ປະທານາທິບໍດີສະຫະລັດ ທ່ານດໍໂນລ ທຣຳ ໄດ້ເລີ້ມຕົ້ນໃໝ່ກ່ຽວກັບອົງການສືບລັບທີ່ສຳຄັນຂອງປະເທດ.
ປະທານາທິບໍດີທຣຳ ໄດ້ຮັບເອົາການລາອອກຂອງຮອງຜູ້ອຳນວຍການອົງການສືບລັບແຫ່ງຊາດ ທ່ານນາງຊູ ກໍດັອນ (Sue Gordon) ໃນຕອນແລງວັນພະຫັດວານນີ້ ບໍ່ຮອດສອງອາທິດຫຼັງຈາກການປະກາດຂອງທ່ານແດນ ໂຄຕສ໌ ຜູ້ອຳນວຍການອົງການດັ່ງກ່າວ ຈະລາອອກເຊັ່ນດຽວກັນ.
ປະທານາທິບໍດີຂຽນລົງໃນທວີດເຕີ້ວ່າ “ທ່ານນາງຊູ ກໍດັອນ ເປັນມືອາຊີບທີ່ຍິ່ງໃຫຍ່ ມີອາຊີບມາເປັນເວລາຍາວນານ ແລະກໍມີຊື່ສຽງ” ແລະທ່ານກ່າວຕື່ມວ່າ “ຂໍສະແດງຄວາມເຄົາລົບຕໍ່ທ່ານນາງເປັນຢ່າງຍິ່ງ.”
ບໍ່ຮອດນຶ່ງຊົ່ວໂມງຕໍ່ມາ ທ່ານທຣຳ ກໍໄດ້ຂຽນຂໍ້ຄວາມລົງໃນທວີດເຕີ້ ກ່ຽວກັບທ່ານໂຈເຊັຟ ແມັກກວຍເອີ (Joseph Maguire) ພົນເຮືອເອກເບ້ຍບຳນານຊຶ່ງຮັບໜ້າທີ່ເປັນຜູ້ອຳນວຍການສູນກາງຕໍ່ຕ້ານພວກກໍ່ການຮ້າຍແຫ່ງຊາດຂອງສະຫະລັດໃນເວລານີ້ ຈະເຂົ້າຮັບໜ້າທີ່ ເປັນຜູ້ຮັກສາການອົງການສືບລັບແຫ່ງຊາດໃນວັນທີ 15 ສິງຫາ ຊຶ່ງເປັນມື້ທີ່ການລາອອກຂອງທ່ານໂຄຕສ໌ແລະທ່ານນາງກໍດັອນ ເລີ້ມມີຜົນນັ້ນ.
ທ່ານທຣຳ ເປັນຜູ້ພາໃຫ້ມີການຄາດເດົາກ່ຽວກັບການລາອອກຂອງທ່ານນາງກໍດັອນ ເຈົ້າໜ້າອະວຸໂສໃນປະຊາຄົມສືບລັບ ມາເປັນເວລາ 30 ປີ ເວລາທ່ານ
ຂຽນຂໍ້ຄວາມລົງໃນທວີດເຕີ້ ທ່ານມີແຜນທີ່ຈະແຕ່ງຕັ້ງຜູ້ອຳນວຍການຊົ່ວຄາວຫຼັງຈາກທ່ານໂຄຕສ໌ລາອອກໃນເດືອນແລ້ວນີ້.
ອີງຕາມກົດໝາຍຂອງສະຫະລັດແລ້ວ ໃນຂະນະທີ່ບໍ່ມີຜູ້ອຳນວຍການອົງການສືບລັບແຫ່ງຊາດນັ້ນ ຮອງຜູ້ອຳນວຍການ ຂອງອົງການດັ່ງກ່າວ ກໍຄວນທີ່ຈະເປັນຜູ້ຮັກສາການແທນ.
ເມື່ອມີການຖາມໃນຕົ້ນເດືອນນີ້ ກ່ຽວກັບຄວາມລັງເລໃຈຂອງທ່ານ ທີ່ຈະອະນຸຍາດໃຫ້ທ່ານນາງກໍດັອນ ຮັບໜ້າທີ່ເປັນຜູ້ອຳນວຍການຊົ່ວຄາວນັ້ນ ທ່ານທຣຳຕອບພວກນັກຂ່າວວ່າ “ຂ້າພະເຈົ້າມັກທ່ານນາງຊູ ກໍດັອນ.”
ທ່ານກ່າວຕື່ມວ່າ “ທ່ານນາງຢູ່ທີ່ນັ້ນໃນເວລານີ້ ແລະແນ່ນອນທ່ານນາງຈະຖືກພິຈາລະນາໃນການເປັນຜູ້ຮັກສາການ ນັ້ນອາດຈະເກີດຂຶ້ນໄດ້.”
ບໍ່ຄືກັນກັບທ່ານໂຄຕສ໌ ຜູ້ອຳນວຍການທີ່ກຳລັງຈະພົ້ນຈາກຕຳແໜ່ງ ຊຶ່ງໄດ້ປະທະຄາລົມກັບທ່ານທຣຳຢ່າງເປັນການເປີດເຜີຍ ໃນຫຼາຍໆໂອກາດ ທ່ານນາງກໍດັອນ ມັກຈະຫຼີກລ່ຽງ ໃນການຖົກຖຽງກັນຢ່າງເປັນການເປີດເຜີຍ.
