຶ່ງຈະຂຶ້ນໄປເທິງກຳປັ່ນເພື່ອກວດເບິ່ງ ຜູ້ໂດຍສານ 1,455 ຄົນ ພ້ອມດ້ວຍພະນັກງານຂອງເຮືອ 802 ຄົນ ກ່ອນທີ່ພວກເຂົາເຈົ້າຈະໄດ້ຮັບອະນຸຍາດໃຫ້ອອກຈາກກຳປັ່ນໄປໄດ້.
